បងប្អូនទាំងអស់ដែលបានភ្ជាប់ជាមួយយើងនៅក្នុងអភិបូជានេះ យើងកំពុងស្តាប់ព្រះបន្ទូលរបស់ព្រះយេស៊ូ។ ថ្ងៃនេះ ព្រះបន្ទូលរបស់ព្រះយេស៊ូ ទោះបីមានបងប្អូនខ្លះកំពុងព្យាបាលជំងឺកូវីដ-១៩ ទោះបីមានខ្លះកំពុងធ្វើចត្តាឡីស័ក ប៉ុន្តែជាព្រះបន្ទូលសម្រាប់យើងរៀងៗខ្លួន។ “ព្រះយេស៊ូត្រាស់ហៅសាវ័កទាំង១២នាក់មក រួចទ្រង់ចាត់គេពីរៗនាក់ឱ្យទៅទាំងប្រទានអំណាចដើម្បីដេញខ្មោចផង”។ បងប្អូនជាទីស្រឡាញ់ យើងជាសាវ័កដែលព្រះយេស៊ូបានជ្រើសរើស ព្រះយេស៊ូត្រាស់ហៅយើងដើម្បីឱ្យយើងទៅប្រកាសដំណឹងល្អ។ ឥតមានកាលៈទេសៈណាមួយ ឥតមានស្ថានភាពណាមួយ ឥតមានបរិយាកាសណាមួយ ដែលណែនាំឱ្យយើងឥតមានសមត្ថភាពដើម្បីប្រកាសដំណឹងល្អ។
សប្តាហ៍មុន យើងបានឃើញព្រះយេស៊ូណែនាំឱ្យយើងធ្វើតាមព្រះយេស៊ូ មានន័យថាធ្វើដូចព្រះយេស៊ូចេញពីភូមិមួយទៅភូមិមួយ។ ថ្ងៃនេះ គឺព្រះយេស៊ូដែលបានចាត់យើងឱ្យយើងទៅប្រកាសដំណឹងល្អ ពិតមែនយើងមិនអាចចេញពីភូមិមួយទៅភូមិមួយ។ ប៉ុន្តែ សព្វថ្ងៃតាមស្ថានភាពរបស់យើង តាមកន្លែងដែលយើងនៅ តាមកម្លាំងកាយកម្លាំងចិត្តដែលយើងមាន យើងដឹងថាយើងបានទទួលបេសកកម្មមួយយ៉ាងពិសេស គឺប្រកាសដំណឹងល្អតាមរបៀបព្រះយេស៊ូ។ ប្រហែលយើងអាចនិយាយថា ខ្ញុំឥតមានសមត្ថភាព ខ្ញុំឥតមានកម្លាំងកាយកម្លាំងចិត្ត ខ្ញុំកំពុងភ័យខ្លាច ខ្ញុំជាមនុស្សតូចតាច ខ្ញុំជាមនុស្សដែលគ្មានចំណេះដឹង។
បងប្អូនជាទីស្រឡាញ់ យើងបានស្តាប់អត្ថបទទី១នៅពេលព្រះជាម្ចាស់បានជ្រើសរើស អរមូស គឺព្រះជាម្ចាស់បានជ្រើសអរមូសពីក្រោយហ្វូងគោ។ ព្រះអង្គមានព្រះបន្ទូលទៅគាត់ថា “ចូរទៅថ្លែងពាក្យក្នុងនាមខ្ញុំ ប្រាប់អ៊ីស្រាអែលជាប្រជារាស្ត្ររបស់យើង”។ តាមពិត ព្រះជាម្ចាស់បានជ្រើសរើសមនុស្សតូចតាចម្នាក់ដែលគ្មានអ្វីអស្ចារ្យ ជាកសិករ ជាអ្នកគង្វាល ប៉ុន្តែព្រះជាម្ចាស់បានជ្រើសរើសគាត់ដើម្បីប្រកាសដំណឹងល្អ។ យើងដឹងថា យើងជាគ្រីស្តបរិស័ទដែលបានទទួលព្រះវិញ្ញាណដ៏វិសុទ្ធ យើងជាគ្រីស្តបរិស័ទដែលបានទទួលសញ្ញាសម្គាល់ពីព្រះវិញ្ញាណដ៏វិសុទ្ធ ដើម្បីឱ្យយើងទៅប្រកាសដំណឹងល្អ។ យើងបានស្តាប់អត្ថបទទី២ “នៅក្នុងអង្គព្រះគ្រីស្តបងប្អូនក៏បានជឿសង្ឃឹមលើព្រះអង្គ ហើយបានទទួលសញ្ញាសម្គាល់ពីព្រះវិញ្ញាណដ៏វិសុទ្ធតាមព្រះបន្ទូលសន្យា ព្រះជាម្ចាស់ប្រទានព្រះវិញ្ញាណមកចិញ្ចឹមចិត្តយើង ដោយដឹងថាយើងនឹងទទួលមរតកនៅពេលព្រះអង្គលោះប្រជារាស្ត្ររបស់ព្រះអង្គឱ្យបានសម្រេច ដើម្បីឱ្យយើងកោតសរសើរសិរីរុងរឿងរបស់ព្រះជាម្ចាស់” យើងបានទទួលព្រះវិញ្ញាណដ៏វិសុទ្ធ។
