“សេចក្ដីពិត ជានាមថ្មីរបស់សុខសន្តិភាព”
| អត្ថបទទី១៖ អេសាយ ៥២,១៣-៥៣,១២ ព្រះអម្ចាស់បានទម្លាក់កំហុសរបស់ យើងទាំងអស់គ្នាទៅលើលោក។ អស ៥៣,៦ អត្ថបទទី២៖ ហេប្រឺ ៤,១៤-១៦.៥,៧-៩ បន្ទាប់ពីព្រះអង្គបានគ្រប់លក្ខណៈហើយ ទ្រង់ក៏បានទៅជាប្រភពនៃការសង្គ្រោះ។ ហប ៥,៩ ដំណឹងល្អ៖ យូហាន ១៨,១-១៩,៤២ បើអ្នករាល់គ្នាមករកខ្ញុំ ទុកឲ្យអ្នកទាំងនេះចេញទៅចុះ។ យហ ១៨,៨ |
“ដូច្នេះ យូដាសនាំកងទាហាន និងកងរក្សាព្រះវិហារចូលមក ទាំងកាន់ចន្លុះ កាន់គោម កាន់អាវុធផង”
បងប្អូនជាទីស្រឡាញ់
នៅពេលយើងឃើញរបៀបដែលគេមកដើម្បីចាប់ព្រះយេស៊ូ ដោយដឹងថានៅពេលនោះព្រះយេស៊ូកំពុងអធិដ្ឋានជាមួយក្រុមសាវ័កនៅលើភ្នំអូលីវ តែក្រុមសាវ័កកំពុងដេកលក់។ ប៉ុន្តែ នៅពេលយើងឃើញរបៀបទាហាន របៀបមហាបូជាចារ្យ របៀបគណៈផារីស៊ី មកជាមួយអាវុធ មកជាមួយកម្លាំង ដើម្បីចាប់មនុស្សម្នាក់គឺព្រះយេស៊ូ។ ណែនាំឱ្យយើងឆ្ងល់ ណែនាំឱ្យយើងមិនយល់ មូលហេតុអ្វីត្រូវការមានកម្លាំងអាវុធខ្លាំងដូចនេះដើម្បីចាប់ព្រះយេស៊ូ? នៅពេលក្រុមសាវ័ករត់ទៅអស់ហើយ មានន័យថាព្រះយេស៊ូនៅម្នាក់ឯង នៅពេលនោះ “ពួកទាហាន និងមេបញ្ជាការរបស់គេ ព្រមទាំងកងរក្សាព្រះវិហាររបស់ជនជាតិយូដា នាំគ្នាចាប់ព្រះយេស៊ូហើយចងព្រះអង្គ” មិនមែនតែចាប់តែប៉ុណ្ណឹង ប៉ុន្តែចងព្រះយេស៊ូទៀត។
នៅពេលព្រះយេស៊ូនៅម្នាក់ឯង អស់គ្រីស្តទូត អស់សាវ័ក មានតែព្រះយេស៊ូតែមួយអង្គគត់ ពិតមែនគេប្រើគ្រប់មធ្យោបាយដើម្បីចាប់ព្រះយេស៊ូដូចជាធំពេក។ តើព្រះយេស៊ូបានធ្វើអ្វីខុសខ្លះ? តើគេកំពុងចោទប្រកាន់ព្រះយេស៊ូអំពីអ្វីខ្លះ? មូលហេតុអ្វីត្រូវការចាប់ព្រះយេស៊ូរបៀបនេះ? ធ្វើដូចជា ព្រះយេស៊ូជាអ្នកទោសម្នាក់ដែលបានធ្វើខុសយ៉ាងធ្ងន់ធ្ងរ ធ្វើដូចជាព្រះអង្គជាមនុស្សម្នាក់ដែលត្រូវការប្រុងប្រយ័ត្នមែនទែន ដែលត្រូវការមានទាំងអាវុធ មានទាំងទាហាន ហើយចង់ដៃចងជើងរបស់ព្រះយេស៊ូ ដោយខ្លាចព្រះអង្គគេចខ្លួន។ តើព្រះយេស៊ូបានធ្វើអ្វីខុស?
