ក្នុងអភិបូជាបុណ្យសព អេលីហ្សា (លីកេ) កូអ៊ីណេហ្រ្គាច
នៅព្រះសហគមន៍ព្រះកុមារយេស៊ូ បឹងទំពន់
ថ្ងៃទី២៤ ខែមករា ឆ្នាំ២០២២
លោកអភិបាល លោកឪពុក បងប្រុសបងស្រី មិត្តសម្លាញ់ និងក្រុមគ្រួសាររបស់លីកេ ជាទីគោរពស្រឡាញ់
ថ្ងៃនេះ យើងជួបជុំគ្នានៅក្នុងព្រះវិហារបឹងទំពន់ ក៏ដូចជាមួយបងប្អូននៅប៉ុន្មានប្រទេសដូចជាប្រទេសប៊ែលហ្ស៊ីក (ប្រទេសកំណើត) ប្រទេសអ៊ីតាលី ប្រទេសកូរ៉េ ប្រទេសភីលីពីន ដែលលីកេធ្លាប់រស់នៅនិងមានមិត្តភក្តិច្រើននៅទីនោះ។ រួមជាមួយគ្នា យើងអរព្រះគុណព្រះជាម្ចាស់សម្រាប់ជីវិតដែលលីកេបានផ្ញើនៅក្នុងសេចក្តីស្រឡាញ់ សម្រាប់ប្រទេសកម្ពុជា និងសម្រាប់យើងទាំងអស់គ្នា។ ជាពេលវេលាដើម្បីទូលអង្វរព្រះជាម្ចាស់ សូមព្រះអង្គស្វាគមន៍លីកេនៅក្នុងមហាគ្រួសារនៅស្ថានបរមសុខ រួមជាមួយអូនេស្តា ពីយូរឆ្នាំហើយដែលគាត់បានចាប់ផ្តើមរស់នៅប្រទេសកម្ពុជានៅឆ្នាំ១៩៨២។ រួមជាមួយបងប្អូនទាំងអស់ ដែលលីកេបានធ្វើការជាមួយនឹងសព្វថ្ងៃនៅស្ថានបរមសុខរួមជាមួយព្រះបិតាហើយ។
ខ្ញុំសូមស្វាគមន៍ក្រុមគ្រួសាររបស់លីកេ ដែលបានមកពីប្រទេសប៊ែលហ្ស៊ីក ខ្ញុំសូមស្វាគមន៍មិត្តភក្តិដែលបានធ្វើការជាមួយលីកេ មិត្តភក្តិដែលបានស្គាល់លីកេ។ ជាពិសេសតាមរយៈសាលាមត្តេយ្យនៅក្នុងភូមិភាគភ្នំពេញ ក៏ដូចជាតាមរយៈអង្គការដែលគាត់បានរៀបចំ ដើម្បីជួយអភិវឌ្ឍន៍ទឹកស្អាតនៅប៉ុន្មានខេត្តទូទាំងប្រទេសកម្ពុជា។
តាមពិត ខ្ញុំបានស្គាល់លីកេពីយូរឆ្នាំមកហើយគឺនៅឆ្នាំ២០០២ នៅពេលលោកអភិបាល អេមីល បានសុំឱ្យខ្ញុំទទួលខុសត្រូវគណៈកម្មការអប់រំការសិក្សាកាតូលិក ក្នុងភូមិភាគភ្នំពេញ។ នៅពេលនោះយើងបានធ្វើការរួមជាមួយគ្នា សម្រាប់សាលាមត្តេយ្យដែលគាត់មានបទពិសោធន៍ពីយូរឆ្នាំ។ ខ្ញុំបានជួបគាត់ជាច្រើនដងច្រើនសារនៅក្នុងការប្រជុំអង្គការកាតូលិក ក៏ដូចជានៅគ្រប់សកម្មភាពដែលយើងមាននៅក្នុងភូមិភាគភ្នំពេញ អភិបូជាជាភាសាអង់គ្លេស និងអភិបូជានៅក្នុងព្រះវិហារបឹងទំពន់នេះ។
