លោកពុកប្រធានធំនៃក្រុមគ្រួសារបព្វជិតសហជីវិនព្រះយេស៊ូ លោកពុកអាធូរ៉ូ សូសា (Fr. Arturo Sosa, SJ) បានតែងតាំងលោកពុក វ៉ុន អូឆាង ស៊ីម៉ូន (Fr Kwon Oh-chang Simon, SJ) ជាប្រធានក្រុមគ្រួសារសហជីវិនព្រះយេស៊ូ (Jesuit) នៅកម្ពុជា។ លោកពុកវ៉ុន នឹងចូលកាន់តំណែងបន្តពីលោកពុក អូ អ៊ីនដុន ហ្វ្រាន់ស៊ីស្កូ (Fr Oh In-don Francisco, SJ) ដែលបានបម្រើការតាំងពីឆ្នាំ ២០១៣។
លោកពុកវ៉ុន កើតនៅឆ្នាំ ១៩៦៨ នៅទីក្រុងអង់ដុង (Andong) ប្រទេសកូរ៉េខាងត្បូង។ លោកបានចូលក្នុងក្រុមបព្វជិត សហជីវិនព្រះយេស៊ូ នៅថ្ងៃទី ៤ ខែកុម្ភៈ ឆ្នាំ២០០៣ បន្ទាប់ពីបានបញ្ចប់ការសិក្សាពីសាលាច្បាប់នៅសាកលវិទ្យាល័យជាតិសេអ៊ូល។ លោកពុកវ៉ុន បានតែងតាំងជាបូជាចារ្យនៅថ្ងៃទី៣ ខែកក្កដា ឆ្នាំ២០១៣ ហើយបានថ្វាយសច្ចានិរន្តរ៍ នៅថ្ងៃទី២២ ខែតុលា ឆ្នាំ២០២១។
លោកបានមកដល់ប្រទេសកម្ពុជាជាលើកដំបូង ក្នុងឆ្នាំ២០០៨ ដោយបម្រើការងារនៅ មជ្ឈមណ្ឌលបណ្តុះបណ្តាលវិជ្ជាជីវៈ និងផ្ទះសម្រាប់ជនមានពិការភាព បន្ទាយព្រាប ក្នុងខេត្តកណ្តាល។ បន្ទាប់មក លោកបានចាកចេញពីប្រទេសកម្ពុជាទៅបន្តការសិក្សាផ្នែកទេវវិទ្យា នៅទីក្រុងប៊ើខេឡៃ (Berkeley) ក្នុងរដ្ឋកាលីហ្វូញ៉ា (California)នៃសហរដ្ឋអាមេរិក ហើយបន្ទាប់មកបានត្រឡប់ទៅស្រុកកំណើត ហើយបានតែងតាំងជាបូជាចារ្យក្នុងប្រទេសកូរ៉េខាងត្បូង។
បន្ទាប់ពីការតែងតាំង លោកពុកវ៉ុន បានបម្រើការជាជំនួយការបូជាចារ្យព្រះសហគមន៍កាតូលិក អ៊ូកស៊ូ ហើយបន្ទាប់មក ក្លាយជានាយកខាងវិញ្ញាណនៅមជ្ឈមណ្ឌលសំណាក់ធម៌របស់ក្រុមសហជីវិនព្រះយេស៊ូ (Jesuit retreat center) នៅសាន់ជុន (Suncheon) ។ គាត់ត្រូវបានចាត់ឲ្យមកប្រទេសកម្ពុជាវិញមួយឆ្នាំក្រោយមក ក្នុងមុខងារជាអ្នកទទួលខុសត្រូវ សហគមន៍នៅព្រាបស (Prieb So Jesuit) ក្នុងទីក្រុងភ្នំពេញ ខណៈពេលដែលគាត់កំពុងសិក្សាភាសាខ្មែរឲ្យកាន់តែស៊ីជម្រៅ។
