យុវជនជាមេកាយឫទ្ធិរបស់ព្រះសហគមន៍កាតូលិក១៥០នាក់មកពីមណ្ឌលសកម្មភាពនានាក្នុងភូមិភាគភ្នំពេញបានចូលរួមបោះជំរំរិះគិតអំពីរបៀបថ្មីដើម្បីពង្រឹងសមត្ថភាពរបស់ខ្លួនក្នុងភាពជាអ្នកដឹកនាំ។ កម្មវិធីនេះ ធ្វើនៅរមណីយដ្ឋានឋានសួរធម្មជាតិ ភ្នំវល្លិ៍ ដែលរៀបចំឡើងដោយការិយាល័យយុវជន ជំទង់និងកុមាររបស់ព្រះសហគមន៍កាតូលិកភូមិភាគភ្នំពេញ។
លោក រ័ត្ន ចន្ថា អាយុ៣៣ឆ្នាំ ជាអ្នកគ្រប់គ្រងផ្នែកកុមារកាយឫទ្ធិ បានឱ្យដឹងថា កម្មវិធីនេះគឺចង់បណ្តុះភាពក្លាហានបន្ថែមសម្រាប់មេកាយឫទ្ធិទាំងអស់ ជាពិសេសលើការបង្រៀនកូនៗកាយឫទ្ធិ ម្យ៉ាងទៀតគឺឲ្យមេកាយឫទ្ធិមានទំនាក់ទំនងល្អជាមួយគ្នា ចេះស្រលាញ់គ្នាទៅវិញទៅមក និងចេះរស់នៅជាក្រុមដោយមានការសាមគ្គីគ្នា។
កម្មវិធីសិក្ខាសាលានេះ រៀបចំឡើងរយៈពេលបីថ្ងៃ គឺពីថ្ងៃទី១២ដល់ថ្ងៃទី១៤ ខែធ្នូ ឆ្នាំ២០២២ ក្រោមប្រធានបទ«ខ្ញុំអាចធ្វើបាន» ដែលជាចំណងជើងសៀវភៅថ្មីមគ្គទេសក៍ថ្មី សម្រាប់មេកាយឫទ្ធិយកទៅសិក្សាដើម្បីដឹកនាំក្រុមរបស់ខ្លួន។
កម្មវិធីនេះដែរក៏មានការអញ្ជើញចូលរួមជាអធិបតីភាពពីលោក អភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញផងដែរ។
លោកអភិបាលអូលីវីយ៉េ ជ្មីតហស្លេ មានប្រសាសន៍ថា ទោះបីជាមេកាយឫទ្ធិទាំងនេះ ខ្លះនៅក្មេងក៏ដោយ ប៉ុន្តែការចូលរួមនេះ នឹងជួយគេឲ្យទៅជាអ្នកទទួលខុសត្រូវពេញលក្ខណៈ ទៅជាបងសម្រាប់ប្អូនៗ ដើម្បីឱ្យគេរីកចម្រើននៅក្នុងជីវិតផ្ទាល់ខ្លួន។
ព្រះសហគមន៍កាតូលិកភូមិភាគភ្នំពេញបានចាប់ផ្តើមសកម្មភាពក្រុមកាយឫទ្ធិនេះ ក្នុងឆ្នាំ ២០០៣នៅឯភូមិចំការទៀង ក្នុងខេត្តតាកែវ គឺនៅភាគអាគ្នេយ៍នៃប្រទេស ប្រមាណ៨០គីឡូម៉ែត្រពីទីក្រុងភ្នំពេញ។
មេកាយឫទ្ធិទាំង១៥០នាក់នេះ ជាកម្លាំងសម្រាប់ព្រះសហគមន៍ ទោះបីជាពាក់គណ្តាលជាគ្រីស្តបរិស័ទ និងពាក់កណ្ដាលទៀតមិនមែនជាគ្រីស្តបរិស័ទក៏ដោយ។ លោកអភិបាលបន្ថែមថា ប៉ុន្តែយុវជនទាំងនេះ សុខចិត្តបម្រើកូនតូចៗ ដើម្បីអោយកូនតូចៗរីកចម្រើននៅក្នុងជីវិតផ្ទាល់ខ្លួន ជាពិសេសតាមរយៈទស្សនៈកាយឫទ្ធិ។
