យុវជនប្រមាណជា១០០នាក់ ដែលជាប្រធាន និងអនុប្រធានយុវជន យុវនារី នៃព្រះសហគមន៍កាតូលិកភូមិភាគភ្នំពេញ ចួបជុំគ្នា ដើម្បីរិះគិតអំពីបទពិសោធនៃការបម្រើនិងរៀនអំពីការលើកទឹកចិត្តគ្នា។
«យើងជាគ្រីស្តបរិស័ទម្នាក់ៗមានតួនាទីបម្រើព្រះសហគមន៍និងអ្នកជុំវិញយើង ដោយមិនគិតពីផលចំណេញខ្លួនឯង។» យុវជន សុខ ចន្នី មកពីព្រះសហគមន៍ពោធិ៍ចិនតុងនៃមណ្ឌលសកម្មភាពភ្នំពេញថ្មីបានលើកឡើងយ៉ាងនេះ នៅក្នុងជំនួបធ្វើឡើងកាលពីថ្ងៃទី២៩-៣១ ខែកក្កដាកន្លងទៅ នៅព្រះវិហារសន្តមីកាអែល ក្រុងកំពង់សោម ខេត្តព្រះសីហនុ ភាគខាងលិចនៃប្រទេសកម្ពុជា។
ចន្នី បានឲ្យដឹងថា ក្នុងកម្មវិធីនេះ មានប្រធានបទជាច្រើនដែលជួយដល់រូបគាត់ឲ្យយល់ដឹងបន្ថែមអំពីជីវិតនៃការបម្រើ។ ចន្នីបន្ថែម «ជីវិតជាការលះបង់ ហេតុនេះយើងនឹងបន្តធ្វើដើម្បីព្រះជាម្ចាស់និងអ្នកដែលនៅជុំវិញយើង ដោយកុំខ្វល់នឹងអ្នកដែលគិតអវិជ្ជមានពីយើង។»
កម្មវិធីនេះ រៀបចំឡើងក្រោមប្រធានបទ “យុវជនជាកម្លាំងរបស់ព្រះសហគមន៍ គឺត្រូវបម្រើដោយមានចិត្តស្រឡាញ់”។
លោកស៊ាន់ សារឿន ប្រធានការិយាល័យយុវជន ជំទង់ កុមារ និងគ្រួសារបានឱ្យដឹងថា ការជួបជុំនិងចែករំលែកពិសោធន៍ទៅវិញទៅមក ជាកម្លាំងម្យ៉ាងនាំឲ្យកិច្ចការបម្រើព្រះសហគមន៍បានទៅមុខ។ លោកប្រធានការិយាល័យបញ្ជាក់ទៀតថា យុវជនយើងបម្រើដោយសេចក្ដីស្រឡាញ់ និងជំនឿ ប៉ុន្តែពេលខ្លះមានការបាក់ទឹកចិត្ត និងពេលខ្លះអស់សង្ឃឹម ជាពិសេសនៅក្នុងបរិបទកូវីដ-១៩។
លោកបន្ថែមថា ការចែករំលែកអំពីបទពិសោធក្នុងបរិបទកូវីដនេះឱ្យយើងចេះតស៊ូ រកគ្រប់មធ្យោបាយនូវអ្វីដែលថ្មី ដើម្បីឱ្យក្ដីស្រមៃទៅមុខ អាចរស់នៅក្នុងស្ថានភាពកូវីដ។
នៅក្នុងអំឡុងពេលជំងឺរាតត្បាត ការិយាល័យកុមារ ជំទង់ យុវជននិងគ្រួសារ បានចួបប្រជុំគ្នាតាមរយៈប្រព័ន្ធអ៊ីធឺណិតជាច្រើនដង ដើម្បីបង្កើតទំនាក់ទំនងជាមួយគ្នា ចែករំលែកបទពិសោធនៃការតស៊ូ សេចក្ដីសង្ឃឹម និងជំនឿ។
មុនពេលបើកកម្មវិធី យុវជនទាំងអស់បានចូលរួមក្នុងពិធីអធិដ្ឋានតាមបែបតេហ្សេ ដើម្បីរិះគិតអំពីជីវិតជាអ្នកបម្រើនៅក្នុងព្រះសហគមន៍កាតូលិក។
