ឯកឧត្តម បណ្ឌិតសភាចារ្យ ច័ន្ទ សារុន តំណាងរាស្រ្តមណ្ឌលខេត្តតាកែវ បានបំពាក់មេដាយស្ថាបនាជាតិជូនដល់លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញដែលបានជួយកសាងនិងឧត្ថម្ភសម្ភារមួយចំនួនដល់វិទ្យាល័យសម្ដេចក្រុមព្រះ និងព្រះអង្គម្ចាស់ក្សត្រិយនរោត្ដម ម៉ារីរណឫទ្ធិ អង្គរនាប ស្ថិតនៅក្នុងស្រុកត្រាំកក់ ខេត្តតាកែវ នាព្រឹកថ្ងៃទី ២៤ មីនា ២០២២។
ថ្លែងនៅក្នុងអង្គពិធី ក្នុងទីតាំងរបស់សាលាវិទ្យាល័យ ឯកឧត្តមបណ្ឌិតសភាចារ្យ ច័ន្ទ សារុន ថ្លែងកោតសរសើរលោកអភិបាលព្រះសហគមន៍អូលីវីយ៉េ ដែលបានជួយអភិវឌ្ឍច្រើននៅក្នុងខេត្តតាកែវនេះ។ ឯកឧត្តម សំណូមពរដល់លោកអភិបាលអូលីវីយ៉េ ដើម្បីពិនិត្យ ពិចារណាជួយដល់កុមារគថ្លង់ និងពិការភ្នែកនៅក្នុងខេត្តតាកែវនេះ ឱ្យបានចូលរៀននិងក្លាយទៅជាពលរដ្ឋដែលមានសមត្ថភាពពេញលេញ។ លោកថា «ខ្ញុំមើលឃើញថា មានតែលោកអូលីវីយ៉េមួយទេដែលមានលទ្ធភាពអាចជួយបាន។»
លោក អ៊ូ ហេង នាយកវិទ្យាល័យ មានប្រសាសន៍ថា សមិទ្ធផលដែលលោកអភិបាលអូលីវីយ៉េបានជួយកន្លងមកនេះមានសាលារៀនដែលមាន១០បន្ទប់ ដែលសហការជាមួយអង្គការកុមារមេគង្គកម្ពុជា និង២០២០កន្លងទៅនេះ លោកបានជួសជុលសាលាដែលមានទំហំទឹកប្រាក់ប្រមាណជាមួយម៉ឺនដុល្លារអាមេរិកបូករួមទាំងឡាបូលាងសម្អាតដៃនិងរោងដំណាំផងដែរ។
លោកនាយកសាលារូបនេះ បានឲ្យដឹងទៀតថា លោកអភិបាលក៏បានឧត្ថម្ភនូវ កុំព្យូទ័រដល់សិស្សនិងលោកគ្រូអ្នកគ្រូនៅក្នុងសាលាផងដែរ។ លោកបញ្ជាក់ថា «សម្រាប់នៅតំបន់ជនបទសាលាមួយចំនួនមិនងាយមានកុំព្យុទ័របង្រៀន និងរៀនទេ។ នេះជាឱកាសមួយដ៏ល្អប្រពៃ និងក្នុងនាមជានាយកសាលា និងអាជ្ញាធរដែនដីសូមថ្លែងអំណរគុណដ៏ជ្រាលជ្រៅបំផុតសម្រាប់ទឹកចិត្តសប្បុរសធម៌របស់លោកអភិបាលអូលីវីយ៉េ។»
លោកអ៊ូ ហេង បន្ថែមទៀតថា លោកជឿជាក់ថាការងារសប្បុរសធម៌ដែលលោកអភិបាលបានបន្សល់ទុកស្នាដៃដ៏ច្រើនឥតគណនាបែបនេះ ជាគំរូមួយដល់មនុស្សជំនាន់នេះនិង ជាមរតកដើម្បីឆ្លងផុតភាពអវិជ្ជា និងស្របទៅនឹងសម័យដែលក្រសួងអប់រំដាក់ថា ជាសម័យឌីជីថលក្នុងសតវត្សរ៍ទី២១នេះ។
ថ្លែងនៅក្នុងកម្មវិធីនេះ លោកស្រី សេរី ផល្លី ប្រធានមន្ទីរអប់រំយុវជននិងកីឡាខេត្តតាកែវ មានប្រសាសន៍ថា ដើម្បីឆ្លើយតបទៅនឹងគុណូបការ: របស់លោកអភិបាលអូលីវីយ៉េ សូមលោកគ្រូអ្នកគ្រូ និងសិស្សានុសិស្សប្រើប្រាស់អ្វីៗដែលមាននេះ ឱ្យមានប្រសិទ្ធភាព ឱ្យមានជាគុណប្រយោជន៍ក្នុងវិស័យអប់រំ ដើម្បីក្លាយជាណលរដ្ឋដ៏មានសមត្ថភាព និងឆ្នាំនេះធ្វើយ៉ាងណាប្រឡងយកនិទ្ទេសAឱ្យបានច្រើន។
