ក្បូនដង្ហែដែលមានហ្វូងមនុស្សកាន់ស្លឹកដែលបានរចនាជារូបផ្សេងៗ អមដោយសំឡេងស្គ របាំត្រុដិ និងរបាំក្ងោក យ៉ាងឱឡារឹក បានហែចេញពីផ្ទះបងស្រីឧបការគុណ មកកាន់ព្រះវិហារព្រះកុមារយេស៊ូ ក្នុងសង្កាត់បឹងទំពុន ខណ្ឌមានជ័យ រាជធានីនៅភ្នំពេញ នាព្រឹកថ្ងៃទី ១០ មេសា ២០២២នេះ។
ពិធីនេះប្រារព្ធធ្វើឡើងតាមរបៀបព្រះសហគមន៍កាតូលិកនៅកម្ពុជា ក្រោមអធិបតីភាព លោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតហស្លេ តាមទំនៀមទម្លាប់ព្រះសហគមន៍កាតូលិកក្នុងថ្ងៃដំបូងដែលព្រះសហគមន៍ឈានដល់សប្ដាហ៍ពិសិដ្ឋ ដោយរំឭកដល់ប្រជាជនអបអរសាទរព្រះយេស៊ូយាងចូលក្រុងយេរូសាឡឹម ដើម្បីចូលក្នុងអាថ៌កំបាំងរបស់ព្រះជាម្ចាស់ដោយព្រះបុត្រាត្រូវរងទុក្ខលំបាក សោយទិវង្គត និងមានព្រះជន្មថ្មីដ៏រុងរឿងតាមជំនឿព្រះសហគមន៍កាតូលិក ។
នៅក្នុងឱកាសនេះដែរ លោកអភិបាលព្រះសហគមន៍មានប្រសាសន៍ណែនាំ ដោយលើកទឹកចិត្តគ្រីស្តបរិស័ទទាំងអស់ ដែលបានធ្វើដំណើររួមគ្នាជាមួយព្រះសហគមន៍ក្នុងរយៈពេល៤០ថ្ងៃនៃរដូវអប់រំពិសេសនេះថា ៤០ថ្ងៃនេះយើងបានចូលក្នុងវាលរហោស្ថាន ដោយខិត្តខំចូលក្នុងវាលរហោស្ថាននៃជីវិតរបស់យើង ដើម្បីតស៊ូ កែប្រែចិត្តគំនិតដើម្បីភ្ជាប់ជាមួយព្រះហឫទ័យព្រះយេស៊ូថែមទៀត។
ជាងនេះទៅទៀតតាមរយៈថ្ងៃដំបូងនៃសប្ដាហ៍ពិសិដ្ឋនេះ លោកអភិបាលមានប្រសាសន៍ថា នេះជាពេលវេលាដែលយើងរួមជាមួយមហាជនពីដើម កោតសរសើរព្រះអម្ចាស់យេស៊ូ ដែលយាងចូលក្នុងទីក្រុងយេរូសាឡឹម ហើយក៏ជាពេលវេលាដែលយើងចូលរួមនៅក្នុងការរងទុក្ខលំបាករបស់ព្រះយេស៊ូ ដើម្បីធ្វើដំណើរយ៉ាងជិតស្និទ្ធជាមួយព្រះយេស៊ូដែលជប់លៀងជាមួយក្រុមសាវ័គ សោយព្រះទិវង្គត និងមានព្រះជន្មរស់ឡើងវិញ។
លោកអភិបាលក៏បានលើកទឹកចិត្តបន្ថែមដល់គ្រីស្តបរិស័ទខ្មែរទាំងអស់ដែលកំពុងតែត្រៀមចូលក្នុងឆ្នាំថ្មីប្រពៃណីជាតិខ្មែរ និងក្រើនរំឭកគ្រីស្តបរិស័ទឱ្យនឹកឃើញដល់សប្ដាហ៍ពិសិដ្ឋ នឹកដល់ព្រះយេស៊ូសោយទិវង្គត និងមានព្រះជន្មថ្មី ជាសញ្ញាសម្គាល់នៃជីវិតថ្មីដែលកើតឡើងនៅក្នុងដួងចិត្តរបស់យើង នៅលើទឹកដីរបស់យើង។
