នៅព្រះសហគមន៍ព្រះកុមារយេស៊ូ
បឹងទំពន់ ថ្ងៃទី០៩ ខែមករា ឆ្នាំ២០២២
| អត្ថបទទី១៖ អេសាយ ៤០,១-៥.៩-១១ ព្រះអង្គនឹងថែរក្សាប្រជារាស្ដ្ររបស់ព្រះអង្គ ដូចគង្វាលថែរក្សាហ្វូងចៀមរបស់ខ្លួន។ អស ៤០,១១ អត្ថបទទី២៖ ទីតុស ២,១១-១៤.៣,៤-៧ ព្រះអង្គបានសង្គ្រោះយើង តាមព្រះហឫទ័យមេត្តាករុណារបស់ព្រះអង្គ គឺមិនមែនមកពីយើងបានប្រព្រឹត្តអំពើសុចរិតនោះទេ។ ទត ៣,៥ ដំណឹងល្អ៖ លូកា ៣,១៥-១៦.២១-២២ លោកនឹងធ្វើពិធីជ្រមុជឲ្យអ្នករាល់គ្នាក្នុងព្រះវិញ្ញាណដ៏វិសុទ្ធ។ លក ៣,១៦ |
“ព្រះជាម្ចាស់បានបង្កើតយើង”
បងប្អូនជាទីស្រឡាញ់
នៅពេលយើងបន្តពីបុណ្យព្រះយេស៊ូប្រសូត ភ្លាមយើងបានគោរពគ្រួសារដ៏វិសុទ្ធ នៅថ្ងៃនេះយើងគោរពព្រះយេស៊ូទទួលពិធីជ្រមុជទឹក។ ប្រសិនបើយើងពិចារណា គ្រួសារដ៏វិសុទ្ធ ពិធីជ្រមុជទឹកដើម្បីចូលនៅក្នុងមហាគ្រួសាររបស់ព្រះជាម្ចាស់។ ពិតមែនគ្រួសារជាអាទិភាពសម្រាប់យើងទាំងអស់គ្នា ពីដើមព្រះជាម្ចាស់បានកើតនៅក្នុងគ្រួសារ។ នៅពេលព្រះយេស៊ូបានចាប់ផ្តើមប្រកាសដំណឹងល្អ សញ្ញាសម្គាល់ទីមួយដែលព្រះយេស៊ូបានបង្ហាញ គឺនៅពេលព្រះអង្គចូលរួមនៅក្នុងពិធីមង្គលការ មានន័យថាគ្រួសារសំខាន់ណាស់។
ថ្ងៃនេះខ្ញុំរំភើប ព្រឹកមិញមុនខ្ញុំធ្វើដំណើរមកមានកូនៗដែលទទួលអគ្គសញ្ញាព្រះកាយព្រះគ្រីស្តនៅព្រះវិហារភ្នំពេញថ្មីមកជួបខ្ញុំ ដែលឪពុកម្តាយគាត់មានមកពីចំការទៀង និងជុំគិរី។ ពេលមកដល់ទីនេះខ្ញុំមិនដឹងថាខ្ញុំធ្វើពិធីជ្រមុជទឹកដល់អ្នកណា ខ្ញុំភ្ញាក់ហើយខ្ញុំនឹកឃើញថាក្រុមគ្រួសារនៅក្នុងព្រះសហគមន៍របស់យើង ជាគ្រួសារដ៏តូចមួយដែលយើងស្គាល់គ្នាទៅវិញទៅមក។ នៅពេលខ្ញុំមកដល់ប្រទេសកម្ពុជា អាទិត្យទី២ដែលខ្ញុំនៅខ្មែរខ្ញុំបានទៅមាត់ក្រសាស់ ជួបជាមួយលោកតា (តាគេត)។ បន្តិចម្តងៗ ខ្ញុំដឹងថាលោកតាជាកូនចៅរបស់លោករ៉ាបាំង (ជាមរណៈសាក្សីនៅក្នុងព្រះសហគមន៍កម្ពុជាយើង)។ ក្រោយមកពេលខ្ញុំនៅស្វាយស៊ីសុផុន