លោកអភិបាល និងលោកបូជាចារ្យជាង៧០អង្គ ចួបជុំគ្នារព្ធពិធីប្រសិទ្ធពរលើប្រេងពិសិដ្ឋ សម្រាប់ប្រើប្រាស់ក្នុងអគ្គសញ្ញានានារបស់ព្រះសហគមន៍កាតូលិក ដែលធ្វើឡើងនៅព្រះវិហារសន្តសិលា និងសន្តប៉ូល នារាជធានីភ្នំពេញ ក្រោមអធិបតីភាពលោកអភិបាលព្រះសហគមន៍ទាំងបីភូមិភាគ នាថ្ងៃទី ៦ មេសា ២០២២នេះ។
នៅក្នុងធម្មទេសនានៃពិធីបុណ្យអភិបូជានេះ លោកអភិបាលអូលីវីយ៉េ អភិបាលព្រះសហគមន៍កាតូលិកភូមិភាគភ្នំពេញ មានប្រសាសន៍ថា៖ ប្រេងដែលលោកនឹងប្រសិទ្ធពរនៅក្នុងថ្ងៃនេះ គឺសម្រាប់ប្រើក្នុងអគ្គសញ្ញានានា។ លោកបន្ថែមថា «ជាប្រងនៃអគ្គសញ្ញាដែលផ្ដល់ជីវិត ជាប្រេងសម្រាប់អប់រំជំនឿ និងលាបអ្នកជំងឺដើម្បីទទួលកម្លាំងថ្មី។»
លោកអភិបាល អូលីវីយ៉េ បន្ថែមថា ប្រេងនៅក្នុងឆ្នាំនេះ នឹងអាចប្រើបន្ថែមទៅលើអគ្គសញ្ញាដែលព្រះសហគមន៍បានខកខានប្រារព្ធកាលពីឆ្នាំកន្លងទៅ ដោយសារជំងឺកូវីដ-១៩។
លោកបន្ថែមថា ប្រេងនេះធ្វើឲ្យមនុស្សទៅជាបុត្រាបុត្រីរបស់ព្រះជាម្ចាស់ ហើយឆ្នាំនេះព្រះសហគមន៍ក៏សង្ឃឹមថានឹងមានអ្នកទទួលអគ្គសញ្ញាជាបូជាចារ្យម្នាក់ និងមានពិធីតែងតាំងជា ឧបដ្ឋាកផងដែរ។
ប្រេងដែលយើងរៀបចំថ្ងៃនេះ នាំឱ្យយើងអរព្រះគុណព្រះជាម្ចាស់ថែមទៀត សូមឱ្យសេចក្ដីសុខសាន្តរបស់ព្រះជាម្ចាស់គង់នៅក្នុងដួងចិត្តរបស់យើង និងណែនាំឱ្យយើងរស់នៅសុខដុមរមនា។
ក្នុងពិធីនោះ តំណាងគ្រីស្តបរិស័ទមកពីព្រះវិហារនានា បាននាំយកប្រេងចំនួន៣ប្រភេទ មកដដាក់នៅ មុខអសនៈ ដើម្បីឲ្យលោកអភិបាលទាំងបីភូមិភាគប្រសិទ្ធពរ ក្លាយជាប្រេងសក្ការៈ ទុកប្រើប្រាស់តាមកន្លែងនីមួយៗតាមសេចក្តីត្រូវការ។ ប្រេងពិសិដ្ឋមាន៣យ៉ាងគឺ៖ ប្រេងអ្នកជំងឺ(សម្រាប់លាបផ្ដល់កម្លាំងឱ្យអ្នកជំងឺ) ប្រេងអ្នកស្វែងយល់ (សម្រាប់លាបឱ្យអ្នកដែលកំពុងរៀបចំខ្លួនទទួលអគ្គសញ្ញាជ្រមុជទឹក) និងប្រេងគ្រីស្មា (សម្រាប់លាបឱ្យអ្នកដែលទទួលអគ្គសញ្ញាជ្រមុជទឹក អគ្គសញ្ញាលាបថ្ងាស អគ្គសញ្ញាតែងតាំងនានា)។
តាមប្រសាសន៍លោកបូជាចារ្យ ដាមីញ៉ាំង ហ្វារនឺ ទទួលបន្ទុកនៃគណៈកម្មការរៀបចំពិធីបុណ្យមានប្រសាសន៍ថា ពិធីនេះព្រះសហគមន៍ហៅថាពិធីប្រសិទ្ធពរលើប្រេងអភិសេក និងតាមក្បួនពិធីបុណ្យយើងត្រូវប្រារព្ធនៅព្រឹកថ្ងៃព្រហស្បតិ៍ពិសិដ្ឋ ប៉ុន្តែព្រះសហគមន៍មានសិទ្ធិប្រារព្ធនៅមុនសប្ដាហ៍ពិសិដ្ឋដែរ។
លោកបន្ថែមថា ពិធីនេះ បូជាចារ្យភូមិភាគទាំងអស់ត្រូវតែចូលរួមប្រារព្ធជាមួយលោកអភិបាល ដោយសារ ប្រេងពិសិដ្ឋទាំង៣យ៉ាង មានអត្ថន័យថាព្រះជាម្ចាស់សង្គ្រោះពិភពលោក និងយើងប្រើដើម្បីប្រារព្ធអគ្គសញ្ញានានាតាមរបៀបព្រះសហគមន៍កាតូលិក ដែលមានន័យថាព្រះជាម្ចាស់អភិសេកយើងផងដែរ។ លោកដាមីញ៉ាំងបញ្ជាក់ថា យើងប្រារព្ធតែម្ដងក្នុងមួយឆ្នាំគឺលោកអភិបាលតែម្នាក់គត់ គឺលោកអូលីវីយ៉េ ដែលបានទទួលអគ្គសញ្ញាតែងតាំងជាអភិបាលដែលអាចប្រសិទ្ធពរលើប្រេងគ្រីស្មា ដើម្បីឱ្យប្រេងគ្រីស្មានេះក្លាយជាប្រេងអភិសេក។
យោងតាមឯកសាររបស់ព្រះសហគមន៍កាតូលិក សហគមន៍គ្រីស្តបរិស័ទបានយកប្រេងទឹកជានិមិត្តរូបនៃព្រះវិញ្ញាណដ៏វិសុទ្ធ ដែលជាព្រះអំណោយទានពិសេសរបស់ព្រះជាម្ចាស់ គឺព្រះអង្គជ្រាបចូលក្នុងចិត្តគំនិត ព្រមទាំងប្រទានកម្លាំង និងអំណរសប្បាយដល់អស់អ្នកជឿ៕
ដោយ៖ ដាលីស
