ធ្វើនៅព្រះសហគមន៍ព្រះកុមារយេស៊ូ
បឹងទំពន់ ថ្ងៃទី០២ ខែកុម្ភៈ ឆ្នាំ២០២២
| អត្ថបទទី១៖ ហេប្រឺ ២,១៤-១៨ ពេលជួបការល្បងល ព្រះអង្គក៏អាចជួយអស់អ្នកដែលជួបនឹងការល្បងលបានដែរ។ ហប ២,១៨ ដំណឹងល្អ៖ លូកា ២,២២-៤០ ភ្នែកទូលបង្គំបានឃើញការសង្គ្រោះ ដែលព្រះអង្គបានប្រទានមកឲ្យប្រជាជាតិទាំងអស់។ លក ២,៣០-៣១ |
“ទុកឱ្យព្រះពន្លឺរះក្នុងដួងចិត្តយើង”
បងប្អូនជាទីស្រឡាញ់
ថ្ងៃនេះជាថ្ងៃនៃអំណរសប្បាយ ដោយសារព្រះយេស៊ូបានថ្វាយខ្លួននៅវិសាលវិហារក្នុងទីក្រុងយេរូសាឡឹម។ តាមប្រពៃណីព្រះសហគមន៍ យើងគោរពព្រះពន្លឺដែរ ដោយសារព្រះយេស៊ូជាព្រះពន្លឺដែលបំភ្លឺពិភពលោក។ ជាពេលវេលា ដែលយើងអធិដ្ឋានយ៉ាងពិសេសសម្រាប់បព្វជិតបព្វជីតា និងបងប្អូនទាំងអស់ដែលបានផ្ញើជីវិតទាំងស្រុងទៅលើព្រះជាម្ចាស់។ ថ្ងៃនេះ នៅក្នុងអំណរសប្បាយនៃព្រះសហគមន៍ទូទាំងពិភពលោក ព្រះសហគមន៍កម្ពុជាមានអំណរសប្បាយថែមទៀត ដោយទទួលស្វាគមន៍បងស្រីបីនាក់នៅក្នុងក្រុមគ្រួសារឧបការគុណ ដែលបានផ្ញើជីវិតទាំងស្រុងទៅលើព្រះជាម្ចាស់អស់មួយជីវិត។
ខ្ញុំសូមថ្លែងអំណរគុណដល់ឪពុកម្តាយរបស់បងស្រីទាំងបីនាក់ ដែលបានឯកភាព ដែលបានផ្ញើអំណោយទានយ៉ាងពិសេសដល់ព្រះសហគមន៍។ ខ្ញុំសូមថ្លែងអំណរគុណដល់លោកឪពុក និងបងស្រីមួយចំនួនដែលបានដឹកនាំ បានណែនាំបងស្រីពីប៉ុន្មានឆ្នាំកន្លងមក នៅក្នុងការអប់រំទាំងផ្លូវវិញ្ញាណ ទាំងផ្លូវចិត្ត ជាពិសេសចំណេះដឹង។ សូមថ្លែងអំណរគុណដល់ក្រុមគ្រីស្តបរិស័ទតាមព្រះសហគមន៍នីមួយៗ ក៏ដូចជាក្រុមបងស្រី បព្វជិតបព្វជីតាដែលបានមកថ្ងៃនេះយ៉ាងច្រើន។ នេះបានជួយឱ្យបងស្រីបានរីកចម្រើន មិនមែនតែនៅក្នុងចំណេះដឹង ប៉ុន្តែនៅក្នុងប្រាជ្ញាឈ្លាសវៃ នៅក្នុងកម្លាំងកាយកម្លាំងចិត្ត។ ដើម្បីថ្ងៃនេះមានជំនឿរឹងមាំ មានកម្លាំងដ៏ពេញលក្ខណៈ និងមានសេចក្តីស្រឡាញ់ពេញខ្លួន ដើម្បីប្រកាសថាបងស្រីសុខចិត្តដើរជាមួយព្រះយេស៊ូអស់មួយជីវិត នៅក្នុងក្រុមបងស្រីឧបការគុណ។ ជាពិសេស សូមថ្លែងអំណរគុណដល់ក្រុមបងស្រីឧបការគុណ សម្រាប់បេសកកម្មនៅក្នុងព្រះសហគមន៍លើទឹកដីប្រទេសកម្ពុជា តាំងពីសតវត្សទី១៩មករហូតដល់សព្វថ្ងៃ។ ដែលបានជួយ ឱ្យព្រះសហគមន៍ប៉ុន្មានកន្លែងអាចរីកចម្រើនលូតលាស់នៅក្នុងសេចក្តីស្រឡាញ់ នៅក្នុងព្រះរាជ្យរបស់ព្រះជាម្ចាស់សម្រាប់មនុស្សទាំងអស់ តាមរយៈសន្តម៉ាតាំងម៉ូយ។
