ព្រះសហគមន៍មណ្ឌលសកម្មភាពភ្នំពេញខាងជើង ព្រះវិហារសន្តយ៉ូសែប ផ្សារតូច ដឹកនាំដោយលោកបូជាចារ្យ ប៉ូល រឿង ឆ័ត្រសិរី និងតំណាងគ្រីស្តបរិស័ទកាតូលិក នាំយកគ្រឿងឧបភោគបរិភោគមួយចំនួន ជូនដល់ អភិបាលនៃគណៈអភិបាលខណ្ឌឫស្សីកែវថ្មី លោក ឯក ឃុនដឿន ដែលលោកទើបចូលកាន់តំណែងជាអភិបាលខណ្ឌ ដើម្បីចូលរួមសកម្មភាពមនុស្សធម៌នានា ក្នុងការបង្ការទប់ស្កាត់ និងគ្រប់គ្រងការឆ្លងរីករាលដាលនៃជំងឺកូវីដ-១៩ នៅក្នុងខណ្ឌឫស្សីកែវ នាថ្ងៃទី ១៦ វិច្ឆិកា ២០២១នេះ។
នៅក្នុងពិធីសំណេះសំណាលនិងអបអរសាទរការឡើងកាន់តំណែងថ្មីរបស់លោកអភិបាលខណ្ឌឫស្សីកែវ លោកបូជាចារ្យ ប៉ូល រឿង ឆ័ត្រសិរី ជាអ្នកទទួលបន្ទុកមណ្ឌលសកម្មភាពព្រះសហគមន៍កាតូលិកភ្នំពេញខាងជើង មានប្រសាសន៍ថា ថ្ងៃនេះជាឱកាសល្អ ដែលក្នុងនាមព្រះសហគន៍មកសួរសុខទុក្ខសំណេះសំណាលជាមួយលោកអភិបាលខណ្ឌថ្មីនិងជាឱកាសមួយ អនុញ្ញាតឲ្យព្រះសហគមន៍រួមសហការជាមួយសង្គម ដូចព្រះយេស៊ូធ្លាប់មានបន្ទូលអំពីការផ្ដល់អាហារ ការសួរសុខទុក្ខអ្នកជំងឺ និងផ្ដល់សម្លៀកបំពាក់ជាដើម គឺជាកិច្ចការខាងសង្គមរបស់ព្រះសហគមន៍ដែលត្រូវធ្វើ។
លោកថា ព្រះហឫទ័យរបស់ព្រះជាម្ចាស់ទតមើលលើកិច្ចការរបស់យើង។ ថ្ងៃនេះព្រះសហគមន៍យើងធ្វើជាតំណាងនៃព្រះន្ទូលរបស់ព្រះជាម្ចាស់ ដោយយើងមានទំនាក់ទំនងល្អជាមួយខាងរដ្ឋដែលជាផ្នែកនៃសង្គម គឺជាកិច្ចការមួយដែលគួរឱ្យមាននៅក្នុងជីវិតរបស់ព្រះសហគន៍ប្រចាំថ្ងៃ ដោយសាររដ្ឋមានតួនាទីគ្រប់គ្រងដើម្បីឱ្យមានផលល្អសម្រាប់ប្រជាជន ហើយព្រះសហគមន៍របស់យើងក៏មានឋានៈជាប្រជាពលរដ្ឋរបស់រដ្ឋនីមួយៗដែរ។ ដូច្នេះការពង្រឹងទំនាក់ទំនងធ្វើឱ្យយើងមានភាពស្និទ្ធស្នាលជាមួយគ្នា ហើយកិច្ចការដែលព្រះសហគមន៍ធ្វើគឺគោរពទៅនឹងច្បាប់របស់រដ្ឋ និងរដ្ឋក៏ជួយដល់កិច្ចការឬបេសកកម្មផ្សេងៗរបស់ព្រះសហគមន៍។
លោកបន្ថែមថា «ការជួយគ្នាទៅវិញទៅមកនេះ ជាឱកាសមួយដើម្បីឱ្យយើងយល់គ្នាពីតួនាទីរៀងៗខ្លួន ហើយព្រះសហគមន៍ជួយគ្រីស្តបរិស័ទខាងផ្លូវវិញ្ញាណក៏ជួយជំរុញឱ្យគ្រីស្តបរិស័ទជាមនុស្សល្អរបស់សង្គម។ ប្រសិនបើសង្គមមានការគ្រប់គ្រងល្អ ក៏ជួយដល់ការប្រកាសដំណឹងល្អរបស់ព្រះសហគមន៍ឱ្យកាន់តែរីកចម្រើនដែរ»។
