កាលពិថ្ងៃទី១ ខែកក្កដា ឆ្នាំ២០២១ លោកអភិបាល អូលីវីយ៉េ អភិបាលព្រះសហគមន៍កាតូលិក ភូមិភាគភ្នំពេញ អញ្ជើញទៅសួរសុខទុក្ខនិងចែកគ្រឿងឧបភោគបរិភោគ ព្រមទាំងថវិការមួយចំនួន ជូនបងប្អូនប្រជាពលរដ្ឋចំនួន ១០០គ្រួសារ ដែលបានរុះរើ ផ្ទះបណ្តែតទឹកចេញពីដងទន្លេបាសាក់ ស្ថិតក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
លោកអភិបាល បានលើកទឹកចិត្តបងប្អូនឲ្យមានការតស៊ូ ក្នុងជីវិតកុំអស់សង្ឃឹម។ ជាពិសេសក្នុងបរិបទនៃការឆ្លងរីករាលដាលនៃជំងឺកូវីដ១៩ ត្រូវតែថែរក្សា អនាម័យជានិច្ច និងរស់នៅរក្សាគម្លាតផងដែរ។ លោកថា “ត្រូវគោរពវិធានរបស់ក្រសួងសុខាភិបាលជានិច្ច ៣ការពារ និង ៣កុំ”។ ជាមួយគ្នានេះដែរ លោកអភិបាលបានរំលឹកបងប្អូនថា «ត្រូវយកចិត្តទុកដាក់រស់នៅដោយគោរព ច្បាប់របស់ប្រទេសកម្ពុជាជានិច្ចផងដែរ» ។
ដូនជី ដួង ខន្តី នៃក្រុមគ្រួសារបងស្រីឧបការគុណនាទីក្រុងភ្នំពេញ បានអញ្ជើញទៅសួរសុខទុក្ខដល់គ្រួសារដែលមានផ្ទះបណ្តែតលើទឹកទាំងនោះ កាលពីប៉ុន្មានសប្តាហ៍មុន។ ដូនជីរូបនេះ បានឲ្យដឹងថា ប្រជាជននៅទីនេះ ភាគច្រើនពួកគាត់គ្មានកន្លែងស្នាក់អាស្រ័យទេ គឺត្រូវជួលផ្ទះគេ ឬរស់នៅលើដីដែលសុំគេបណ្តោះអាសន្ន។
ដូនជីបន្ថែមថា «នៅទីនេះ ភាគច្រើនគ្រួសារវៀតណាម និងមានបងប្អូនខ្មែរតិចតួច ដែលគ្មានដីនៅលើគោកទេ។ ពួកគាត់នេសាទត្រី»។
ក្រោយពីរុះរើ គ្រួសារទាំងនោះជួបការលំបាកខ្លាំង ដោយត្រូវផ្លាស់ប្តូររបៀបរស់នៅថ្មី និងសម្របខ្លួនទៅក្នុងបរិយាកាសលើដីគោក ជាពិសេសគឺមុខរបរចិញ្ចឹមជីវិត។ «អ្នកខ្លះគាត់រើសអេតចាយ អ្នកខ្លះទៀតលាងចានឲ្យគេ អ្នកខ្លះទៀតអត់ដឹងរកអី» ដូនជីបន្ថែម។
កន្លងមកក្រុមដូនជីបានផ្តល់នូវគ្រឿងឧបភោគបរិភោគដល់គ្រួសារខ្វះខាតខ្លាំងមួយចំនួន ហើយនៅថ្ងៃនេះ បានស្នើសុំលោកអភិបាលអូលីវីយ៉េ អភិបាលនៃព្រះសហគមន៍ភូមិភាគភ្នំពេញ នូវសម្ភារមួយចំនួន ដើម្បីជូនដល់គ្រួសារទាំង១០០ គ្រួសារ។
គ្រឿងឧបភោគទាំងនោះរួមមាន មីមួយកេះ ត្រីខកំប៉ុង ម៉ាស់មួយប្រអប់ អង្ករ១០គីឡូក្រាម ដើម្បីជួយសម្រួលដល់ជីវភាពរបស់ពួកគាត់មួយរយៈពេលខ្លី។ ក្នុងនោះដែរ លោកអភិបាលបានប្រគល់ប្រាក់ចំនួន១៤ម៉ឺនរៀល ដល់គ្រួសារនីមួយៗ។
តាមប្រសាសន៍របស់ដូនជីខន្តី ឲ្យដឹងទៀតថា គាត់មានគម្រោងបន្តជួយដល់អ្នកខ្វះខាតខ្លាំង ឲ្យមានទីជម្រកសមរម្យ និងជួយរកមុខរបរដើម្បីឲ្យពួកគាត់អាចមានជីវិតល្អប្រសើរបាន។
សូមជំរាបថា កាលពីថ្ងៃទី២ ខែមិថុនា ឆ្នាំ២០២១ សាលារាជធានីភ្នំពេញបានឲ្យម្ចាស់ ផ្ទះបណ្តែតទឹក ផ្ទះទូកតូចៗ បែត្រីបណ្តែតទឹក និងសំណង់មិនរៀបរយនៅលើផ្ទៃទន្លេ ក្នុងភូមិសាស្ត្ររាជធានីភ្នំពេញ រុះរើចេញ ដោយបានទុកពេល១សប្តាហ៍ ក្នុងការរុះរើ និងបានបញ្ជាក់ថា ការតាំងទីលំនៅទាំងនេះ គឺខុសនឹងច្បាប់របស់កម្ពុជា ដែលធ្វើឲ្យប៉ះពាល់ដល់ប្រព័ន្ធអេកូឡូហ្ស៊ី មានចរន្តទឹកហូរ គោករាក់ ពិសេសការប្រើប្រាស់ចំណីត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្ល ដែលធ្វើឲ្យខូចខាតធ្ងន់ធ្ងរដល់ជីវៈចម្រុះនៅក្នុងទឹក ខូចគុណភាពទឹក បំពុលបរិស្ថាន និងប៉ះពាល់ដល់សោភណ្ឌភាពរាជធានីភ្នំពេញ និងប៉ះពាល់ដល់សុខភាពប្រជាជនដែលប្រើប្រាស់ទឹកមិនស្អាត។
ជាមួយគ្នានេះដែរ រដ្ឋបាលរាជធានី ក៏បានឲ្យដឹងទៀតថា អ្នកដែលរឹងទទឹងមិនព្រមរុះរើ នឹងត្រូវកសាងសំណុំរឿងបញ្ជូនទៅតុលាការតាមផ្លូវច្បាប់៕
ដោយ លី សុវណ្ណា
