នាថ្ងៃទី១៨ ខែមីនា ឆ្នាំ២០២៣ ក្នុងឱកាសព្រះសហគមន៍ផ្លូវត្រីព្រះវិហារ ព្រះបេះដូង ព្រះយេស៊ូ ប្រារព្ធខួបនឹករលឹកដល់មរណភាពរបស់លោកបូជាចារ្យ ត្រឿង ប៊ូយៀប មានមនុស្សជាច្រើនបានប្រមូលផ្តុំគ្នាធ្វើការអធិដ្ឋានរួមគ្នានៅខាងមុខរូបសំណាក់របស់លោក។
ការធ្វើការអធិដ្ឋាននេះ ដើម្បីទទួលព្រះពរពីព្រះជាម្ចាស់តាមរយៈលោកបូជាចារ្យ ប៊ូយៀប ក្រោមអធិបតីភាពលោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតអីស្លែរ។
ចម្រៀងសរសើរលើកតម្កើងព្រះជាម្ចាស់លាន់ឮកងរំពង ស្របពេលមនុស្សទាំងនោះទទួលទឹកព្រះពរពីលោកអភិបាលព្រះសហគមន៍ អូលីវីយ៉េ នៅពេលចាប់ផ្ដើមកម្មវិធីអភិបូជាដ៏សក្ការៈនេះ។
លោកអភិបាលអូលីវីយ៉េ បានលើកឡើងថា នេះជាថ្ងៃដ៏ឱឡារឹកសម្រាប់ព្រះសហគមន៍នៅក្នុងភូមិភាគភ្នំពេញដើម្បីនឹករលឹកដល់លោកឪពុក ប៊ូយៀប ដែលធ្លាប់ទទួលខុសត្រូវនៅទីនេះក្នុងឆ្នាំ ១៩២៤ ចូលឆ្នាំ ១៩២៧។
លោកអភិបាលក៏បានរំឭកពីការរៀបចំកន្លែងនេះឱ្យទៅជាបូជនីដ្ឋាន ដើម្បីឱ្យបូជនីចរទាំងអស់អាចធ្វើបូជនីយេស៍ពីព្រះសហគមន៍ផ្សារតូច ដែលជាកន្លែងនឹករលឹកមរណសាក្សីនៅលើទឹកដីនៅកម្ពុជា បន្ទាប់មកនៅព្រះសហគមន៍អរិយក្សត្រ ដែលជាកន្លែងគោរពព្រះនាងម៉ារី ជាព្រះមហាក្សត្រីនៃសុខសន្តិភាព។
លោកមានប្រសាសន៍ថា ៖ «យើងនឹងបន្តធ្វើដំណើរដល់កន្លែងនេះ ដែលជាផ្លូវមួយយ៉ាងពិសេសក្នុងការរៀបចំនៅក្នុងភូមិភាគភ្នំពេញ ដើម្បីគោរពនៅតាមកន្លែងសក្ការៈបំផុត ដើម្បីទៅជាកម្លាំងនៅក្នុងជំនឿរបស់យើងជាពិសេស»។
លោកអភិបាលក៏បានណែនាំគ្រីស្តបរិស័ទឱ្យត្រឡប់មកវិញមកគោរពព្រះជាម្ចាស់ និងសូមព្រះពរព្រះអង្គតាមរយៈមរណសាក្សី ប៊ូយៀប ដោយអធិដ្ឋានអធិដ្ឋានសូមព្រះអង្គប្រទានពរឱ្យទៅជាមនុស្សពេញលក្ខណៈដោយមានសេចក្ដីសុខនៅក្នុងដួងចិត្ត។
កញ្ញា ហ៊ន ចាន់ណា មកពីកោះនរាហ៍ ដែលបានមកចូលរួមពិធីនេះ បានប្រាប់ថា ៖ «ខ្ញុំមកទីនេះដើម្បីអធិដ្ឋានសុំសេចក្ដីសុខនៅក្នុងក្រុមគ្រួសារ»។
កញ្ញាបានបន្តថា នៅក្នុងចំណោមមហាជនកុះករដូចនេះកញ្ញាតែងតែអធិដ្ឋានតាមរយៈលោកបូជាចារ្យ ប៊ូយៀប ជាញឹកញាប់មិនថានៅទីនេះ ឬនៅគេហដ្ឋានផ្ទាល់ ដើម្បីសូមអង្វរព្រះជាម្ចាស់តាមរយៈលោក ប៊ូយៀប ដោយមានជំនឿពិតប្រាកដ ឲ្យជួយនៅក្នុងជីវិតរស់នