កាលពីថ្ងៃអាទិត្យម្សិលមិញនេះ លោកអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ បានមានប្រសាសន៍ថា ពេលយើងក្លាយជាគ្រីស្តបរិស័ទ យើងត្រូវដឹងថា យើងជាបុត្រធីតារបស់ព្រះជាម្ចាស់ យើងជាព្រះកាយព្រះគ្រីស្ត និងយើងជាវិហាររបស់ព្រះជាម្ចាស់។
«នេះគឺជាអត្តសញ្ញាណរបស់យើងដែលជាគ្រីស្តបរិស័ទ។» លោកអភិបាលបញ្ជាក់។
លោកបានរំលឹកគ្រីស្តបរិស័ទទាំងអស់ ដែលបានចូលរួមក្នុងពិធីអគ្គសញ្ញាលាបថ្ងាសនៅមណ្ឌលសកម្មភាពតាកែវ ដូច្នេះថា ព្រះជាម្ចាស់បានត្រាស់ហៅយើងឲ្យក្លាយជាបុត្រធីតារបស់ព្រះអង្គ ដែលកោតខ្លាចព្រះបិតា គឺគោរពព្រះអង្គគ្រប់ពេល មិនគ្រាន់តែពេលមកវិហារនោះទេ។
យើងមិនមែនជាប្រជាជនធម្មតាទេ ព្រោះពេលទទួលព្រះកាយព្រះគ្រីស្ត គឺយើងជាបងប្អូននឹងគ្នា យើងជាព្រះកាយព្រះគ្រីស្ត ក្នុងចំណោមព្រះសហគមន៍នានាក្នុងពិភពលោក។ លោកបញ្ជាក់បន្ថែម។
ក្នុងនោះដែរ លោកអភិបាលបានពន្យល់ទៀតថា យើងជាវិហាររបស់ព្រះជាម្ចាស់ គឺជីវិតរបស់ខ្លួនយើងផ្ទាល់ជារូបកាយដ៏សក្ការៈ ដែលមានព្រះវិញ្ញាណដ៏វិសុទ្ធគង់នៅជាមួយ។
ក្នុងពិធីកាលពីថ្ងៃទី២៦ ខែមិថុនានេះ មានគ្រីស្តបរិស័ទទទួលអគ្គសញ្ញាលាបថ្ងាសចំនួន១១០នាក់ ដែលមកពីព្រះសហគមន៍ចំនួន៨ក្នុងមណ្ឌលសកម្មភាពតាកែវ។
កម្មវិធីនេះ បានធ្វើឡើងនៅព្រះសហគមន៍សន្តីម៉ារីញញឹម-ចំការទៀង ក្នុងឃុំគូស ស្រុកត្រាំកក់ ខេត្តតាកែវ។
លោកអភិបាលអូលីវីយ៉េ មានប្រសាសន៍ទៅកាន់បេក្ខជនទៀតថា ព្រះវិញ្ញាណណែនាំយើងក្នុងជីវិតប្រចាំថ្ងៃ។ លោកសង្កត់ធ្ងន់ថា «អត់មាននរណាម្នាក់មានអំណោយទានស្មើសូន្យទេ គឺមានតែអ្នកខ្ជិល ដែលមិនចេះមើលអំណោយទានរបស់ខ្លួនប៉ុណ្ណោះ។»
លោកអភិបាលបានបន្ថែម ក្នុងជីវិតជាគ្រីស្តបរិស័ទ យើងខុសពីសាសនាឯទៀត ដោយសារតែយើងមានព្រះវិញ្ញាណរបស់ព្រះជាម្ចាស់ ដូច្នេះ «របៀបដែលយើងរស់នៅ របៀបដែលយើងដឹកនាំត្រូវតែជារបៀបប្លែក… ដោយចាប់អារម្មណ៍ពីមនុស្សម្នាក់ៗ តើអ្នកនោះត្រូវការអ្វីខ្លះដើម្បីឲ្យគាត់ជោគជ័យក្នុងជីវិតផ្ទាល់ខ្លួន ដោយបញ្ចេញអស់ពីសមត្ថភាពរបស់គាត់» តាមអំណោយទានដែលព្រះជាម្ចាស់ប្រទានឲ្យម្នាក់ៗរៀងៗខ្លួន។
ហេតុនេះយើងជាអ្នកដឹកនាំត្រូវតែជួយពួកគាត់ឲ្យរីកចម្រើន កុំឲ្យធ្លាក់ក្នុងជីវិតអន្តរាយ។ «ក្នុងពេលបច្ចុប្បន្ននេះ ភ្នែករបស់យើងមើលឃើញរូបភាពខុសជាច្រើន នាំឲ្យយើងគិតថា អ្នកមានទ្រព្យច្រើនជាមនុស្សល្អ អ្នកដែលគ្មានអ្វីសោះជាមនុស្សខ្សោយ។ នេះមិនមែនទេ។» លោកអភិបាលព្រះសហគមន៍បានរំលឹកដល់គ្រីស្តបរិស័ទ។
