រដ្ឋាភិបាលនៃសារធារណរដ្ឋឥណ្ឌា និងអង្គការការីតាសកម្ពុជា បានចុះអនុស្សរណៈ យោគយល់គ្នា សម្រាប់កុមារកំព្រា កុមារងាយរងគ្រោះ តាមរយៈសេវាគ្លីនិកចល័តនៅកម្ពុជានៅឯមន្ទីរពេទ្យជ័យជំនះ ខេត្តកណ្តាល កាលពីថ្ងៃទី១៨ ខែមីនា ឆ្នាំ២០២២។
កម្មវិធីចុះអនុស្សរណៈនេះ ធ្វើឡើងដោយមានលោកគីម រតនា នាយកប្រតិបត្តិនៃអង្គការការីតាសកម្ពុជា និងលោកជំទាវបណ្ឌិត ឌីវីយ៉ានី ខប្រាហ្គេដ (Dr. Devyani Khobragade) ឯកអគ្គរាជទូតនៃសាធារណរដ្ឋឥណ្ឌាប្រចាំនៅកម្ពុជា និងមានតំណាងពីក្រសួងសុខាភិបាលនិងមន្ត្រីខេត្តកណ្តាលចូលរួមផងដែរ។
ថ្លែងក្នុងឱកាសនោះ លោក គីម រតនា បានថ្លែងអំណរគុណចំពោះរដ្ឋាភិបាលឥណ្ឌា ដែលបានផ្តល់ជំនួយសម្រាប់គម្រោងនេះ ដែលផ្តល់អត្ថប្រយោជន៍ដល់កុមារកំព្រា កុមារងាយរងគ្រោះ កុមារមានពិការភាពផ្លូវចិត្ត និងកុមារដែលគេបោះបង់ចោល។ លោក រតនា បានថ្លែងអំណរគុណជាពិសេសចំពោះលោកជំទាវឯកអគ្គរដ្ឋទូតសម្រាប់ការគាំទ្រ និងកិច្ចសហប្រតិបត្តិការជាបន្តបន្ទាប់របស់លោកជំទាវ ដែលបានបន្តដល់ មជ្ឈមណ្ឌលផ្លូវចិត្តកុមារនិងយុវជន(CCAMH) នៃអង្គការការីតាសកម្ពុជា ក្នុងរយៈពេលជាច្រើនឆ្នាំកន្លងមកនេះ។
នៅក្នុងសុន្ទរកថាស្វាគមន៍របស់លោកវេជ្ជបណ្ឌិត ប៊ូមីកុមារ ជេហ្គាន់ណាថាន់ (Bhoomikumar JEGANNATHAN) អ្នកទទួលខុសត្រូវ CCAMH បានគូសបញ្ជាក់ពី ភាពពាក់ព័ន្ធតាមបរិបទនៃគម្រោងនេះ ដោយសារវាមានគោលបំណងដើម្បីទៅដល់កុមារដែលមានពិការភាពផ្នែកប្រព័ន្ធប្រសាទ និងផ្លូវចិត្តផ្សេងទៀតដែលមិនអាចទទួលបានសេវាថែទាំសុខភាពដោយសារជំងឺរាតត្បាតកូវីដ-១៩។
លោកជំទាវ បណ្ឌិត ឌីវីយ៉ានី ខប្រាហ្គេដ បានកោតសរសើរចំពោះតួនាទីរបស់លោកវេជ្ជបណ្ឌិត ប៊ូមីកុមារ ក្នុងការអភិវឌ្ឍន៍សេវាសុខភាពផ្លូវចិត្តកុមារនៅកម្ពុជា ដោយមានការគាំទ្រពីរដ្ឋាភិបាលនៃប្រទេសឥណ្ឌា។ លោកជំទាវបានសង្កត់ធ្ងន់លើផលប៉ះពាល់ជាវិជ្ជមាននៃគម្រោង ផលប៉ះពាល់រហ័ស (QIP) ឆ្ពោះទៅរកការពង្រឹងទំនាក់ទំនងទ្វេភាគីរួម និងសុច្ឆន្ទៈរវាងប្រជាជនឥណ្ឌា និងកម្ពុជា។