នៅពេលនោះ យើងចាប់អារម្មណ៍អំពីសំណួររបស់លោកពីឡាត សួរព្រះយេស៊ូថា៖ “តើអ្នកជាស្ដេចរបស់ជនជាតិយូដាមែនឬ?”។ ដោយសារ បញ្ហាគឺនៅត្រង់ចំណុចហ្នឹង ទាំងមហាបូជាចារ្យ ទាំងគណៈផារីស៊ី គេចង់ចាប់ព្រះយេស៊ូ ដោយសារគេខ្លាចព្រះយេស៊ូទៅជាព្រះមហាក្សត្ររបស់ជនជាតិយូដា។ យើងនឹកឃើញ ពីសម័យដើមនៅពេលព្រះយេស៊ូបានប្រសូតហើយ ពេលស្តេចហេរ៉ូឌលឺដំណឹងនោះពីក្រុមហោរាចារ្យ ទោះបីព្រះយេស៊ូជាកូនង៉ែតអាយុតែ១ថ្ងៃក៏ដោយ។ ស្តេចហេរ៉ូឌ បានប្រមូលកម្លាំងដើម្បីសម្លាប់កូនក្មេងដែលមិនទាន់គ្រប់អាយុ២ឆ្នាំ ទូទាំងស្រុកកាលីឡេ ដោយសង្ឃឹមថានៅក្នុងចំណោមកូនក្មេងទាំងនោះមានព្រះយេស៊ូដែរ ដែលហោរាចារ្យបានទាយថាជាព្រះមហាក្សត្រ។ នៅថ្ងៃនេះ គេចាប់ព្រះយេស៊ូដោយសារព្រះយេស៊ូជាព្រះមហាក្សត្ររបស់ជនជាតិយូដា។
បងប្អូនជាទីស្រឡាញ់ សូមបងប្អូនចាប់អារម្មណ៍អំពីចម្លើយរបស់ព្រះយេស៊ូ ដោយសារចម្លើយរបស់ព្រះយេស៊ូណែនាំឱ្យយើងចូលនៅក្នុងផ្លូវថ្មីសម្រាប់ពិភពលោករបស់យើង។ ព្រះយេស៊ូជាព្រះមហាក្សត្រ ប៉ុន្តែមិនមែនជាព្រះមហាក្សត្រតាមលោកិយ ព្រះយេស៊ូមានព្រះបន្ទូលតបថា៖ “រាជ្យរបស់ខ្ញុំមិនមែននៅក្នុងលោកនេះទេ។ ប្រសិនបើរាជ្យរបស់ខ្ញុំនៅក្នុងលោកនេះមែន ពួកបម្រើរបស់ខ្ញុំមុខជានាំគ្នាតយុទ្ធ មិនឲ្យគេបញ្ជូនខ្ញុំទៅក្នុងកណ្ដាប់ដៃរបស់សាសន៍យូដាបានឡើយ។ ប៉ុន្តែ រាជ្យរបស់ខ្ញុំមិនមែននៅលោកនេះទេ”។ ព្រះរាជរបស់ព្រះយេស៊ូគឺមកពីស្ថានបរមសុខ ដូច្នេះព្រះយេស៊ូមិនត្រូវការមានទាហាន មិនត្រូវការមានអង្គរក្ស ដើម្បីការពារព្រះអង្គ។ ផ្ទុយទៅវិញ “ខ្ញុំកើតមក ហើយខ្ញុំមកក្នុងលោកនេះ ដើម្បីផ្ដល់សក្ខីភាពអំពីសេចក្ដីពិត”។
