ដើម្បីចូលរួមអំណរសប្បាយក្នុងឱកាសបុណ្យព្រះយេស៊ូប្រសូត ព្រះវិហារសន្តម៉ាថាយនៃព្រះសហគមន៍កោះកុង កាលពីល្ងាចថ្ងៃទី១៦ ខែធ្នូ ឆ្នាំ២០២២ បានរៀបចំកម្មវិធីជប់លៀងមួយសម្រាប់គ្រួសារក្រីក្រដែលមានជំងឺប្រចាំកាយ ចំនួន២៥គ្រួសារ ដោយមានការចែកអំណោយនិងពិសារអាហារសាមគ្គីរួមជាមួយគ្រីស្តបរិស័ទឯទៀតៗប្រមាណជាង១០០នាក់។
ថ្លែងទៅកាន់អ្នកចូលរួម លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញមានប្រសាសន៍ថា កម្មវិធីនេះ ជាឱកាសមួយដែលយើងបានបង្ហាញថា យើងជាគ្រួសារមួយយ៉ាងពិសេស និងអរគុណដល់គណៈកម្មានៅព្រះសហគមន៍កោះកុងដែលបានអញ្ជើញបងប្អូនមកពីទីឆ្ងាយជិតដើម្បីចូលរួមថ្ងៃនៃអំណរសប្បាយនៃបុណ្យព្រះយេស៊ូប្រសូត្រ។
លោកអភិបាលបានបន្តថា បុណ្យព្រះយេស៊ូប្រសូត្រគឺជាពន្លឺមួយ ណែនាំឱ្យយើងមានសេចក្ដីសុខទាំងអស់គ្នា។ លោកអភិបាលបានជូនពរ ដល់គ្រួសារទាំង២៥ទាំងអស់ ឲ្យមានសុខភាពល្អ មានកម្លាំងកាយ កម្លាំងចិត្តតស៊ូ។
លោកបញ្ជាក់ថា «ជីវិតរបស់យើងមានតែការតស៊ូ ទោះពិបាកក៏ត្រូវតែតស៊ូដើម្បីយកឈ្នះការលំបាក និងយកឈ្នះដើម្បីកូនយើង ដើម្បីឱ្យកូនយើងមានអនាគតល្អ និងសូមព្រះជាម្ចាស់ប្រទានពរដល់បងប្អូនទាំងអស់គ្នា។»
លោកបូជាចារ្យ តាវ៉ូឡា យ៉ាំងលូកា ជាបូជាចារ្យទទួលខុសត្រូវក្នុងមណ្ឌលសកម្មភាពកំពង់សោម និងកោះកុង មានប្រសាសន៍ថា ពិធីចែកអំណោយដល់គ្រួសារក្រីក្រជារបៀបមួយដើម្បីឱ្យបងប្អូនស្គាល់ព្រះសហគមន៍ ហើយនឹងបានរីករាយរួមជាមួយគ្នាតាមរយៈការសម្ដែងរឿងព្រះយេស៊ូប្រសូត្រ មានរបាំ និងមានចាប់យករង្វាន់ជាច្រើន រួមនិងអាហារសាមគ្គី ដើម្បីបង្ហាញសេចក្ដីស្រលាញ់ បង្ហាញសេចក្ដីសុខសាន្ត និងអំណរសប្បាយនៅរាត្រីនេះផងដែរ។
លោក សំ វណ្ណា អាយុ៧០ឆ្នាំសព្វថ្ងៃរស់នៅក្នុងភូមិនាងកុក ឃុំបាក់ក្លង ស្រុកមណ្ឌលសីមា ខេត្តកោះកុង ប្រពន្ធរបស់គាត់មានអាយុ៧២ឆ្នាំមានជំងឺប្រចាំកាយសម្រាកនៅផ្ទះ ដែលមានចៅស្រីអាយុ១៩ឆ្នាំ កំពុងធ្វើការងារនៅក្នុងរោងចក្រ ផ្គត់ផ្គង់ក្នុងគ្រួសារនិងញថ្នាំសង្កូវសម្រាប់ជំងឺរបស់ពួកគាត់។
លោកវណ្ណា ឲ្យដឹងថា ថ្ងៃនេះ លោកសប្បាយចិត្តណាស់ដែលបានទទួលអំណោយពីព្រះសហគមន៍ ឲ្យគាត់បានហូបអាហារជុំគ្នាជាមួយបងប្អូនដែលមកចូលរួមទាំងអស់។ លោកថា ទោះបីមិនច្រើន ប៉ុន្តែអាចអោយគាត់ដោះស្រាយជីវភាពបានមួយគ្រា។
