ក្រុមគ្រួសារបងស្រីមេត្តាករុណា ប្រារព្ធពិធីខួប២៥ឆ្នាំនៃការថ្វាយខ្លួនទៅព្រះជាម្ចាស់របស់បងស្រី លូស៊ីតា ក្នុងក្រុមគ្រួសារបងស្រីមេត្តាករុណា ក្រោមអធិបតីភាព លោកអភិបាលព្រះសហគមន៍កាតូលិកភូមិភាគភ្នំពេញ អូលីវីយ៉េ ជ្មីតហស្លេរ និងលោកបូជាចារ្យ ឆាលី ឌីតម៉ាយ័រ។ ពិធីនេះប្រព្រឹត្តទៅ នាថ្ងៃទី៧ ធ្នូ ២០២១ នៅគ្រឹះស្ថានបងស្រីមេត្តាករុណាព្រះមុន្នីវង្ស ក្នុងសង្កាត់បឹងព្រលឹត រាជធានីភ្នំពេញ ដោយមានវត្តមានក្រុមគ្រួសារបងប្រុសមេត្តាករុណា ក្រុមគ្រួសារស្រីមេត្តករុណាចោមចៅ និងសៀមរាបចូលរួមផងដែរ។
នៅក្នុងពិធីនេះ លោកអភិបាលព្រះសហគមន៍ អូលីវីយ៉េ បានមានប្រសាសន៍ថា ថ្ងៃនេះយើងអរព្រះគុណព្រះជាម្ចាស់សម្រាប់ខួប២៥ឆ្នាំ ដែលបងស្រី លូស៊ីតា បានថ្វាយខ្លួនទៅព្រះជាម្ចាស់ ក្នុងក្រុមគ្រួសារបងស្រីមេត្តាករុណា។
លោកអភិបាលក៏បានរំឭកដល់ពាក្យរបស់សន្តីតេរេសានៃទីក្រុងកាល់ហ្គូតា ដែលជាអ្នកម្ដាយបង្កើតឱ្យមានក្រុមគ្រួសារមេត្តាករុណានេះថា «ប្រសិនបើអ្នកមិនអាចផ្ដល់អាហារដល់មនុស្សមួយរយនាក់បាន យ៉ាងហោចណាស់ក៏អាចជួយបានម្នាក់» និងពាក្យមួយទៀតរបស់សន្តីតេរេសាគឺ «បុណ្យព្រះយេស៊ូប្រសូត គ្រប់ពេលយើងត្រូវញញឹមនិងឱបកូនៗ»។
លោកអភិបាលបន្តថា ថ្ងៃនេះបងស្រីប្រារព្ធខួប២៥ឆ្នាំ នៃការថ្វាយខ្លួនជាបព្វជិតានៅក្នុងគ្រួសារបងស្រីមេត្តាករុណា និងមកបំពេញបេសកកម្មនៅកម្ពុជា ធ្វើឱ្យខ្ញុំនឹកឃើញនៅពេលខ្ញុំមកដល់កម្ពុជា ក៏មានសញ្ញាដូចបងស្រី យើងអាចរកឃើញគ្រួសារ២នៅទីនេះដែលជាគ្រួសារធំ ទោះបីជាបងស្រីបានចាកឆ្ងាយពីប្រទេសកំណើត ប៉ុន្តែបងស្រីអាចរកឃើញគ្រួសារថ្មីនៅកម្ពុជា ក្នុងនោះគ្រួសារទីមួយគឺបងប្រុសបងស្រីនៅទីនេះ និងមួយទៀតគឺជាកុមារនិងអស់អ្នកដែលបងស្រីបាននិងកំពុងបម្រើ។