អ្នកស្រី សុខ ឌៀរ៉ូហ្សេត ប្រធានកម្មវិធីសហគមន៍នៃមជ្ឈមណ្ឌលផ្លូវចិត្តកុមារនិងយុវជន មានប្រសាសន៍ថា ជាមួយនឹងគម្រោងដែលបានចុះហត្ថលេខាថ្មីៗនេះ គឺរដ្ឋាភិបាលឥណ្ឌាបានផ្តល់នូវរថយន្តចល័ត១គ្រឿង និងវគ្គបណ្តុះបណ្តាលបុគ្គលិកនៃCCAMH នៅប្រទេសឥណ្ឌា។
អ្នកស្រី ឌៀរ៉ូហ្សេត បានប្រាប់វិទ្យុវើរីតាស់អាស៊ីនៅថ្ងៃ២១ ខែមីនានេះថា ជំនួយរថយន្តចល័ត នឹងជួយសម្រួលដល់កិច្ចការងារដឹកជញ្ជូនគ្រួសារកុមារមានពិការភាព ដែលត្រូវមកបើកថ្នាំរាល់ខែនៅតាខ្មៅ (CCAMH) និងសម្រួលដល់បុគ្គលិកCCAMH ដែលផ្តល់សេវាប្រឹក្សាតាមផ្ទះ។ អ្នកស្រីបញ្ជាក់ថា «ជាទូទៅ បុគ្គលិករបស់យើងប្រើម៉ូតូផ្ទាល់ខ្លួនដើម្បីធ្វើដំណើរទៅភូមិ ដូច្នេះ រថយន្តចល័តជួយសម្រួលម្យ៉ាង។ ។ យើងអាចដឹកគាត់និងសម្រួលការងារចុះទៅភូមិ ដឹកឥវ៉ាន់ទៅតាមភូមិជាដើម។»
អ្នកស្រីប្រធានកម្មវិធីសហគមន៍រូបនេះបន្ថែមថា កម្មវិធីរបស់មជ្ឈមណ្ឌលបច្ចុប្បន្នបានជួយដល់គ្រួសារចំនួន៦០ ដែលមានកូនជាកុមារពិការសតិបញ្ញា និងផ្លូវចិត្ត ដែលធ្វើឡើងក្នុងភូមិចំនួន១៨ ស្ថិតនៅក្នុងស្រុកចម្ការលើនៃខេត្តត្បូងឃ្មុំ និងស្រុកឱរាំងឪនៃខេត្តកំពង់ចាម។ អ្នកស្រីបន្តថា «ភាគច្រើន យើងជួបក្មេងពិការបញ្ញា ទន់ដៃជើង ប្រកាច់» ហើយគ្រួសាររបស់ពួកគាត់ជាកសិករ អ្នកចម្ការ អ្នកនេសាទក្រីក្រជាដើម។
អ្នកស្រីឌៀរ៉ូហ្សេតបញ្ជាក់ថា ដោយស្ថានភាពគ្រួសារក្រីក្របែបនេះ ជារៀងរាល់ខែខាងមជ្ឈមណ្ឌលផ្តល់ជាសោហ៊ុយដល់គ្រួសាររបស់កុមារទាំងនោះ នាំកូនៗរបស់ពួកគាត់មកពិនិត្យសុខភាពនិងទទួលថ្នាំព្យាបាល នៅមជ្ឈមណ្ឌលផ្លូវចិត្តកុមារនាក្រុងតាខ្មៅខេត្តកណ្តាល។
អ្នកស្រីឌៀរ៉ូហ្សេត ឲ្យដឹងទៀតថា កម្មវិធីចុះទៅតាមភូមិ គឺបុគ្គលិកអង្គការចុះស្វែងរក និងពិនិត្យសុខភាពដល់កុមារ ប្រសិនបើរកឃើញថា ពួកគាត់មានតម្រូវការផ្សេង ឬមានជំងឺត្រូវព្យាបាលផ្សេង អង្គការនឹងបញ្ជូនពួកគាត់ទៅកាន់អង្គការដៃគូបន្តទៀត។ ក្នុងករណីរកឃើញកុមារមានពិការភាពខាងបញ្ញា យើងប្រឹក្សាជាមួយក្រុមគ្រួសារ បង្រៀនឪពុកម្តាយ បង្ហាត់ពួកគាត់ដោយផ្ទាល់។
