វិទ្យាស្ថានសន្តប៉ូល បានទទួលជ័យលាភីវគ្គផ្តាច់ព្រ័ត្រ ពីការប្រកួតប្រជែងរកស្នាដៃនិងគំនិតប្រឌិត របស់គម្រោងអនាគតបៃតងកម្ពុជា USAID ដែលបានប្រកាសជាផ្លូវការនាល្ងាចថ្ងៃទី ០៦ ខែមេសា ក្រោមអធិបតីភាពរបស់ លោក សាយ សំអាល់ រដ្ឋមន្ត្រីក្រសួងបរិស្ថាន និងលោកស្រី នែនស៊ី ជែ អ៊ីសលីក នាយិកាបេសកម្ម នៃទីភ្នាក់ងារជំនួយអាមេរិក USAID។
ការប្រកួតប្រជែងរកស្នាដៃនិងគំនិតច្នៃប្រឌិត បានដំណើរការពីខែកញ្ញា ដល់ខែធ្នូ ឆ្នាំ២០២១ បានលើកទឹកចិត្តដល់បេក្ខជនបេក្ខនារី ឱ្យផលិតសម្ភារៈផ្សព្វផ្សាយដែលមានគំនិតច្នៃប្រឌិតនិងទាក់ទាញ ក្នុងគោលបំណង «កាត់បន្ថយតម្រូវការប្រើប្រាស់គ្រឿងសង្ហារឹមធ្វើពីឈើប្រណិត»។
ស្នាដៃដែលត្រូវបានជ្រើសរើសសម្រិតសម្រាំង នឹងត្រូវបានចែកចាយជាសាធារណៈក្នុងប្រព័ន្ធផ្សព្វផ្សាយយុទ្ធនាការ ដែលជំរុញ សាធារណជន ឱ្យពិចារណាប្តូរមកប្រើប្រាស់គ្រឿងសង្ហារឹម ដែលមានមេត្រីភាពនឹងបរិស្ថាន ជាជាងប្រើប្រាស់គ្រឿងសង្ហារឹមធ្វើពីឈើប្រណិត។
លោក ផុន សុផល នាយកវិទ្យាស្ថានសន្តប៉ូល បានថ្លែងថា ៖ «កម្មវិធីជាកម្មវិធីមួយដែលលើកទឹកចិត្តដល់ ស្ថានប័នឬបុគ្គលដែលអនុវត្តគាំទ្រកម្មវិធីសហមេត្រីបរិស្ថាន ជាក់ស្តែងវិទ្យាស្ថានសន្តប៉ូលយើង គឺគ្រឹះស្ថានឧត្តមសិក្សាមួយដែលយកចិត្តទុកដាក់ លើបរិស្ថាន»។
លោកបានបន្តថា ក្រោមការដឹកនាំរបស់លោកអភិបាល ឆ្នាំនេះលោកបានប្រកាសជា «ឆ្នាំបៃតង» ពណ៌បៃតងជាពណ៌នៃសេចក្ដីសង្ឃឹម។ វិទ្យាស្ថានសន្តប៉ូលមានកម្មវិធីឱ្យនិស្សិតដាំដើមឈើ ក៏ដូចជាកម្មវិធីគាំទ្រទៅលើបរិស្ថាននៅក្នុងវិទ្យាស្ថានទាំងមូល។
នាយកវិទ្យាស្ថានសន្តប៉ូល ក៏បានអំពាវនាវដល់និស្សិត យុវជននិងប្រជាពលរដ្ឋខ្មែរ ចូលរួមដាំដើមឈើ សម្អាតបរិស្ថាន និងការចូលរួមក្នុងកម្មវិធីមួយចំនួនលើកការលើកកម្ពស់បរិស្ថាន ដើម្បីសង្គម និងប្រទេសកម្ពុជាយើង មានបរិស្ថានស្អាត និងបៃតង។
វិទ្យាស្ថានសន្តប៉ូល ជាគ្រឹះស្ថានឧត្ដមសិក្សាឯកជនមួយដែលមានលក្ខណៈស្តង់ដារជាតិនិងស្តង់ដារក្នុងតំបន់។ វិទ្យាស្ថានសន្តប៉ូល គឺការកសាងសមត្ថភាពបញ្ញាដល់ធនធានមនុស្សឲ្យមានគុណភាពឈានឡើងឥតឈប់ឈរ ប្រកបដោយគុណភាព និងប្រសិទ្ធភាព។ វិទ្យាស្ថានសន្តប៉ូល ស្ថិតក្នុងភូមិអង្គគគីរ ឃុំតាភេម ស្រុកត្រាំកក់ ខេត្តតាកែវ។