សប្តាហ៍មុន ខ្ញុំបាននិយាយអំពីព្រះអំណោយទានដែលយើងបានទទួលនៅក្នុងព្រះវិញ្ញាណដ៏វិសុទ្ធ។ ថ្ងៃនេះ ខ្ញុំចង់បញ្ជាក់អំពីផ្លែនៃព្រះវិញ្ញាណដ៏វិសុទ្ធនៅក្នុងជីវិតរបស់យើង ផ្លែនេះគឺមាន៖
- សេចក្តីស្រឡាញ់
- អំណរ
- សេចក្តីសុខសាន្ត
- ចិត្តអត់ធ្មត់
- ចិត្តសន្តោសមេត្តា
- ចិត្តសប្បុរស
- ចិត្តស្លូតបូត
- ចេះយោគយល់
- ភក្តីភាព
- ចេះបន្ទាបខ្លួនឯង
- ចេះតមការសប្បាយ
- ចេះទប់ចិត្តខ្លួនឯង។
បងប្អូនជាទីស្រឡាញ់ នេះជាផ្លែនៃព្រះវិញ្ញាណដ៏វិសុទ្ធ ផ្លែដែលយើងបានទទួលនៅក្នុងជីវិតរបស់យើង។ សព្វថ្ងៃ ទោះបីយើងពិបាកក៏ដោយនៅក្នុងកូវីដ-១៩ ទោះបីយើងភ័យខ្លាចក៏ដោយយើងដឹងថាផ្លែនេះគឺជាផ្លែដែលភ្ជាប់នឹងខ្លួនយើង។ ឱ្យយើងគិតពិចារណា តើយើងមានសេចក្តីស្រឡាញ់អ្វីខ្លះ? តើយើងមានអំណរអ្វីខ្លះ? តើយើងមានសេចក្តីសុខសាន្តអ្វីខ្លះ? តើយើងមានចិត្តអត់ធ្មត់? តើយើងមានចិត្តសន្តោសមេត្តា? តើយើងមានចិត្តសប្បុរស? តើយើងមានចិត្តស្លូតបូត? តើយើងចេះយោគយល់គ្នា? តើយើងមានភក្តីភាព? តើយើងចេះបន្ទាបខ្លួន? តើយើងចេះទប់ចិត្តខ្លួនឯង? នេះជាផ្លែដែលយើងមាននៅក្នុងជីវិតរបស់យើង លុះត្រាតែយើងជាប់ជាមួយព្រះជាម្ចាស់ដែលបានត្រាស់ហៅយើង ដែលស្រឡាញ់យើង។
នៅក្នុងផ្លែនេះ យើងអាចរកឃើញកម្លាំងដើម្បីថែរក្សាជីវិតរបស់យើងជាគ្រីស្តបរិស័ទ ជីវិតរបស់យើងជាព្រះសហគមន៍។ ខ្ញុំចង់រំលឹកដល់បងប្អូន យើងជាប្រជារាស្ត្ររបស់ព្រះជាម្ចាស់ដ៏មានជីវិត ដោយសារព្រះជាម្ចាស់ជាព្រះដែលមានព្រះជន្មគង់នៅ។ កុំឱ្យយើងភ្លេច នៅពេលព្រះជាម្ចាស់បានសម្តែងព្រះអង្គដល់លោកមូសេ ព្រះអង្គមានព្រះបន្ទូលថា “ខ្ញុំជាព្រះដែលមានព្រះជន្មគង់នៅ”។ យើងជាបុត្រធីតារបស់ព្រះជាម្ចាស់ដែលមានព្រះជន្មគង់នៅ មានន័យថាយើងជាប្រជារាស្ត្រដែលពោរពេញដោយជីវិត។