អ្នកស្រីបន្ថែមថា ក្នុងមួយខែក្រុមការងារចុះទៅម្តង ហើយយើងក៏មានចងក្រងឪពុកកម្តាយជាក្រុម និងមានអ្នកស្ម័គ្រចិត្តភូមិចំនួន២នាក់ក្នុងមួយភូមិ ដែលសរុបទៅយើងមាន៣៦នាក់ក្នុង១៨ភូមិ។
អ្នកស្រីបញ្ជាក់ថា ជាមួយនឹងគម្រោងជួយដល់កុមារដែលមានពិការភាពផ្នែកសតិបញ្ញានេះ ខាងរដ្ឋាភិបាលនៃសាធារណរដ្ឋឥណ្ឌា បានជួយគាំទ្រតាំងពីឆ្នាំ២០១៩ លើផ្នែកបណ្តុះបណ្តាលធនធានមនុស្សក្នុងប្រទេសនិងក្រៅប្រទេសពីវិទ្យាស្ថានជាតិសម្រាប់ពង្រឹងសមត្ថភាពសិទ្ធិអំណាចដល់ជនមានពិការភាពចំរុះ (National Institute for Empowerment of Persons with Multiple Disabilities-NIEPMD) នៅប្រទេសឥណ្ឌា និងជំនួយដល់ការបោះពុម្ពលើឯកសារទាក់ទងនឹងគម្រោងកុមារមានពិការភាព ដូចជា សៀវភៅ ខិតបណ្ណផ្សព្វផ្សាយជាដើម។
តាមរយៈសេចក្តីប្រកាសពត៌មានរបស់ស្ថានទូតឥណ្ឌាប្រចាំនៅកម្ពុជា ចេញផ្សាយនៅថ្ងៃទី១៨ ខែមីនា បានឲ្យដឹងថា ក្រោមគម្រោង ផលប៉ះពាល់រហ័ស (QIP) ស្ថានទូតឥណ្ឌាបានអនុវត្តគម្រោងផ្សេងទៀតក្នុងភាពជាដៃគូជាមួយអង្គការការីតាសកម្ពុជា ស្តីអំពី «ការកសាងសមត្ថភាពអ្នកថែទាំ និងអ្នកជំនាញដើម្បីផ្តល់សិទ្ធិអំណាចដល់កុមារ និងក្មេងជំទង់ដែលមានពិការភាពច្រើន និងគ្រួសាររបស់ពួកគេ» ដែលស្ថិតក្រោមដំណាក់កាលចុងបញ្ចប់ ដែលផ្តល់អត្ថប្រយោជន៍ដល់កុមារ និងគ្រួសាររបស់ពួកគេប្រហែល ១៣០០ នាក់។
ក្រោមគម្រោង QIP រដ្ឋាភិបាលឥណ្ឌាអនុវត្តគម្រោងចំនួន ១០ ជារៀងរាល់ឆ្នាំក្នុងប្រទេសកម្ពុជា ដោយផ្តល់មូលនិធិរហូតដល់ ៥០០០០ ដុល្លារអាមេរិកក្នុងមួយគម្រោង។ ចាប់តាំងពីឆ្នាំ ២០១៥-១៦ រដ្ឋាភិបាលនៃប្រទេសឥណ្ឌាបានអនុម័តគម្រោងចំនួន ៤៦ ក្នុងវិស័យព័ត៌មានវិទ្យា កសិកម្ម សុខភាព អនាម័យ ការផ្តល់សិទ្ធិអំណាចដល់ស្ត្រី សុខុមាលភាពកុមារ ការអភិវឌ្ឍន៍ជនបទ ហេដ្ឋារចនាសម្ព័ន្ធសង្គម (រួមទាំងការកសាងសមត្ថភាព) បរិស្ថាន។ល៕
ដោយ កែវ កញ្ញា