ជាមួយគ្នានេះដែរ លោកអភិបាលខណ្ឌថ្មី លោក ឯក ឃុនដឿន មានប្រសាសន៍ថ្លែងអំណរគុណដល់ព្រះសហគមន៍កាតូលិកដែលបានពាំនាំនូវគ្រឿងឧបភោគបរិភោគ និងថវិកាមួយចំនួនមកជូនអាជ្ញាធរខណ្ឌឫស្សីកែវ ក្នុងការជួយសង្គ្រោះប្រជាពលរដ្ឋនៅក្នុងសហគមន៍ដែលកំពុងតែជួបការលំបាកនិងខ្វះខាត។
លោកអភិបាលខណ្ឌបន្តថា បងប្អូនខាងព្រះវិហារកាតូលិកបានចូលរួមចំណែកយ៉ាងសំខាន់ដល់ការគាំទ្រគោលនយោបាយរបស់សម្ដេចតេជោ ក្នុងការជួយគ្នា និងចូលរួមអភិវឌ្ឍប្រទេសក្រោមដំបូលសន្តិភាព ដែលធ្វើឱ្យប្រទេសរបស់យើងមានភាពរីកចម្រើនទាំងសុខដុមសាសនាផង ទាំងការអភិវឌ្ឍប្រទេសជាតិផង ហើយនេះជាទឹកចិត្តដ៏ល្អប្រពៃរបស់បងប្អូនកាតូលិកដែលបានរួមចំណែកជាមួយរាជរដ្ឋាភិបាល ក្នុងការដោះស្រាយ និងរួមគ្នាអភិវឌ្ឍប្រទេស។
លោកបានសង្កត់ធ្ងន់ថា «សាសនាទាំងអស់ល្អដូចគ្នា ហើយចំណុចគោលធំៗដែលយើងចង់បាននោះគឺសន្តិភាព គេចផុតពីសង្គ្រាម ការជួយអ្នកខ្វះខាត អ្នករងគ្រោះ និងចូលរួមអភិវឌ្ឍ ហើយពិសេសការជួយគ្នាទៅវិញទៅមករវាងព្រះសហគមន៍និងរដ្ឋអំណាចមានសារសំខាន់ណាស់ ដោយយើងអាចរួមគ្នាលុបបំបាត់នូវភាពក្រីក្រផង និងអ្វីដែលជាអំពើអបាយមុខផង ហើយយើងរួមគ្នាថែទាំសន្តិភាព និងការអភិវឌ្ឍ ដែលទាំងអស់នេះមិនអាចឃ្លាតឆ្ងាយគ្នាបានទេ»។
លោកបន្ថែមថា គ្រប់សាសនា និងគ្រប់ជាតិសាសន៍ដែលមាននៅលើផែនដី ក៏ដូចជានៅក្នុងប្រទេសយើងនេះសុទ្ធតែជាកោសិកាសង្គមមួយដែលយើងត្រូវតែរួមគ្នាចូលរួមថែទាំសន្តិភាពដែលជាគោលការណ៍ធំ ហើយជួយគ្នាក្នុងការបណ្ដុះបណ្ដាលធនធានមនុស្ស ជួយគ្នាក្នុងការសង្គ្រោះអ្នកដែលខ្វះខាតរងគ្រោះដោយសារសង្គ្រាមឬទុរភិក្ស សុទ្ធសឹងតែជាគោលដៅដែលយើងចង់បាន។
លោកអភិបាលខណ្ឌ បានថ្លែងអំណរគុណ និងកោតសរសើរព្រះសហគមន៍កាតូលិកដែលមានបំណងសាងសង់ព្រះវិហារ កសាងសាលាបណ្ដុះបណ្ដាលធនធានមនុស្ស និងមជ្ឈមណ្ឌលព្យាបាល ដែលសុទ្ធសឹងតែជាគោលនយោបាយរបស់សម្ដេចតេជោដែលចង់ជួយប្រជាជនខ្មែរយើងឱ្យមានសុខភាពល្អ និងធូរធា។
គ្រឿងឧបភោគទាំងនោះមាន អង្ករ៦០០គីឡូក្រាម ទឹកសុទ្ធ១២កេស ម៉ាស៣កេស ទឹកត្រី១៥យួរ ទឹកស៊ីអ៊ីវ១៥យួរ និងថវិកា១លានរៀល៕
ដោយដាលីស
