ក្នុងថ្ងៃបុណ្យប្រសិទ្ធពរលើប្រេងគ្រីស្មា ដែលជាប្រេងពិសិដ្ឋរបស់ព្រះសគមន៍ ដើម្បីយកប្រារព្ធពិធីនានា លោកបូជាចារ្យនិងបព្វជិតប្រមាណជាង៧០អង្គ មកពីតំបន់នានាក្នុងប្រទេសកម្ពុជា បានរំលឹកពាក្យសច្ចាប្រណិធានឡើងវិញ កាលពីយប់ទី៦ ខែមេសាកន្លងទៅនេះ ក្រោមអធិបតីភាពរបស់លោកអភិបាលទាំងបីភូមិភាគ។
លោកបូជាចារ្យ សែ សាធ ត្រូវបានតែងតាំងជាបូជាចារ្យភូមិភាគកំពង់ចាម កាលពីឆ្នាំ២០១៦មានប្រសាសន៍ថា ជារៀងរាល់ឆ្នាំនៅពេលលោកប្រកាសពាក្យសច្ចានៅចំពោះមុខលោកអភិបាលបែបនេះ គឺផ្ដល់កម្លាំង ដើម្បីឱ្យជីវិតរបស់លោកម្នាក់ៗមានភាពនឹងនរ និងយល់ថាពិតមែនព្រះជាម្ចាស់បានត្រាស់ហៅគាត់ឱ្យបំពេញមុខងារជាបូជាចារ្យរបស់ព្រះយេស៊ូគ្រីស្ត។ លោកបន្ថែមថា យើងជាសហការីរបស់លោកអភិបាល យើងដឹងថាព្រះជាម្ចាស់ត្រាស់ហៅយើងឱ្យបំពេញបេសកកម្មនេះបន្តពីព្រះអង្គដែរ។
លោកសាធ បញ្ជាក់ថា «នៅពេលដែលខ្ញុំរំឭកពាក្យសច្ចា ខ្ញុំនឹកដល់បេសកកម្មដែលព្រះអង្គប្រទានឱ្យ និងរំឭកពីរបៀបដែលព្រះជាម្ចាស់ត្រាស់ហៅ និងដោយរក្សារបៀបរស់នៅរបស់ខ្លួនដូចការណែនាំរបស់សម្ដេចប៉ាប ដែលបូជាចារ្យត្រូវឈរលើសរសរ៤គឺ៖ ជិតស្និទ្ធជាមួយព្រះជាម្ចាស់តាមរយៈការអធិដ្ឋាន ស្និទ្ធស្នាលជាមួយលោកអភិបាលរបស់ខ្លួនដោយមានទំនាក់ទំនងល្អចេះស្ដាប់បង្គាប់ មានទំនាក់ទំនងល្អជាមួយបងប្អូនជាបូជាចារ្យផ្សេងទៀតដោយធ្វើដំណើរក្នុងផ្លូវដ៏វិសុទ្ធជាមួយគ្នា និងបំពេញបេសកកម្មជាប់មួយគ្រីស្តបរិស័ទដោយស្គាល់ចៀមរបស់ខ្លួន។»
ក្នុងពិធីរំលឹកពាក្យសច្ចានេះ អស់លោកបូជាចារ្យទាំងអស់ដែលបម្រើព្រះសហគមន៍ និងសង្គមនៅក្នុងព្រះរាជាណាចក្រកម្ពុជា បានប្រកាសថាអស់លោកចង់រួមស្លាប់រួមរស់ជាមួយព្រះគ្រីស្តដោយលះបង់ប្រយោជន៍ផ្ទាល់ខ្លួន និងប្រកាន់យកភាពស្មោះត្រង់ចំពោះមុខងារនៃបេសកកម្មរបស់ខ្លួនក្នុងព្រះសហគមន៍ ដោយថ្វាយអភិបូជា និងប្រារព្ធពិធីបុណ្យផ្សេងៗ។
កម្មវិធីនេះ បានធ្វើឡើងនៅ ព្រះវិហារសន្តសិលា និងសន្តប៉ូល ភ្នំពេញថ្មី នារាជធានីភ្នំពេញ នៅចំពោះមុខគ្រីស្តបរិស័ទជាច្រើនកុះករមកពីព្រះសហគមន៍នានាក្នុងប្រទេសកម្ពុជា។
