ភ្នំពេញថ្មី ថ្ងៃទី០២ ខែមករា ឆ្នាំ២០២២
| អត្ថបទទី១៖ អេសាយ ៦០,១-៦ ចូរក្រោកឡើង បញ្ចាំងពន្លឺ ដ្បិតពន្លឺរបស់អ្នកមកដល់ហើយ។ អស ៦០,១ អត្ថបទទី២៖ អេភេសូ ៣,២-៣ក.៥-៦ ដោយសារដំណឹងល្អ សាសន៍ដទៃមានសិទ្ធិចូលរួមទទួលមត៌ក។ អភ ៣,៦ ដំណឹងល្អ៖ ម៉ាថាយ ២,១-១២ ឃើញព្រះឱរសគង់នៅជាមួយនាងម៉ារីជាមាតា គេក៏នាំគ្នាក្រាបថ្វាយបង្គំព្រះអង្គ។ មថ ២,១១ |
បងប្អូនជាទីស្រឡាញ់
ពីម្សិលមិញយើងបានចូលនៅក្នុងឆ្នាំសាកល គឺឆ្នាំ២០២២នៃគ្រីស្តសករាជ ដូច្នេះជាពេលវេលាដើម្បីជូនពរដល់បងប្អូនទាំងអស់។ សូមបងប្អូនទាំងអស់គ្នា ពោរពេញដោយសេចក្តីសុខសាន្ត ពោរពេញដោយសេចក្តីសង្ឃឹម ពោរពេញដោយសុខមាលភាព និងពោរពេញដោយសេចក្តីស្រឡាញ់ដែលមកពីព្រះជាម្ចាស់សម្រាប់ឆ្នាំថ្មីនេះ។ ថ្ងៃនេះ ដែលយើងចូលនៅក្នុងឆ្នាំថ្មីដោយស្តាប់រឿងហោរាចារ្យ ដែលបានទៅសួរសុខទុក្ខព្រះកុមារយេស៊ូ។ នៅពេលយើងបានស្តាប់រឿងនេះ យើងយល់ថាតាមពិតព្រះយេស៊ូមិនយាងសម្រាប់តែអ្នកភូមិបេថ្លេហឹមដ៏តូចនេះទេ។ ប៉ុន្តែហោរាចារ្យបានធ្វើដំណើរពីចម្ងាយ ហោរាចារ្យមកពីគ្រប់ទ្វីប ហោរាចារ្យបានស្រាវជ្រាវដោយសារគេមិនកាន់សាសនាយូដាទេ។ ប៉ុន្តែ គេបានសំឡឹងមើលនៅក្នុងផ្កាយមួយយ៉ាងប្លែក នៅក្នុងផ្កាយនេះគេយល់ថាមានព្រះមួយព្រះអង្គដែលជាស្តេចមួយយ៉ាងប្លែកបានប្រសូតហើយ។
បុណ្យព្រះយេស៊ូសម្តែងឋានៈជាព្រះអង្គដែលយើងគោរពថ្ងៃនេះ យើងយល់ថាគ្រីស្តសាសនារបស់យើងមិនមែនសម្រាប់តែមនុស្សប៉ុន្មាននាក់ គឺសម្រាប់មនុស្សទាំងអស់នៅក្នុងពិភពលោកទាំងមូល។ សម្រាប់យើងដែលជាគ្រីស្តបរិស័ទ យើងត្រូវការទទួលសំណួរដែលគេសួរដល់ស្តេចហេរ៉ូដ តើស្តេចរបស់ជនជាតិយូដាដែលទើបនឹងប្រសូតគង់នៅឯណា? ខ្ញុំគិតថាសំណួរនេះសំខាន់ណាស់ឱ្យយើងចាប់ផ្តើមសួរសំណួរនេះ តើព្រះយេស៊ូនៅកន្លែងណាក្នុងជីវិតរបស់យើង? ជំហានទីមួយនៃជីវិតរបស់ហោរាចារ្យ គឺស្វែងរកព្រះយេស៊ូ បងប្អូនយើងដែលអង្គុយនៅទីនេះមានច្រើនដែលកំពុងទទួលការអប់រំជំនឿ។ អប់រំជំនឿដើម្បីស្វែងរកព្រះយេស៊ូ តើព្រះយេស៊ូនៅឯណា? ទោះបីយើងជាគ្រីស្តបរិស័ទរួចហើយ ទោះបីយើងជាបងប្រុសបងស្រី ជាលោកបូជាចារ្យ ជាលោកអភិបាលក៏ដោយ យើងត្រូវតែបន្តអស់មួយជីវិតរបស់យើងដើម្បីដើរតាមព្រះយេស៊ូ តើព្រះយេស៊ូគង់នៅឯណាសម្រាប់យើង?
