ព្រះសហគមន៍កាតូលិកកម្ពុជា ព្រះវិហារម្ចាស់ក្សត្រីយ៍នៃសន្តិភាព (អរិយក្សត្រ) ក្នុងស្រុកល្វាឯម ខេត្តកណ្តាលប្រារព្ធពិធីអរព្រះគុណព្រះជាម្ចាស់ដោយអធិដ្ឋានរួមជាមួយព្រះនាងម៉ារី ក្នុងឱកាសរំឭកខួប១៤ឆ្នាំនៃការស្រង់រូបសំណាកព្រះនាងម៉ារីទី១ពីបាតទន្លេមេគង្គ ក្រោមអធិបតីភាពលោកអភិបាលព្រះសហគមន៍កាតូលិកភូមិភាគកំពង់ចាម ប្រ៊ុយណូ កូសម៍ នាព្រឹកថ្ងៃទី២៣ មេសា ២០២២ ដោយមានគ្រីស្តបរិស័ទចូលរួមជាច្រើនកុះករ។
នៅក្នុងធម្មទេសនា លោកអភិបាលប្រ៊ុយណូ កូសម៍ មានប្រសាសន៍ថា យើងមកអង្វរព្រះជាម្ចាស់តាមរយៈព្រះនាងម៉ារី។ នៅពេលយើងមកទីនេះ យើងដឹងថាព្រះនាងម៉ារីណែនាំយើងឆ្ពោះទៅកាន់ព្រះជាម្ចាស់ផ្ទាល់។ លោកអភិបាលបន្តថា អ្វីដែលយើងបានឮ និងអ្វីដែលយើងបានឃើញមិនស្រួល និងពេលខ្លះមិនល្អឱ្យយើងឈឺចាប់វេទនា។
លោកអភិបាលភូមិភាគកំពង់ចាម រំលឹកទៀតថា «សង្គ្រាមមានច្រើននៅក្នុងពិភពលោក នាំឱ្យមានមនុស្សរាប់ពាន់អ្នកស្លាប់ និងរាប់លានអ្នកវេទនា។ សម្ដេចប៉ាបបានណែនាំឱ្យយើងអង្វរសូមសុខសន្តិភាពសម្រាប់ពិភពលោកទាំងមូលតាមរយៈព្រះនាងម៉ារី ជាពិសេសប្រទេសអ៊ុយក្រែន និងរុស្សី។» លោកថា ព្រះជាម្ចាស់ចង់ឱ្យយើងអធិដ្ឋានសម្រាប់មនុស្សទាំងអស់ ហើយយើងមិនអាចនៅស្ងៀមបានទេ គឺឱ្យយើងចេះផ្ដល់សាក្ខីភាពពីជំនឿរបស់យើង។ លោកអភិបាលប្រ៊ុយណូមានប្រសាសន៍ទៀតថា យើងជាគ្រីស្តបរិស័ទ យើងមានតួនាទីក្នុងការនិយាយ ផ្ដល់សក្ខីភាព ដោយសារព្រះយេស៊ូជាកម្លាំងរបស់យើង។ ជីវិតរបស់យើងជាគ្រីស្តបរិស័ទ ជំនឿរបស់យើងខ្លាំងជាងអាវុធបរិមាណូ។
នៅក្នុងឱកាសនេះដែរ លោក ដាវីឌ ហ្សួរណូ បូជាចារ្យទទួលខុសត្រូវព្រះសហគមន៍នេះមានប្រសាសន៍ថាព្រះនាងម៉ារីជាម្ដាយយើងខ្ញុំ និងណែនាំឱ្យយើងទៅជាមនុស្សដ៏វិសុទ្ធ។
លោកបូជាចារ្យ ដាវីដ បញ្ជាក់ថា នៅថ្ងៃនេះយើងសប្បាយរីករាយ ដោយសារជិត២ឆ្នាំមកហើយដែលយើងមិនមានបុណ្យធំដូចនេះ ដោយសារកូវីដ១៩។ ទើបតែថ្ងៃនេះយើងអាចធ្វើបុណ្យធំដូចមុន និងយើងសប្បាយព្រោះមនុស្សដែលមកអធិដ្ឋានជាមួយព្រះនាងម៉ារីនៅទីនេះ ដែលជាកន្លែងយើងជឿថាព្រះនាងម៉ារីបានជ្រើសរើស ដើម្បីឱ្យបងប្អូនគ្រីស្តបរិស័ទមានជីវិតជិតស្និទ្ធជាមួយព្រះយេស៊ូតាមរយៈព្រះនាងម៉ារី និងជាបេសកកម្មរបស់ព្រះនាងម៉ារីដែលនាំយើងអធិដ្ឋានទៅព្រះជាម្ចាស់ជាមួយព្រះនាងម៉ារីជាម្ដាយរបស់យើង។
