យុវសិស្សវិទ្យាល័យរបស់ព្រះសហគមន៍កាតូលិកភូមិភាគកំពង់ចាម ប្រមាណជា៨០នាក់ បានចូលរួមក្នុងកម្មវិធីតម្រង់ទិសសិក្សាដែលរៀបចំដោយមណ្ឌលនិស្សិតព្រះសហគមន៍កាតូលិក ដើម្បីយល់ដឹងបន្ថែមអំពីមុខវិជ្ជាដែលត្រូវជ្រើសរើសសិក្សានៅសកលវិទ្យាល័យ។
កម្មវិធីនេះត្រូវបានរៀបចំឡើងនៅព្រះសហគមន៍កំពង់ចាមក្រុង ស្ថិតនៅក្នុងក្រុងកំពង់ចាម ខេត្តកំពង់ចាម។
តាមសម្ដីរបស់លោក ប៊ុន សុបិន្ត ជាប្រធានមណ្ឌលនិសិ្សតព្រះសហគមន៍កាតូលិកបានឲ្យដឹងថា មណ្ឌលនិសិ្សតបានបង្កើតកម្មវិធីនេះឡើងក្នុងគោលបំណង៣គឺ ទី១ រិះគិតពីគោលដៅជីវិត ទី២ ដឹងពីរបៀបជ្រើសរើសមុខវិជ្ជាដែលសមនឹងគោលដៅរបស់យុវសិស្ស និងទី៣ ត្រៀមខ្លួនបន្តការសិក្សានៅសាកលវិទ្យាល័យទៅតាមជំនាញដែលខ្លួនស្រលាញ់។
តាមបទពិសោធន៍នៃការធ្វើកម្មវិធីកន្លងមក លោក សុបិន្តបានបន្ថែមទៀតថា កម្រិតនៃការទទួលបានពត៌មានទាក់ទងទៅនឹងការជ្រើសរើសមុខវិជ្ជាបន្តការសិក្សានៅសាកលវិទ្យាល័យរបស់សិស្សានុសិស្សនៅមានកម្រិតនៅឡើយ។ ដោយលោកបានបញ្ជាក់ថា ពេលខ្លះសិស្សានុសិស្សសម្រេចចិត្តតាមមិត្តភក្តិ និងក្រុមគ្រួសារ។
លោកបានបន្ថែមទៀតថា មណ្ឌលនិស្សិតចង់អោយប្អូនម្នាក់ៗធ្វើតាម ឬដើរតាមក្ដីស្រមៃរបស់ខ្លួនឯងតាមរយៈលទ្ធភាព ចំណេះដឹង សមត្ថភាព និងអ្វីជាទេពកោសល្យដែលមាននៅក្នុងខ្លួន។
ជាមួយគ្នានេះ ចាន់ ចេក មានអាយុ២២ឆ្នាំជានិស្សិតឆ្នាំទី៣ផ្នែកអក្សរសាស្ត្រខ្មែរនៃសាកលវិទ្យាល័យភូមិន្ទភ្នំពេញបាននិយាយថា មុននឹងជ្រើសរើសជំនាញនៅសាកលវិទ្យាល័យ រឿងទីមួយគឺត្រូវជ្រើសរើសជំនាញណាដែលស្រលាញ់ចូលចិត្តនឹងមានសមត្ថភាពអាចសិក្សាបាន ហើយរឿងទីពីរ ត្រូវសម្លឹងមើលទៅលើទីផ្សារការងារក្នុងសង្គមសព្វថ្ងៃផងដែរ។
កម្មវិធីតម្រង់ទិសសិក្សានេះត្រូវបានធ្វើឡើងកាលពីថ្ងៃទី១៥ ខែតុលា ឆ្នាំ២០២២កន្លងទៅ។
ទន្ទឹមនឹងនោះ ផុន ដានី អាយុ១៩ឆ្នាំជានិស្សិតស្រីឆ្នាំទី៣ ផ្នែកធនាគារនិងហិរញ្ញវត្ថុនៃសាកលវិទ្យាល័យភូមិន្ទនីតិសាស្រ្តនិងវិទ្យាសាស្ត្រសេដ្ឋកិច្ច បាននិយាយថា ដំបូងឡើយគឺត្រូវយល់ អំពីខ្លួនឯងជាមុនសិន ដោយត្រូវយល់ថាខ្លួនឯងពូកែនិងស្រលាញ់មុខវិជ្ជាណាមួយ ហើយនឹងជាពិសេសសម្លឹងទៅមើលកត្តាគ្រួសារអាចមានលទ្ធភាពជួយទៅលើការសិក្សារបស់យើងដែរទេ។
ដានីបានបញ្ជាក់ថា ភាសាបរទេសជាផ្នែកមួយសំខាន់ក្នុងការសិក្សាតាមជំនាញឬមុខវិជ្ជានីមួយៗ ដែលអាចបណ្ដាលអោយការសិក្សារបស់យើងកាន់តែមានភាពងាយស្រួល។
យុវសិស្ស ដុង សុធា អាយុ១៨ឆ្នាំស្នាក់ រៀនថ្នាក់ទី១២ និងស្នាក់នៅមណ្ឌលសិស្សអូររាំងឪ របស់ព្រហសហគមន៍កាតូលិក បាននិយាយថា កម្មវិធីនេះជួយគាត់មានភាពក្លាហានហ៊ានសម្រេចចិត្តជ្រើសរើសមុខវិជ្ជាសិក្សាដោយមិនចាំបាច់ជ្រើសរើសតាមគ្រួសារឬមិត្តភក្តិនោះទេ និងហ៊ានដាក់គោលដៅសម្រាប់អនាគតនិងស្គាល់ពីសមត្ថភាពដែលមាននៅក្នុងខ្លួនម្នាក់ៗ។
ស្របពេលជាមួយគ្នានេះ យុវតី ស៊ុន សៀងថៃ មានអាយុ១៨ឆ្នាំ ជាសិស្សរៀនថ្នាក់ទី១២ មកពីព្រះសហគមន៍ចម្លាក់ បាននិយាយថា ការចែករំលែកពីសិស្សច្បងដែលមានបទពិសោធ គឺបានបង្ហាញផ្លូវមួយ ដែលត្រួសត្រាយអោយប្អូនម្នាក់ៗយល់ពីរបៀបសិក្សានៅសាកលវិទ្យាល័យ របៀបស្រាវជ្រាវឯកសារតាមប្រព័ន្ធអ៊ីនធើណេត និងបានជំរុញលើកទឹកចិត្តដល់ប្អូនៗឱ្យមានចិត្តក្លាហាន តស៊ូ ហើយនឹងត្រូវតែខិតខំជំនះ ទោះបីជាមានបញ្ហាឬជួបឧបសគ្គបន្តិចបន្តួច កុំងាយនឹងបោះបង់ ត្រូវព្យាយាមស្វែងរកនូវអ្វីដែលខ្លួនឯងចង់បាននិងត្រឹមត្រូវ។
តាមកាលបរិច្ឆេទដែលក្រសួងអប់រំ យុវជន និងកីឡាបានប្រកាសការប្រឡងមធ្យមសិក្សាទុតិយភូមិ ឬ បាក់ឌុបនៅឆ្នាំនេះ គឺនៅថ្ងៃទី ០៥ ខែ ធ្នូ ឆ្នាំ២០២២ខាងមុខនេះ៕
ដោយចាន់ ម៉ានុត
