“សូមកុំធ្វើឱ្យជីវិតរបស់យើងរដិបរដុប” នេះជាប្រសាសន៍របស់លោកបូជាចារ្យ ដាមីញ៉ាំង ហ្វារនឺ ប្រធានព្រះសហគមន៍មណ្ឌលសកម្មភាពភ្នំពេញខាងជើង បានមានប្រសាសន៍ណែនាំគ្រីស្តបរិស័ទនៅក្នុងសប្ដាហ៍ទី២នៃរដូវរង់ចាំ និងត្រូវនឹងថ្ងៃដែលព្រះសហគមន៍កាតូលិករំឭកដល់សន្តយ៉ូហានបាទីស្ត នាថ្ងៃទី៥ ធ្នូ ២០២១ នៅព្រះវិហារព្រះកុមារយេស៊ូបឹងទំពុន រាជធានីភ្នំពេញ ដោយមានគ្រីស្តបរិស័ទចូលរួមជាច្រើនផងដែរ។
នៅក្នុងធម៌ទេសនាក្នុងសប្ដាហ៍ទី២នៃរដូវរង់ចាំនេះ លោកបូជាចារ្យ បានដាស់តឿនគ្រីស្តបរិស័ទឱ្យយកចិត្តទុកដាក់ក្នុងអត្ថបទទី២សន្ត ប៉ូល បានទូលអង្វរព្រះជាម្ចាស់ថា “សូមឱ្យបងប្អូនមានសេចក្ដីស្រឡាញ់យ៉ាងលើសលុបកាន់តែខ្លាំងឡើងៗ ធ្វើឱ្យបងប្អូនចេះដឹងច្បាស់និងយល់សព្វគ្រប់ទាំងអស់ ដើម្បីឱ្យបងប្អូនចេះពិចារណាមើលការណ៍ណាដែលប្រសើរជាងគេ”។ នៅក្នុងនេះលោកដាមីញ៉ាំង បានពន្យល់ដល់គ្រីស្តបរិស័ទថា សូមឱ្យយើងជ្រាបនូវអ្វីដែលត្រឹមត្រូវនិងពិចារណា។ រាល់ថ្ងៃមានរឿងច្រើនដែលឆ្លងកាត់ចិត្តរបស់យើង។ លោកបានដាក់ជាសំណួរឱ្យគ្រីស្តបរិស័ទរិះគិតផ្ទាល់ខ្លួនថា តើអ្វីដែលសំខាន់ជាងគេក្នុងជីវិតរបស់ខ្ញុំ? តើអ្វីដែលមានសមត្ថភាព? ពេលស្លាប់ទៅណា? មានព្រះជាម្ចាស់ ឬយ៉ាងណា? សន្តប៉ូលជួយយើងរិះគិតអ្វីដែលសំខាន់ជាងគេក្នុងជីវិត។
ជាងនេះទៅទៀត លោកបូជាចារ្យដាមីញ៉ាំង ណែនាំគ្រីស្តបរិស័ទដោយមានប្រសាសន៍ថា ឈ្មោះយ៉ូហានបាទីស្ត មានន័យថា ព្រះជាម្ចាស់ប្រោសប្រណីសន្ដោស។ លោកយ៉ូហានបាទីស្ត រៀបចំផ្លូវរដិបរដុបឱ្យរាបស្មើថ្វាយព្រះយេស៊ូ។ លោកថា អំពើបាប ជាអ្វីដែលធ្វើឱ្យជីវិតយើងរដិបរដុប រញ៉េរញ៉ៃ និងអ្វីដែលរញ៉េរញ៉ៃមិនមែនមកពីព្រះជាម្ចាស់ទេ។ សូមកុំពេញចិត្តធ្វើឱ្យជីវិតរបស់យើងរដិបរដុប កុំធ្វើឱ្យរញ៉េរញ៉ៃ ដែលមិនទៀងត្រង់។ អាទិត្យទី២នៃរដូវរង់ចាំ សូមកុំភ្លេចអត្ថបទព្រះគម្ពីរថ្ងៃនេះ។ ឱ!ព្រះសង្គ្រោះសូមយាងមក ព្រះអង្គចង់បង្កើតយើងដោយស្មោះត្រង់។
នៅក្នុងឱកាសនេះដែរ បងប្រុស វី សំណាង ជានិស្សិតទេវវិទ្យាល័យដែលមានបេសកកម្មបម្រើព្រះសហគមន៍មណ្ឌលសកម្មភាពភ្នំពេញខាងត្បូងបានឱ្យដឹងថា នៅក្នុងអាទិត្យទី២ នៃរដូវរង់ចាំ ដែលយើងបានស្ដាប់អត្ថបទដំណឹងល្អរៀបរាប់អំពីលោកយ៉ូហានបាទីស្តប្រកាសប្រាប់ប្រជាជនឲ្យរៀបចំផ្លូវថ្វាយព្រះគ្រីស្ត ដែលផ្លូវណារដិបរដុប សូមរៀបឲ្យស្មើ ។ សម្រាប់ខ្ញុំ គ្រីស្តបរិស័ទយើងសព្វថ្ងៃ ក្នុងដំណើរជីវិតឆ្ពោះទៅរកព្រះជាម្ចាស់ពោរពេញទៅដោយផ្លូវរដិបរដុប និងផ្លូវរដិបរដុបនេះ គឺជាបញ្ហា ឧបសគ្គ រវល់កិច្ចការងារ រកលុយ ជាពិសេសគឺបញ្ហាកូវិដ-១៩ ដែលយើងម្នាក់យកជាលេសក្នុងការខកខានទៅជួបព្រះជាម្ចាស់។ បងប្រុសថា នេះដើម្បីដោះសារម៉្យាងក្នុងការយករួចខ្លួន ។ ក្នុងនាមយើងជាគ្រីស្តបរិស័ទ ជាពិសេសក្នុងរដូវរង់ចាំ សូមឲ្យយើងយកចិត្តទុកដាក់ ចាប់អារម្មណ៍ រៀបចំជីវិតរបស់យើង បំបាត់ទម្លាប់អាក្រក់ដែលរារាំងយើងឆ្ពោះទៅកាន់ភាពដ៏វិសុទ្ធ។ បងប្រុសសំណាងបញ្ជាក់ថា ដើម្បីលុបបំបាត់ផ្លូវរដិបរដុប គ្រីស្តបរិស័ទត្រូវអធិដ្ឋានច្រើនជាងមុន ស្តាប់ព្រះបន្ទូលច្រើនជាងមុន ចូលរួមអភិបូជាថ្ងៃអាទិត្យ និង ពិធីបុណ្យនានា ដើម្បីឱ្យផ្លូវនៃជីវិតរបស់យើងរលោងស្រួលក្នុងការឆ្ពោះទៅរកព្រះជាម្ចាស់ ។
ដោយ៖ ដាលីស
