ក្នុងសំលៀកបំពាក់អាវស និងសំពត់ឬខោពណ៌ខ្មៅឬខៀវ ឈរតម្រង់ជាពីរជួរនៅមុខព្រះវិហារសន្តសិលានិងសន្តប៉ូលដែលមានទ្វារបិទជិត បេក្ខជនពេញវ័យចំនួន១៥នាក់បាន គោះទ្វារព្រះវិហារ។ លោកបូជាចារ្យសិលា សួន ហង្សលី បូជាចារ្យទទួលខុសត្រូវព្រះវិហារនិងជាប្រធានមណ្ឌលសកម្មភាពភ្នំពេញថ្មី បានស្រែកសួរពីចម្ងាយថា «តើអ្នកមករកអ្វី?» បេក្ខជនទាំងអស់បានឆ្លើយព្រមគ្នាថា «ខ្ញុំមកសុំចូលព្រះសហគមន៍»។
លោកបូជាចារ្យបានស្វាគមន៍ពួកគេ ដោយបើកទ្វារឲ្យចូលក្នុងព្រះវិហាររួមជាមួយគ្រីស្តបរិស័ទនានា។ នេះជាកម្មវិធីមួយដែលព្រះសហគមន៍កាតូលិកនៅកម្ពុជាបានធ្វើឡើង សម្រាប់អស់អ្នកមកឈ្វេងយល់ជំនឿ ដែលជាដំណាក់កាលដំបូងមុនពេលទទួលអគ្គសញ្ញាជ្រមុជទឹក គឺជាពិធីសុំចូលព្រះសហគមន៍ ឬហៅថា ជំហានទី១។
កម្មវិធីនេះបានធ្វើឡើងនៅថ្ងៃទី២០ ខែកុម្ភៈ ឆ្នាំ២០២២ នៅព្រះវិហារសន្តសិលានិងសន្តប៉ូល ស្ថិតនៅក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌពោធិ៍សែនជ័យ រាជធានីភ្នំពេញ។
លោកសោម លោកា អាយុ៣៦ឆ្នាំបានឲ្យដឹងថា គាត់ស្គាល់ព្រះសហគមន៍តាមរយៈបងប្អូនរបស់គាត់ និងតាមរយៈការងារដែលគាត់កំពុងធ្វើសព្វថ្ងៃនេះ។
លោកា មានស្រុកកំណើតមកពីខេត្តប៉ៃលិន ដែលមានចម្ងាយ៣៦៧គីឡូម៉ែត្រពីទីក្រុងភ្នំពេញ គឺជាបុគ្គលិកម្នាក់កំពុងបម្រើការងារជាងមួយឆ្នាំហើយនៅក្នុងផ្នែកទទួលស្វាគមន៍ភ្ញៀវរបស់មណ្ឌលសកម្មភាពភ្នំពេញថ្មី។ លោកលោកា និយាយថា «ខ្ញុំឃើញពីភាពទំនាក់ទំនងនៅក្នុងសហគមន៍ ក៏ដូចជាការជួយផ្សេងៗរបស់ព្រះសហគមន៍ មានកិច្ចការល្អជាច្រើនដែលជួយដល់សង្គមរបស់យើង។»
លោកលោកា បានបញ្ជាក់ថា «ខ្ញុំបានចូលរួមញឹកញាប់ជាមួយសកម្មភាពរបស់ព្រះសហគមន៍ ជាពិសេសគឺកម្មវិធីសប្បុរសធម៌។ ខ្ញុំសប្បាយចិត្ត និងរំភើបមែនទែន ទោះបីខ្ញុំជួយបានត្រឹមតែកម្លាំង ប៉ុន្តែខ្ញុំមានអារម្មណ៍រំភើបនៅពេលឃើញព្រះសហគមន៍មានទឹកចិត្ត សប្បុរសធម៌សម្រាប់បងប្អូនរបស់យើង។»
ដោយសារចំណុចនេះ បានជំរុញឲ្យលោកសោម លោកា សម្រេចិត្តរៀនអប់រំជំនឿ ដោយមានការជ្រោមជ្រែងពីក្រុមគ្រួសាររបស់គាត់ផងដែរ។
រីឯយុវតីវ៉ន ចំប៉ា កំពុងបម្រើការងារនៅក្នុងសាលាដុនបូស្កូទឹកថ្លា ជាបេក្ខជនម្នាក់ទៀតបានឲ្យដឹងថា នាងបានសិក្សាឈ្វេងយល់អំពីជំនឿរបស់ព្រះសហគមន៍កាតូលិកជិតមួយឆ្នាំមកហើយ។ ចំប៉ាឲ្យដឹងថា «គ្រីស្តបរិស័ទផ្តល់ជំនឿនិងសេចក្តីស្រឡាញ់ឲ្យគ្នាទៅវិញទៅមក និងចេះជួយយកអាសារគ្នា។»
វ៉ន ចំប៉ា បាននិយាយថា ការផ្លាស់ប្តូរជំនឿរបស់គាត់ពីពុទ្ធបរិស័ទមកគ្រីស្តបរិស័ទនេះ មិនងាយស្រួលនោះទេ ដោយសារក្រុមគ្រួសារជាពុទ្ធបរិស័ទទាំងអស់ ហើយឪពុកម្តាយក៏មិនសូវពេញចិត្តនឹងជំនឿថ្មីរបស់គាត់ដែរ។
