អភិបាលព្រះសហគមន៍កាតូលិកភូមិភាគភ្នំពេញ លោកអូលីវីយ៉េ ជ្មីតអ៊ីស្លែរ រួមជាមួយព្រះចៅអធិការវត្តអង្គមន្ត្រី ព្រះអង្គ ង៉ែត ចម្រើន បានរៀបចំវីដេអូរួមគ្នាមួយនៅវត្ដអង្គមន្ត្រី និងនៅព្រះវិហារសន្តីម៉ារីញញឹមចំការទៀង ក្នុងស្រុកត្រាំកក់ ខេត្តតាកែវ ក្នុងឱកាសទិវាសន្តិភាពអន្តរជាតិ លើកទី១៩ នាថ្ងៃទី២១ ខែកញ្ញា ឆ្នាំ២០២១ ដែលជានិមិត្តសញ្ញាបង្ហាញអំពីសុខដុមរមនារវាងសាសនា និងសាសនានៅប្រទេសកម្ពុជា។
ព្រះតេជគុណ ង៉ែត ចម្រើន បានមានថេរដីកាតាមរយៈវីដេអូនេះ ពីទិវាសន្តិភាពនេះថា ៖ «ថ្ងៃនេះយើងបានជួបគ្នារវាងព្រះពុទ្ធសាសនា និងគ្រីស្តសាសនានិយាយពីសន្តិភាព និងពីសេចក្ដីសុខផ្លូវចិត្ត»។
ព្រះតេជគុណ ង៉ែត ចម្រើន បានធ្វើការពន្យល់ថា នៅក្នុងព្រះពុទ្ធសាសនា ព្រះអង្គបានសម្ដែង សុខោពុទ្ធា នមុបាទោ ការកើតឡើងនៃព្រះសម្មាសម្ពុទ្ធ ការត្រាស់ដឹងនៃព្រះសម្មាសម្ពុទ្ធនាំឱ្យនាំមកនូវសេចក្ដីសុខ។ សុខោ សុធម្មសវណំ បានសម្ដែងនូវព្រះធម៌ការបានស្ដាប់នូវព្រះធម៌នាំមកឱ្យនូវសេចក្ដីសុខ។ សង្ឃសាមគ្គីសាមគ្គាណំ តបោសុខោ ការព្រមព្រៀងគ្នា ការសាមគ្គីគ្នាជាពួកជាក្រុម ដូចក្នុងថ្ងៃនេះរវាងព្រះពុទ្ធសាសនានិងគ្រីស្តសាសនា បង្កើតបានសេចក្ដីសុខ។
ជាការឆ្លើយតបនឹងទិវានេះ លោកអូលីវីយ៉េ ក៏បានមានប្រសាសន៍ និងលើកយកព្រះបន្ទូលព្រះយេស៊ូថា ៖ «ថ្ងៃនេះខ្ញុំសូមស្វាគមន៍បងប្អូនទាំងអស់នៅក្នុងទិវាសន្តិភាពអន្តរជាតិ ដែលជាពេលវេលាមួយដែលពិភពលោកកំពុងអធិដ្ឋាន ដើម្បីឱ្យអំពើហិង្សា ដើម្បីឱ្យសង្គ្រាមទៅឆ្ងាយពីយើង និងសម្រាប់យើងដែលជាគ្រីស្តបរិស័ទ យើងស្ដាប់ព្រះបន្ទូលរបស់ព្រះយេស៊ូ»។
លោកអភិបាលរូបនេះ បានបញ្ជាក់ទៀតថា ៖ «ខ្ញុំទុកសេចក្ដីសុខសាន្តឱ្យអ្នករាល់គ្នា ខ្ញុំផ្តល់សេចក្ដីសុខសាន្តរបស់ខ្ញុំឱ្យអ្នករាល់គ្នា។ សេចក្ដីសុខសាន្តដែលខ្ញុំផ្ដល់ឱ្យនេះមិនដូចសេចក្ដីសុខសាន្តដែលមនុស្សលោកឱ្យទេ»។
លោកអូលីវីយ៉េ បានបន្តថា នេះជាពេលវេលាដើម្បីនឹកឃើញព្រះយេស៊ូយាងមក ដើម្បីឱ្យមនុស្សបង្កើតសេចក្ដីសុខនៅក្នុងដួងចិត្ត។ នៅពេលមនុស្សមានសេចក្ដីសុខសាន្តនៅក្នុងដួងចិត្ត ពួកគេអាចធ្វើដំណើរនៅក្នុងសង្គម អាចចែករំលែកសេចក្ដីសុខដល់បងប្អូនឯទៀតៗ នៅក្នុងក្រុមគ្រួសារ នៅកន្លែងដែលអ្នករាល់ធ្វើការ ឬនៅសាលារៀនជាដើម។
លោកបានមានប្រសាសន៍ថា ៖ «នៅថ្ងៃនេះដែរ យើងទាំងពីរអង្គបានជួបជុំគ្នា គឺយើងចង់បង្ហាញថាពិតមែននៅក្នុងជីវិតរបស់យើងជាអ្នកបួស សេចក្ដីសុខសាន្តជាអាទិភាព ហើយយើងចង់ណែនាំទាំងគ្រីស្តបរិស័ទនិងពុទ្ធបរិស័ទ ចូលនៅក្នុងជីវិតសុខដុមរមនាពោរពេញដោយសេចក្ដីសុខសាន្ត»។
នាទិវានេះផងដែរ បព្វជិតទាំងពីរអង្គ បានផ្ញើសារទៅកាន់បរិស័ទទាំងឡាយ តាមរបៀបសាសនារៀងៗខ្លួន សូមឱ្យប្រជាពលរដ្ឋខ្មែរទូទាំងកម្ពុជរដ្ឋជួបតែសេចក្ដីសុខសាន្ត និងសូមឱ្យមនុស្សគ្រប់រូបយកចិត្តទុកដាក់ដើម្បីកសាងសេចក្ដីសុខដើម្បីឈ្នះមេរោគកូវីដ១៩៕
