អគារសាលាបឋមសិក្សា នៃមជ្ឈមណ្ឌលវប្បធម៌និងភាសាបរទេស (FFCC) មួយខ្នងដែលមានថ្នាក់រៀន១២បន្ទប់ បានដាក់សម្ពោធជាផ្លូវការក្រោមអធិបតីភាព ឯកឧត្តម បណ្ឌិត ម៉ៅ ធនិន្ទ អភិបាលនៃគណៈអភិបាលខេត្តកំពត លោកអភិបាលព្រះសហគមន៍កាតូលិកភូមិភាគភ្នំពេញ អូលីវីយ៉េ ជ្មីតហស្លេ។ កម្មវិធីសម្ពោធដាក់ឱ្យប្រើប្រាស់នេះ ប្រព្រឹត្តទៅនៅភូមិសុវណ្ណសាគរ ស្រុកកំពង់បាយ ខេត្តកំពត នាព្រឹកថ្ងៃទី១៧ ខែមិថុនាឆ្នាំ ២០២២ ដោយមានអ្នកចូលរួមប្រមាណជាង ៣០០នាក់។
លោកបូជាចារ្យ តាវ៉ូឡា យ៉ាំងលូកា ជាប្រធានមណ្ឌលសកម្មភាពកំពត មានប្រសាសន៍ថា សាលានេះមានទិសដៅស្វែងរកសេចក្ដីសុខជូនប្រទេសកម្ពុជា ប្រកបដោយវឌ្ឍនភាព ដោយធ្វើឱ្យកុមារគ្រប់ស្រទាប់វណ្ណៈ ទទួលបានការអប់រំប្រកបដោយ គុណភាព ភាតរភាព និងលើកកម្ពស់តម្លៃ វប្បធម៌ សីលធម៌ គុណធម៌ ដើម្បីឲ្យកុមារក្លាយជាពលរដ្ឋល្អនៅក្នុងសង្គមនាពេលអនាគត។
លោកអភិបាល អូលីវីយ៉េ ជ្មីតហស្លេមានប្រសាសន៍ថា កម្មវិធីសិក្សារបស់យើងគឺធ្វើយ៉ាងម៉េចដើម្បីណែនាំឱ្យកូនក្មេងយុវជនយុវនារីឲ្យទៅជាមនុស្សដ៏ពេញលក្ខណៈ គឺឱ្យកូនក្មេងរីកចម្រើនបន្តិចម្ដងៗ មិនមែនត្រឹមតែចំណេះដឹងប៉ុន្តែជាមនុស្សដែលពេញលក្ខណៈ។
លោកអភិបាលមានប្រសាសន៍បន្ថែមថា សាលាបានខិតខំបណ្តុះបណ្តាលកុមារឱ្យមានសេចក្ដីក្លាហាន ឯករាជម្ចាស់ការដែលចេះទទួលខុសត្រូវនិងបង្កើតទំនាក់ទំនងរវាងលោកគ្រូអ្នកគ្រូជាមួយបងប្អូនព្រមទាំងអ្នកដទៃនៅក្នុងសង្គម។
លោកអភិបាលបញ្ជាក់ទៀតថា «យើងជាមនុស្ស ពេញលក្ខណៈនៅពេលដែលយើងចូលទៅក្នុងវប្បធម៌របស់យើងដែលចូលទៅក្នុងគ្រប់វិស័យដែលនាំអោយយើងចូលនៅក្នុងប្រទេសកម្ពុជា ស្គាល់ឫស ណែនាំឱ្យស្គាល់តួនាទីរបស់យើង ជាតួនាទីដ៏សំខាន់ ដោយបន្តរស់នៅក្នុងសុខសន្តិភាពពេញលក្ខណៈ។»
តាមរយៈការកើនឡើងចំនួនថ្នាក់រៀនទាំងមត្តេយ្យ និងបឋមសិក្សា និងមានការឧបត្ថម្ភគាំទ្រពីព្រះសហគមន៍កាតូលិកភូមិភាគភ្នំពេញ និងពីសប្បុរសជនមួយចំនួន លោកតាវ៉ូឡា យ៉ាំងលូកា ដែលជាគណៈគ្រប់គ្រងរបស់សាលា បានចាប់ផ្ដើមកសាងអគារបឋមសិក្សាថ្មីនេះឡើង នៅថ្ងៃទី ២៤ ខែវិច្ឆិកា ឆ្នាំ២០២០ និងបានបញ្ចប់ជាស្ថាពរនៅ ថ្ងៃទី១៧ ខែធ្នូ ឆ្នាំ២០២១ អគារសិក្សាថ្មីនេះបានបើកទ្វារទទួលសិស្សអោយចូលរៀន ចាប់ពីថ្ងៃទី ១០ ខែមករា ឆ្នាំ២០២២។