បងប្អូនជាទីស្រឡាញ់ នៅក្នុងរយៈពេលប៉ុន្មានខែកន្លងមកយើងបានរស់នៅក្នុងរបៀបចង្អៀតចង្អល់។ ដោយសារ ជំងឺកូវីដ-១៩បានណែនាំឱ្យយើងមិនអាចជួបជុំគ្នាយ៉ាងច្រើន មិនអាចមានសកម្មភាពតាមចិត្ត។ ប៉ុន្តែ យើងដឹងថាទោះបីកន្លងមកយើងពិបាកក៏ដោយ ព្រះពន្លឺរបស់ព្រះយេស៊ូបានណែនាំឱ្យយើងកក់ក្តៅ។ ថ្ងៃនេះ តាមរយៈជីវិតរបស់បងស្រីទាំងបីនាក់ ព្រះពន្លឺរបស់ព្រះយេស៊ូបានណែនាំឱ្យយើងកក់ក្តៅយ៉ាងខ្លាំង និងណែនាំឱ្យយើងដូចជាមានសេចក្តីសង្ឃឹមសាជាថ្មី។ ដូចយើងបានស្តាប់លោកតាស៊ីម៉ូនបានប្រកាសថា “ភ្នែកទូលបង្គំបានឃើញការសង្រ្គោះ ដែលព្រះអង្គប្រទានមកឱ្យប្រជាជាតិទាំងអស់ គឺជាពន្លឺដែលនាំឱ្យមនុស្សគ្រប់ជាតិសាសន៍ស្គាល់ព្រះអង្គ”។ តាមពិតខ្ញុំគិតថា អត្ថបទនេះមានអត្ថន័យពីរសម្រាប់យើងថ្ងៃនេះ៖
អត្ថន័យទី១ សម្រាប់បងស្រីទាំងបីនាក់ ដោយសារជាពេលវេលាដើម្បីនឹករលឹក នៅពេលព្រះយេស៊ូបានត្រាស់ហៅលើកទីមួយ នៅពេលព្រះយេស៊ូបានចាប់ផ្តើមមានទំនាក់ទំនងជាមួយបងស្រី។ ដោយបានធ្វើដំណើរជាមួយបងស្រីរហូតដល់ថ្ងៃនេះ ដើម្បីថ្ងៃនេះបងស្រីអាចប្រកាសថា ពិតមែនយើងចង់ដើរជាមួយព្រះយេស៊ូអស់មួយជីវិត។ តាមពិតព្រះយេស៊ូជាព្រះពន្លឺដែលបានបំភ្លឺមនុស្សគ្រប់ជាតិសាសន៍ ព្រះយេស៊ូជាពន្លឺដែលបានបំភ្លឺបងស្រីដើម្បីទទួលសេចក្តីស្រឡាញ់នៅក្នុងព្រះពន្លឺនេះ ជាសេចក្តីស្រឡាញ់ដែលមកពីព្រះហឫទ័យប្រណីសន្តោសរបស់ព្រះជាម្ចាស់។
អត្ថន័យទី២ សម្រាប់យើងទាំងអស់គ្នា ដោយសារថ្ងៃនេះបងស្រីដែលបានប្រកាសពាក្យសច្ចាជានិរន្តរ៍ ដោយសុខចិត្តរស់នៅជាអ្នកក្រខ្សត់ សុខចិត្តថែរក្សាព្រហ្មចារី សុខចិត្តស្តាប់បង្គាប់។ តាមពិត នេះជាការរំលឹកសម្រាប់ពប្វជិតបព្វជីតាទាំងអស់ដែលមកយ៉ាងច្រើនថ្ងៃនេះ ដើម្បីនឹកឃើញនៅពេលយើងបានផ្ញើជីវិតរបស់យើងទាំងស្រុងដែរ។ ជាពេលវេលាមួយ សម្រាប់យុវជនយុវនារីដើម្បីភ្ញាក់ស្មារតី ឱ្យយើងនឹកឃើញ តើខ្ញុំមិនអាចធ្វើបងស្រីឬបងប្រុសបានទេឬ?
