អស់លោកបូជាចារ្យជាប្រមាណជាង២០អង្គ រួមគ្នាអរព្រះគុណព្រះជាម្ចាស់ក្នុងឱកាសខួប២០ឆ្នាំនៃអគ្គសញ្ញាតែងតាំងជាបូជាចារ្យរបស់លោកបូជាចារ្យសញ្ជាតិខ្មែរបីរូប មានលោកយ៉ូហាន អ៊ុន សុន លោកសិលា សួន ហង្សលី និងលោក ឡាយ ប៉ូល ក្រោមអធិបតីភាពលោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតហស្លេ លោកអភិបាលព្រះសហគមន៍ភូមិភាគបាត់ដំបង អេនរីគេ ហ្វីការេដូ និងលោកអភិបាលព្រះសហគមន៍ភូមិភាគកំពង់ចាម ប្រ៊ុយណូ កូសម៍ នាល្ងាចថ្ងៃទី ៩ ធ្នូ ២០២១ នៅព្រះវិហារសន្តសិលា និងសន្តប៉ូល ភ្នំពេញថ្មី ដោយមានគ្រីស្តបរិស័ទចូលរួមជាច្រើនកុះករ។
នៅក្នុងឱកាសនេះដែល លោកបូជាចារ្យ ឡាយ ប៉ូលមានប្រសាសន៍ដោយផ្ដល់សក្ខីភាពរបស់លោកនៅក្នុងធម្មទេសនា ព្រះបន្ទូលរបស់ព្រះជាម្ចាស់ បានឲ្យលោកមើលឃើញការសង្គ្រោះ គឺប្រកាសពីសេចក្ដីសង្ឃឹម។
លោកបូជាចារ្យប៉ូលបានបន្ថែមថា «ខ្ញុំរិះគិតពីដំណើរជីវិតរបស់ខ្ញុំជាបូជាចារ្យ ខ្ញុំឃើញថានរណាក៏ចង់អួតខ្លួន អ្នកណាក៏ចង់បានថ្វីដៃល្អ នាំឱ្យខ្ញុំនឹកឃើញព្រះបន្ទូលព្រះយេស៊ូជំពូក១០ (លូកា)។ ព្រះយេស៊ូប្រគល់ឱ្យអ្នករាល់គ្នាមានអំណាច និងព្រះយេស៊ូមានបន្ទូល កុំត្រេកអរនឹងឃើញខ្មោចចុះចូលអ្នករាល់គ្នា ប៉ុន្តែត្រេកអរដែលអ្នករាល់គ្នាមានឈ្មោះនៅស្ថានបរមសុខ។ យើងមានឈ្មោះនៅស្ថានបរមសុខ ពាក្យនេះជួយខ្ញុំនៅពេលបរាជ័យ។ នៅពេលខ្ញុំទៅតាមភូមិ ព្រះបន្ទូលនេះជាគ្រឹះមួយជួយឱ្យខ្ញុំរឹងមាំ»។
លោកបូជាចារ្យ ប៉ូល ឡាយស្នើដល់គ្រីស្តបរិស័ទ អធិដ្ឋានសម្រាប់ពួកលោកទាំង៣នាក់និងនិស្សិតទេវវិទ្យាល័យចំនួន២នាក់ ដែលបានទទួលពិធីជា Acolyte (អ្នកបម្រើតុអសនៈ) ដើម្បីឱ្យយើងជាប់ចិត្តជាមួយព្រះជាម្ចាស់។
រីឯលោកលោកបូជាចារ្យ អ៊ុន សុន ក៏បានចែករំលែកសក្ខីភាពអំពីជីវិតជាបូជាចារ្យរយ:ពេល២០ឆ្នាំមកនេះដែរថា ជីវិតជាបូជាចារ្យ គឺមានអំណរសប្បាយដោយរួមជាមួយបងប្អូន និងមានអំណរសប្បាយក្នុងទំនាក់ទំនងជាមួយអន្តរសាសនា ដោយយើងជាបូជាចារ្យយើងថ្វាយខ្លួន។ លោកបន្តថា «២០ឆ្នាំមែន តែខ្ញុំមិនទាន់ចាស់ទេ ដោយយើងអំណរមានអំណរសប្បាយពេញ»។
លោកបូជាចារ្យសុន បានលើកទឹកចិត្តដល់យុវជន កុំភ័យខ្លាចជីវិតនៃការត្រាស់ហៅជាអ្នកបួស។ លោកថា ពិតមែនជីវិតនៃការត្រាស់ហៅ មានបទពិសោធផ្សេងៗ ដើម្បីប្រកាសដំណឹងល្អ ដើម្បីឱ្យគេបានដឹង គេបានឮ ដោយយើងប្រកាសអស់ពីក្ដីស្រឡាញ់ដែលយើងមាន។ ទោះបីជា ព្រះសហគមន៍យើងតូច តែបេសកកម្មសំខាន់របស់យើងគឺប្រកាសពីព្រះហឫទ័យប្រណីសន្ដោស អំពីសេចក្តីស្រឡាញ់ និងអំណរសប្បាយ។
នៅក្នុងឱកាសនេះដែរ តំណាងគ្រីស្តបរិស័ទ លោកគ្រូ ដួង សាវង់ បានថ្លែងអំណរគុណដល់លោកបូជាចារ្យទាំង៣រូប ដែលបានចំណាយកម្លាំងកាយចិត្តដ៏ធំធេងដោយលះបង់ ខ្លួនមកបម្រើព្រះសហគមន៍ ដើម្បីឱ្យយើងខ្ញុំបានរីកចម្រើននៅក្នុងជំនឿ និងទទួលព្រះហឫទ័យប្រណីសន្ដោសពីព្រះជាម្ចាស់តាមរយៈអគ្គសញ្ញានានា។ សូមព្រះជាម្ចាស់ ប្រទានព្រះពរដល់លោកទាំងបីអង្គឱ្យមានកម្លាំងបន្តប្រកាសដំណឹងល្អ និងប្រកាសពីធម៌មេត្តាករុណាដល់បងប្អូនទាំងអស់។
លោកបូជាចារ្យខ្មែរទាំងបីអង្គ បានទទួលអគ្គសញ្ញាតែងតាំងជាបូជាចារ្យក្នុងឆ្នាំ២០០១ ក្រោមអធិបតីភាពរបស់លោកអភិបាល អេមីល ដេតម្ប អភិបាលនៃព្រះសហគមន៍កាតូលិកភូមិភាគភ្នំពេញ នៅព្រះវិហារសន្តយ៉ូសែបផ្សារតូច នារាជធានីភ្នំពេញ។ លោកទាំងបី ទទួលការអប់រំ នៅជំរំជាយដែនខ្មែរថៃ មុនពេលចូលក្នុងទេវវិទ្យាល័យ។
បច្ចុប្បន្ននៅក្នុងព្រះសហគមន៍កាតូលិកកម្ពុជាមានបូជាចារ្យជាតិខ្មែរតែ៨នាក់ប៉ុណ្ណោះ និងកំពុងមាននិស្សិតទេវវិទ្យាល័យចំនួន៤នាក់ និងមានម្នាក់ជាឧបដ្ឋាក៕
ដោយ៖ ដាលីស