គង្វាលព្រះសហគមន៍រូបនេះ បានសុំឲ្យគ្រីស្តបរិស័ទប្រឹងប្រែងរស់នៅដូចជាផ្កាឈូក ដែលខំប្រឹងឡើងខ្ពស់ដើម្បីស្វែងរកពន្លឺ គឺស្ថានបរមសុខ ដើម្បីរៀបចំអនាគតរបស់យើងដែលអស្ចារ្យ។
ស៊ឹម សោភា អាយុ២៣ឆ្នាំ ជាគ្រីស្តបរិស័ទទទួលអគ្គសញ្ញាលាបថ្ងាសបានឲ្យដឹងថា រូបគាត់បានផ្លាស់ប្តូរជំនឿកាលពីឆ្នាំ២០២១ ហើយសព្វថ្ងៃនេះ គាត់បានចូលរួមក្នុងសកម្មភាពជាច្រើនជាមួយព្រះសហគមន៍ ដើម្បីបង្ហាញវត្តមានរបស់ព្រះជាម្ចាស់។ «ខ្ញុំចែកអំណរសប្បាយដល់ក្មេងៗ ដល់ចាស់ជរា ដល់មនុស្សដទៃៗទៀតឲ្យស្គាល់ពីព្រះជាម្ចាស់ ស្គាល់ពីដំណឹងល្អ ជួយទុក្ខធុរៈគ្នា ចេះស្រឡាញ់គ្នាទៅវិញទៅមក។»
អ្នកស្រី លន់ ស្រីពៅ ជាបុគ្គលិកតម្បាញរបស់ព្រះសហគមន៍ ដែលជាបេក្ខជនម្នាក់ទៀត បានឲ្យដឹងថា គាត់សប្បាយចិត្តដែលព្រះជាម្ចាស់បានប្រទានអគ្គសញ្ញាលាបថ្ងាស ដល់គាត់ថ្ងៃនេះ។ ស្រីពៅបន្ថែមថាជំនឿបានជួយឲ្យគាត់ធូរស្រាលក្នុងចិត្តពេលមានទុក្ខលំបាក ដោយគាត់គ្រាន់តែអធិដ្ឋាន ធម៌ឱព្រះបិតា គាត់ក៏សប្បាយចិត្តឡើងវិញ។
លោកកុល ជៀង ជាគ្រីស្តបរិស័ទដើមដំបូង បាននិយាយថា ដោយសារអំណោយទានពីព្រះជាម្ចាស់ ព្រះសហគមន៍នៅទីនេះបានរីកចម្រើនឡើងពីមួយឆ្នាំទៅមួយៗ ដោយចាប់ផ្តើមពីព្រះវិហារសន្តីម៉ារីញញឹម-ចំការទៀងទៅកន្លែងផ្សេងៗទៀត ដែលរហូតមកដល់ពេលនេះ មាន៨កន្លែងហើយ។
ក្រោយពេលទទួលពិធីជ្រមុជទឹករួចក្នុងឆ្នាំ១៩៩៨ លោកបានប្រមែរប្រមូលជំទង់និងកុមារមួយក្រុម ឲ្យចូលរួមអធិដ្ឋាន និងមានការការលើកទឹកចិត្ត និងការសួរសុខទុក្ខពីលោកបូជាចារ្យនានាមកដល់កន្លែងដោយផ្ទាល់ ទើបព្រះសហគមន៍ក៏លេចចេញជារូបរាងបន្តិចម្តងៗ។ ហើយគ្រីស្តបរិស័ទក៏ចាប់ផ្តើមចេញទៅប្រកាសដំណឹងល្អតាមកន្លែងនីមួយៗ ដោយមានសកម្មភាពមនុស្សធម៌ និងការអប់រំជំនឿ។
លោកអភិបាលអូលីយ៉េ មានប្រសាសន៍ប្រាប់អ្នកសារពត៌មានដោយផ្ទាល់ថា ការផ្តល់ការងារធ្វើ ដើម្បីលើកកម្ពស់សេដ្ឋកិច្ចក្នុងក្រុមគ្រួសារគ្រីស្តបរិស័ទជារឿងមួយសំខាន់ ដើម្បីឲ្យពួកគាត់អាចបន្តការប្រកាសដំណឹងល្អដល់ប្រជាជនឯទៀតៗ និងដើម្បីឲ្យជំនឿចាក់ឫសដល់មនុស្សជំនាន់ក្រោយ។
ក្នុងតំបន់តាកែវ ជាពិសេសនៅចំការទៀង លោកអភិបាលព្រះសហគមន៍បានខិតខំរៀបចំឲ្យមានសហគ្រិនសង្គម ដែលបានជួយដល់គ្រួសារគ្រីស្តបរិស័ទ ពុទ្ធបរិស័ទ ស្ត្រីមេម៉ាយ អ្នកផ្ទុកមេរោគអេដស៍ ឲ្យមានការងារធ្វើច្បាស់លាស់ ដែលមានដូចជាតម្បាញសូត្រ ផលិតផលស្ករគ្រាប់ សិប្បកម្មដូង កន្លែងស្នាក់លំហែ។ ជាមួយគ្នានេះដែរ ក៏មានក្រុមសិល្បៈតន្ត្រី ក្រុមបម្រើព្រះសហគមន៍និងសង្គម ក្រុមពិធីបុណ្យ និងអប់រំជំនឿ និងមានសាលារៀនពីកម្រិតមត្តេយ្យរហូតដល់ឧត្តមសិក្សា៕
ដោយកែវ កញ្ញា