ព្រឹកមិញលោកឪពុក វីរៈជ័យ បាននិយាយថានៅចំប៉ាមានយុវនារីច្រើនណាស់ ប៉ុន្តែឥតមានម្នាក់ដែលសុខចិត្តចូលធ្វើជាបងស្រីសោះ។ ដូច្នេះ ពេលវេលានេះជាពេលវេលាសម្រាប់យុវនារីដើម្បីទទួលព្រះពន្លឺរបស់ព្រះយេស៊ូ ដូចលោកតាស៊ីម៉ូនបានមើលឃើញ នៅក្នុងចំណោមមហាជនមានកូនង៉ែតមួយ ដែលជាព្រះយេស៊ូ ជាព្រះពន្លឺឱ្យយើងមើលឃើញពន្លឺយ៉ាងជាក់ស្តែង។ ជាពន្លឺរបស់ព្រះយេស៊ូ ដែលណែនាំឱ្យជីវិតរបស់យើងជាជីវិតពោរពេញដោយអំណរសប្បាយ ជាអំណរសប្បាយយ៉ាងពិសេសដែលមកពីព្រះជាម្ចាស់។ ថ្ងៃនេះ ជាពេលវេលាមួយដែរសម្រាប់ព្រះសហគមន៍នីមួយៗនៅក្នុងប្រទេសកម្ពុជា ដើម្បីបន្តអធិដ្ឋានសម្រាប់ការត្រាស់ហៅរបស់ព្រះសហគមន៍យើង។ បន្តផ្តល់សក្ខីភាព យើងជាគ្រួសារមួយយ៉ាងពិសេសដើម្បីណែនាំឱ្យយុវជនយុវនារីរកឃើញគ្រួសារមួយដ៏កក់ក្តៅ និងណែនាំឱ្យគេមើលឃើញពន្លឺរបស់ព្រះគ្រីស្ត ដើម្បីឱ្យព្រះគ្រីស្តមានវត្តមានថែមទៀតលើទឹកដីនៃប្រទេសកម្ពុជាយើង។
នៅក្នុងទំនុកតម្កើងថ្ងៃនេះ “ព្រះអង្គបានបង្កើតខ្ញុំបានសុខ ហើយទ្រង់បានទុកខ្ញុំក្នុងផ្ទៃ អ្នកម្តាយមានគុណយូរថ្ងៃយូរខែ សន្តោសប្រណីគ្រប់កាយា ខ្ញុំសូមលើកតម្កើងព្រះអង្គ ស្នាព្រះហស្តទ្រង់ដ៏អស្ចារ្យ ខ្ញុំដឹងថាអ្វីគ្រប់ប្រការ សុទ្ធតែអស្ចារ្យកើតពីទ្រង់”។ ទំនុកតម្កើងនេះ ដូចនៅក្នុងអត្ថបទរបស់សន្តប៉ូល “ខ្ញុំអួតតែពីភាពទន់ខ្សោយរបស់ខ្ញុំប៉ុណ្ណោះ ដោយដឹងថាការប្រណីសន្តោសរបស់យើងល្មមគ្រប់គ្រាន់សម្រាប់អ្នកហើយ”។ ទោះបីយើងខ្សោយក៏ដោយ ទោះបីយើងមានទុក្ខលំបាកក៏ដោយ យើងដឹងថាពីដើមរៀងមកព្រះជាម្ចាស់បានបង្កើតយើង ព្រះជាម្ចាស់បានជ្រើសរើសយើង ព្រះជាម្ចាស់បានចាត់ឱ្យទៅ ព្រះជាម្ចាស់បានថែរក្សាយើង ដើម្បីបន្តបេសកកម្មរបស់ព្រះអង្គលើផែនដីនេះ។ តាមពិត បងស្រីម្នាក់ៗជាឧបករណ៍ដ៏តូចមួយមែន ប៉ុន្តែជាឧបករណ៍ដ៏សំខាន់ណាស់ ដើម្បីបន្តគម្រោងការនៃការសង្រ្គោះរបស់ព្រះជាម្ចាស់ ឱ្យកើតឡើងនៅលើទឹកដីនៃប្រទេសកម្ពុជា និងណែនាំឱ្យពិភពរបស់យើងអាចមើលឃើញពន្លឺដ៏អស្ចារ្យដែលមកពីព្រះជាម្ចាស់ផ្ទាល់។
រួមជាមួយសន្តយ៉ូហានម៉ាតាំងម៉ូយ ចាប់ពីពេលនេះតទៅជាផ្លូវមួយយ៉ាងធំណាស់ ដែលកំពុងបើកនៅមុខបងស្រីដើម្បីបម្រើការអធិដ្ឋាន។ ដើម្បីបម្រើអ្នកក្រីក្រ ដើម្បីណែនាំឱ្យមនុស្សដែលបាត់បង់សេចក្តីសង្ឃឹមទាំងអស់មានសេចក្តីសង្ឃឹមឡើងវិញ។ ខ្ញុំគិតថានៅក្នុងពេលវេលានេះ ជាពេលវេលាពិសេសសម្រាប់ព្រះសហគមន៍ទូទាំងពិភពលោក សម្តេចប៉ាបបានអញ្ជើញយើងឱ្យចូលរួមនៅក្នុងសន្និបាត ដែលណែនាំឱ្យយើងធ្វើដំណើររួមជាមួយគ្នា។ ជាពេលវេលាមួយ ដើម្បីគិតរួមជាមួយបងស្រីឧបការគុណ រួមជាមួយព្រះសហគមន៍ទាំងអស់ តើយើងធ្វើដូចម្តេច ដើម្បីរួមរស់ជាធ្លុងតែមួយថែមទៀត ជាមួយព្រះសហគមន៍នៅលើទឹកដីនៃប្រទេសកម្ពុជា? តើយើងធ្វើដូចម្តេច ដើម្បីចូលរួមយ៉ាងសកម្មថែមទៀត ដើម្បីកសាងព្រះសហគមន៍ និងដើម្បីធ្វើជាសាក្សីនៃការលើកលែងទោស សម្រុះសម្រួល និងភាតរភាពរវាងព្រះសហគមន៍នឹងព្រះសហគមន៍នីមួយៗ?
