កុមារជំទង់អាយុ១៣ដល់១៧ឆ្នាំចំនួន ៨៧នាក់ មកពី៤មណ្ឌលសកម្មភាពនៃព្រះសហគមន៍កាតូលិកភូមិភាគភ្នំពេញ ចូលរួមសិក្ខាសាលាក្រោមប្រធានបទ “មិត្តសម្លាញ់ជីវិត” ដែលដឹកនាំដោយ ការិយាល័យយុវជន ជំទង់ កុមារ និងគ្រួសារ នៃព្រះសហគមន៍ភូមិភាគភ្នំពេញ។ កម្មវិធីនេះចាប់ផ្ដើមនាថ្ងៃទី១៥ និង១៦ មករា ២០២២ នៅព្រះវិហារសន្តសិលា និងសន្តប៉ូល ភ្នំពេញថ្មី។

តាមការឱ្យដឹងពីកញ្ញា នៅ ម៉ាលីន អ្នកទទួលខុសត្រូវកម្មវិធីជំទង់ បានឱ្យដឹងថា កម្មវិធីសិក្ខាសាលានេះធ្វើឡើងក្នុងគោលបំណង៤សំខាន់ៗ៖ ១. ដើម្បីពង្រឹងផ្លូវវិញ្ញាណរបស់ជំទង់ឱ្យកាន់តែរឹងមាំ។ ២. ចែករំលែកបទពិសោធជីវិតជាបទពិសោធនៃរបៀបរស់នៅ។ ៣. ឱ្យគាត់រៀនរស់នៅជាមួយព្រះសហគមន៍យ៉ាងជិតស្និទ្ធដោយចូលរួមបម្រើព្រះសហគមន៍កាន់តែច្រើន។ ៤. ណែនាំឱ្យពួកគាត់មានអំណរសប្បាយដោយសារយើងខានចួបជុំគ្នាជាយូរមកហើយ។
ម៉ាលីន បន្ថែមថា កម្មវិធីលើកនេះ កុមារទាំងអស់មានការចាប់អារម្មណ៍ខ្លាំងទៅលើប្រធានបទ ដោយមិត្តសម្លាញ់ធ្វើឱ្យគាត់មានអារម្មណ៍ថា ជិតស្និទ្ធ និងត្រូវរក្សាការពារ។
អ្នកចូលរួមក្នុងកម្មវិធីលើកនេះ មានជំទង់ខ្លះ មិនដែលស្គាល់ព្រះសហគមន៍សោះ ក៏មានចំណាប់អារម្មណ៍ចូលរួម ចង់ស្គាល់ព្រះសហគមន៍និងអ្វីផ្សេងៗដែលពាក់ព័ន្ធនឹងព្រះសហគមន៍ ជាពិសេសប្រធានបទរបស់យើងគឺ “មិត្តសម្លាញ់ជីវិត”។ ម៉ាលីនបញ្ជាក់ថា «ពួកគាត់បានចាប់យកនូវអ្វីដែលកម្មវិធីយើង បានដាក់ និងអនុវត្តបានល្អមែនទែន និងជាពិសេសក្រុមជំទង់ទាំងនេះបានចូលរួមការការពារបរិស្ថានទាំងព្រះសហគមន៍និងខាងក្រៅ»។
កុមារា វ៉ាន់ សៀវហ្វុង មកពីព្រះសហគមន៍ពោធិ៍ធំ-ក្ដីកណ្ដាល បាននិយាយថា «មិត្តសម្លាញ់ជីវិត ធ្វើឱ្យខ្ញុំទទួលបានចំណេះ(យល់)ដឹងច្បាស់ពីខ្លួនឯង និងអ្នកនៅជុំវិញ មិនតែប៉ុណ្ណោះខ្ញុំអាចយល់ពីបរិស្ថាន និងសង្គមខាងក្រៅ»។ សៀវហ្វុង បន្ថែមថា បើយើងគ្មានមិត្តក្នុងជីវិតទេយើងក៏ពិបាកដើរតែម្នាក់ឯងបាន។ យើងរស់នៅចាំបាច់ត្រូវស្គាល់មិត្តភក្ដិ បងប្អូន និងមនុស្សដែលរស់នៅជុំវិញយើង។

កុមារជំទង់ ទូច ឌីណា ជាសិស្សថ្នាក់ទី៨ខនៃវិទ្យាល័យដុនបូស្កូ បាននិយាយថា នាងចង់បានបទពិសោធទាក់ទងនឹងមិត្តនិងពីរបៀបរក្សាមិត្ត។ ក្រោយពីបានចូលរួមសិក្ខាសាលានេះ ឌីណា យល់ដឹងអំពីការរក្សាមិត្តភាព «ដោយចេះស្រឡាញ់ យោគយល់ លើកលែងទោសឱ្យគ្នា ចេះលើកទឹកចិត្តគ្នា និងផ្ដល់ឱកាសឱ្យគ្នាទៅវិញទៅមក គឺដើម្បីឱ្យមិត្តភាពបានយូរអង្វែង»។ នាងបន្ថែមថា «ខ្ញុំចង់ផ្ដាំទៅមិត្តរបស់ខ្ញុំថាខ្ញុំនៅតែស្រឡាញ់គាត់ មិនចង់ឱ្យបាត់បង់មិត្តណាទាំងអស់»។

បន្ទាប់ពីរាជរដ្ឋាភិបាលកម្ពុជាបើកឱ្យមានដំណើរការនៃសកម្មភាពគ្រប់វិស័យឡើងវិញ ការិយាល័យយុវជន ជំទង់ កុមារ និងគ្រួសារ ក្នុងភូមិភាគភ្នំពេញ បានបង្កើតឱ្យមានកម្មវិធីសិក្ខាសាលាអំពី មិត្តសម្លាញ់ជីវិត នេះឡើងនៅតាម តំបន់មួយចំនួនក្នុងមណ្ឌលសកម្មភាពនានារបស់ព្រះសហគមន៍ក្នុងភូមិភាគភ្នំពេញ។ នេះ ជាសិក្ខាសាលាលើកទី២ហើយ ដោយលើកទី១ គឺធ្វើនៅជ្រៃធំ ស្រុកកោះធំ ខេត្តកណ្តាល កាលពីថ្ងៃទី៨និង៩ មករា ២០២២៕

ដោយ៖ ដាលីស