ស្វែងរកព្រះយេស៊ូ ដែលមានន័យថាយើងត្រូវការរកឃើញ មិនមែនតែដើរតាម ស្វែងរក សួរសំណួរ ប៉ុន្តែយើងត្រូវការធ្វើដំណើរទៅដល់ដើម្បីរកឃើញព្រះយេស៊ូផ្ទាល់។ ដូចហោរាចារ្យបានរកឃើញព្រះយេស៊ូ គេបានសួរស្តេចហេរ៉ូដទោះបីគេបានចម្លើយមិនសូវច្បាស់ ប៉ុន្តែគេបានបន្តតស៊ូដោយដឹងថាផ្កាយនេះជាសញ្ញាមួយយ៉ាងពិសេស ដែលអាចណែនាំគេឱ្យគេរកឃើញ។ មិនមែនតែស្វែងរកគឺរកឱ្យឃើញ គេបានរកឃើញពិតមែន ដោយសារគេបានតស៊ូ គេបានយកចិត្តទុកដាក់គេបានខិតខំអស់ពីសមត្ថភាព។ គេបានមកពីចម្ងាយ ដើម្បីរកឃើញចម្លើយនៃសំណួររបស់គេ តើព្រះយេស៊ូនៅឯណា? នៅពេលគេរកឃើញគេពោរពេញដោយអំណរសប្បាយ។ នេះជាដំណាក់កាលនៃជីវិតរបស់យើងដែរ ស្វែងរកព្រះយេស៊ូ ដើម្បីរកឃើញព្រះយេស៊ូ នៅពេលយើងរកឃើញព្រះយេស៊ូហើយយើងសប្បាយចិត្តណាស់។
ដូចយើងបានស្តាប់ នៅពេលគេបានរកឃើញព្រះយេស៊ូគេពោរពេញដោយអំណរសប្បាយ ដោយសារគេបានទៅដល់គោលដៅរបស់គេ ទីដៅរបស់គេ។ “កាលហោរាចារ្យទាំងនោះឃើញផ្កាយគេសប្បាយចិត្តពន់ប្រមាណ” តើយើងសប្បាយចិត្តនៅពេលយើងរកឃើញព្រះយេស៊ូឬទេ? តើយើងសប្បាយចិត្ត នៅពេលយើងឃើញព្រះយេស៊ូដែលជាជីវិតរបស់យើងនៅក្បែរយើងឬទេ? ដោយសារអំណរសប្បាយរបស់គេ គេបានថ្វាយបង្គំដោយគោរពព្រះឱរស្តនៅក្នុងរបៀបពិសេសបំផុត “ស្វែងរក រកឃើញ និងថ្វាយបង្គំ”។ សូមចាប់អារម្មណ៍អំពីរបៀបដែលគេថ្វាយបង្គំ គេមិនថ្វាយបង្គំធម្មតាទេ គេថ្វាយបង្គំដោយបើកហិបហើយយកទ្រព្យសម្បត្តិដែលគេបានត្រៀមពីយូរមកហើយមកថ្វាយ។ នៅក្នុងនេះមានទ្រព្យសម្បត្តិបីប្រភេទដែលគេមាន ពោរពេញដោយតម្លៃ និងជាពិសេសពោរពេញដោយអត្ថន័យ៖