ក្នុងធម្មទេសនា លោកអភិបាលអូលីវីយ៉េ មានប្រសាសន៍ទៅកាន់អស់លោកបូជាចារ្យថា លោកឪពុកជាទីស្រឡាញ់ ព្រះជាម្ចាស់បានត្រាស់ហៅយើង បំពេញបេសកកម្មប្រកាសដំណឹងល្អ និងជំរុញយើងឱ្យយើងទៅជួបបងប្អូនដែលឯទៀតៗ ដើម្បីផ្ដល់សាក្ខីភាពនៅលើទឹកដីប្រទេសកម្ពុជា ឲ្យចូលយ៉ាងជ្រៅនៅក្នុងជីវិតរបស់បងប្អូន ដើម្បីចូលនៅក្នុងវប្បធម៌ ដើម្បីយល់ភាសា និងយល់ចិត្តគ្នា ។
លោកអភិបាលអូលីវីយ៉េ បន្ថែមថា យើងមានបេសកកម្មតែមួយ «ប្រទានឱ្យបងប្អូនមានសេចក្ដីសង្ឃឹម និងសន្តិភាពនៅក្នុងជីវិត ដែលណែនាំឱ្យព្រះសហគមន៍ចាក់ឫសយ៉ាងជ្រៅនៅក្នុងជីវិតរបស់បងប្អូនក្នុងទឹកដីកម្ពុជា។»
ក្នុងឱកាសនេះដែរ លោកអភិបាលអូលីវីយ៉េ ស្នើឱ្យគ្រីស្តបរិស័ទជួយអង្វរព្រះជាម្ចាស់ ប្រទានព្រះអំណោយទានសម្រាប់លោកបូជាចារ្យដើម្បីអាចបម្រើព្រះជាម្ចាស់ដោយស្មោះត្រង់ និងណែនាំបងប្អូនទៅដល់ប្រភពនៃការសង្គ្រោះ។ អង្វរសម្រាប់អស់លោកអភិបាល ឱ្យចេះបំពេញមុខងារនេះដោយស្ម័គ្រចិត្ត និងមានភក្តីភាពក្នុងនាមព្រះគ្រីស្តជាមហាបូជាចារ្យ ជាគង្វាលដ៏សប្បុរស ជាបរមគ្រូ និងជាអ្នកបម្រើមនុស្សទាំងឡាយ។ និងអង្វរព្រះជាម្ចាស់ សូមព្រះអង្គណែនាំទាំងលោកបូជាចារ្យ និងទាំងប្រជារាស្ត្ររបស់ព្រះអង្គឱ្យមានជីវិតអស់កល្បជានិច្ច។
លោក ដួង សាវង់ តំណាងគ្រីស្តបរិស័ទទាំងអស់បានឡើងថ្លែង ក្នុងអង្គពិធីយ៉ាងនេះថា យើងទាំងអស់គ្នារំភើបចិត្តនៃសក្ខីភាពនៃជីវិតរស់នៅរបស់លោកអភិបាល អស់លោកបូជាចារ្យ និងលោកឧបដ្ឋាក ដែលបានឆ្លើយតបនឹងការត្រាស់ហៅរបស់ព្រះគ្រីស្ត ដោយសុខចិត្តបូជាជីវិតថ្វាយព្រះជាម្ចាស់ ដោយលះបង់ខ្លួនឯងចោលដើម្បីជាប្រយោជន៍ដល់យើងខ្ញុំ និងព្រះសហគមន៍កម្ពុជាទាំងមូល។ លោកសាវង់ សូមអរគុណសម្រាប់ ការចែករំលែកព្រះបន្ទូលដែលជាអាហារផ្ដល់ជីវិត និងការណែនាំឱ្យចេះទទួលយកពន្លឺព្រះអម្ចាស់ ចេះបន្ទាបខ្លួន បម្រើអ្នកតូចតាច និងផ្ញើជីវិតទាំងស្រុងលើព្រះហឫទ័យប្រណីសន្ដោសរបស់ព្រះជាម្ចាស់ និងកិច្ចការផ្សេងៗជាច្រើនទៀត ដែលជាចំណុចសំខាន់សម្រាប់ពង្រឹងជំនឿនិងនាំឲ្យស្គាល់ព្រះជាម្ចាស់កាន់តែខ្លាំងឡើងៗ។
តាមឯកសារមហាសន្និបាត វ៉ាទីកង់ទី២បានបញ្ជាក់ថា លោកបូជាចារ្យទទួលមុខងារ របស់ព្រះគ្រីស្ត … អស់លោកបូជាចារ្យមានមុខងារបម្រើរបស់អស់លោកគ្រូគង្វាល(អភិបាល) ដែលមានដូចជា មុខងារបម្រើព្រះបន្ទូល មុខងារជាអ្នកបម្រើអគ្គសញ្ញានានា អគ្គសញ្ញាអរព្រះគុណ និងជាមេដឹកនាំប្រជារាស្រ្តរបស់ព្រះជាម្ចាស់៕
ដោយ៖ ដាលីស