ថ្ងៃនេះ ខ្ញុំចង់ជម្រុញដល់ព្រះសហគមន៍គ្រប់ទីកន្លែង សព្វថ្ងៃយើងមានព្រះសហគមន៍មួយចំនួនដែលជាប់ធ្វើចត្តាឡីស័កដោយសារមានកូវីដខ្លះៗ។ យើងមានបព្វជិតបព្វជីតា គ្រីស្តបរិស័ទមួយចំនួនដែលកំពុងធ្វើចត្តាឡីស័ក ដោយសារបានជាប់ដោយផ្ទាល់ ឬប្រយោល។ យើងមានបងប្អូនមួយចំនួនដែលកំពុងភ័យខ្លាច មានខ្លះគាត់រត់ទៅទិញឧបករណ៍តេសបឋម ដើម្បីមើលតើយើងមានជំងឺកូវីដឬអត់? នៅក្នុងស្ថានភាពនេះ ប្រសិនបើយើងមើលអ្វីដែលយើងបានទទួលពីមួយថ្ងៃទៅមួយថ្ងៃនៅក្នុងការផ្សាយព័ត៌មាន។ សព្វថ្ងៃ ព័ត៌មានគេមិនសូវនិយាយអំពីបងប្អូនដែលបានជាសះស្បើយ គឺគេសង្កត់ធ្ងន់ទៅលើអ្នកដែលបានឆ្លងថ្មី និងអ្នកដែលស្លាប់។ ដូច្នេះ ណែនាំឱ្យយើងភ័យថែមទៀត ណែនាំឱ្យយើងអស់សង្ឃឹមថែមទៀត ណែនាំឱ្យយើងគាំង ណែនាំឱ្យយើងស្ទះ។ ប៉ុន្តែ យើងជាប្រជារាស្ត្រពោរពេញដោយជីវិតដែលមកពីព្រះជាម្ចាស់ដែលមានព្រះជន្មគង់នៅ ដូច្នេះយើងមិនអាចស្ទះ យើងមិនអាចគាំង ទោះបីភ័យក៏ដោយ ទោះបីខ្លាចក៏ដោយ យើងដឹងថាព្រះយេស៊ូគង់នៅ។
ដូច្នេះ សំខាន់បំផុតឱ្យយើងថែរក្សា៣កុំ៣ការពារ ឱ្យយើងយកចិត្តទុកដាក់នៅក្នុងជីវិតរបស់យើងពីមួយថ្ងៃទៅមួយថ្ងៃ។ ប៉ុន្តែ ឱ្យយើងយកចិត្តទុកដាក់មួយចំណុចទៀត ដែលសំខាន់បំផុតដើម្បីឱ្យព្រះសហគមន៍យើងមានជីវិត គឺ៖
- យកចិត្តទុកដាក់លើជីវិតខាងផ្លូវវិញ្ញាណ នៅក្នុងការអធិដ្ឋាន នៅក្នុងការចូលអភិបូជាប្រចាំ នៅក្នុងការស្តាប់ព្រះបន្ទូលរបស់ព្រះជាម្ចាស់។ ជាពិសេស សម្រាប់បងប្អូនដែលកំពុងធ្វើចត្តាឡីស័ក ដោយសារយើងមានពេលទំនេរច្រើនណាស់ ដូច្នេះជាពេលវេលាដើម្បីមើល តើខ្ញុំស្រឡាញ់ព្រះជាម្ចាស់ដល់កម្រិតណា? តើខ្ញុំសប្បាយចិត្តអធិដ្ឋានជាមួយព្រះជាម្ចាស់ឬទេ?
- ឱ្យយើងយកចិត្តទុកដាក់នៅគ្រប់ព្រះសហគមន៍អំពីកម្មវិធីអប់រំជំនឿ សប្តាហ៍នេះខ្ញុំនឹងមានប្រជុំពីចម្ងាយ (ZOOM) ជាមួយគ្រូអប់រំជំនឿតាមកម្រិត ដើម្បីឱ្យយើងជម្រុញតាមកន្លែងនីមួយៗឱ្យកម្មវិធីអប់រំជំនឿរបស់យើងទៅមុខ។
- ឱ្យយើងបន្តយកចិត្តទុកដាក់អប់រំណែនាំយុវជនយុវនារី សម្រាប់ខែសីហា ខែកញ្ញា យើងមានគម្រោងការ ទី១ចូលរួមនៅក្នុងការអធិដ្ឋានសម្រាប់សុខសន្តិភាព រួមជាមួយយុវជននៅក្នុងប្រទេសមីយ៉ាន់ម៉ា និងនៅក្នុងទ្វីបអាស៊ីទាំងមូល នៅថ្ងៃទី៧ ខែសីហា ខាងមុខនេះ។ ទី២ យើងកំពុងរៀបចំមហាសន្និបាតយុវជននៅក្នុងភូមិភាគភ្នំពេញ ប្រសិនបើយើងធ្វើផ្ទាល់មិនបានយើងធ្វើពីចម្ងាយ (ZOOM) នៅថ្ងៃទី៩-១២ ខែកញ្ញា ខាងមុខនេះ។ ដូច្នេះ នៅក្នុងខែកក្កដា ខែសីហា ជាមួយក្រុមយុវជន ជាមួយការិយាល័យយុវជន យើងនឹងរៀបចំដើម្បីឱ្យមហាសន្និបាតរបស់យើង នៅក្នុងកាលៈទេសៈណាក៏ដោយអាចកើតឡើងនៅខែកញ្ញា។ ដោយសារ យើងត្រូវតែមានជីវិតតទៅទៀត ដោយសារយើងជាប្រជារាស្ត្ររបស់ព្រះជាម្ចាស់ដែលពោរពេញដោយជីវិត។
