កុមារចំនួន៣៥នាក់ដែលមានអាយុចន្លោះពី៥ដល់១៤ឆ្នាំ នៅព្រះវិហារបរិសុទ្ធ ព្រះសហគមន៍សំរោងធំ ក្នុងស្រុកកៀនស្វាយ ខេតតកណ្ដាល ចូលរួមទិវាសិទ្ធិកុមារអន្តរជាតិ នាព្រឹកថ្ងៃទី២៧ មិថុនា ២០២១។ កុមារដែលចូលរួមក្នុងកម្មវិធីនេះ ទទួលបានការអប់រំ និងលើកទឹកចិត្តកុមារ ឱ្យស្គាល់អំពីសិទ្ធិដែលអាទិភាពរបស់ខ្លួន ព្រមទាំងរៀនពីរបៀបសម្របខ្លួនក្នុងរស់នៅក្នុងសម័យកូវីដ១៩នេះ។

កញ្ញា គុំ ធីតា មេកាយឫទ្ធិ និងជាគ្រូមត្តេយ្យនៅព្រះសហគមន៍សំរោងធំបានឱ្យដឹងថា កម្មវិធីនេះយើងពន្យល់ពីអត្ថន័យនៃសិទ្ធិទាំង៤ឱ្យកុមារយល់ច្បាស់ និងអនុវត្តផ្ទាល់ខ្លួនមានដូចជា៖ សិទ្ធិរស់រានមានជីវិតដែលមានជម្រក និងអាហារ សិទ្ធិទទួលបានការថែទាំនិងព្យាបាល សិទ្ធទទួលបានការសិក្សាអប់រំ និងសិទ្ធក្នុងការកម្សាន្តរីករាយ។ 

អ្នកគ្រូ ធីតាបន្ថែមថា ក្រៅពីសិទ្ធិទាំងនេះ យើងក៏ណែនាំក្មេងៗឱ្យយល់ពីការណែនាំរបស់ព្រះសហគមន៍តាមរយៈសារលោកអភិបាលអូលីវីយ៉េ ដោយផ្ដោតលើចំណុចសំខាន់ៗមាន៖ ៣ការពារមានពាក់ម៉ាស់ លាងដៃនិងរក្សាគម្លាត។ ៣កុំមាន៖ កុំចូលទៅកន្លែងបិទជិតគ្មានខ្យល់ចេញចូល កុំទៅកន្លែងមនុស្សច្រើន កុំប៉ះពាល់គ្នាដោយចាប់ដៃ ឬឱបគ្នា។ ព្រមទាំង៣ថែរក្សា ដោយមានទំនួសលខុសត្រូវ សាមគ្គីភាព និងការអធិដ្ឋាន។ 

អ្នកគ្រូធីតាបន្តថា «ដោយបញ្ហាកូវីដ១៩ យើងមិនអាចជុំគ្នាចំនួនច្រើនដូចមុន ហើយរយៈពេលក៏ខ្លីក្នុងការអប់រំ។ ខ្ញុំយល់ឃើញថា នៅក្នុងសម័យកូវីដ១៩នេះ កូនក្មេងនៅផ្ទះច្រើន មិនសូវទទួលបានការអប់រំដូចមុនទេ ដូច្នេះកម្មវិធីនេះពិតជាមានប្រយោជន៍ក្នុងការជួយដល់ក្មេងៗឱ្យទទួលបានការអប់រំខ្លះៗ ហើយក៏មានប្រយោជន៍ក្នុងព្រះសហគមន៍ដោយសង្ឃឹមថាអាចជួយក្មេងតាមរយៈកម្មវិធីដែលយើងអាចធ្វើបាន និងបត់បែនតាមកាលៈទេសៈ»។

ទិវាសិទ្ធិកុមារនេះ រៀបចំឡើងស្របតាមការណែនាំរបស់លោកអភិបាលព្រះសហគមន៍កាតូលិក ភូមិភាគភ្នំពេញ អូលីវីយ៉េ ជ្មីតហស្លេ និងដោយមានការជំរុញ និងគាំទ្រដោយការិយាល័យយុវជន ជំទង់ និងកុមារនៃព្រះសហគមន៍កាតូលិកភូមិភាគភ្នំពេញមានរយៈពេល៤សប្ដាហ៍ ដោយគិតចាប់ពីដើមខែរហូតដល់ចុងខែមិថុនា តាមរយៈមេកាយឫទ្ធិនឹងទៅអប់រំកុមារកាយឫទ្ធិតាមផ្ទះជារៀងរាល់ថ្ងៃ ដើម្បីលើកទឹកចិត្តកុមារ ក៏ដូចជានៅតាមព្រះសហគមន៍នីមួយៗ ព្រមទាំងចែកកញ្ចប់អនុស្សាវរីយ៍ដល់កុមារផងដែរ ប៉ុន្តែអនុវត្តតាមវិធានសុខាភិបាល។ 

លោកស៊ាន់ សារឿន ប្រធានការិយាល័យយុវជន ជំទង់ និងកុមារ ធ្លាប់ឱ្យដឹងថា ឆ្នាំនេះការិយាល័យយើងបានរៀបចំយុទ្ធនាការសិទ្ធិកុមារ ដោយមានសម្ភារៈអប់រំដល់កុមារឱ្យមានការយល់ដឹងពីសិទ្ធិ និងសេរីភាពរបស់ក្នុងសង្គម។ ជាពិសេសចង់បង្ហាញពីការយកចិត្តទុកដាក់ពីព្រះសហគមន៍កាតូលិកភូមិភាគភ្នំពេញចំពោះកុមារ។ 

លោកសារឿនបានឱ្យដឹងទៀតថា អ្វីដែលសំខាន់ជាងនេះគឺចង់បញ្ជ្រាបកុមារ ឱ្យយល់ដឹងអំពីការអប់រំរបស់លោកអភិបាលអូលីវីយ៉េ នៅក្នុងបរិបទកូវីដ១៩នេះដោយផ្ដោតសំខាន់លើ៣ថែរក្សាគឺ៖ ការទទួលខុសត្រូវ សាមគ្គីភាព និងអធិដ្ឋាន។ លោកសារឿងបន្ថែមថា គោលបំណងរបស់យើងជារៀងរាល់ឆ្នាំ គឺធ្វើឡើងដើម្បីធ្វើយ៉ាងណាជួយឱ្យកុមារយល់ពីតម្លៃ និងសិទ្ធិធំៗរបស់ពួកគាត់ទាំង៤ច្បាស់ ព្រមទាំងឱ្យកុមារទទួលបានអំណរសប្បាយតាមរយៈការបង្កើតកម្មវិធីរបស់យើង៕