ខ្ញុំបានស្គាល់លោកតាជាជាងឈើ ហើយគាត់បានជួយសាងសង់ព្រះវិហារឱ្យខ្ញុំនៅពេលខ្ញុំកំពុងរៀនភាសាខ្មែរ។ បន្ទាប់មក ខ្ញុំបានស្គាល់លោកគ្រូ ជៀង ដែលជាគ្រីស្តបរិស័ទដំបូងនៅចំការទៀង។ ហើយបន្ទាប់មកទៀត ខ្ញុំស្គាល់មីង អាន ដែលជាគ្រីស្តបរិស័ទដំបូងនៅជុំគិរី ពេលខ្ញុំទៅបម្រើព្រះសហគមន៍នៅទីនោះ។ ពួកគាត់ទាំងអស់គ្នាដែលខ្ញុំបានរៀបរាប់ខាងលើ ជាលោកតាលោកយាយរបស់កូនៗយើងដែលនឹងទទួលអគ្គសញ្ញាជ្រមុជទឹកថ្ងៃនេះ។
ដូច្នេះ ពេលខ្ញុំមើលឃើញនេះលោកតាលោកយាយរបស់យើង សុទ្ធតែជាមូលដ្ឋានគ្រឹះនៅក្នុងព្រះសហគមន៍ដ៏តូចរបស់យើង។ ពីមុនសម័យប៉ុលពត បន្តពីសម័យប៉ុលពត រហូតដល់សព្វថ្ងៃយើងមានកូនចៅ ពេលយើងឃើញដូចនេះយើងដឹងថាយើងជាគ្រួសារយ៉ាងជិតស្និទ្ធ។ ជាគ្រួសារ ដែលកំពុងកសាងព្រះសហគមន៍ពីមួយថ្ងៃទៅមួយថ្ងៃ ថ្ងៃនេះយើងមានកូនចៅរបស់យើងទាំងអ្នកដែលទទួលអគ្គសញ្ញាព្រះកាយព្រះគ្រីស្តដំបូង ទាំងអ្នកដែលទទួលអគ្គសញ្ញាជ្រមុជទឹកថ្ងៃនេះ។ ពិតមែន យើងដឹងថាព្រះសហគមន៍បានចាប់ផ្តើមរីកចម្រើន ចាប់ផ្តើមពីកន្លែងដ៏តូចតាច ដោយសារមាត់ក្រសាស់ជាព្រះសហគមន៍ប្រវត្តិសាស្ត្រមុនសម័យប៉ុលពត ជាព្រះសហគមន៍ពីដើមនៅក្នុងព្រះសហគមន៍កាតូលិកភូមិភាគភ្នំពេញ។ ព្រះសហគមន៍ជុំគិរី និងចំការទៀងជាព្រះសហគមន៍ខ្មែរដំបូងដែលរីកចម្រើនពី២០ឆ្នាំកន្លងមកនៅក្នុងភូមិភាគភ្នំពេញ។ ឥលូវនេះយើងនៅគ្រប់ទីកន្លែងក្នុងរាជធានីភ្នំពេញ មានខ្លះនៅភ្នំពេញថ្មី មានខ្លះនៅបឹងទំពន់ ខ្លះនៅផ្សារតូច…។ បន្តិចទៀត ខ្ញុំនឹងធ្វើអគ្គសញ្ញាអាពាហ៍ពិពាហ៍ដល់ប៉ុន្មានគូរ ដែលយើងបានស្គាល់ឪពុកម្តាយពីយូរមកហើយ។