លោកស្រីបន្ថែមថា សូមយុវសិស្សទាំងអស់ពេលរៀនចប់ ត្រូវចេះចាប់យកជំនាញស្របតាមទីផ្សារការងារ កុំរៀនតាមគ្នា និងត្រូវត្រៀមខ្លួនក្នុងសម័យបដិវដ្តឧស្សាហកម្មនេះ ដោយចេះអភិវឌ្ឍខ្លួនជានិច្ច។
សមិទ្ធផល ដែលបានសម្ពោធនៅថ្ងៃទី២៤ ខែមីនា ឆ្នាំ២០២២នេះមាន សាលារៀនមួយខ្នង ឡាបូលាងសម្អាតដៃ និងសួនដំណាំ ដែលជាការឧត្ថម្ភរបស់លោកអភិបាលអូលិវីយ៉េចំពោះវិទ្យាល័យសម្ដេចក្រុមព្រះ និងព្រះអង្គម្ចាស់ក្សត្រិយនរោត្ដម ម៉ារីរណឫទ្ធិ អង្គរនាប។
ថ្លែងប្រាប់សារព័ត៌មានវើរីតាសអាស៊ី លោកអភិបាលអូលីវីយ៉េមានប្រសាសន៍ថា វិទ្យាល័យអង្គរនាប ជាសាលាដៃគូរបស់វិទ្យាល័យសន្តហ្វ្រង់ស្វ័រនៃព្រះសហគមន៍កាតូលិកជាយូរឆ្នាំមកហើយ ដោយបានឧបត្ថម្ភអាគារសាលារៀន និងកុំព្យូទ័រតាំងពីឆ្នាំ២០០៦។
លោកបន្ថែមថា រាល់សមិទ្ធផលដែលបានផ្តល់ជូននេះ គឺដំណើរការមួយនៃកិច្ចសហប្រតិបត្តិការរួមគ្នា ដែលមាន«អត្ថន័យយ៉ាងជ្រៅ មិនត្រឹមតែមើលលើសមិទ្ធផល ប៉ុន្តែយល់ថា យើងទាំងអស់គ្នាទទួលខុសត្រូវយ៉ាងខ្ពស់ ដើម្បីឱ្យសុខសន្តិភាពមានភាពរីកចម្រើនពីមួយថ្ងៃទៅមួយថ្ងៃ។»
ក្នុងសម័យកូវីដ១៩ ព្រះសហគមន៍បានចំណាយជាង៧ម៉ឺនដុល្លារ លើការសិក្សារបស់សិស្សានុសិស្ស និងវិស័យសំខាន់ៗទៀត ដែលមាន វិស័យសុខភាព វិស័យកសិកម្ម និងវិស័យមួយទៀតគឺអន្តរសាសនា។
លោកអភិបាលបញ្ជាក់ថា នៅពេលសាសនាធ្វើការជាមួយគ្នា នាំឱ្យមានផលផ្លែជាច្រើន។ នៅពេលយើងខ្វះទំនាក់ទំនង ខ្វះការនិយាយទល់មុខគ្នា ខ្វះការយល់ចិត្តគ្នា នាំឱ្យមានទំនាស់។ លោកអភិបាលបានថ្លែងនិងណែនាំទៀតថា អរគុណរដ្ឋាភិបាលដែលថែរក្សាសុខសន្តិភាព និងយើងទៅជាទូតនៃសន្តិភាព គឺចាប់ផ្ដើមពីខ្លួនរបស់យើង។
លោកនាយកសាលា អ៊ូ ហេង បញ្ជាក់ថា ចាប់តាំងពីឆ្នាំ ២០០២ រហូតមកដល់ពេលនេះ លោកអភិបាលអូលីវីយ៉េ ចូលរួមជា សៀវភៅសិក្សា ១០០០ក្បាល កំព្យូទ័រ២៥គ្រឿង និងសហការជាមួយកុមារមេគង្គ កសាងអាគារសិក្សា១ខ្នង និងជួសជុលអាគារ១ខ្នង ដែលមានបន្ទប់កំព្យូទ័រ និងបន្ទប់រៀន៤៤បន្ទប់ ក្នុងនោះក៏មានសួនដំណាំ១កន្លែង និងសៀវភៅសម្រាប់ដាក់ក្នុងបណ្ណាល័យមួយចំនួនផងដែរ៕
ដោយ៖ ដាលីស
