សាលាវិទ្យាល័យចំណេះដឹងទូទៅនិងបច្ចេកទេស ឯកជនសន្តហ្រ្វង់ស្វ័រ ដែលជាវិទ្យាល័យមួយកំពុងតែដំណើរ ការដោយព្រះសហគមន៍កាតូលិកភូមិភាគភ្នំពេញកំពុងតែជំរុញនិងលើកទឹកចិត្តយុវជនទូទៅឲ្យយកចិត្តទុកដាក់លើជំនាញបច្ចេកទេស ។
លោក យុន សំអាត នាយកសាលាវិទ្យាល័យចំណេះដឹងទូទៅនិងបច្ចេកទេស ឯកជនសន្តហ្រ្វង់ស្វ័រ បានមាន ប្រសាសន៍ថា ដើម្បីបង្ហាញពីការគាំទ្ររបស់វិទ្យាល័យក៏ដូចជាលើកទឹកចិត្តយុវជនទូទៅ កាលពីព្រឹត្តិការណ៍ការប្រកួតប្រជែងផែនការអាជីវកម្មដែលមានឈ្មោះថា«អាជីវកម្មខ្ញុំ»ឆ្នាំ២០២២ដែលប្រព្រឹត្តទៅកាលពី ខែកញ្ញា ឆ្នាំ២០២២ ថ្មីៗកន្លងទៅ វិទ្យាល័យយើង ដែលស្ថិតនៅភូមិគគីរ ឃុំតាភេម ស្រុកត្រាំកក់ ខេត្តតាកែវ មានសិស្សានុសិស្សចំនួន៦នាក់ដែលតំណាងអោយខេត្តចូលរួមប្រកួតក្នុងកម្មវិធីនេះ។
លោកបានមានប្រសាសន៍ថា ការប្រកួតមួយនេះគឺល្អមែនទែនហើយការប្រកួតនេះរៀបចំឡើងដោយក្រសួងអប់រំ យុវជន និង កីឡាដែលធ្វើឡើងក្នុងក្របខណ្ឌថ្នាក់ជាតិទូទាំងប្រទេសដោយមានបេក្ខជនទាំងអស់១៥ក្រុមហើយក៍មាន១៥ប្រធានបទផ្សេងគ្នាតាមរាជធានីខេត្តចូលរួមហើយការប្រកួតក្នុងវគ្គនេះជាវគ្គពាក់កណ្ដាលផ្ដាច់ព្រ័ត្រ។
លោកបានបន្តថា គុណសម្បត្តិនឹងតម្លៃនៃកម្មវិធីនេះ គឺបំផុសស្មារតីអោយយុវជនរៀនទទួលខុសត្រូវ រៀនបង្កើតអ្វីដែលថ្មី ដើម្បីខ្លួនឯង គ្រួសារ នឹងដើម្បីចូលរួមចំណែកអភិវឌ្ឍន៍នៅក្នុងសហគមន៍ក៍ដូចជាសង្គមផងដែរ។
លោកគ្រូសំអាតបន្ថែម វិទ្យាល័យយើងគាំទ្រកម្មវិធីនេះដោយសារកម្មវិធីនេះអាចជួយពួកគាត់ឲ្យយល់ពី តួនាទីច្បាស់លាស់ដែលជាស្នូលនៃសង្គមជាតិ ជាសសរទ្រូងរបស់ជាតិនឹងដើម្បីជាចំនុចចាប់ផ្ដើមមួយដើម្បីអោយពួកគេស្គាល់ពីខ្លួនឯងថាជានរណា ស្គាល់ពីតួនាទីរបស់ខ្លួនបែបណានៅក្នុងសហគមន៍និងសង្គមចំពោះការចូលរួមចំណែកអភិវឌ្ឍន៍សង្គមជាតិ ដោយបង្កើតភាពក្លាហាន ហ៊ានបញ្ចេញមតិ ហ៊ានតស៊ូមតិ ជជែកវែកញែកដេញដោល ហ៊ានពន្យល់បំភ្លឺឬបង្ហាញពីទស្សនៈរបស់ខ្លួនទៅមនុស្សជុំវិញខ្លួន។
លោកគ្រូបានបញ្ជាក់ថា “ ជាការពិតណាស់សម្រាប់លោកគ្រូដែលជានាយកសាលា ខ្ញុំ ពិតជាមានអំណរសប្បាយយ៉ាងក្រៃលែងដែលបានសិស្សានុសិស្សចូលរួមក្នុងការប្រកួតប្រជែងក្នុងកម្មវិធីដែលមានសារៈសំខាន់នេះគឺ កម្មវិធីអាជីវកម្មខ្ញុំថ្នាក់ជាតិហើយខ្ញុំពិតជាមានមោទនភាពចំពោះសិស្សរបស់យើងតំណាងខេត្តទាំងមូលដែលសាលាមានចំនួនសិស្សតិចប្រសិនបើយើងប្រៀបធៀបនឹងសាលាផ្សេងៗ ប៉ុន្តែដោយសារតែខាងមន្ទីរអប់រំយុវជននឹងកីឡាបានចាប់យកនឹងមានទំនុកចិត្តទើបសាលាវិទ្យាល័យសន្តហ្វ្រង់ស្វ័ររបស់យើងមានឱកាសចូលរួមប្រកួតក្នុងកម្មវិធីនេះ “។