យើងជាគ្រួសារមួយដែលធ្វើដំណើរជាមួយគ្នា កម្មវិធីដែលយើងមានថ្ងៃនេះទាំងទទួលព្រះកាយទាំងទទួលអគ្គសញ្ញាជ្រមុជទឹក ណែនាំឱ្យយើងឃើញពិតមែនព្រះអង្គជាបុត្រដ៏ជាទីស្រឡាញ់របស់យើង យើងបានបង្កើតព្រះអង្គនៅថ្ងៃនេះ។ ថ្ងៃនេះ យើងអាចនិយាយបានថាបងប្អូនទាំងអស់ជាបុត្រធីតារបស់ព្រះជាម្ចាស់ យើងស្តាប់ព្រះសូរសៀងរបស់ព្រះជាម្ចាស់ដែលមានព្រះបន្ទូលថា “យើងបានបង្កើតបងប្អូននៅថ្ងៃនេះ”។ ជាពិធីជ្រមុជទឹក ជាព្រះកាយព្រះគ្រីស្តដើម្បីភ្ជាប់នៅក្នុងមហាគ្រួសាររបស់យើង។ មហាគ្រួសាររបស់យើង សម្រាប់ឆ្នាំថ្មីនេះខ្ញុំជឿថាទាំងអស់គ្នាយើងចង់មានសេចក្តីសុខ ជាពិសេសយើងចង់មានសុភមង្គល។ នៅក្នុងអត្ថបទទី២ “ព្រះជាម្ចាស់បានសម្តែងព្រះហឫទ័យប្រណីសន្តោសមក ដើម្បីសង្រ្គោះមនុស្សទាំងអស់”។ នេះជាដំណឹងល្អ ដែលថ្ងៃនេះយើងបានឃើញយ៉ាងជាក់ស្តែងសម្រាប់កូនៗរបស់យើង និងសម្រាប់យើងទាំងអស់គ្នាក្នុងឆ្នាំនេះ។ ដោយដឹងថាព្រះជាម្ចាស់សម្តែងព្រះហឫទ័យប្រណីសន្តោសមក ដើម្បីសង្រ្គោះមនុស្សទាំងអស់ នេះជាអំណរសប្បាយដែលយើងទទួល នេះជាសុភមង្គលដែលយើងចង់បាន។
នៅខែកុម្ភៈខាងមុខនេះ យើងនឹងមានកម្មវិធីបូជនីយេសក៍ចរក្រោមប្រធានបទ “សុភមង្គល” ដោយសារនេះជាអ្វីដែលយើងចង់មាន។ ប្រសិនបើ យើងគិតពិចារណាជាងមួយឆ្នាំកន្លងមក ដែលណែនាំឱ្យយើងពិបាក ណែនាំឱ្យយើងភ័យខ្លាច ណែនាំឱ្យយើងមានរឿងយ៉ាងច្រើននៅក្នុងសង្គម។ ណែនាំឱ្យយើងយល់ថា ពិតមែនសុភមង្គលជាគោលបំណងរបស់យើង ជាអ្វីដែលយើងចង់មាននៅក្នុងជីវិតរបស់យើង។ ប៉ុន្តែ តើជាសុភមង្គលអ្វី? ជាសុភមង្គលតាមលោកីយ ឬសុភមង្គលតាមរបៀបព្រះជាម្ចាស់។ នៅក្នុងអត្ថបទទី២ “ព្រះហឫទ័យប្រណីសន្តោសនេះអប់រំយើង ឱ្យយើងលះបង់ចិត្តដែលមិនចេះគោរពប្រណិប័តន៍ព្រះជាម្ចាស់ចោល ឱ្យលះបង់សេចក្តីប៉ងប្រាថ្នាខាងលោកីយ ដើម្បីឱ្យយើងរស់នៅក្នុងលោកនេះដោយមានចិត្តធ្ងន់ សុចរិត និងគោរពប្រណិប័តន៍ព្រះជាម្ចាស់” នេះជាសុភមង្គលដ៏ពិតប្រាកដដែលយើងត្រូវតែមាន។ មិនថាលោកីយមិនល្អ ប៉ុន្តែប្រសិនបើយើងដើរតាមសុភមង្គលនៃលោកីយ ណែនាំឱ្យយើងភ័យខ្លាច។
