ក្នុងពិធីរំលឹកដល់សន្តីម៉ារីម៉ាដាឡា សម្រាប់ព្រះសហគមន៍ស្វាយប៉ាក លោកបូជាចារ្យផ្រមផុង ស៊ីហារ៉ាត់ (ប៊ឺត) ជាប្រធានអភិបូជានៅថ្ងៃនោះ បានមានប្រសាសន៍ថា យើងទាំងអស់គ្នាជាមនុស្សមានបាប ដូច្នេះឱ្យយើងកែប្រែចិត្តគំនិតរបស់យើង ឱ្យយើងស្វែងរកព្រះយេស៊ូគ្រីស្ត។
លោកបូជាចារ្យអធិបតី មានបន្ថែមថា «អ្នកមានបាបបានទទួលអ្វីល្អមែនទែនពីព្រះជាម្ចាស់។ ជាក់ស្តែងនៅក្នុងព្រះគម្ពីរ អ្នកដែលបានឡើងស្ថានបរមសុខមុនគេគឺអ្នកទោស(ចោរព្រៃ) ដែលជាប់ឆ្កាងជាមួយព្រះយេស៊ូ។»
លោកបូជាចារ្យប៊ឺត បន្តថា នាងម៉ារីម៉ាដាឡា ជាស្ត្រីរកស៊ីផ្លូវភេទ ពិតមែនគាត់ជាមនុស្សមិនល្អ ប៉ុន្តែនៅពេលគាត់បានជួបព្រះយេស៊ូគ្រីស្ត គាត់បានកែប្រែចិត្តគំនិត ក្លាយជាមនុស្សថ្មី។
ជាទូទៅមនុស្សទាំងអស់មើលគ្នាតែសំបកក្រៅ ដែលខុសពីព្រះជាម្ចាស់ ព្រះអង្គគង់នៅជាមួយមនុស្សមានបាបដែរ។ លោកបានសង្កត់ធ្ងន់ថា «អស់អ្នកដែលគិតថាខ្លួនឯងល្អមែនទែន អ្នកនោះនៅឆ្ងាយពីព្រះជាម្ចាស់ ប៉ុន្តែអស់អ្នកដែលទទួលស្គាល់ថាខ្លួនជាមនុស្សមានបាប អ្នកនោះព្រះជាម្ចាស់គង់នៅជាមួយគេ។»
លោកបន្តថា ព្រះយេស៊ូយាងមកដើម្បីស្វែងរកមនុស្សមានបាប ដើម្បីឱ្យគេកែប្រែចិត្តគំនិត មិនមែនមករកមនុស្សសុចរិតទេ។
លោកសុំឲ្យគ្រីស្តបរិស័ទទាំងអស់ យកគំរូតាមនាងម៉ារីម៉ាដាឡា ដែលបានកែប្រែចិត្តគំនិត បន្ទាបខ្លួនគាត់ និងស្វែងរកព្រះជាម្ចាស់នៅក្នុងជីវិតរបស់គាត់។ ហើយទីបញ្ចប់ គាត់បានឃើញសិរីរុងរឿងរបស់ព្រះជាម្ចាស់មុនគេ។
ព្រះសហគមន៍ស្វាយប៉ាក បានជ្រើសរើសសន្តីម៉ារីម៉ាដាឡាជាសន្តឧបការីរបស់ខ្លួន ហើយជារៀងរាល់ឆ្នាំ ព្រះសហគមន៍នេះតែងប្រារព្ធពិធីនេះ នៅថ្ងៃទី២៣ ខែកក្កដា។
មុននឹងបញ្ចប់ធម្មទេសនាលោកបូជាចារ្យប៊ឺត បានដាស់តឿនគ្រីស្តបរិស័ទឲ្យចេះស្រឡាញ់គ្នា ចេះលើកលែងទោសឱ្យគ្នា។ លោកថា នេះជាអ្វីដែលសំខាន់ជាងគេសម្រាប់គ្រីស្តបរិស័ទ។
ក្នុងកម្មវិធីរំលឹកសន្តីរូបនេះ ក្នុងឆ្នាំ២០២២នេះ បានធ្វើឡើង នៅភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ និងមានការអញ្ជើញចូលរួមពីលោកបូជាចារ្យ រឿង ឆ័ត្រសិរី លោកឪពុក ចន ប៉េង លោកឪពុក អូហ្គូស្ទីន វន និងលោកឪពុក ផ្រមផុង ស៊ីហារ៉ាត់ (ប៊ឺត) ព្រមទាំងដែលមានគ្រីស្តបរិស័ទប្រមាណជិត១០០នាក់ ដែលមកពីតំបន់ផ្សេងៗក្នុងមណ្ឌលសកម្មភាពភ្នំពេញខាងជើង។
ព្រះសហគមន៍គីឡូម៉ែត្រលេខ១១ ឬព្រះសហគមន៍ស្វាយប៉ាក ស្ថិតនៅក្រោមមណ្ឌលសកម្មភាពព្រះសហគមន៍កាតូលិកភ្នំពេញខាងជើង ក្នុងភូមិភាគភ្នំពេញ៕
អត្ថបទ៖ សុធីរិទ្ធ