ប្រធានគណៈកម្មការព្រះសហគមន៍ ឃុន កញ្ញា និយាយថា «អត្ថន័យនៃបុណ្យហែរស្លឹកចំពោះខ្ញុំ គឺអបអរសាទរព្រះយេស៊ូជាស្តេចយាងចូលក្រុងយេរូសាឡឹម ត្រៀមខ្លួនចូលសប្តាហ៍ពិសិដ្ឋ រួមទុក្ខលំបាករបស់ព្រះយេស៊ូ ជាពេលវេលាដែលត្រូវជិតស្និទ្ធជាមួយព្រះយេស៊ូ និងត្រៀមខ្លួនទទួលអំណរសប្បាយដែលព្រះយេស៊ូមានព្រះជន្មដ៏រុងរឿងអស់កល្បជានិច្ច ដោយថ្វាយទុក្ខលំបាក កង្វល់ អំណរសប្បាយ និងមានក្តីសង្ឃឹមអាចរួមជាមួយព្រះអង្គនៅស្ថានបរមសុខ គឺទទួលជីវិតអស់កល់ជានិច្ច។»
ពិធីនេះត្រូវបានប្រារព្ធឡើង ដោយមានការណែនាំពីលោកបូជាចារ្យទទួលខុសត្រូវព្រះសហគមន៍ ដាមីញ៉ាំង ហ្វារនឺ ដោយមានអានអត្ថបទព្រះគម្ពីរដំណឹងល្អ ច្រៀងលើកតម្កើងព្រះជាម្ចាស់ និងប្រោសទឹកព្រះពរលើស្លឹករួមជាមួយគ្រីស្តបរិស័ទ រួចហែទៅកាន់ព្រះវិហារព្រះកុមារយេស៊ូយ៉ាងឱឡារឹក ។
លោកអភិបាលអូលីវីយ៉េ គោះទ្វារព្រះវិហារ៣ដង ដោយប្រកាសឱ្យទ្វារបើកចំហរ ដើម្បីឱ្យព្រះយេស៊ូព្រះមហាក្សត្រនៃពិភពលោកប្រកបដោយសិរីរុងរឿងយាងចូល និងអញ្ជើញគ្រីស្តបរិស័ទចូលទៅក្នុងព្រះវិហារ ដើម្បីប្រារព្ធពិធីបុណ្យអភិបូជាដែលជាការរំឭកពីអាថ៌កំបាំងនៃការសង្គ្រោះតាមជំនឿព្រះសហគមន៍កាតូលិក។
ឆ្លៀតក្នុងឱកាសដែលព្រះសហគមន៍នឹករឭកដល់ព្រះយេស៊ូយាងចូលក្រុងយេរូសាឡឹមដើម្បីរងទុក្ខលំបាក និងសោយទិវង្គតព្រោះតែភាពច្រណែន និងចិត្តលោភលន់របស់មនុស្សលោកនេះដែរ លោកអភិបាលអូលីវីយ៉េ ណែនាំគ្រីស្តបរិស័ទនៅក្នុងធម្មទេសនាថា “ទោះបីលោកពីឡាត់មិនបានរកឃើញទោសព្រះយេស៊ូ តែគេបានពុករលួយដោយលោកយ៉ូដាសបានលក់ព្រះយេស៊ូព្រោះតែប្រាក់”។
លោកអភិបាលបន្តថា ការច្រណែន ការស្រេកឃ្លានអំណាច និងពុករលួយ នាំឱ្យមានសង្គ្រាម ដូចប្រទេសអ៊ុយក្រែនណិងរុស្សីសព្វថ្ងៃ។ លោកអភិបាលបន្ថែមថា ព្រះយេស៊ូជាមាគ៌ានៃសេចក្ដីសុខសាន្ត និងសេចក្ដីសុខសាន្តតាមរបៀបព្រះយេស៊ូគឺ៖ យើងជាអ្នកតូចជាងគេនិងបម្រើគេ ចេះអាណិតមេត្តា កុំឆ្លើយនឹងហិង្សាដោយអំពើហិង្សា ណែនាំឱ្យកាត់បន្ថយសេចក្ដីស្អប់ ទោះពេលវេលាចុងក្រោយលើកលែងទោស និងជឿទុកចិត្តថ្វាយគ្រប់យ៉ាងទៅព្រះបិតាទាំងអំណរសប្បាយនិងទុក្ខព្រួយ។
ដោយ៖ ដាលីស
