នៅរសៀលថ្ងៃទី១៨ ខែមិថុនានេះ មានលោកបូជាចារ្យកាតូលិក សួន ហង្សលី តំណាងពេញសិទ្ធិ លោកអូលីវីយ៉េ ជ្មិតហស្លេ អភិបាល ព្រះសហគមន៍កាតូលិកភូមិភាគភ្នំពេញ បានជូនម៉ាសចំនួន២ម៉ឺនម៉ាសដល់គណៈដឹកនាំជាន់ខ្ពស់នៃសាសនាឥស្លាមកម្ពុជា ដែលទទួលដោយលោកសឹម ម៉ាត់ទោត តំណាងឲ្យលោកឧញ៉ាសុះកំរ៉ី ជាគណៈដឹកនាំ។
ក្នុងពិធីប្រគល់ម៉ាស់នេះ លោកបូជាចារ្យកាតូលិក សួន ហង្សលី បានអានលិខិតរបស់លោកអភិបាលអូលីវីយ៉េ ផ្ញើជូនលោកឧញ៉ា សុះកំរ៉ី អំពីកិច្ចការមួយចំនួនដែលព្រះសហគមន៍កាតូលិកបាន និងកំពុងធ្វើក្នុងអំឡុងពេលនៃការរាលដាលនៃជំងឺកូវីដ១៩ក្នុងប្រទេសកម្ពុជា។ លោក បន្តថា ក្នុងពេលនេះ កាតូលិកកម្ពុជាភូមិភាគភ្នំពេញ មានសេចក្តីសោមនស្សរីករាយសូមផ្តល់ជូននូវម៉ាសចំនួន ២ម៉ឺនម៉ាស ដល់ លោកឧកញ៉ា នៃដឹកនាំជាន់ខ្ពស់នៃសាសនាឥស្លាមកម្ពុជា ដើម្បីប្រើប្រាស់ និងចែកជូនបងប្អូនប្រជាពលរដ្ឋតាមសេចក្តីត្រូវការ ក្នុងការពារ និងប្រយុទ្ធប្រឆាំនឹងការឆ្លងរីករាលដាល់នៃមេរោគឆ្លងកូវីដ១៩។
ក្នុងឱកាសនោះដែរ លោកសឹម ម៉ាត់ទោត បានមានប្រសាសន៍ថ្លែងអំណរគុណយ៉ាងខ្លាំងចំពោះព្រះសហគមន៍កាតូលិក ដែលតែងតែយកចិត្តទុកដាក់ និងបង្ហាញនូវសាមគ្គីភាព ចំពោះ បងប្អូនសាសនាឥស្លាមនៅកម្ពុជា។ លោកបន្តថា នេះជាលើកទី២ហើយដែលព្រះសហគមន៍កាតូលិក បានយកសម្ភារបរិក្ខាដើម្បីទប់ទល់នឹងកូវីដ១៩ ជូនដល់គណៈដឹកនាំជាន់ខ្ពស់នៃសាសនាឥស្លាមកម្ពុជា ដែលលើកទី១ គឺមានម៉ាសនិងអាកុល។
សូមជំរាបថា ព្រះសហគមន៍កាតូលិកភូមិភាគភ្នំពេញ ដឹកនាំដោយលោកអភិបាលអូលីវីយ៉េ បានយកចិត្តទុក ដាក់យ៉ាងខ្លាំង ក្នុងការចូលរួមប្រយុទ្ធប្រឆាំង នឹងមេរោគឆ្លងកូវីដ១៩។ ជាពិសេស យកចិត្តទុកដាក់ ចំពោះបងប្អូនដែលងាយរងគ្រោះ និងរងផលប៉ះពាល់យ៉ាងខ្លាំង ពីកូវីដ១៩ ដូចជាការចែកស្បៀង និងម្ហូបអាហារ ដល់អ្នកខ្វះខាត និងជនក្រីក្រក្នុងតំបន់បិទខ្ទប់ជាដើមចំនួនជាង១០០០ គ្រូសារ ក៏ដូចជាការប្រគល់ម៉ាសជូន ក្រសួងមន្ទីរ និងអាជ្ញាធរមូលដ្ឋានផងដែរ។ ក្នុងពេលតែមួយព្រះសហគមន៍កាតូលិកភូមិភាគភ្នំពេញក៏បានបន្តកិច្ចខិតខំប្រឹងប្រែងកសាងសន្តិភាព និងសុខដុមរមនាកម្មសាសនា ដោយថ្វាយ ប្រគេន និងជូនម៉ាសដើម្បីការពារមេរោគឆ្លងកូវីដ១៩ ដល់សម្តេចព្រះសង្ឃរាជទំាងពីរគណៈ ប្រគេនដលើព្រះសង្ឃតាមវត្ត និង ប្រគល់ជូន គណៈដឹកនាំជាន់ខ្ពស់នៃសាសនាឥស្លាមកម្ពុជានាពេលនេះ ៕
