«ខ្ញុំយល់ឃើញថាព្រះនាងម៉ារីពិតជាអស្ចារ្យ ជាព្រះមាតានៃពិភពលោក និងការអស្ចារ្យដែលកើតឡើងគឺព្រះជាម្ចាស់ពិតជាលើកព្រះនាងម៉ារីឡើងស្ថានបរមសុខ។» នេះជាការបញ្ជាក់របស់កញ្ញា ភឿន ស្រីនា ដែលជាគ្រីស្តបរិស័ទកាតូលិកម្នាក់តែងតែអធិដ្ឋានជាពិសេសតាមរយៈនាងម៉ារីដែលជាមាតារបស់ព្រះយេស៊ូ។
ស្រីនា បានចូលរួមក្នុងបុណ្យព្រះជាម្ចាស់លើកនាងម៉ារីឡើងស្ថានបរមសុខ ដែលជាបុណ្យឱឡារិកមួយរបស់ព្រះសហគមន៍សកល ធ្វើឡើងកាលពីថ្ងៃទី១៤ ខែសីហានៅព្រះវិហារសន្តយ៉ូសែប ផ្សារតូច នារាជធានីភ្នំពេញ។
យុវតីរូបនេះ បានឲ្យដឹងថា រាល់ពេលអធិដ្ឋាន គាត់ទទួលអារម្មណ៍ថា នាងម៉ារីតែងនៅក្បែរគាត់ ប្រៀបដូចជាម្តាយដែលកំពុងចាំស្តាប់កូន។
យុវតីដែលជាអាជីវកររូបនេះបានបន្ថែមថា «ទទួលបាននូវភាពកក់ក្ដៅ ដោយជឿថាតាមរយៈព្រះនាងម៉ារី ខ្ញុំអាចឆ្លងទៅព្រះជាម្ចាស់បាន គឺដូចជាស្ពានចម្លងខ្ញុំទៅព្រះជាម្ចាស់”។»
ក្នុងពិធីបុណ្យនេះ គ្រីស្តបរិស័ទជាង២០០នាក់ រួមនិងលោកបូជាចារ្យ បានដង្ហែរូបសំណាកព្រះនាងម៉ារីពីខាងក្រោម ឡើងទៅជាន់ទី១ដែលជាព្រះវិហារដើម្បីប្រារព្ធពិធីលើកតម្កើងព្រះជាម្ចាស់។ ស្រីនាដែលតែងតែអធិដ្ឋានរាល់ថ្ងៃជាមួយព្រះនាងម៉ារី មុនពេលចាប់ផ្ដើមកិច្ចការរកស៊ី របស់គាត់បានឲ្យដឹងថា គាត់បានទូលអង្វរព្រះនាងដោយពឹងផ្អែកទាំងស្រុងលើគម្រោងការរបស់ព្រះជាម្ចាស់។
នាងបន្តថា «ព្រះនាងម៉ារីតែងតែផ្ដល់ក្ដីសង្ឃឹមនៅក្នុងចិត្តខ្ញុំ ដែលធ្វើឱ្យខ្ញុំអាចដើរទៅមុខបានទោះបីជាពិបាកក៏ដោយ។»
នៅក្នុងធម្មទេសនានៃពិធីបុណ្យនេះដែរ លោកបូជាចារ្យប៉ូល រឿង ឆ័ត្រសិរី ជាអធីបតីនៃកម្មវិធីបានមានប្រសាសន៍ទាក់ទងនឹងពិធីបុណ្យនេះថា ក្នុងកាលៈទេសៈដែលគេបៀតបៀនព្រះសហគមន៍ គ្រីស្តបរិស័ទទៅផ្នូរព្រះនាងម៉ារីដែលជាមាតាព្រះសហគមន៍ និងចង់យកសពពីផ្នូរ ប៉ុន្តែគេមិនឃើញសពរបស់គាត់នោះទេ ទើបគេជឿថា ដោយសារតែព្រះនាងម៉ារីជាមាតាព្រះយេស៊ូដែលជាព្រះជាម្ចាស់ ទើបព្រះជាម្ចាស់លើកកិត្តិយសព្រះនាងម៉ារី ដោយលើកព្រះនាងឡើងស្ថានបរមសុខទាំងរូបកាយនិងវិញ្ញាណ។
ថ្លែងប្រាប់សារព័ត៌មានកាតូលិក លោកបូជាចារ្យទទួលបន្ទុកព្រះសហគមន៍កាតូលិកមណ្ឌលសកម្មភាពភ្នំពេញខាងជើង ឆ័ត្រសិរី បានបញ្ជាក់ទៀតថា ព្រះនាងម៉ារីជាគំរូសម្រាប់អ្នកជឿដោយកត្តា៣យ៉ាងគឺ មានចិត្តទូលាយនិងឈឺឆ្អាលទុក្ខធុរៈអ្នកដទៃ ជឿសង្ឃឹមលើព្រះជាម្ចាស់ទាំងស្រុង និងការបន្ទាបខ្លួនជាជនសាមញ្ញ។
លោកបានពន្យល់ថា ព្រះនាងបានទៅសួរសុខទុក្ខនាងអេលីសាបេត ហើយនៅបម្រើគាត់ទោះបីព្រះនាងកំពុងមានផ្ទៃពោះដូចគ្នា។ ព្រះនាងម៉ារីថ្វាយខ្លួនទៅព្រះជាម្ចាស់ទាំងស្រុងដោយព្រមទទួលព្រះយេស៊ូ។
លោកបន្ថែមថា នេះជាគំរូសម្រាប់គ្រីស្តបរិស័ទទាំងអស់ ដើម្បីទទួលការត្រាស់ហៅពីព្រះជាម្ចាស់ដើម្បីធ្វើអ្វីមួយដោយមិនត្រូវបដិសេធ ទោះបីមានការពិបាកនៅក្នុងបេសកកម្មនោះក៏សូមបន្ត។
លោកសង្កត់ធ្ងន់ទៀតថា ព្រះនាងម៉ារីបន្ទាបខ្លួនជាអ្នកបម្រើ ជាអ្នកដាក់ខ្លួនដ៏សាមញ្ញបំផុត ធ្វើឱ្យអ្នកជឿយកគំរូតាម ហើយព្រះនាងបានបម្រើកិច្ចការសង្គ្រោះរបស់ព្រះជាម្ចាស់ ដែលធ្វើឱ្យយើងមានក្ដីសង្ឃឹម។
លោកបញ្ជាក់ថា «កាលណាយើងធ្វើតាមគម្រោងការរបស់ព្រះជាម្ចាស់ដូចព្រះនាងម៉ារី យើងក៏សង្ឃឹមថា ព្រះជាម្ចាស់នឹងនាំយើងឱ្យចូលទៅស្ថានបរមសុខដូចព្រះនាងម៉ារីដែរ៕»
ដោយដាលីស