ចំប៉ា «គាត់(ឪពុកម្តាយ)កាន់ខ្លាំង ព្រោះអីព្រះពុទ្ធសាសនា យើងកាន់តាំងពីដើមរៀងមក…អីចឹងឪពុកម្តាយខ្ញុំក៏មិនជាយល់ស្របជាមួយខ្ញុំអីដែរ…ព្រោះគាត់គិតថា គ្រីស្តសាសនាជាសាសនារបស់បរទេស។»
ទោះជាយ៉ាងនេះក្តី យុវតីរូបនេះ បានជំនះនឹងការយល់ឃើញរបស់ឪពុកម្តាយ «ខ្ញុំជំនះ ព្រោះជំនឿរបស់ខ្ញុំ ខ្ញុំស្រឡាញ់ ខ្ញុំនឹងគោរពព្រះយេស៊ូគ្រីស្ត។»
វ៉ន ចំប៉ាបានបង្ហាញឆន្ទៈរបស់នាងដូច្នេះថា «ខ្ញុំនឹងបង្ហាញគាត់ថា ទោះបីជាខ្ញុំជាគ្រីស្តបរិស័ទ ប៉ុន្តែគ្រីស្តបរិស័ទក៏ជាមនុស្សល្អនៅក្នុងសង្គម ចេះជួយសង្គម និងចេះគោរពឪពុកម្តាយ ចេះធ្វើអំពើល្អជាច្រើនសម្រាប់គ្រួសារនិងសង្គម និងខ្លួនឯងដែរ។»
ក្នុងកម្មវិធីសុំចូលព្រះសហគមន៍នេះ លោកបូជាចារ្យ សិលា សួន ហង្សលី បានឲ្យបេក្ខជនទាំង១៥រូប ឈរនៅមុខអាសនៈ នៅមុខគ្រីស្តបរិស័ទចាស់ក្មេងទាំងអស់ រួចសួរបញ្ជាក់ឲ្យបេក្ខជនទាំងអស់លះបង់ពិធីផ្សេងៗដែលមានដូចជា ពិធីសែនព្រេន ពិធីបញ្ជាន់អារក្សអ្នកតា ដែលមិនណែនាំឲ្យគោរពបម្រើព្រះជាម្ចាស់។ គ្រប់គ្នាបានឆ្លើយថា «យើងខ្ញុំសម្រចចិត្តហើយ។»
បន្ទាប់មកពួកគាត់ទាំងអស់បានលុតជង្គង់នៅមុខព្រះឈើឆ្កាង និងព្រះគម្ពីរ ដោយសុំយកអង្គទាំងពីរជាទីពឹង និងបែរមករកព្រះសហគមន៍ដែលមានគ្រីស្តបរិស័ទជាច្រើន ហើយសុំយកព្រះសហគមន៍ជាទីពឹងផងដែរ។
ជាមួយគ្នានោះ លោកបូជាចារ្យអធិបតី បានធ្វើសញ្ញាឈើឆ្កាងនៅលើថ្ងាស លើវិញ្ញាណទាំង៥ និងលើខ្លួនរបស់បេក្ខជន។ «ឥឡូវនេះ ខ្ញុំសូមគូសញ្ញាឈើឆ្កាងលើខ្លួនបងប្អូន ដើម្បីឲ្យបងប្អូនក្លាយទៅជាអ្នកទទួលការអប់រំជំនឿ។ គូសលើត្រចៀកដើម្បីឲ្យបងប្អូនអាចស្តាប់លឺព្រះបន្ទូល គូសលើភ្នែក ដើម្បីឲ្យអាចមើលឃើញពន្លឺរបស់ព្រះជាម្ចាស់ គូសលើមាត់ គឺដើម្បីឲ្យចេះឆ្លើយនឹងព្រះបន្ទូលរបស់ព្រះជាម្ចាស់ គូលលើទ្រូង គឺដើម្បីឲ្យព្រះគ្រីស្តគង់នៅក្នុងបងប្អូនដោយសារជំនឿ គូសលើស្មា គឺដើម្បីឲ្យបងប្អូនពាក់នឹមរបស់ព្រះគ្រីស្តដោយចិត្តរីករាយ។»
បេក្ខជនដែលបានទទួលពិធីសុំចូលព្រះសហគមន៍ នឹងត្រូវរៀននិងត្រៀមខ្លួនបន្ថែមទៀត មុនទទួលអគ្គសញ្ញាជ្រមុជទឹក។
ក្នុងកម្មវិធីអប់រំជំនឿរបស់ព្រះសហគមន៍កាតូលិកនៅកម្ពុជា បេក្ខជនដែលជាមនុស្សពេញវ័យដែលចង់ផ្លាស់ប្តូរជំនឿរបស់ខ្លួនមកជាកាតូលិក ត្រូវសិក្សារៀនសូត្រអំពីជំនឿ ដែលមានព្រះគម្ពីរ ប្រពៃណីសាសនា ពិធីបុណ្យ និងការចូលរួមសកម្មភាពរបស់ព្រះសហគមន៍ក្នុងសង្គម យ៉ាងហោចណាស់រយៈពេលជិត២ឆ្នាំ។ ការសិក្សានេះតម្រូវឲ្យបេក្ខជនម្នាក់ៗចំណាយពេលវេលាមួយម៉ោង ឬមួយម៉ោងកន្លះជារៀងរាល់ថ្ងៃអាទិត្យ៕