ថ្លែងនៅក្នុងពិធីប្រកាសជ័យលាភី លោក សាយ សំអាល់ បានមានប្រសាសន៍ថា ៖ «ការផ្លាស់ប្តូរឥរិយាបទ និងការបន្តការចូលរួមលើកកម្ពស់តម្លៃធនធានធម្មជាតិ ដើម្បីទប់ស្កាត់ការបំផ្លាញធនធានធម្មជាតិ ដែលផ្តើមចេញពីខ្លួនយើងម្នាក់ៗ ជាពិសេសយុវជន ក្រុមគ្រួសារ និងសហគមន៍ ជាកត្តាសំខាន់ក្នុងការចូលរួមចំណែកថែរក្សាធនធានធម្មជាតិនិងបរិស្ថាន»។
ចំណែក លោកស្រី នែនស៊ី ជែ អ៊ីសលីក បានកត់សម្គាល់ថា ៖ «តម្រូវការឈើប្រណិត មានការកើនឡើងគួរឱ្យកត់សម្គាល់ ទាំងទីផ្សារក្នុងស្រុក និងអន្តរជាតិ ដែលរួមចំណែកដល់ការកាប់បំផ្លាញព្រៃឈើ និងការបាត់បង់ប្រភេទដើមឈើមានតម្លៃ នៅក្នុងព្រៃត្រូពិចរបស់កម្ពុជា»។
លោកស្រីបានបន្តថា ៖ «យើងសង្ឃឹមថា យុទ្ធនាការដែលដឹកនាំដោយយុវជននេះ នឹងផ្តល់ព័ត៌មានដែលមានប្រយោជន៍ និងផ្តល់ជម្រើសដល់ប្រជាពលរដ្ឋកម្ពុជា ជាពិសេសយុវជន ធ្វើការពិចារណាប្រើប្រាស់គ្រឿងសង្ហារិមដែលមិនធ្វើពីឈើប្រណិត»។
ពិធីលើកទឹកចិត្តមេត្រីបរិស្ថានថ្ងៃនេះ បង្ហាញពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិក ក្នុងកិច្ចសហប្រតិបត្តិការជាមួយក្រសួងបរិស្ថានកម្ពុជា ក្នុងការលើកកម្ពស់កិច្ចគាំពារបរិស្ថាន ការប្រើប្រាស់ធនធានធម្មជាតិប្រកបដោយនិរន្តភាព និងសកម្មភាពជាវិជ្ជមានពីសាធារណជន ក្នុងការអភិរក្សកេរ្តិ៍ដំណែលធម្មជាតិ ដ៏សម្បូរបែបរបស់កម្ពុជា ដើម្បីជាប្រយោជន៍របស់ប្រជាពលរដ្ឋគ្រប់រូប ក៏ដូចជាអ្នកជំនាន់ក្រោយៗទៀត។
យុទ្ធនាការទំនាក់ទំនងផ្លាស់ប្តូរឥរិយាបទសង្គម ដែលផ្តោតលើយុវជននិងបរិស្ថាននេះ ផ្តល់ខ្លឹមសារនិងសារគន្លឹះ តាមរយៈប្រព័ន្ធពហុផ្សព្វផ្សាយ ដើម្បីគាំទ្រយុវជន ដែលជា «ជើងឯកបៃតង» ក្នុងការធ្វើជាគំរូ ផ្លាស់ប្តូរឥរិយាបថ និងការអនុវត្តឱ្យបានជោគជ័យ ជុំវិញកិច្ចការពារធនធានធម្មជាតិរបស់កម្ពុជា។
រយៈពេលជាង១០ឆ្នាំមកនេះ វិទ្យាស្ថានសន្តប៉ូលបានបណ្ដុះបណ្ដាលនិស្សិតកំរិតបរិញ្ញាបត្រជំនាញ វិស្វកម្ម Software ទូរគមនាគមន៍ និងបណ្ដាញ ជំនាញអក្សរសាស្ត្រអង់គ្លេស ជំនាញគ្រប់គ្រងទេសចរណ៍ ក្សេត្រសាស្ត្រ ជំនាញសង្គមកិច្ច។ រីឯបរិញ្ញាបត្ររង វិទ្យាស្ថានបណ្ដុះបណ្ដាលលើជំនាញ៦មាន៖ ជំនាញអភិវឌ្ឍកម្មវិធីកុំព្យូទ័រ ជំនាញគ្រប់គ្រងប្រព័ន្ធនិងបណ្ដាញកុំព្យុទ័រ ជំនាញផលិតកម្មដំណាំហូបផ្លែនិងបន្លែ ជំនាញវេជ្ជសាស្ត្រសត្វ ជំនាញភាសាអង់គ្លេស ជំនាញសណ្ឋាគារ និងបដិសណ្ឋារកិច្ច។
គ្រប់កម្មវិធីអប់រំរបស់វិទ្យាស្ថានសន្តប៉ូល គឺមានកិច្ចសហប្រតិបត្តិការល្អជាមួយនឹងក្រសួងអប់រំ យុវជន និងកីឡា ព្រមទាំងសហការជាមួយអាណាព្យាបាលរបស់និស្សិតផ្ទាល់ផងដែរ៕