ទីមួយ មានមាស នៅពេលគេបានរកឃើញព្រះយេស៊ូគេបានយល់ថាព្រះអង្គជាព្រះមហាក្សត្រ គេប្រើមាសដើម្បីបង្ហាញអំពីឋានៈរបស់ព្រះយេស៊ូ។ ព្រះយេស៊ូជាព្រះមហាក្សត្រដែលគេមកថ្វាយបង្គំ ព្រះមហាក្សត្ររបស់សាសនាយូដា។ ប៉ុន្តែ យើងត្រូវការនឹកឃើញព្រះមហាក្សត្រដែលគេថ្វាយមាស គឺពិតមែនជាព្រះមហាក្សត្រដែលព្រះយេស៊ូបានបង្ហាញនៅក្នុងមួយជីវិតរបស់ព្រះអង្គ។ នៅពេលព្រះអង្គបានបង្ហាញឋានៈរបស់ព្រះអង្គជាព្រះមហាក្សត្រនៅលើផែនដីនេះ ព្រះអង្គបានលាងជើងឱ្យក្រុមគ្រីស្តទូត។ ជាព្រះមហាក្សត្រដែលដាក់ខ្លួន ជាព្រះមហាក្សត្រដែលសុខចិត្តធ្វើជាអ្នកបម្រើ ព្រះយេស៊ូជាអ្នកបម្រើនៅក្នុងឋានៈជាព្រះមហាក្សត្រ។
ទីពីរ មានគ្រឿងក្រអូប (នៅសម័យនោះគ្រឿងក្រអូបមិនមែនតែធូបដែលយើងទិញថោកៗ គ្រឿងក្រអូបជាអ្វីដែលមានតម្លៃបំផុត)។ ជាគ្រឿងក្រអូបដែលពោរពេញដោយតម្លៃ ដែលគេទុកសម្រាប់គោរពថ្វាយដល់ព្រះជាម្ចាស់។ នៅពេលនោះគេទទួលស្គាល់ថា ព្រះយេស៊ូមិនមែនតែជាព្រះមហាក្សត្រទេស គឺព្រះយេស៊ូជាព្រះជាម្ចាស់។ គេគោរពថ្វាយបង្គំដល់ព្រះយេស៊ូ ដែលជាព្រះជាម្ចាស់ថ្មីសម្រាប់គេ។ ប៉ុន្តែ គេបានស្វែងរក គេបានរកឃើញ និងគេគោរពព្រះយេស៊ូដែលជាព្រះជាម្ចាស់របស់គេរួចទៅហើយ។ ដូចពីសម័យដើម លោកអាប្រាហាំបានយកព្រះជាម្ចាស់ជាព្រះមួយព្រះអង្គគត់ នៅពេលនោះគេបានថ្វាយបង្គំដល់ព្រះយេស៊ូដែលជាកូនង៉ែតពិតមែន ប៉ុន្តែដោយទទួលស្គាល់ថាកូនង៉ែតនេះជាព្រះជាម្ចាស់ដ៏ពិតប្រាកដ។
ទីបី មានជ័រល្វីងទេស ដែលគេប្រើវាដើម្បីរៀបចំសពកុំឱ្យមានក្លិន ដើម្បីថែរក្សាសពឱ្យទុកបានយូរ។ ថ្វាយជ័រល្វីង នៅថ្ងៃដែលព្រះយេស៊ូប្រសូតដូចជាប្លែក ប៉ុន្តែហោរាចារ្យគេដឹងថាព្រះយេស៊ូត្រូវតែសោយទិវង្គត ព្រះយេស៊ូត្រូវតែរងទុក្ខលំបាកយ៉ាងខ្លាំងនៅលើផែនដីនេះ។ តាមពិតនៅពេលនោះ គេដូចជាព្យាការីដែលចេះមើលឃើញអ្វីដែលនឹងកើតឡើងនៅថ្ងៃអនាគតរបស់ព្រះយេស៊ូ។ កាលនោះព្រះយេស៊ូមានអាយុតែ១អាទិត្យ ប៉ុន្តែនៅពេលព្រះយេស៊ូមានព្រះជន្ម៣០ព្រះវស្សា