បងប្អូនជាទីស្រឡាញ់ យប់នេះដែលយើងបានចូលរួមនៅក្នុងការរងទុក្ខលំបាករបស់ព្រះយេស៊ូ យើងមើលឃើញរបៀបដែលគេបានកាត់ក្តីព្រះយេស៊ូ។ ព្រះយេស៊ូជាមនុស្សដែលមិនបានធ្វើអ្វីខុស ព្រះយេស៊ូជាមនុស្សដែលពោរពេញដោយភាពសុចរិត ព្រះយេស៊ូជាមនុស្សដ៏វិសុទ្ធ នៅពេលនោះយើងរកឃើញឈ្មោះថ្មីសម្រាប់សុខសន្តិភាព គឺសេចក្តីពិតដែលមកពីព្រះជាម្ចាស់។ ព្រះយេស៊ូដែលត្រូវគេវាយ ព្រះយេស៊ូដែលត្រូវគេមើលងាយ ព្រះយេស៊ូដែលត្រូវគេចំអក ព្រះយេស៊ូដែលត្រូវគេជេរប្រមាថ នៅពេលនោះព្រះយេស៊ូមិនបានឆ្លើយតបមួយម៉ាត់សោះ។ ព្រះយេស៊ូនៅស្ងៀមស្ងាត់ ដូចយើងបានស្តាប់នៅក្នុងអត្ថបទរបស់លោកអេសាយ “ដូចកូនចៀមដែលគេដឹកទៅទីពិឃាត ឬដូចចៀមឈរស្ងៀមនៅមុខអ្នកកាត់រោម លោកមិនបានហើបមាត់ទាល់តែសោះ” លោកនៅស្ងៀមស្ងាត់ ព្រះយេស៊ូនៅស្ងៀមស្ងាត់។ ភាពស្ងៀមស្ងាត់របស់ព្រះយេស៊ូ ជាសក្ខីភាពមួយយ៉ាងពិសេស ជាសក្ខីភាពដែលណែនាំឱ្យយើងទទួលស្គាល់អំពីសេចក្តីពិត។ តាមពិត យប់នេះនៅពេលគេកាត់ក្តីព្រះយេស៊ូ ជាការកាត់ក្តីមួយដែលខុសទាំងស្រុង ដោយសារព្រះយេស៊ូជាមនុស្សសុចរិត ព្រះអង្គមិនដែលបានប្រព្រឹត្តអំពីខុសអ្វីសោះ។ ប៉ុន្តែ ការកាត់ក្តីខុសទាំងស្រុងនេះ ជាការកាត់ក្តីដែលបើកផ្លូវនៃការសង្រ្គោះសម្រាប់មនុស្សលោក។
នៅក្នុងការកាត់ក្តីរបស់ព្រះយេស៊ូ យើងបានឃើញការស្អប់គ្នាដ៏ពេញលក្ខណៈ យើងបានឃើញអំពើហិង្សា យើងបានឃើញការមើលងាយ។ ប៉ុន្តែ ការស្អប់គ្នានេះ ហិង្សានេះ ការមើលងាយនេះ បានណែនាំឱ្យព្រះយេស៊ូសោយទិវង្គតមែន និងបានណែនាំឱ្យយើងមើលឃើញផ្លូវថ្មីផ្លូវនៃជីវិត។ សូមចាប់អារម្មណ៍ “ទាហានម្នាក់យកលំពែងចាក់ត្រង់ចន្លោះឆ្អឹងជំនីរព្រះអង្គ ស្រាប់តែមានទឹក និងលោហិតហូរចេញមកមួយរំពេច”។ ទឹកនៃជីវិតអស់កល្បជានិច្ច ឈាមនៃសេចក្តីស្រឡាញ់ ដែលបានឈ្នះអំពើហិង្សា ដែលឈ្នះការស្អប់គ្នា ដែលឈ្នះការមើលងាយគ្នាទៅវិញទៅមក ដែលណែនាំឱ្យយើងមើលឃើញផ្លូវថ្មី ផ្លូវនៃសេចក្តីសុខសាន្ត ដែលមានឈ្មោះថ្មីថាសេចក្តីពិត។ មហាជន ទាហាន អ្នកកាត់ក្តី ដែលបានស្រែកអស់ពីសមត្ថភាពថា “ឆ្កាងទៅ ឆ្កាងទៅ” ដែលបានស្អប់ព្រះយេស៊ូ ដែលបានវាយព្រះយេស៊ូ ដែលបានជេរប្រមាថព្រះយេស៊ូអស់ពីកម្លាំងកាយអស់ពីកម្លាំងចិត្ត នៅពេលហ្នឹងគេនាំគ្នាមើលព្រះអង្គដែលគេបានចាក់នៅក្នុងភាពស្ងៀមស្ងាត់។