ឯកឧត្តម ម៉ៅ ធនិន្ទ មានប្រសាសន៍អរគុណដល់សប្បរសជន និងព្រះសហគមន៍កាតូលិកដែលបានយកចិត្តទុកដាក់ខ្ពស់ចំពោះកុមារក្នុងវិស័យអប់រំ។ លោកបន្ថែមថា «យើងត្រូវរួបរួមគ្នាកសាងធនធានមនុស្សតាមរយ:ការអប់រំ។ ចំណេះដឹងនាំឱ្យមនុស្សមានសីលធម៌ល្អ ទៅជាធនធានមនុស្សដ៏ពិតប្រាកដ។»
លោកសំណូមពរដល់លោកគ្រូអ្នកគ្រូទាំងអស់ឲ្យចូលរួមយ៉ាងសកម្មដើម្បីផលិតធនធានមនុស្សសម្រាប់ប្រទេសជាតិ ទាំងសីលធម៌ ក្រមសីលធម៌ សុជីវធម៌ សម្ដីសម្ដៅ អាកប្បកិរិយា ភាសា អក្សរសាស្ត្រ មនសិកា ឆន្ទៈ និងគ្រប់បែបយ៉ាងនៅក្នុងនោះដើម្បីបោះចេញមកនូវធនធានមនុស្សដែលពិតប្រាកដនិងពេញលក្ខណៈសម្បត្តិ។
លោកបន្ថែមទៀតថា «ខ្ញុំចង់ឱ្យអ្នកគ្រូអ្នកគ្រូទាំងអស់ បណ្ដុះបណ្ដាលធនធានមនុស្សពាក់ព័ន្ធទៅនឹងវប្បធម៌កត្តញ្ញូ។ ភាពកត្តញូ គឺជាអ្វីដែលសំខាន់សម្រាប់ទឹកដីរបស់យើង។»
លោកបញ្ជាក់ថា សាលាដែលមិនបានបំពេញកាត្វកិច្ចបង្រៀនអំពីរឿងនេះ គឺមិនបានបំពេញតួនាទីជាម្ដាយទី២ ពេញលក្ខណៈនោះទេ។
កុមារី លី ម៉េងហួយ ក្នុងវ័យ១២ឆ្នាំ កំពុងសិក្សានៅថ្នាក់ទី៥នៃមជ្ឈមណ្ឌលវប្បធម៌និងភាសាបរទេស និយាយថា «នៅក្នុងចំណោមកម្មវិធីសិក្សាទាំងអស់ ខ្ញុំចូលចិត្តសិល្បៈនិងភាសាខ្មែរ ព្រោះម៉ាក់ថាភាសាខ្មែរខ្ញុំខ្លាំងនិងរបាំខ្ញុំរាំជាប្រចាំឆ្នាំបានស្អាត។»
ដោយមានការលើកទឹកចិត្តពីម្ដាយផង កុមារីពោលទាំងរីករាយថា ធំឡើងនាងចង់ក្លាយជាគ្រូបង្រៀនភាសាខ្មែរ។
ម៉េងហួយបន្តថា «ខ្ញុំក៏សូមអរគុណដល់លោកគ្រូអ្នកគ្រូនៅសាលា FFCC ដែលបានបង្ហាត់បង្រៀនខ្ញុំតាំងពីតូចៗរហូតមកដល់ថ្នាក់ទី៥នេះ។»
មជ្ឈមណ្ឌលវប្បធម៌និងភាសាបរទេស សាងសង់លើផ្ទៃដីសរុបចំនួន ៣,១០៨ម៉ែត្រការេ និងផ្ទៃក្រឡាបន្ទប់រៀនទាំងអស់ ចំនួន១,០២៨ម៉ែត្រការេ។ មានអគារចំនួន ៣ខ្នង ១ខ្នងសម្រាប់មត្តេយ្យ ម៉ុនតេសូរី និង២ខ្នងសម្រាប់បឋមសិក្សា ចែកចេញជា បន្ទប់រៀនចំនួន ១២បន្ទប់ បន្ទប់ទឹកចំនួន២៥បន្ទប់ បន្ទប់តន្រ្ដី១បន្ទប់ បន្ទប់កុំព្យូទ័រ១បន្ទប់ បន្ទប់ពិសោធន៍១បន្ទប់ បន្ទប់គេហកិច្ច១បន្ទប់ បន្ទប់សុខភាព១បន្ទប់ បណ្ណាល័យ១ បន្ទប់ និងការិយាល័យ១បន្ទប់ ។
បច្ចុប្បន្នមានសិស្សសរុបចំនួន១៨៨នាក់ និងគ្រូបង្រៀននិងបុគ្គលិកចំនួន២១នាក់។
អាគារសិក្សានេះ ត្រូវបានឧបត្ថម្ភសាងសង់ដោយសប្បុរសធម៌មកព្រះសហគមន៍ក្នុងនិងក្រៅប្រទេស៕
ដោយ៖ ដាលីស