ដោយឡែក លោក ឯក សុធី មានអាយុ៤៦ឆ្នាំ រស់នៅក្នុងក្រុងខេមរភូមិន្ទ មានជំងឺទឹកក្នុងថ្លើម ជាអតីតអ្នកនេសាទ មានកូន៣នាក់ក្នុងបន្ទុក បានរៀបរាប់ទាំងក្ដុកក្ដួលថា«នៅពេលដែលខ្ញុំអត់ និងខ្វះខាត មានព្រះសហគមន៍ជួយគឺខ្ញុំរំភើបណាស់។ ខ្ញុំតែងតែមានអារម្មណ៍ថា ខ្ញុំក្រហើយឈឺបែបនេះ ប្រហែលមិនមានអ្នកណាជួយខ្ញុំនឹងគ្រួសារខ្ញុំទេ ប៉ុន្តែមានព្រះសហគមន៍កាតូលិក បានអញ្ជើញខ្ញុំមកទទួលអំណោយនៅថ្ងៃនេះជាមួយបងប្អូនដទៃទៀត ធ្វើអោយខ្ញុំរំភើបណាស់ និយាយអ្វីមិនចង់ចេញទេ។»
លោកបន្ថែមថា នៅថ្ងៃនេះដែរគាត់បានហូបអាហារសាមគ្គីមួយដែលជាគ្រួសារមួយដែលកក់ក្ដៅ មិនរើសអើងគ្នា ទោះបងប្អូនខ្លះមានជំងឺនិងក្រីក្រ ប៉ុន្តែព្រះសហគមន៍នៅទីនេះបានបង្ហាញក្ដីស្រលាញ់មួយ ធ្វើអោយចិត្តគាត់មានសង្ឃឹមបន្តប្រឹងប្រែងជាមួយដំណើរជីវិត។
លោក លេង ស៊ីន អាយុ៦៨ឆ្នាំ ជាគណៈកម្មាសង្គហៈនិងជាគ្រូអប់រំជំនឿក្នុងព្រះសហគមន៍ បានឱ្យដឹងថា គ្រួសារចំនួន២៥នេះ មកពីសង្កាត់ស្មាច់មានជ័យ សង្កាត់ដងទង់ (ភូមិដងទង់១និងភូមិដងទង់២) សង្កាត់ស្ទឹងវែង និងក្រុងខេមរភូមិន្ទ។
លោកបានបន្តថា បុណ្យព្រះយេស៊ូប្រសូត្រនេះព្រះសហគមន៍ជួយទៅដល់អ្នកក្រីក្រ ដើម្បីឱ្យគេទទួលពន្លឺ ដែលណែនាំឱ្យគេមានសង្ឃឹមនៅក្នុងជីវិតរបស់គេ ហើយដើម្បីអោយគេនឹកឃើញថា «ទោះបីជាពួកគេក្រីក្រខ្វះខាតមែន ប៉ុន្តែបងប្អូនទាំងអស់មិនបោះបង់ចោលពួកគេនោះទេ ហើយទាំងនេះជាបំណងរបស់ព្រះសហគមន៍ ដើម្បីឱ្យបងប្អូនទទួលសេចក្ដីស្រលាញ់ពីព្រះជាម្ចាស់។»
លោកបានបញ្ជាក់ផងដែរថា អំណោយដែលចែកជូនគ្រួសារក្រីក្រទាំងនេះ គឺបានមយយចំណែកពីគ្រីស្តបរិស័ទ ហើយមួយភាគធំគឺមកពីព្រះសហគមន៍។
ព្រះសហគមន៍កោះកុង បានផ្តល់ទានដល់គ្រួសារក្រីក្រក្នុងឱកាសបុណ្យធំៗ ដូចជា បុណ្យចម្លង បុណ្យព្រះយេស៊ូប្រសូត្រ បុណ្យចូលឆ្នាំខ្មែរ និងបុណ្យភ្ជុំបិណ្ឌ។
ព្រះសហគមន៍កោះកុងបង្កើតឡើងក្នុងឆ្នាំ១៩៩៤ ស្ថិតនៅក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ជាខេត្តនៅជាប់ព្រំដែនប្រទេសថៃ ដែលមានចំងាយ២៧១គីឡូម៉ែត្រពីរាជធានីភ្នំពេញ ស្ថិតនៅភាគនិរតីនៃប្រទេស។ បច្ចុប្បន្នព្រះសហគមន៍នេះ មាន២០គ្រួសារគ្រីស្តបរិស័ទដែលកំពុងរស់នៅក្នុងតំបន់នោះ ដែលភាគច្រើនពួកគាត់ប្រកបរបរជាអ្នកលក់ដូរ នេសាទ ធ្វើការរោងចក្រជាដើម៕
ដោយចាន់ ម៉ានុត