សព្វថ្ងៃយើងមិនចង់មើលព័ត៌មានសោះ ដោយសារពេលយើងមើលព័ត៌មានជាពិសេសព័ត៌មានអន្តរជាតិសុទ្ធតែការភ័យខ្លាច ណែនាំឱ្យយើងព្រួយបារម្ភ។ ប៉ុន្តែ ប្រសិនបើយើងគិតអំពីសុភមង្គលតាមលោកីយ របៀបដែលគេផ្សព្វផ្សាយជារៀងរាល់ថ្ងៃ គេបានពុះដីឡូដ៍ គេសាងសង់បុរី ផ្ទះល្វែងដើម្បីលក់ថោកៗ…។ គេបានដាក់ថាគ្មានការប្រាក់ ដោយមានលេខសូន្យធំៗ ពេលយើងមិនបានមើលព័ត៌មានលម្អិតដែលគេសរសេរ យើងកក់លុយចំនួនណាមួយ និងបង់ប្រាក់ប្រចាំខែតាមចំនួនដែលគេកំណត់។ ពេលយើងមើលព័ត៌មាននេះទាំងអស់ ប្រហែលណែនាំឱ្យយើងមានសុភមង្គលតាមលោកីយ ប៉ុន្តែក៏ប្រហែលណែនាំឱ្យយើងមានបញ្ហាច្រើន។ បញ្ហានៅក្នុងគ្រួសារ បញ្ហានៅក្នុងសង្គម មានខ្លះគេច្រណែន មានខ្លះគេលោភលន់ មានខ្លះគេអាត្មានិយម មានខ្លះឥតមានលុយដើម្បីសម្រុះសម្រួល។ គេចាប់ផ្តើមខ្ចីលុយ ហើយដោយសារកូវីដ-១៩ណែនាំឱ្យយើងសងលុយធនាគារមិនបាន ដូច្នេះណែនាំឱ្យយើងមានបញ្ហាកើតឡើងច្រើន នៅពេលយើងរស់នៅក្នុងរបៀបដែលលោកីយណែនាំឱ្យយើង។
ប៉ុន្តែ សុភមង្គលដែលព្រះជាម្ចាស់ចង់ឱ្យយើងមាន គឺសុភមង្គលនៅក្នុងលោកីយនេះ ដោយសារយើងមិនរស់នៅក្នុងពិភពផ្សេង។ យើងនៅក្នុងពិភពលោកដែលព្រះជាម្ចាស់បានបង្កើត យើងរស់នៅលើផែនដីរបស់យើងដែលព្រះជាម្ចាស់បានបង្កើត។ យើងនៅរស់នៅក្នុងសង្គមកម្ពុជាដែលយើងរស់នៅសព្វថ្ងៃ យើងមកពីជនបទរស់នៅទីក្រុង យើងរកស៊ី យើងធ្វើការ យើងរៀននៅសាលាជាមួយគេ។ ប៉ុន្តែ អ្វីដែលសំខាន់ឱ្យយើងមើលអ្វីដែលជាមូលដ្ឋានគ្រឹះ ប្រសិនបើយើងពិចារណាអំពីបញ្ហាដែលកើតឡើងនៅក្នុងមួយឆ្នាំកន្លងមក យើងបាត់បង់សេចក្តីសុខច្រើន។ យើងអរព្រះគុណព្រះជាម្ចាស់ ដែលថ្ងៃស្អែកបើកសាលាធម្មតាជាផ្លូវការ យើងអរព្រះគុណព្រះជាម្ចាស់ដែលសង្គមរបស់យើងពោរពេញដោយជីវិត។
