ព្រះសហគមន៍កាតូលិកភូមិភាគភ្នំពេញប្រារព្ធពិធីប្រគល់មុខងារបម្រើតុសក្ការៈ ដល់បងប្រុស ប៊ុនលី និងបងប្រុស វី សំណាង ដើម្បីបម្រើព្រះជាម្ចាស់ និងព្រះសហគមន៍ ក្រោមអធិបតីភាពលោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតហស្លេ លោកអភិបាលព្រះសហគមន៍ភូមិភាគបាត់ដំបង អេនរីគេ ហ្វីការេដូ និងលោកអភិបាលព្រះសហគមន៍ភូមិភាគកំពង់ចាម ប្រ៊ុយណូ កូសម៍ នាល្ងាចថ្ងៃទី ៩ ធ្នូ ២០២១ នៅព្រះវិហារសន្តសិលា និងសន្តប៉ូល ភ្នំពេញថ្មី ដោយមានគ្រីស្តបរិស័ទចូលរួមជាច្រើនកុះករ។
លោកនាយកទេវវិទ្យាល័យ សិលា សួន ហង្សលី បានឡើងប្រកាសស្នើសូមលោកអភិបាលដើម្បីប្រគល់មុខងារបម្រើតុសក្ការ:ដល់បេក្ខជន អន់តូនី ប៊ុន លី និងបេក្ខជន យ៉ូហានបាទីស្ត វី សំណាង។
បេក្ខជនទាំងពីរទៅលុតជង្គង់នៅមុខលោកអភិបាល ដោយលោកអភិបាលអធិដ្ឋានអង្វរព្រះជាម្ចាស់ឱ្យចម្រើននៅក្នុងជំនឿ មានចិត្តស្មោះត្រង់ក្នុងភក្ដីភាពជាមួយព្រះជាម្ចាស់។
លោកអភិបាល ប្រគល់ចាននំប៉័ង និងពែងដល់បេក្ខជនទាំង២ ដើម្បីបម្រើព្រះជាម្ចាស់ និងបងប្អូនក្នុងព្រះសហគមន៍។
បងប្រុស វី សំណាង មានប្រសាសន៍ទាំងរីករាយថា មុខងារបម្រើតុសក្ការៈជាដំណាក់កាលមួយក្នុងការរៀបចំខ្លួនក្លាយទៅជាបូជាចារ្យ និងមុខងារនេះពិតជាមានសារសំខាន់ដោយសារយើងដឹងថាតុសក្ការៈ គឺជាសក្ការបូជារបស់ព្រះយេស៊ូផ្ទាល់ ដូច្នេះនៅពេលយើងបានបម្រើតុសក្ការៈ ដូចយើងបានចូលរួមនៅក្នុងសក្ការបូជាជាមួយព្រះយេស៊ូដែរ។
និស្សិតរូបនេះ បានចូលសិក្សាក្នុងទេវវិទ្យាល័យ ចំនួន៧ឆ្នាំមកហើយ គាត់បានបន្តថា «ក្នុងមុខងារនេះជួយខ្ញុំកាន់តែជិតស្និទ្ធជាមួយព្រះសហគមន៍។ ជាពិសេសនៅពេលដែលខ្ញុំបម្រើតុសក្ការៈគឺបានចូលរួមនៅក្នុងពិធីបុណ្យ ដើម្បីទទួលអាហារខាងផ្លូវវិញ្ញាណដោយស្ដាប់ព្រះបន្ទូល និងទទួលព្រះកាយព្រះគ្រីស្តដើម្បីជាកម្លាំងនៅក្នុងការធ្វើដំណើរក្នុងការត្រាស់ហៅរបស់ខ្លួន»។
បងប្រុសសំណាង ក៏បានផ្ដាំផ្ញើដល់យុវជនទាំងអស់ថា ពេលខ្លះយើងគិតថាការត្រាស់ហៅរបស់ព្រះជាម្ចាស់គឺពិបាកសម្រាប់យើងម្នាក់ៗ ប៉ុន្តែអ្វីសំខាន់សូមឱ្យយើងបើកចិត្តនិងអធិដ្ឋានដើម្បីឱ្យព្រះអង្គបំភ្លឺតាមរយៈព្រះវិញ្ញាណដ៏វិសុទ្ធដែលណែនាំឱ្យយើងយល់ឃើញកាន់តែច្បាស់នូវការត្រាស់ហៅរបស់យើង។ ដូច្នេះប្រសិនបើយើងឃើញទីសម្គាល់តូចមួយនៅក្នុងការត្រាស់ហៅជាបូជាចារ្យ សូមឆ្លើយតប រីឯដំណើរការនៃការត្រាស់ហៅ ព្រះជាម្ចាស់នឹងបង្ហាញយើងពីមួយថ្ងៃទៅមួយថ្ងៃ។
តំណាងគ្រីស្តបរិស័ទ ដួង សាវង់ បានថ្លែងនៅមុខគ្រីស្តបរិស័ទទាំងអស់ថា ថ្ងៃនេះយើងទាំងអស់គ្នាសូមអរព្រះគុណព្រះជាម្ចាស់នូវព្រះហឫទ័យប្រណីសន្ដោស ដែលណែនាំឱ្យយើងទទួលបានបងប្រុសពីរនាក់ជាអ្នកបម្រើតុសក្ការៈ និងសូមព្រះជាម្ចាស់ព្រះមេត្តាប្រោសឱ្យបងប្រុសទាំងពីរមានសុខភាពល្អ កម្លាំងមាំមួន និងបន្តដំណើរទៅមុខទៀត។
បច្ចុប្បន្នទេវវិទ្យាល័យកម្ពុជាមាននិស្សិតចំនួន៤នាក់ និងមាន៣នាក់ទៀតកំពុងត្រៀមខ្លួនដើម្បីចូលទេវវិទ្យាល័យ។
ដោយ៖ ដាលីស