លោកគ្រូបានឲ្យដឹង ថា សិស្សានុសិស្សដែលចូលរួមប្រកួតគឺជាសិស្សដែលស្ថិតនៅថ្នាក់កម្រិតមធ្យមសិក្សាហើយមានអាយុទើបតែ១៦ទៅ១៧ឆ្នាំតែប៉ុណ្ណោះ ។
យុវសិស្ស ថុល វណ្ណៈ រៀនថ្នាក់ទី១១ ផ្នែកក្សត្រសាស្ត្រ បានប្រាប់អោយដឹងដែរថា នេះជាឱកាសមួយដែលខ្លួននិងក្រុមអាចទទួលបានបទពិសោធន៍ថ្មីៗ នឹងចំណេះដឹងថ្មីៗ ជាពិសេសអាចអោយដឹងពីសមត្ថភាពរបស់ក្រុមដទៃផងដែរ ។
វណ្ណៈបានបន្ថែម “ ខ្ញុំពិតជាមានមោទនភាពខ្លាំងណាស់ដែលខ្ញុំបាទបានតំណាងអោយខេត្តតាកែវចូលរួមប្រកួតប្រជែងក្នុងកម្មវិធីអាជីវកម្មខ្ញុំ” ។
ជាមួយគ្នានេះ យុវតី ផៃ វាសនាភក្តិ អាយុ១៦ឆ្នាំ ជាសិស្សរៀនថ្នាក់ទី១១ជំនាញទេសចរ បានរៀបរាប់ពីចំណាប់អារម្មណ៍ថា នាងខ្ញុំពិតជាសេចក្ដីសោមនស្សរីករាយខ្លាំងមែនទែនដែលបានចូលរួមនៅក្នុងការប្រកួតបប្រជែងមួយនេះ ។ នាងខ្ញុំទទួលបាននូវចំណេះដឹងថ្មីៗមួយទៀតទាក់ទងទៅនឹងការធ្វើអាជីវកម្មតាមបែបម៉ូឌែល ខេនវ៉ាស់ ហើយក្រុមនាងខ្ញុំក៍បានចូលរួមក្នុងវគ្គបណ្ដុះបណ្ដាលតាមប្រពន្ធ័អនឡាញទាក់ទងជាមួយការធ្វើទីផ្សារ ការលក់តាមបែបឌីជីថលជាដើម នឹងអ្វីដែលសំខាន់គឺក្រុមនាងខ្ញុំបានចុះសាកសួរផ្ទាល់ទៅដល់ម្ចាស់អាជីវកម្មដែលមានទីតាំងនៅខេត្តបាត់ដំបងដើម្បីបានពត៌មានចងក្រងជាឯកសារនៅក្នុងការធ្វើបទបង្ហាញផងដែរ “ ។
យុវតីដដែលបានបន្តថា សម្រាប់ការងារជាក្រុមក៍ដូចជាការធ្វើអាជីកម្មតាមបែបម៉ូឌែល ខេនវ៉ាស់ បន្លែសរីរាង្គរបស់សហគមន៍យើងខ្ញុំគឺជួបផលវិបាកមួយចំនួនដោយសារតែនេះជាលើកទីមួយដែលនាងខ្ញុំបានចូលរួមការប្រកួតប្រជែងអាជីវកម្មថ្នាក់ជាតិនេះ ដូច្នេះវាមានការលំបាកច្រើនហើយអាចនិយាយបានថានាងខ្ញុំគឺនៅស្ទើរធ្វើមិនបាន ។ មួយវិញទៀតចំពោះការធ្វើស្លាយដើម្បីធ្វើបទបង្ហាញក៍ក្រុមនាងខ្ញុំជួបការលំបាកផងដែរ ប៉ុន្តែបន្ទាប់ពីពួកយើងបានទទួលការបណ្ដុះបណ្ដាលក៍ដូចជាការចែករំលែកបទពិសោធន៍នឹងការសាកសួរពីសិស្សច្បងដែលគាត់ជាម្ចាស់ជ័យលាភីពីឆ្នាំមុន ធ្វើអោយក្រុមនាងខ្ញុំបានដឹងពីអេបមួយចំនួនដែលធ្វើស្លាយបានស្អាតហើយក៍មានជំរុញពីលោកគ្រូដឹកនាំក្រុមនាងខ្ញុំផងដែរ ។
សាលាវិទ្យាល័យចំណេះដឹងទូទៅនិងបច្ចេកទេស ឯកជនសន្តហ្វ្រង់ស្វ័រដែលជាវិទ្យាល័យកាតូលិកមួយមានអាយុក្មេងខ្ចីហើយវិទ្យាល័យនេះគឺកើតនៅឆ្នាំ២០១៥តាមសេចក្ដីប្រកាសរបស់ក្រសួងអប់រំយុវជននឹងកីឡានឹងមកដល់ពេលនេះទើបតែមានសិស្សានុសិស្ស៤ជំនាន់ទេដែលបានបញ្ចប់ការសិក្សាផ្នែកអប់រំបច្ចេកទេសនឹងបញ្ចប់សញ្ញាប័ត្របច្ចេកទេសនឹងវិជ្ជាជីវៈ ហើយសាលាវិទ្យាល័យសន្តហ្វ្រង់ស្វ័រត្រូវបានសាងសង់ឡើងក្នុងគំនិតផ្ដួចផ្ដើមពីលោកអភិបាល អូលីវីយេ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញផងដែរ ៕