លោកបូជាចារ្យរូបនេះ បន្ថែមថា «ខ្ញុំសង្ឃឹមថាកន្លែងនេះ ជាកន្លែងដែលជួយគ្រីស្តបរិស័ទឱ្យមានជីវិតជាគ្រីស្តបរិស័ទល្អ និងជាកន្លែងដែលគេមកបាន ដើម្បីគិតអំពីជីវិតរបស់គេដោយទទួលក្ដីសង្ឃឹមនៅទីនេះជាមួយព្រះនាងម៉ារី។» លោកដាវីដ បន្តថា កន្លែងនេះជួយដល់គ្រីស្តបរិស័ទរំឭកពីភាពជាបងប្អូនគ្នា ដោយយើងមានព្រះបិតាតែមួយ និងមានព្រះនាងម៉ារីជាម្ដាយរបស់យើង យើងជាបុត្រធីតារបស់ព្រះជាម្ចាស់ ជាកន្លែងអធិដ្ឋានពីសន្តិភាព។ ទោះបីជានៅស្រុកខ្មែរមិនមានសង្គ្រាម តែមិនត្រឹមតែជាសន្តិភាពនៅក្នុងសង្គមខ្មែរ ក្នុងគ្រួសារខ្មែរប៉ុណ្ណោះទេ គឺសន្តិភាពសម្រាប់ពិភពលោក ដោយយើងមានបេសកកម្មបើកចិត្តគំនិតរបស់យើង មិនមែនគិតអំពីជីវិតផ្ទាល់ខ្លួនតែប៉ុនហ្នឹងទេ។
ព្រះវិហារមាតានៃសន្តិភាពអរិយក្សត្រ មានទីតាំងនៅត្រើយម្ខាងនៃទន្លេមេគង្គ ស្ថិតនៅក្នុងស្រុកល្វាឯម ខេត្តកណ្តាល។
យុវតី ញ៉ សុគន្ធា មកពីព្រះសហគមន៍ស្អាង ខេត្តកណ្ដាលដែលមកចូលរួមអធិដ្ឋានព្រះនាងម៉ារីនៅអរិយក្សត្រនេះ ឲ្យដឹងថា «ខ្ញុំតែងតែអធិដ្ឋានជាមួយព្រះនាងទាំងនៅទីនេះ និងនៅផ្ទះ។»
គន្ធា បន្ថែមថា «ចំពោះខ្ញុំផ្ទាល់ ខ្ញុំជឿលើព្រះនាងម៉ារីច្បាស់ ព្រោះតាំងពីខ្ញុំមកអធិដ្ឋានរាល់មួយឆ្នាំពីរដងគឺគាត់បានផ្ដល់ក្ដីសង្ឃឹមឱ្យខ្ញុំ និងគ្រប់ការងារដែលខ្ញុំធ្វើបានជោគជ័យនៅពេលដែលខ្ញុំបានអធិដ្ឋានជាមួយព្រះនាង ទាំងរឿងបញ្ហាក្នុងគ្រួសារ និងសុខភាពគ្រួសារតែងតែទទួលបានជោគជ័យមកវិញ ហើយក៏ទទួលបាននូវអ្វីដែលយើងចង់បាន។»
រូបសំណាកព្រះនាងម៉ារីទី១ ត្រូវបានស្រង់ចេញពីបាតទន្លេមេគង្គកាលពីថ្ងៃទី ១៦ ខែមេសា ឆ្នាំ២០០៨ ដោយក្រុមគ្រួសារអ្នកនេសាទដែលជាពុទ្ធបរិស័ទ។ ប៉ុន្មានឆ្នាំក្រោយមក ក្រុមគ្រួសារនេះបានកែប្រែចិត្តគំនិតទទួលដំណឹងល្អ និងបានក្លាយជាគ្រីស្តបរិស័ទកាតូលិក៕
ដោយ៖ ដាលីស