នេះជាពេលវេលាមួយដើម្បីគិតថែមទៀត និងដើម្បីធ្វើដំណើរថែមទៀតដោយដឹងថា យើងមានបងស្រីថ្មីបីនាក់ ជាកម្លាំងថ្មីថែមទៀតសម្រាប់ក្រុមបងស្រីឧបការគុណ។ រួមគ្នាយើងធ្វើដំណើរជាមួយគ្នា និងធ្វើជាសញ្ញាសម្គាល់នៃជីវិតដែលយើងបានទទួលពីព្រះជាម្ចាស់ នៅក្នុងព្រះសហគមន៍ដែលជាមហាគ្រួសាររបស់យើង។ បងប្អូនជាទីស្រឡាញ់ “សូមទុកឱ្យព្រះយេស៊ូប្រសូតសាជាថ្មីនៅក្នុងដួងចិត្តរបស់យើង” នេះជាអ្វីដែលខ្ញុំសូមជូនដល់បងស្រីថ្មីទាំងបីនាក់ និងសម្រាប់បងប្អូនទាំងអស់ដែរ។ ឱ្យយើងទុកឱ្យព្រះយេស៊ូប្រសូតសាជាថ្មីនៅក្នុងដួងចិត្តរបស់យើង។ យើងនៅក្នុងពេលវេលា នៃការចែករំលែកការជូនពរនៃសេចក្តីសុខ កម្លាំងកាយកម្លាំងចិត្ត សុខុមាលភាព នៅក្នុងឱកាសចូលឆ្នាំថ្មីនេះ។ ថ្ងៃនេះផងដែរ ជាពេលវេលាមួយដើម្បីឱ្យយើងទុកឱ្យព្រះយេស៊ូប្រសូតសាជាថ្មី។ តាមរយៈបងស្រី តាមរយៈយើងទាំងអស់គ្នា ព្រះយេស៊ូអាចប្រសូតសាជាថ្មីនៅលើទឹកដីនៃប្រទេសកម្ពុជាយើង ដើម្បីឱ្យគេស្គាល់ព្រះយេស៊ូយ៉ាងច្រើន។ ដើម្បីឱ្យពាក្យអធិដ្ឋានរបស់លោកតាស៊ូម៉ូនកើតឡើងនៅថ្ងៃនេះ “ភ្នែកទូលបង្គំបានឃើញការសង្រ្គោះ ដែលព្រះអង្គប្រទានមកឱ្យប្រជាជាតិទាំងអស់ គឺជាពន្លឺដែលនាំឱ្យមនុស្សគ្រប់ជាតិសាសន៍ស្គាល់ព្រះអង្គ”។
ហេតុនេះហើយ ដូចលោកតាស៊ីម៉ូន យាយហាណា នៅក្នុងពេលវេលាចុងក្រោយនៃជីវិតរបស់គាត់ គាត់បានទទួលស្គាល់ព្រះយេស៊ូ។ បងស្រីកំពុងចាប់ផ្តើមជីវិតជាបងស្រីយ៉ាងពេញលក្ខណៈ ដូច្នេះមានពេលយ៉ាងច្រើនដើម្បីទុកឱ្យព្រះពន្លឺរបស់ព្រះជាម្ចាស់ រះឡើងនៅក្នុងដួងចិត្តរបស់បងស្រី នៅក្នុងដួងចិត្តរបស់យើង ដើម្បីឱ្យយើងកក់ក្តៅ។ ប៉ុន្តែមិនមែនកក់ក្ដៅធម្មតា កក់ក្ដៅដោយសារយើងទទួលពន្លឺ រស្មីយ៉ាងត្រចះត្រចង់ ដែលមកពីព្រះហឫទ័យប្រណីសន្តោសរបស់ព្រះជាម្ចាស់។
ពិតមែន សូមសេចក្តីសុខសាន្តរបស់ព្រះជាម្ចាស់ គង់នៅជាមួយបងស្រី និងគង់នៅជាមួយបងប្អូនទាំងអស់គ្នា។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
