លោកបូជាចារ្យវីរៈជ័យ ស្រ៊ីប្រាម៉ុង បានរៀបចំពិធីជ្រមុជទឹកដល់ទារក៨នាក់ នៅព្រះវិហារគង្វាលដ៏សប្បុរស(ព្រះសហគមន៍រោងចក្រ) ក្នុងភូមិដីឥដ្ឋ ស្រុកកៀនស្វាយ ខេត្តកណ្ដាល នាថ្ងៃទី ៥ កញ្ញា ២០២១នេះ។
នៅក្នុងឱកាសនេះដែរ លោកបូជាចារ្យវីរៈជ័យ ស្រ៊ីប្រាម៉ុង ជាអ្នកទទួលខុសត្រូវមណ្ឌលសកម្មភាពទន្លេមេគង្គដែលក្នុងនោះមានព្រះសហគមន៍រោងចក្រនេះ រំលឹកឪពុកម្ដាយធម៌ឲ្យអប់រំកូនៗ ទាំងចំណេះដឹងទូទៅ ជំនឿ និងរបៀបថែរក្សាពួកគេក្រោយពីទទួលអគ្គសញ្ញាជ្រមុជទឹករួច។
លោកបូជាចារ្យបានបង្ហាញអំពីកាយវិកាខ្លះៗដែលមានអត្ថន័យ សម្រាប់អគ្គសញ្ញាជ្រមុជទឹកនេះ គឺបូជាចារ្យ ឪពុកម្តាយ និងឪពុកម្តាយធម៌ គូសសញ្ញាឈើឆ្កាងលើកុមារៗ គឺបង្ហាញអំពីតួនាទីណែនាំកុមារឱ្យស្គាល់ព្រះយេស៊ូ។ ការចាក់ទឹកបង្ហូលើក្បាលកុមារ ដែលមានឪពុកម្តាយ និងឪពុកម្តាយធម៌នៅក្បែរ គឺជាសញ្ញាបង្ហាញថាពួកគាត់ត្រូវទទួលរក្សាកូនទាំងរូបកាយ និងវិញ្ញាណ។
រីឯការបំពាក់អាវថ្មីពណ៌ស ដែលជូនឱ្យឪពុកម្ដាយធម៌ពាក់ឱ្យកូន ជានិមិត្តសញ្ញានៃការបំពាក់ព្រះយេស៊ូ គឺបំពាក់ជីវិតថ្មីដល់កូន គឺត្រូវណែនាំកូនឱ្យយល់ និងទទួលព្រះយេស៊ូនៅក្នុងរូបកាយគេ។ លោកបូជាចារ្យបន្ថែមទៀតថា ពេលឪពុកម្ដាយធម៌កាន់ទៀនឱ្យកូនធម៌ គឺណែនាំពន្លឺព្រះយេស៊ូឱ្យពួកគេ។ ឪពុកម្ដាយធម៌ត្រូវធ្វើជាគំរូឱ្យកូន ជាពន្លឺជីវិតដែលបំភ្លឺកូនធម៌ក្នុងជីវិតជាគ្រីស្តបរិស័ទ។
គង្វាលព្រះសហគមន៍រូបនេះឲ្យដឹងទៀតថា នៅព្រះសហគមន៍មណ្ឌលសកម្មភាពទន្លេមេគង្គ គ្រីស្តបរិស័ទមានទម្លាប់មួយ គឺនៅក្នុងឱកាសបុណ្យចូលឆ្នាំ កូនៗត្រូវមកផ្ទះគោរពឪពុកម្ដាយនិងឪពុកម្ដាយធម៌ ទោះបីជាកូនធំ ហើយទៅរស់នៅដល់ទីណា ធ្វើការនៅទីណាក៏ដោយ គឺពួកគេមិនដែលភ្លេចទំនាក់ទំនងកូនធម៌ និងឪពុកម្ដាយធម៌នោះទេ។
តាមប្រសាសន៍របស់លោកបូជាចារ្យ វីរៈជ័យ បានឱ្យដឹងទៀតថា មុននឹងធ្វើអគ្គសញ្ញានានា យើងត្រូវគិតច្រើន និងពិភាក្សាជាមួយគណៈកម្មការ ដោយត្រូវទំនាក់ទំនងជាមួយអាជ្ញាធរដើម្បីស្នើការអនុញ្ញាតិ ដែល ពីកាលមុន កាន់តែច្រើនកាន់តែល្អ។ ប៉ុន្តែយើងត្រូវអប់រំមុន និងត្រូវធ្វើតាមការណែនាំរបស់ភូមិឃុំ និង៣កុំ ៣ការពារ ដើម្បីសុវត្ថិភាពទាំងអស់គ្នា។
ក្នុងនាមជាបូជាចារ្យ លោកវីរៈជ័យ សូមផ្ដាំផ្ញើដល់ឪពុកម្ដាយ និងឪពុកម្ដាយធម៌ ៖ ១. យើងមានកូនដែលជាព្រះពររបស់ព្រះជាម្ចាស់រួចហើយ ដូច្នេះត្រូវចេះថែរក្សាពួកគេឱ្យបានល្អ។ ២. ត្រូវអប់រំពួកគេដោយក្ដីស្រឡាញ់។ ៣. ក្នុងនាមយើងជាគ្រីស្តបរិស័ទត្រូវយកកូនមកព្រះវិហារ ណែនាំកូនឱ្យស្គាល់ព្រះជាម្ចាស់ដោយធ្វើជាគំរូល្អសម្រាប់កូន។
ព្រះសហគមន៍មណ្ឌលសកម្មភាពទន្លេមេគង្គ បានរៀបចំឲ្យមានការអប់រំសម្រាប់អគ្គសញ្ញាជ្រមុជទឹក រៀងរាល់១ខែម្ដងដល់កូនៗរបស់គ្រីស្តបរិស័ទ ប៉ុន្តែឪពុកម្ដាយ រួមជាមួយឪពុកម្ដាយធម៌ត្រូវទទួលការអប់រំ ដើម្បីយល់ពីអត្ថន័យនៃកាយវិកានីមួយៗ និងអាចណែនាំដល់កូនៗក្នុងជំនឿរបស់ពួកគេ។ កម្មវិធីអប់រំនេះ ធ្វើឡើងរៀងរាល់អាទិត្យដើមខែ ឬរៀងរាល់ចុងខែនីមួយៗ អាស្រ័យលើកាលវិភាគរបស់ព្រះសហគមន៍ ដែលភាគច្រើនធ្វើនៅពេលល្ងាច ឬយប់៕