ពិតមែន ទោះបីគេចាប់ព្រះយេស៊ូដោយប្រើអំពើហិង្សា ទោះបីគេកាត់ក្តីព្រះយេស៊ូភ្លាមៗដោយអយុត្តិធម៌ ទោះបីគេឆ្កាងព្រះយេស៊ូដោយប្រើអំពើហិង្សាយ៉ាងខ្លាំង ណែនាំឱ្យព្រះយេស៊ូឈឺចាប់ ម្តាយរបស់ព្រះយេស៊ូឈឺចាប់ សាវ័កជាទីស្រឡាញ់របស់ព្រះយេស៊ូឈឺចាប់យ៉ាងខ្លាំង។ ប៉ុន្តែ យប់នេះព្រះជាម្ចាស់ត្រាស់ហៅយើង ឱ្យយើងសំលឹងមើលព្រះយេស៊ូដែលគេចាក់ហើយ ឱ្យយើងសំលឹងមើលពិភពលោកនៅក្នុងរបៀបថ្មី នៅក្នុងរបៀបព្រះយេស៊ូ នៅពេលគេកាត់ក្តីនិងសម្លាប់ព្រះយេស៊ូ។ មានន័យថា នៅក្នុងភាពស្ងៀមស្ងាត់ដែលណែនាំឱ្យយើងមើលឃើញសេចក្តីពិត នៅក្នុងរូបកាយរបស់ព្រះយេស៊ូដែលត្រូវរងទុក្ខលំបាក យើងបានមើលឃើញយ៉ាងជាក់ស្តែង អំពីជីវិតដែលហូរចេញដូចទឹកនិងឈាម។
បងប្អូនជាទីស្រឡាញ់ សព្វថ្ងៃនៅក្នុងសតវត្សទី២១ ពិភពលោករបស់យើង គ្រួសាររបស់យើង ជីវិតរបស់យើង ពោរពេញដោយការស្អប់គ្នា ពោរពេញដោយអំពើហិង្សា ពោរពេញដោយការមើលងាយ។ ជួនកាល ជីវិតរបស់យើងដូចជាបានបាត់បង់អត្ថន័យទាំងអស់ ជួនកាលយើងផ្ទាល់ខ្លួន យើងជាអ្នកដែលប្រើអំពើហិង្សា យើងជាអ្នកដែលច្រណែនគេ យើងជាអ្នកដែលណែនាំឱ្យគេឆ្កាងព្រះយេស៊ូម្តងទៀត តាមរយៈរបៀបរស់នៅរបស់យើងជាប្រចាំថ្ងៃ។ ប៉ុន្តែ នៅពេលហ្នឹងយើងបានមើលមាគ៌ានៃសុខសន្តិភាព មាគ៌ានៃសេចក្តីសុខសាន្ត គឺសេចក្តីពិត។
បងប្អូនជាទីស្រឡាញ់ នៅក្នុងភាពស្ងៀមស្ងាត់នៃថ្ងៃសុក្រពិសិដ្ឋ ដែលយើងចាប់ផ្តើមពីពេលនេះតទៅ ឱ្យយើងសំលឹងមើលព្រះយេស៊ូនៅលើឈើឆ្កាង។ ឱ្យយើងសំលឹងមើលព្រះអង្គដែលគេចាក់ ឱ្យយើងសំលឹងមើលព្រះមហាក្សត្រដែលគេឆ្កាងនៅលើឈើឆ្កាង ឱ្យយើងស្តាប់នៅក្នុងដួងចិត្តរបស់យើង ព្រះនាមថ្មីនៃសុខសន្តិភាពគឺសេចក្តីពិត។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