នៅពេលព្រះយេស៊ូបានប្រកាសដំណឹងល្អ ព្រះយេស៊ូបានរងទុក្ខលំបាក និងសោយទិវង្គតនៅលើឈើឆ្កាងពិតមែន។ ជ័រល្វីងទេសនេះ ណែនាំឱ្យយើងនឹកឃើញព្រះយេស៊ូសោយទិវង្គតពិតមែន ប៉ុន្តែព្រះយេស៊ូមានព្រះជន្មរស់ឡើងវិញដើម្បីណែនាំឱ្យយើងចូលនៅក្នុងជីវិតអស់កល្បជានិច្ច។
បងប្អូនជាទីស្រឡាញ់ នៅពេលយើងឃើញរបៀបដែលហោរាចារ្យថ្វាយបង្គំ យើងមើលឃើញអំពីព្រះយេស៊ូយ៉ាងជាក់ស្តែង។ ព្រះយេស៊ូជាព្រះមហាក្សត្រដែលបម្រើ ព្រះយេស៊ូជាព្រះជាម្ចាស់ដែលស្រឡាញ់យើង ព្រះយេស៊ូដែលរងទុក្ខលំបាកដើម្បីប្រមូលទុក្ខលំបាករបស់យើងទាំងអស់ ដើម្បីប្រមូលអំពើបាបរបស់យើងទាំងអស់ ឱ្យយើងឆ្លងផុតសេចក្តីស្លាប់ ដើម្បីរួមរស់ជាមួយព្រះយេស៊ូ។ នេះជាអត្ថន័យនៃជីវិត នៅពេលយើងទទួលអគ្គសញ្ញាជ្រមុជទឹក នេះជាអត្ថន័យនៃជីវិតរបស់យើងជាគ្រីស្តបរិស័ទនៅលើផែនដីនេះ។ ឱ្យយើងថែរក្សាសេចក្តីសង្ឃឹមជានិច្ច ទោះបីមានទុក្ខលំបាកក៏ដោយ ទោះបីមានការពិបាកក៏ដោយ ដូចយើងមាននៅក្នុងឆ្នាំ២០២១នេះ យើងដឹងថាសេចក្តីសង្ឃឹមនៅមាន ដោយសារយើងមានព្រះយេស៊ូគ្រីស្តដែលជាជីវិតរបស់យើង។
ដូច្នេះ យើងបានឃើញដំណាក់កាលនៃជីវិតរបស់យើង ស្វែងរក រកឃើញ ថ្វាយបង្គំ ពេលយើងថ្វាយបង្គំរួចហើយយើងទៅចែករំលែក។ ហោរាចារ្យគេមិនល្ងង់ទេ គេមិនទៅជួបស្តេចហេរ៉ូដម្តងទៀតដើម្បីធ្វើរបាយការណ៍ ដោយសារគេដឹងថាស្តេចហេរ៉ូដមានគំនិតអាក្រក់ ចង់សម្លាប់ព្រះឱរស្តយេស៊ូ និងសម្លាប់ហោរាចារ្យដើម្បីកុំឱ្យគេទៅចែករំលែក…។ ដូច្នេះ គេសុខចិត្តទៅតាមផ្លូវផ្សេងដើម្បីធ្វើដំណើរទៅប្រទេសរបស់គេ ប៉ុន្តែជាពិសេសដើម្បីចែករំលែកអំណរសប្បាយដែលគេបានមើលឃើញផ្ទាល់ភ្នែក។ នៅក្នុងព្រះឱរស្តនេះ គឺព្រះជាម្ចាស់ផ្ទាល់ដែលបានប្រសូតដើម្បីឱ្យមនុស្សទាំងអស់មានសេចក្តីសុខ ដើម្បីឱ្យដំណឹងល្អនេះដូចយើងបានស្តាប់នៅក្នុងអត្ថបទទីពីរថ្ងៃនេះ “ដោយសារដំណឹងល្អនេះ សាសន៍ដទៃមានសិទ្ធិចូលរួមទទួលមរតក មានសិទ្ធិចូលរួមនៅក្នុងព្រះកាយតែមួយ មានសិទ្ធិទទួលព្រះពរ”។ នេះជាអ្វីដែលហោរចារ្យបានអនុវត្តយ៉ាងជាក់ស្តែង ដើម្បីណែនាំឱ្យសាសន៍ដទៃមានន័យថាមនុស្សទាំងអស់នៅលើផែនដីនេះ។ នៅក្នុងហោរាចារ្យដែលជាដំណាងនៃប្រជាជននីមួយៗនៅលើផែនដីនេះ ក៏ដូចជាដំណាងយើងដែលជាជនជាតិខ្មែរ បានណែនាំឱ្យយើងមានសិទ្ធិទទួលមរតក មានន័យថាជីវិតអស់កល្បជានិច្ច។ មានសិទ្ធិចូលរួមនៅក្នុងព្រះកាយតែមួយ មានន័យថាចូលនៅក្នុងមហាគ្រួសារដែលជាព្រះសហគមន៍ ចូលនៅក្នុងព្រះយេស៊ូគ្រីស្តតាមរយៈអគ្គសញ្ញាជ្រមុជទឹក មានសិទ្ធិទទួលព្រះពរពីព្រះជាម្ចាស់។ នេះជាអ្វីដែលយើងចង់ទទួលទាំងអស់គ្នា គឺព្រះពរពីព្រះជាម្ចាស់ដើម្បីមានកម្លាំងថ្មី ដើម្បីមានសេចក្តីសង្ឃឹមថ្មី ដើម្បីរួមរស់ប្រកបដោយសុខសន្តិភាពនៅក្នុងឆ្នាំ២០២២។
បងប្អូនជាទីស្រឡាញ់ យើងបានឃើញអស់ហើយ ស្វែងរក រកឃើញ ថ្វាយបង្គំ ចែករំលែក នេះជាជីវិតរបស់យើងជាគ្រីស្តបរិស័ទ។ ដូច្នេះ ខ្ញុំសូមជូនពរដើម្បីឱ្យឆ្នាំ២០២២នេះយើងបន្តស្វែងរក យើងរកឃើញព្រះយេស៊ូយ៉ាងពិតប្រាកដនៅក្នុងបងប្អូនឯទៀតៗ។ យើងថ្វាយបង្គំដល់ព្រះយេស៊ូនៅពេលយើងចូលព្រះវិហារ នៅពេលយើងអធិដ្ឋាន។ ជាពិសេស យើងចែករំលែកអំណរសប្បាយរបស់យើង ដើម្បីឱ្យមនុស្សយ៉ាងច្រើនអាចទទួលព្រះពរ ព្រះពរដែលមកពីព្រះជាម្ចាស់ ព្រះជាម្ចាស់ដែលជាជីវិតរបស់យើង ព្រះជាម្ចាស់ដែលជាសេចក្តីពិតរបស់យើង ព្រះជាម្ចាស់ដែលជាផ្លូវរបស់យើង។ នៅពេលនេះ យើងអរព្រះគុណព្រះជាម្ចាស់ដែលបានចាប់កំណើតជាមនុស្សដើម្បីឱ្យជីវិតរបស់យើងទៅជាជីវិតថ្មី។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