ពេលយើងមើលពីថ្ងៃទី០៧ដល់ទី០៩ ខែមករាកន្លងមក ប្រសិនបើយើងមើលរូបភាពដែលគេបង្ហោះលើបណ្តាញផ្សព្វផ្សាយសង្គមនានា ពីកែប ពីកំពត ពីកំពង់សោម ពីសៀមរាប ពីមណ្ឌលគិរី… មានមនុស្សយ៉ាងច្រើនដើរលេងសប្បាយ ដូច្នេះយើងអរព្រះគុណព្រះជាម្ចាស់។ ប៉ុន្តែ នៅពេលយើងមានបទពិសោធន៍នៅក្នុងមួយឆ្នាំកន្លងមក យើងបានយល់ថានៅពេលយើងមានអារម្មណ៍ថាបាត់បង់ទាំងអស់ យើងនៅសល់ព្រះជាម្ចាស់។ ព្រះជាម្ចាស់ដែលមិនបានលះបង់ចោលយើង ព្រះជាម្ចាស់បានណែនាំឱ្យយើងរស់នៅក្នុងលោកីយនេះ ដោយរកឃើញសេចក្តីស្រឡាញ់ដែលមកពីព្រះជាម្ចាស់ ដែលណែនាំឱ្យយើងចេះស្រឡាញ់គ្នាទៅវិញទៅមក។
ខ្ញុំបាននឹកឃើញថា យើងអាចគោរពបុណ្យព្រះយេស៊ូប្រសូតតាមលោកីយស្រួលណាស់ នៅក្នុងឆ្នាំមុននេះតាំងពីពាក់កណ្តាលខែតុលា នៅគ្រប់ទីកន្លែងគេចាប់ផ្តើមតុបតែងដើម្បីអបអរសាទរបុណ្យនេះ។ យើងអាចធ្វើតាមរបៀបនេះ ដោយតុបតែងយ៉ាងស្អាត ដាក់កាដូយ៉ាងស្អាត ជូនកាដូគ្នាទៅវិញទៅមក យើងអាចធ្វើតាមលោកីយ។ ក៏ប៉ុន្តែ សម្រាប់យើងយើងដឹងហើយថារបៀបដែលយើងបានគោរពព្រះយេស៊ូប្រសូតនៅក្នុងក្រោលសត្វ ណែនាំឱ្យយើងយល់គឺព្រះជាម្ចាស់ដែលស្រឡាញ់ខ្ញុំ។ ព្រះជាម្ចាស់បានណែនាំឱ្យខ្ញុំចេះស្រឡាញ់អ្នកដទៃ ព្រះជាម្ចាស់ណែនាំឱ្យខ្ញុំចេះចែករំលែកឱ្យគេដែរ។ នេះជាបុណ្យព្រះយេស៊ូប្រសូត តាមអត្ថន័យដ៏ពិតប្រាកដរបស់យើង ព្រះជាម្ចាស់ចាប់កំណើតជាមនុស្សដើម្បីធ្វើដំណើរជាមួយយើង ដោយដឹងថាយើងមានទីពឹងមួយយ៉ាងពិសេស។ ក្មេងៗដែលនឹងទទួលអគ្គសញ្ញាជ្រមុជទឹកថ្ងៃនេះ មកពីឪពុកម្តាយ មកពីលោកតាលោកយាយដែលបានណែនាំឱ្យកូនទៅជាគ្រីស្តបរិស័ទ ដោយដឹងថានៅក្នុងព្រះជាម្ចាស់យើងមានថ្មដាជាមូលដ្ឋានគ្រឹះដែលយើងអាចកសាងជីវិតរបស់យើងបាន។
ថ្ងៃអាទិត្យយើងអាចគោរពតាមគេដែរ យើងអាចដើរលេងដូចគេ ប៉ុន្តែសម្រាប់យើងសុភមង្គលដែលយើងមានគឺយើងដឹងថាថ្ងៃអាទិត្យ ខ្ញុំត្រូវចូលព្រះវិហារដើម្បីអធិដ្ឋាន។ ដើម្បីស្តាប់ព្រះបន្ទូល ដើម្បីទទួលព្រះកាយព្រះគ្រីស្ត ដើម្បីនឹកឃើញជីវិតរបស់យើងពេញមួយអាទិត្យកន្លងមក ដើម្បីទទួលកម្លាំងសម្រាប់អាទិត្យថ្មី ដើម្បីត្រៀមខ្លួន។ ដោយដឹងថាព្រះជាម្ចាស់ស្រឡាញ់ខ្ញុំពិតមែន