គាត់ត្រូវបានចាត់តាំងជានាយកបន្ទាយព្រាបពីឆ្នាំ ២០១៥ រហូតដល់ឆ្នាំ ២០១៨ ហើយត្រូវចាត់ឲ្យទៅ Girisonta, Semarang ប្រទេសឥណ្ឌូនេស៊ីសម្រាប់ Tertianship ។ ចាប់តាំងពីលោកត្រឡប់មកប្រទេសកម្ពុជាវិញ លោកបានបំពេញការងារជានាយកសម្រាប់ការត្រាស់ហៅ ខណៈនោះ គាត់កំពុងដឹកនាំក្រុមយុវជននៃព្រះវិហារសន្តហ្វ្រង់ស្វ័រ សាវីយ៉េ (St Francis Xavier Parish) ក្នុងក្រុងសិរីសោភ័ណ ក្នុងភូមិភាគបាត់ដំបង។ លោកពុក វ៉ុន ក៏ជាហិរញ្ញិករបស់ក្រុមគ្រួសារសហជីវិនព្រះយេស៊ូ និងជាប្រធានគណៈកម្មាធិការខាងផ្លូវវិញ្ញាណផងដែរ។ លោកផ្ដល់ការណែនាំខាងវិញ្ញាណសម្រាប់សមាជិកទាំងអស់នៃក្រុមគ្រួសារអ្នកបួសនេះ។
សមាជិកសហជីវិនព្រះយេស៊ូនិងអ្នកពាក់ព័ន្ធនានា នៅកម្ពុជា ក៏ដូចជានៅក្នុងព្រះសហគមន៍កាតូលិកភូមិភាគបាត់ដំបង មានសេចក្តីរីករាយជាខ្លាំង អំពីដំណឹងនៃការតែងតាំងលោកពុក វ៉ុន អូឆាង ស៊ីម៉ូន ជាតំណាងក្រុមគ្រួសារនៃតំបន់កូរ៉េសម្រាប់បេសកកម្មក្រុមសហជីវិនព្រះយេស៊ូនៅកម្ពុជា។ សរសេរក្នុងនាមក្រុមសហជីវិនព្រះយេស៊ូ និងដៃគូបេសកកម្ម លោកពុកអូ អ៊ីនដុន បានសម្តែងការអបអរសាទរ និងដឹងគុណចំពោះលោកពុកវ៉ុន ហើយបានផ្តល់ការគាំទ្រយ៉ាងពេញទំហឹងដល់គាត់ ខណៈដែលគាត់ទទួលយកបេសកកម្មបម្រើប្រជាជនកម្ពុជា។
សន្និសីទសហជីវិនព្រះយេស៊ូនៃប្រធានអាស៊ីប៉ាស៊ីហ្វិក លោកពុកតូនី ម៉ូរេនណូ (Fr Tony Moreno, SJ) ក៏ស្វាគមន៍ការដឹកនាំរបស់លោកពុកវ៉ុន នៅក្នុងសន្និសីទនេះដែរ។ ដោយលោកមានប្រសាសន៍ថា «បេសកកម្មនៅកម្ពុជាកំពុងប្រឈមមុខនឹងបញ្ហាប្រឈមដ៏ធំធេង ហើយយើងក៏ត្រូវបានសម្រាលទុក្ខដោយការរីកចម្រើនបន្តិចម្តងៗនៃយុវជន វ័យក្មេង និងកិច្ចការបម្រើទាំងមូល»។ លោកក៏បានថ្លែងអំណរគុណដល់លោកឪពុក អូ អ៊ីនដុន «សម្រាប់រយៈពេលប្រាំបួនឆ្នាំនៃការបម្រើ និងការដឹកនាំប្រកបដោយការយកចិត្តទុកដាក់របស់គាត់នៅក្នុងបេសកកម្មនៅកម្ពុជា និងនៅក្នុងសន្និសីទរបស់យើង»។ លោកពុក វ៉ុន អូឆាង ស៊ីម៉ូន នឹងចូលកាន់តំណែងជាតំណាងក្រុមគ្រួសារនៃតំបន់កូរ៉េសម្រាប់បេសកកម្មក្រុមសហជីវិនព្រះយេស៊ូនៅកម្ពុជានៅថ្ងៃទី ១ ខែមេសា ឆ្នាំ២០២២នេះ៕
អត្ថបទសម្រួលពីhttps://jcapsj.org