យើងអាចនិយាយបានថា នៅកន្លែងណាដែលមានសកម្មភាពមនុស្សធម៌របស់ព្រះសហគមន៍ កន្លែងហ្នឹងលីកេនៅដោយមានចិត្តស្មោះត្រង់។ ដែលមិនចេះអួតខ្លួន អង្គុយដោយស្ងៀមស្ងាត់ ប៉ុន្តែមានស្នាមញញឹមគ្រប់ពេលវេលា និងមានពាក្យមួយម៉ាត់ពីរម៉ាត់ ដើម្បីលើកទឹកចិត្តនិងជម្រាបសួរនិងការសួរសុខទុក្ខ។ អាចនិយាយបានថា មានតែលីកេម្នាក់ដែលបានឆ្លើយតបគ្រប់សារអេឡិចត្រូនិច (អ៊ីម៉ែល) ដែលខ្ញុំបានផ្ញើជាប្រចាំសម្រាប់ភូមិភាគភ្នំពេញ។ គាត់បានសរសេរពីរបីម៉ាត់ ដោយផ្ញើការអធិដ្ឋាន និងការនឹករលឹកជានិច្ច។ លីកេបានផ្ញើជីវិតទៅលើព្រះជាម្ចាស់ទាំងស្រុង ពិតមែនលីកេបានយកចិត្តទុកដាក់ធ្វើជាមេម្ស៉ៅនៅក្នុងសង្គមកម្ពុជា ក៏ដូចជានៅក្នុងព្រះសហគមន៍របស់យើង។ ដើម្បីណែនាំឱ្យមនុស្សទាំងអស់ដែលគាត់បានជួប អាចមានសេចក្តីសង្ឃឹមនឹងរីកចម្រើនបន្តិចម្តងៗ។ យើងអាចនិយាយបានថា លីកេមានរបៀបមួយប្លែកដើម្បីជិតស្និទ្ធជាមួយមនុស្សទាំងអស់ ណែនាំឱ្យយើងមានអារម្មណ៍យើងមានសេចក្តីសុខនៅពេលមានលីកេនៅ។ ស្នាមញញឹមរបស់លីកេ គឺដើម្បីណែនាំឱ្យយើងបានទទួលការលើកទឹកចិត្ត និងកម្លាំងកាយកម្លាំងចិត្តថែមទៀត។
លីកេ មានវត្តមានមួយដែលចេញពីចិត្តរបស់គាត់ ដើម្បីណែនាំឱ្យមនុស្សម្នាក់អាចតស៊ូថែមទៀតនៅក្នុងជីវិត។ របៀបដែលលីកេ បានលាចាកពីផែនដីនេះនៅថ្ងៃទី២៨ ខែធ្នូ ឆ្នាំ២០២១ នេះជារបៀបគាត់តែម្តងដោយស្ងៀមស្ងាត់ មិនចង់រំខានយើងដើម្បីឱ្យគាត់បានទៅជួបជាមួយព្រះជាម្ចាស់។ ខ្ញុំជឿថានៅថ្ងៃនេះ ក្នុងស្នាមញញឹមរបស់លីកេនៅស្ថានបរមសុខ កំពុងនិយាយដល់យើងកុំពិបាកចិត្ត សូមថែរក្សាជំនឿ សូមរឹងមាំនៅក្នុងសេចក្តីសង្ឃឹម សូមចែករំលែកសេចក្តីស្រឡាញ់របស់ព្រះជាម្ចាស់ជានិច្ច។
សូមលីកេជាទីស្រឡាញ់ ពោរពេញដោយសេចក្តីសុខសាន្តរួមជាមួយព្រះជាម្ចាស់ អាចនិយាយបានថានៅលើផែនដីនេះ យើងនឹកលីកេ។ ប៉ុន្តែ យើងដឹងថាលីកេកំពុងអធិដ្ឋានសម្រាប់យើង ដូចគាត់ធ្លាប់អធិដ្ឋានសម្រាប់យើងនៅពេលគាត់នៅមានជីវិតនៅជាមួយយើងដែរ៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