ក្រោយមកខ្ញុំអាចដើរលេងដោយសារខ្ញុំបានទទួលកម្លាំងពីព្រះជាម្ចាស់ហើយ។ ដូច្នេះ គ្រប់សកម្មភាពយើងមានរបៀបពីរ តាមលោកីយសុទ្ធ ឬយកជំនឿរបស់យើងជាអាទិភាព។ នៅក្នុងជីវិតរបស់យើងប្រចាំថ្ងៃក៏ដូចគ្នាដែរ អ្នកខ្លះនិយាយថាខ្ញុំជាគ្រីស្តបរិស័ទតែថ្ងៃអាទិត្យ នៅពេលខ្ញុំចូលព្រះវិហារ។ មានខ្លះទៀតថា ខ្ញុំជាគ្រីស្តបរិស័ទតែថ្ងៃបុណ្យធំៗក្នុងព្រះសហគមន៍ (បុណ្យព្រះយេស៊ូប្រសូត្រ បុណ្យចម្លង…)។
ឆ្នាំនេះបុណ្យចម្លងត្រូវថ្ងៃបុណ្យចូលឆ្នាំខ្មែរ ខ្ញុំសង្ឃឹមថាបងប្អូនមិនភ្លេចមកព្រះវិហារ កុំឱ្យយើងធ្វើជាគ្រីស្តបរិស័ទតាមកាលៈទេសៈ ឬតាមពេលវេលារបស់យើង។ ពីមួយថ្ងៃទៅមួយថ្ងៃ ឱ្យយើងយល់ថាខ្ញុំជាគ្រីស្តបរិស័ទនៅក្នុងសង្គមបច្ចុប្បន្ននេះ ខ្ញុំត្រូវធ្វើដូចម្តេចដើម្បីណែនាំឱ្យកូនខ្ញុំមានសេចក្តីសុខ។ កូនដែលទទួលព្រះកាយថ្ងៃនេះ គេប្រាប់ខ្ញុំថាគេភ្ញាក់ពីដេកម៉ោង៣ទៀបភ្លឺ ដោយសារគេរំភើបពេកគេខ្លាចទៅព្រះវិហារមិនទាន់។ នេះជាអ្វីដែលយើងបានឃើញ ចេញពីឪពុកម្តាយ ចេញពីលោកតាលោកយាយដែលបានណែនាំ។ នេះជាជីវិតរបស់យើងជាគ្រីស្តបរិស័ទ ដោយដឹងថាពិតមែនយើងមានអំណរសប្បាយ នៅពេលយើងជួបជាមួយព្រះយេស៊ូ។ យើងមានអំណរសប្បាយនៅពេលចូលព្រះវិហារ យើងមានអំណរសប្បាយនៅពេលយើងចេះស្រឡាញ់គេនៅក្នុងសង្គមជាប្រចាំថ្ងៃ។ ថ្ងៃនេះ យើងនឹងចែកគ្រឿងឧបភោគបរិភោគដែលគ្រីស្តបរិស័ទយើងបានរួមគ្នាពីខែធ្នូមក ជូនដល់គ្រួសារក្រីក្រមួយចំនួន។ នេះជាជីវិតរបស់យើងប្រចាំ ចែករំលែកនិងអនុវត្តអ្វីដែលយើងទទួលនៅក្នុងអំណរសប្បាយពីព្រះជាម្ចាស់ ដោយសារព្រះជាម្ចាស់ចង់ឱ្យយើងទទួលសុភមង្គលដ៏ពិតប្រាកដ។
យើងខ្ញុំសូមអរព្រះគុណព្រះជាម្ចាស់ ដែលបានជ្រើសរើសយើងខ្ញុំ ឱ្យយើងដឹងថា “ថ្ងៃនេះពិតមែនយើងជាបុត្រាបុត្រីដ៏ជាទីស្រឡាញ់របស់ព្រះជាម្ចាស់ ព្រះជាម្ចាស់បានបង្កើតយើងហើយ”។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
