ក្រុមសង្គហៈព្រះសហគមន៍ព្រះកុមារយេស៊ូ បឹងទំពុន នៃមណ្ឌលសកម្មភាពភ្នំពេញខាងត្បូង គឺមានការចែកទានទៅដល់ក្រុមគ្រួសារដែលមានជីវភាពខ្វះខាតចំនួន២០គ្រួសារនៅក្នុងរដូវបុណ្យភ្ជុំបិណ្ឌ ក្រោមអធិបតីភាព លោកបូជាចារ្យ ដាមីញ៉ាំង ហ្វារនឺ អ្នកទទួលខុសត្រូវមណ្ឌលសកម្មភាពព្រះសហគមន៍កាតូលិកភ្នំពេញខាងត្បូងកាលពីព្រឹកថ្ងៃទី១៨ ខែកញ្ញា ឆ្នាំ២០២២ ។
លោកបូជាចារ្យដាមីញ៉ាំងមានប្រសាសន៍ថា អំណោយដែលបានចែកជូនបងប្អូនក្រីក្រនៅថ្ងៃនេះ គឺបានមកពីគ្រីស្តបរិស័ទ និងសប្បុរសជនដែលបានចូលរួមជាមួយគ្នាដើម្បីចែករំលែកសេចក្តីស្រឡាញ់របស់ព្រះជាម្ចាស់ចំពោះពួកគាត់។
លោកបូជាចារ្យបានបញ្ជាក់ថា «មិនមែនខ្ញុំទេ ដែលចែកជូនបងប្អូន គឺគ្រីស្តបរិស័ទនិងអ្នកផ្សេងៗជួយគ្នា។»
ជាមួយគ្នានេះដែរ អ្នកស្រី ងួន ផល្លា ជាគណៈកម្មការសង្គហៈបាននិយាយទាំងទឹកមុខអំណរសប្បាយថា រាល់ថ្ងៃនេះ យើងជួយអ្នកក្រីក្រមាន៣ប្រភេទ គឺគ្រួសារក្រីក្ររើសអេតចាយដែលមានកូនប្រើប្រាស់គ្រឿងញៀន ចាស់ជរាមានជំងឺប្រចាំកាយ និងកូនសិស្សកំពុងសិក្សានិងរស់នៅជាមួយក្រុមគ្រួសារដែលផ្ទុកមេរោគអេដស៍។
អ្នកស្រីបន្តថា ទោះបីជាការចែកទាននេះមិនសូវច្រើនលើសលប់ ប៉ុន្តែអាចជួយសម្រួលនូវជីវភាពរបស់គាត់បានមួយគ្រា។ មួយវិញទៀតការជួយគឺយើងជួយមិនគិតទៅលើគ្រួសារគ្រីស្តបរិស័ទឬមិនមែនគ្រីស្តបរិស័ទនោះទេ។
អ្នកស្រីបន្ថែមថា ពួកគាត់មិនមែនជាអ្នកមាននោះទេ ប៉ុន្តែពួកគាត់សប្បាយចិត្តនឹងជួយអ្នកដែលខ្វះខាតនិងអត់ជាងខ្លួន។ អ្នកស្រីផល្លាបញ្ជាក់ថា អំណោយទាំងនេះ ក៏ចូលរួមពីពុទ្ធបរិស័ទផងដែរ។
ការចែកសេចក្ដីស្រលាញ់នឹងការចែកទានមិនគិតទៅលើសាសនាអ្វីនោះទេ សំខាន់ទង្វើល្អនិងការជួយរបស់យើងកើតចេញទឹកចិត្តនឹងសេចក្ដីស្រលាញ់ពិតប្រាកដដែលយើងទទួលបានពីព្រះជាម្ចាស់ ។ នេះជាការបញ្ជាក់របស់អ្នកស្រីផល្លា។
អ្នកស្រី យ៉ែម ចន្ថេន ជាពុទ្ធបរិស័ទនិងជាម្ចាស់ហាងណារិនកាត់ដេរ បាននិយាយថា «ការចែកទាននេះគឺធ្វើទៅពិតៗ ទោះជាបីជាព្រះពុទ្ធសាសនាក៏មានធ្វើបែបនេះដែរ ហើយសម្រាប់អ្វីដែលយើងអាចចែករំលែកបានយើងគួរតែចែករំលែកទៅដល់គ្រួសារដែលអត់ជាងយើង។»
អ្នកស្រីចន្ថេនបន្តថា «អ្វីដែលយើងគិតថាល្អគឺយើងធ្វើទៅ កុំអោយតែយើងទៅប្រព្រឹត្តអំពើបាប។»
បុរសពិការដៃឈ្មោះ ម៉ៅ សុខកង ដែលមានអាយុ៥៣ឆ្នាំបានមកទទួលអំណោយពីព្រះសហគមន៍បាននិយាយថា «ខ្ញុំពិតជាសប្បាយចិត្តដែលព្រះសហគមន៍បានជួយដល់គ្រួសារក្រីក្រដូចជារូបខ្ញុំ ព្រោះខ្ញុំវាអត់ ហើយបានព្រះសហគមន៍ជួយបែបនេះធ្វើអោយគ្រួសារខ្ញុំ ហូបបានមួយគ្រាធំ និងធ្វើអោយខ្ញុំមានចិត្តតស៊ូ ប្រឹងបន្ដដំណើរជីវិតទៅមុខទៀត។»
ពេលជាមួយគ្នានេះ អ្នកស្រីសាម សុខា អាយុ៤២ឆ្នាំ រៀបរាប់ទាំងទឹកភ្នែកថា «ខ្ញុំពិតជារំភើបខ្លាំងមិនដឹងរកពាក្យអ្វីមកនិយាយ។ ខ្ញុំក្ដុកក្ដួលខ្លាំង ព្រោះខ្ញុំជាគ្រួសារដែលមានជីវភាពលំបាកហើយមានជម្ងឺប្រចាំកាយទៀត ខ្ញុំមានតែពាក្យថា អរគុណខ្លាំងណាស់ចំពោះព្រះសហគមន៍ដែលបានចែកទាននេះមកកាន់គ្រួសារក្រីក្រដូចជាខ្ញុំ។»
សព្វថ្ងៃនេះក្រុមសង្គហៈព្រះសហគមន៍ព្រះកុមារយេស៊ូបឹងទំពុននៅតែបន្តជួយដល់គ្រួសារដែលផ្ទុកមេរោគអេដស៍ គ្រួសារដែលបាត់បង់កម្លាំងពលកម្ម ជារៀងរាល់ខែដែលថវិកាទាំងនោះ ទទួលបានពីដង្វាយរបស់បងប្អូនគ្រីស្តបរិស័ទ និងជាពុទ្ធបរិស័ទ ដើម្បីរួមគ្នាទិញជាគ្រឿងឧបភោគបរិភោគ សម្ភារប្រើប្រាស់ដើម្បីចែកជូនទៅគ្រួសារទីទ័លដែលរស់នៅក្នុងសង្កាត់បឹងទំពុនទី១ និងទី២៕
