ព្រះវិហារសន្តីម៉ារីញញឹម ចំការទៀង ប្រារព្ធទិវាសិទ្ធិកុមារ ដើម្បីជួយឱ្យកុមារដែលមានអាយុចន្លោះពី ៣ដល់១៧ឆ្នាំ ប្រមានជាង៦០០នាក់យល់ពីសិទ្ធិរបស់ខ្លួន នាថ្ងៃទី២៥ មិថុនា ២០២២ ក្រោមអធិបតីភាពលោកអភិបាលព្រះសហគមន៍កាតូលិកភូមិភាគភ្នំពេញអូលីវីយ៉េ ជ្មីតហស្លេ នៅភូមិចំការទៀង ឃុំគូស ស្រុកត្រាំកក់ ខេត្តតាកែវ។
កុមារី ធូ រ៉ាឌី រៀននៅសាលាបឋមសិក្សានិគ្រោធារាម ក្នុងវ័យ១២ឆ្នាំ មកពីភូមិត្រពាំងអំពិល និយាយថា ខ្ញុំចូលរួមកម្មវិធីនេះជារៀងរាល់ឆ្នាំ។ រ៉ាឌី និយាយរៀបរាប់ទៀតថា «ទិវានេះ ខ្ញុំបានរៀនពីសិទ្ធិកុមារ និងខ្ញុំចាំបានថាសិទ្ធិកុមារមាន៥យ៉ាង គឺមានឪពុកម្ដាយ ញ៉ាំចំណីអាហារ ដើរលេង ទៅសាលារៀន និង ទៅមន្ទីរពេទ្យពេលឈឺ។»
រ៉ាឌី បន្ថែមថា នៅពេលត្រឡប់ទៅវិញគាត់នឹងប្រាប់ឪពុកម្ដាយនិងមិត្តភក្តិរបស់គាត់អំពីសិទ្ធិទាំងអស់នេះ។
កុមារា ញឹក ហួយ រៀនថ្នាក់ទី៦ នៅសាលាបឋមសិក្សាវត្តនិគ្រោធ ក្នុងភូមិអង្គតាងិល ធ្លាប់បានចូលរួមទិវាកុមារនៅព្រះវិហារសន្តីម៉ារីញញឹមនេះ២ទៅ៣ បាននិយាយថា កម្មវិធីនេះ ជាកម្មវិធីមួយដែលធ្វើឱ្យយើងជាកុមាររីករាយសប្បាយ និងទទួលបានរបស់លេង សម្ភារអនាម័យ និងនំចំណីជាដើម។
ហួយ បន្ថែមថា «ខ្ញុំមកទីនេះក្រៅពីរបស់របរដែលទទួលបាន ខ្ញុំក៏បានយល់ពីព្រះសហគមន៍ យល់ពីសិទ្ធិកុមារ សិទ្ធិបុរស សិទ្ធិនារី និងសូមឱ្យមិត្តភក្តិខ្ញុំចូលរួមកម្មវិធីនេះកាន់តែច្រើន។»
តាមការឱ្យដឹងពីលោក ភឿន សុភាន់ អ្នកទទួលខុសត្រូវក្រុមកាយឫទ្ធិនៅព្រះវិហារនេះ បានរៀបរាប់ថា គោលបំណងសំខាន់នៃការប្រារព្ធពិធីនេះ គឺដើម្បីអបអរសាទរទិវាសិទ្ធិកុមារ ក៏ដូចជាកម្មវិធីមួយដើម្បីរំឭកដល់កុមារ និងបង្រៀនដល់ពួកគាត់ អំពីសិទ្ធិនិងកាតព្វកិច្ចរបស់ពួកគាត់។
ជាមួយគ្នានេះដែរ អ្វីដែលសំខាន់គឺការចួបជុំមួយដើម្បីផ្ដល់នូវអំណរសប្បាយ និងបង្ហាញពីសកម្មភាពរៀនរួមគ្នា។ តាមរយៈការបង្រៀនកុមារឱ្យស្គាល់ពីសិទ្ធិរបស់ខ្លួននេះ លោកសុភាន់ បញ្ជាក់ថា នេះជាអត្ថប្រយោជន៍ដែលកុមារទទួលបាន គឺកាលណាគេយល់ពីសិទ្ធិរបស់គេ គេក៏ដឹងពីតួនាទីរបស់គេ និងអត្ថប្រយោជន៍ដែលផ្ដល់ឱ្យគេ គេអាចរស់នៅក្នុងសិទ្ធិធំទាំង៤របស់គេ ដែលអាចឱ្យរស់នៅក្នុងគន្លងមួយដ៏ត្រឹមត្រូវ។
ក្នុងឱកាសនោះ លោកអភិបាលអូលីវីយ៉េ មានប្រសាសន៍ថាណែនាំកុមារឲ្យយល់ដឹងពីសិទ្ធិធំៗរបស់ខ្លួន មានដូចជា សិទ្ធិរស់រានមានជីវិតដោយមានឪពុកម្ដាយថែរក្សា សិទ្ធិទទួលបានការអប់រំដោយទៅសាលា សិទ្ធិទទួលអាហារគ្រប់គ្រាន់ដើម្បីលូតលាស់ សិទ្ធិទទួលបានការការពារដោយមានសេវាសាធារណៈ ជាពិសេសពេលមានជំងឺ និងសិទ្ធិកម្សាន្តសប្បាយ។
លោកអភិបាលបន្ថែមថា សិទ្ធិកុមារទាំងនេះ ណែនាំឱ្យមើលឃើញអនាគតរបស់ពួកគេ។ ទោះបីស្ថិតនៅក្រោមដំណក់ភ្លៀង កុមារទាំងអស់បានចែកជាក្រុមតូចៗដើម្បីទទួលការណែនាំពីមេកាយឫទ្ធិឱ្យស្គាល់ពីសិទ្ធិកុមារ ដែលមាននៅក្នុងប្រទេសកម្ពុជាក៏ដូចជានៅក្នុងសាកលលោក។
ក្រុមកុមារកាយឫទ្ធិនៃព្រះវិហារសន្តីម៉ារីញញឹមក្នុងព្រះសហគមន៍ចំការទៀង តែងតែចួបជុំគ្នារៀងរាល់សប្ដាហ៍ ដើម្បីទទួលការអប់រំនិងកម្សាន្ត ដោយមានកុមារចន្លោះពី៣០០ទៅ៥០០នាក់ចូលរួម។ ដោយឡែករយៈពេល២ឆ្នាំកន្លងមកនេះកម្ពុជាស្ថិតនៅក្នុងការរាតត្បាតនៃជំងឺឆ្លងកូវីដ១៩ ក្រុមនេះត្រូវបានផ្លាស់ប្ដូរសកម្មភាពទៅជាការសួរសុខទុក្ខតាមផ្ទះ។
បច្ចុប្បន្ននេះក្រោយពេលរាជរដ្ឋាភិបាល បើកឱ្យមានសកម្មភាពគ្រប់វិស័យឡើងវិញ ក្រុមកាយឫទ្ធិបានចួបជុំគ្នានៅព្រះវិហាររាល់សប្ដាហ៍ដែលមានកុមារកាយឫទ្ធិចូលរួមជាមធ្យមចន្លោះពី៨០ ទៅ១២០នាក់។
ដោយដាលីស
