យោងតាមលិខិតលោកអភិបាលព្រះសហគមន៍កាតូលិកភូមិភាគភ្នំពេញនាថ្ងៃទី១៥ ខែកក្កដា ដែលវើរីតាស់អាស៊ីទទួលបាននាពេលល្ងាច បានឲ្យដឹងថា សន្តអាសនៈនៃបុរីវ៉ាទីកង់ បានជ្រើសតាំងលោកសិលា សួន ហង្សលី ជាអភិបាលទទួលបន្ទុកមើលការខុសត្រូវព្រះសហគមន៍កាតូលិកភូមិភាគកំពង់ចាម។
តាមរយៈលិខិតដដែល លោកអភិបាលអូលីវីយ៉េ ជ្មីតហស្លេបានបញ្ជាក់ថា នៅថ្ងៃទី១៥ ខែកក្កដា ឆ្នាំ២០២២នេះ លោកត្រូវបានជ្រើសតាំងដោយសម្តេចប៉ាបហ្វ្រង់ស៊ីស្កូ ឲ្យក្លាយជាលោកអភិបាលមើលការខុសត្រូវនៅក្នុងភូមិភាគកំពង់ចាមទាំងមូល។
ព្រះសហគមន៍ភូមិភាគកំពង់ចាម គ្របដណ្តប់ខេត្តចំនួន៨ មានដូចជា កំពង់ចាម ព្រៃវែង ក្រចេះ ស្ទឹងត្រែង មណ្ឌលគិរី រតនគិរី ត្បូងឃ្មុំ និងស្វាយរៀង។
លោកអភិបាលអូលីវីយ៉េឲ្យដឹងថា លោកនិងលោកអភិបាលថ្មីធ្លាប់បានរួមការងារជាមួយគ្នាក្នុងឆ្នាំ២០០២-២០០៧ នៅមណ្ឌលសកម្មភាពកំពត-តាកែវ។ ក្នុងឆ្នាំ២០០៧-២០១៥ លោកហង្សលី បានទៅបន្តការសិក្សាអនុបណ្ឌិតនៅប្រទេសបារាំង ផ្នែកទេវវិទ្យានៅវិទ្យាស្ថានកាតូលិកនៃទីក្រុងប៉ារីស។
លោកបូជាចារ្យហង្សលី ពេលបច្ចុប្បន្នកំពុងបម្រើការងារនៅក្នុងព្រះសហគមន៍ភូមិភាគភ្នំពេញ ជាបូជាចារ្យទទួលខុសត្រូវមណ្ឌលសកម្មភាពភ្នំពេញថ្មី និងជាតំណាងពេញសិទ្ធិរបស់លោកអភិបាលភូមិភាគភ្នំពេញក្នុងឆ្នាំ២០១៦ និងជានាយកនៃទេវវិទ្យាល័យ សន្តយ៉ូហាន ម៉ារី វីយ៉ាណែរ ក្នុងឆ្នាំ២០១៨។
លោកអភិបាលសិលា សួន ហង្សលី ជាជនជាតិខ្មែរ ប្រសូតនៅក្នុងគ្រួសារគ្រីស្តបរិស័ទ នៅថ្ងៃទី១៥ ខែមេសា ឆ្នាំ១៩៧១ នៅស្រុកល្វាឯម ខេត្តកណ្តាល។ លោកត្រូវបានតែងតាំងជាបូជាចារ្យកាតូលិកក្នុងថ្ងៃទី០៩ ខែធ្នូ ឆ្នាំ២០០១ ជាមួយនិស្សិតទេវវិទ្យាល័យចំនួន៣រូបផ្សេងទៀត ហើយបានបម្រើការងារក្នុងភូមិភាគភ្នំពេញរហូតមកដល់សព្វថ្ងៃនេះ។
ក្នុងសេចក្តីប្រកាសរបស់លោកអភិបាលអូលីវីយ៉េ លោកសូមសម្តែងការអបអរសាទរចំពោះការជ្រើសតាំងនេះ និងសូមថ្លែងអំណរគុណចំពោះវត្តមាននិងកិច្ចសហការដ៏ស្អិតរមួតរបស់លោកអភិបាលថ្មី ដែលបានខិតខំអស់ពីកំលាំងកាយចិត្ត ដើម្បីបម្រើព្រះសហគមន៍នៅក្នុងភូមិភាគភ្នំពេញកន្លងមក។
«យើងពិតជានឹកលោកណាស់ លោកអភិបាល ប៉ុន្តែយើងនឹងអធិដ្ឋានសម្រាប់បេសកកម្មថ្មីរបស់លោកក្នុងភូមិភាគកំពង់ចាម។» លោកអភិបាលអូលីវីយ៉េបន្ថែម។
កែតម្រូវ ១៥ សីហា ២០២២៖
លិខិតដដែលបានឲ្យដឹងទៀតថា ពិធីទទួលមុខងារជាផ្លូវការរបស់លោកអភិបាលសិលា សួន ហង្សលី នឹងប្រព្រឹត្តទៅនៅពេលខាងមុខនេះ៕