- ឱ្យយើងបន្តយកចិត្តទុកដាក់លើកម្មវិធីអប់រំសិក្សា ដើម្បីឱ្យយើងសាលារបស់យើងនីមួយៗបន្តណែនាំអប់រំក្មេងៗដល់ប្រលងឌីប្លមផង ប្រលងបាក់ឌុបផង ឡើងថ្នាក់និងចូលរៀនឆ្នាំសិក្សាថ្មីផង ដោយសង្ឃឹមយើងអាចចូលនៅក្នុងសាលាយើងវិញបាន។
- ឱ្យយើងយកចិត្តទុកដាក់នឹងមេត្តាករុណា មេត្តាករុណាគឺជាអ្វីដែលសំខាន់បំផុត ដើម្បីឱ្យជីវិតរបស់យើងទៅជាជីវិតដែលភ្ជាប់ជាមួយព្រះជាម្ចាស់ ដោយសារព្រះជាម្ចាស់ជាសេចក្តីស្រឡាញ់។ ដូច្នេះ មេត្តាករុណារបស់យើងមិនអាចស្ទះ យើងអាចរកមធ្យោបាយថែមទៀតដើម្បីជាប់ជាមួយបងប្អូនឯទៀតៗ។
សរុបមក ជីវិតខាងផ្លូវវិញ្ញាណ ការអប់រំជំនឿ ការអប់រំណែនាំយុវជន អប់រំសិក្សា និងធម៌មេត្តាករុណា ប្រសិនបើយើងមើលហ្នឹង ណែនាំឱ្យព្រះសហគមន៍របស់យើងនៅមានជីវិត។ ខ្ញុំជឿថាយើងអាចធ្វើបាន លុះត្រាតែយើងអធិដ្ឋាន យើងស្តាប់ព្រះជាម្ចាស់ ជាពិសេសនៅក្នុងទំនុកតម្កើងថ្ងៃនេះ “ព្រះអម្ចាស់ផ្ទាល់ប្រទានមង្គលឱ្យយើងគ្រប់ៗគ្នា ចំណែកផែនដីបង្កើតផល្លាភោគផលផ្លែផ្កាសំបូរមិនខ្វះ”។ នេះជាសេចក្តីពិត ព្រះជាម្ចាស់ប្រទានមង្គលឱ្យយើង បង្កើតផល្លាភោគផលផ្លែផ្កាសំបូរមិនខ្វះ។ នៅក្នុងផ្លែហ្នឹង យើងមានជាពិសេសគឺផ្លែនៃព្រះវិញ្ញាណដ៏វិសុទ្ធដែលមាន សេចក្តីស្រឡាញ់ អំណរ សេចក្តីសុខសាន្ត ចិត្តអត់ធ្មត់ ចិត្តសន្តោសមេត្តា ចិត្តសប្បុរស ចិត្តស្លូតបូត ចេះយោគយល់គ្នា ភក្តីភាព ចេះបន្ទាប់ខ្លួន ចេះទប់ចិត្តខ្លួនឯង។
បងប្អូនជាទីស្រឡាញ់ យើងបន្តអធិដ្ឋានសម្រាប់គ្នាទៅវិញទៅមក ដោយសុំព្រះជាម្ចាស់ប្រទានព្រះពរដល់ព្រះសហគមន៍យើង។ ជាពិសេស ឱ្យយើងទទួលព្រះវិញ្ញាណដ៏វិសុទ្ធដ៏ពេញលក្ខណៈ ដើម្បីឱ្យយើងហ៊ានទៅ ដូចពីដើមលោកអរមូសបានទៅប្រកាសដំណឹងល្អ ដូចពីដើមសាវ័កបានទៅប្រកាសដំណឹងល្អ។ នៅក្នុងបរិយាកាសនេះ យើងទៅដែរដើម្បីប្រកាសដំណឹងល្អ ដោយកែប្រែចិត្តគំនិត ព្រះរាជ្យរបស់ព្រះជាម្ចាស់កំពុងយាងមក ព្រះវិញ្ញាណដ៏វិសុទ្ធគង់នៅជាមួយយើង យើងពោរពេញដោយកម្លាំងដោយសារព្រះជាម្ចាស់មានព្រះជន្មគង់នៅ និងយើងជាប្រជារាស្ត្រដ៏មានជីវិត ជីវិតដែលមកពីព្រះជាម្ចាស់។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