យុវជនទាំងនេះ មកពីព្រះសហគមន៍កាតូលិកភូមិភាគភ្នំពេញ ដែលមានមណ្ឌលសកម្មភាពចំនួន៩ រួមមាន ភ្នំពេញថ្មី ភ្នំពេញខាងជើង ភ្នំពេញខាងត្បូង តាខ្មៅ មេគង្គ បាសាក់ តាកែវ កំពត និងព្រះសីហនុ។
យុវជនទាំងអស់បានចែករំលែកអំពីទុក្ខលំបាកនិងអំណរសប្បាយក្នុងពេលនិងក្រោយកូវីដ-១៩ មានដូចជា ភ័យខ្លាចសេចក្តីស្លាប់ ការបាត់បង់សាច់ញាតិ និងសុវត្ថិភាពពេលធ្វើកិច្ចការងារបម្រើ ធ្លាក់ទឹកចិត្ត និងអស់សង្ឃឹម ដោយសារគ្មានទំនាក់ទំនងជាមួយអ្នកខាងក្រៅ។ ប៉ុន្តែទោះជាយ៉ាងណាពួកគាត់បានឲ្យដឹងថា ប្រព័ន្ធផ្សព្វផ្សាយនិងអ៊ីធឺណេតបានជួយច្រើនសម្រាប់ពត៌មាននិងទំនាក់ទំនង ដែលបានសម្រួលផលលំបាកខ្លះៗ។
នៅក្នុងធម្មទេសនាថ្ងៃទី៣០ លោកបូជាចារ្យប៉ូល ផ្រុមផុង ស៊ីហារ៉ាត់ បានលើកទឹកចិត្តឱ្យយុវជនកុំអស់សង្ឃឹម កុំឱ្យតម្លៃខ្លួនឯងទាបពេក និង កុំយកខ្លួនឯងទៅប្រៀបធៀបនឹងអ្នកដទៃ ព្រោះម្នាក់ៗមានប្រយោជន៍សម្រាប់អ្នកដទៃ។
លោកបន្ថែមថា ម្នាក់ៗមានចំណុចខុសប្លែកនិងពិសេសខុសពីអ្នកដទៃ និងមានអំណោយទានពីព្រះជាម្ចាស់ផ្សេងៗពីគ្នា តែទោះបីជាភាពខុសគ្នាយ៉ាងនេះក្តី ក៏មានចំណុចរួមមួយ គឺ«យើងមានទឹកចិត្តល្អ»។ ព្រះជាម្ចាស់ផ្តល់សេរីភាពដល់យើង ឲ្យយើងចេះថ្លឹងថ្លែង និងពិចារណាសេចក្តីល្អឬមិនល្អ គ្មានអ្នកបង្ខំនិងមិនធ្វើតាមគ្នា។
ក្នុងរយៈពេល៣ថ្ងៃនេះ ក្រុមយុវជនក៏បានចូលរួមសំណាក់ធម៌ដែលដឹកនាំដោយលោកបូជាចារ្យ យ៉ាំងលូកា តាវ៉ូឡា អ្នកទទួលខុសត្រូវមណ្ឌលសកម្មភាពកំពង់សោម។
នៅក្នុងពិធីសំណាក់ធម៌នេះ លោកបូជាចារ្យយ៉ាំងលូកា ណែនាំឱ្យយុវជនយកគម្រូតាមព្រះយេស៊ូ ដែលបម្រើដោយស៊ូទ្រាំនឹងការឈឺចាប់ មិនរអ៊ូររទាំនិងខឹងសម្បារ តែបម្រើដោយសេចក្ដីស្រឡាញ់។
លោកបន្ថែមថា នៅក្នុងព្រះសហគមន៍ យើងក៏បម្រើដោយចិត្តរីករាយ និងដោយក្ដីស្រឡាញ់ ដោយមានកម្លាំង ចេះអប់រំខ្លួន និងរៀបចំខ្លួន ដើម្បីកិច្ចការបម្រើប្រសើរឡើង និងឲ្យអ្នកដទៃមានសុភមង្គល៕
ដោយដាលីស