លោកអភិបាលបន្ថែមថា ខ្ញុំជឿជាក់ថានៅកម្ពុជា មានបងស្រីខ្លះមកជាង២០ឆ្នាំ និងយើងមានបទពិសោធខុសៗគ្នា យើងត្រូវនិយាយ២ភាសា និងមាន២វប្បធម៌ ដូចជាអណ្ដើកដែរ។ ខ្ញុំគិតថាវប្បធម៌២ គឺមានភាពស្រស់ស្អាតដោយ យើងអាចយល់ចិត្តគ្នាបានដោយយើងត្រូវចូលទៅក្នុងភាសារនិងវប្បធម៌២ដែលមានទាំងភាសារនិងវប្បធម៌ជាតិកំណើត និងភាសារនិងវប្បធម៌របស់បងប្អូនដែលបងស្រីបាននិងកំពុងបម្រើនៅទីនេះ។ នៅពេលយើងយល់គ្នាយើងអាចជួយគ្នាទៅវិញទៅមកបាននៅក្នុងបេសកកម្មរបស់យើង។
លោកអភិបាលអូលីវីយ៉េ មានប្រសាសន៍ទៀតថា បងស្រីមាន២៥ឆ្នាំ និងថែម២៥ឆ្នាំទៀត និងថែមទៀតដូចអណ្ដើកដែលមានអាយុវែង និងសូមអរព្រះគុណព្រះជាម្ចាស់ ដែលយើងអាចរួមគ្នាជាធ្លុងតែមួយជាមួយព្រះយេស៊ូ ដើម្បីចែករំលែកសេចក្ដីស្រឡាញ់របស់ព្រះជាម្ចាស់។
នៅក្នុងពិធីខួប២៥ឆ្នាំនៃការថ្វាយខ្លួនទៅព្រះជាម្ចាស់ក្នុងថ្ងៃនេះ បងស្រីលូស៊ីតា បាន រំលឹកពាក្យសច្ចាប្រណិធានសាជាថ្មីនៅមុខលោកអភិបាល និងក្រុមគ្រួសារមេត្តាករុណាទាំងអស់ថា ដោយព្រះនាមព្រះបិតា ព្រះបុត្រា និងព្រះវិញ្ញាណដ៏វិសុទ្ធ «តាមរយៈព្រះបន្ទូលព្រះយេស៊ូនៅលើឈើឆ្កាង “ខ្ញុំស្រេក” ដែលជាព្រះបន្ទូលបង្ហាញសេចក្ដីស្រឡាញ់ ធ្វើឱ្យខ្ញុំដើរតាមព្រះយេស៊ូយ៉ាងជិតស្និទ្ធពេញមួយជីវិត តាមរយៈធម៌មេត្តាករុណានៅក្នុងជីវិតនិងស្របទៅនឹងកិច្ចការដែលសន្តីតេរេសានៅកាល់ហ្គូតាបានធ្វើ»។ បងស្រីលូស៊ីតា បន្ថែមថា ខ្ញុំសូមធ្វើសច្ចាប្រណិធានដោយ ប្រកាន់នូវព្រហ្មចារីយ៍ធម៌ ដាក់ខ្លួនជាអ្នកក្រខ្សត់ ស្ដាប់បង្គាប់ និងមានបេះដូងពេញលេញដោយការបម្រើអ្នកក្រីក្រជាងគេបំផុត ស្របតាមធម្មនុញ្ញនៃក្រុមគ្រួសារមេត្តាករុណា។
បងស្រីលូស៊ីតា មានប្រសាសន៍ថា «ខួប២៥ឆ្នាំរបស់ខ្ញុំ នៅពេលដែលខ្ញុំមើលត្រលប់ក្រោយវិញ ខ្ញុំបានឃើញថាព្រះជាម្ចាស់ស្រឡាញ់ខ្ញុំខ្លាំងណាស់ ហើយខ្ញុំក៏បានទទួលអារម្មណ៍នៃសេចក្ដីស្រឡាញ់ពីព្រះជាម្ចាស់ដែលជាផ្នែកមួយនៃអត្ថន័យនៃការត្រាស់ហៅរបស់ខ្ញុំ។ ២៥ឆ្នាំនេះ ខ្ញុំសូមអរព្រះគុណព្រះជាម្ចាស់ដែលបានការពារថែរក្សា និងស្រឡាញ់ខ្ញុំ»៕
ដោយ៖ ដាលីស