លោកបន្តថា «យើងជួយគេអោយគេចេះគោរពព្រះជាម្ចាស់ ចេះគោរពធម្មជាតិដែលជាអំណោយទានពីព្រះជាម្ចាស់ ចេះគោរពគ្នាទៅវិញទៅមក ចេះស្រលាញ់គ្នាទៅវិញទៅមកនិងចេះបម្រើ ដោយយកចិត្តទុកដាក់នឹងបងប្អូនឯទៀតៗ ដោយយកចិត្តទុកដាក់នៅក្នុងសកម្មភាពសង្គមខ្លះៗដែរ។»
លោកបានបន្ថែមថា សកម្មភាពរបស់កាយឫទ្ធិនេះ មានឥទ្ធិពលលើកុមារនៅក្នុងភូមិភាគភ្នំពេញប្រហែលជា១៥០០នាក់ជារៀងរាល់អាទិត្យ នៃការជួបជុំរបស់ពួកគេ។
មេកាយឫទ្ធិដែលចូលរួមកម្មវិធីសិក្ខាសាលាមានរយៈពេល៣ថ្ងៃនេះ គឺមកពីមណ្ឌលសកម្មភាពទាំង៩ក្នុងភូមិភាគភ្នំពេញមានដូចជា មណ្ឌលសកម្មភាពកំពត មណ្ឌលសកម្មភាពភ្នំពេញថ្មី ភ្នំពេញខាងត្បូង ភ្នំពេញខាងជើង តាកែវ កំពង់សោម បាសាក់ មេគង្គនិងតាខ្មៅ។
ជាទូទៅកូនៗកាយឫទ្ធិនៅព្រះសហគមន៍តាខ្មៅគឺមានចំនួនពី៣០ទៅ៥០នាក់រៀងរាល់ថ្ងៃអាទិត្យ។ នេះបើតាមការបញ្ជាក់ពី ចុស សំណាង អាយុ១៨ឆ្នាំ ជាមេកាយឫទ្ធិមកពីមណ្ឌលសកម្មភាពតាខ្មៅ។
សំណាង កំពុងឈ្វេងយល់អំពីជំនឿកាតូលិក បានឲ្យដឹងទៀតថា គាត់ពិតជាមានអំណរសប្បាយនឹងការបម្រើកុមារនៅក្នុងព្រះសហគមន៍ ហើយគាត់បានត្រៀមជាស្រេចសម្រាប់ក្លាយជាគ្រីស្តបរិស័ទមួយដ៏ល្អ។
លោកបានបញ្ជាក់ «ធ្វើជាមេកាយឫទ្ធិកាតូលិកគឺត្រូវតែគោរពនិងបម្រើ។»
ស្របពេលជាមួយគ្នានេះដែរយុវនារីឈ្មោះមុត ស្រីពៅ អាយុ១៧ឆ្នាំដែលទើបតែបញ្ចប់ថ្នាក់ទី១២មកពីព្រះសហគមន៍សន្តមីកាអែល នៃមណ្ឌលសកម្មភាពកំពង់សោម បានឲ្យដឹងថា នាងនឹងយកបទពិសោធក្នុងសិក្ខាសាលានេះ បង្រៀនដល់កូនៗកាយឫទ្ធិអំពីមេរៀនជីវិត ការចេះស្រលាញ់គ្នា និងក្រមសីលធម៌នៃរបៀបរស់នៅ។
ក្នុងកម្មវិធីនេះដែរ លោកអភិបាលព្រះសហគមន៍បានរៀបចំអំណោយមួយចំនួនចែកជូនដល់មេកាយឫទ្ធិទាំងអស់ ដើម្បីអបអរសាទរព្រះយេស៊ូប្រសូតក្នុងពេលខាងមុខនេះ។
ការិយាល័យយុវជន ជំទង់ កុមារ និងគ្រួសារភូមិភាគភ្នំពេញ មានគម្រោងប្រារព្ធខួប ២០ឆ្នាំនៃក្រុមកាយឫទ្ធិសម្រាប់ភូមិភាគភ្នំពេញនៅឆ្នាំក្រោយ ដោយមានកម្មវីធីបង្រៀនថ្មី បង្កើតសៀវភៅថ្មី ហើយជាពិសេសផ្ដោតសំខាន់ទៅលើសកម្មភាពជាមួយព្រះសហគមន៍៕
ដោយចាន់ម៉ានុត
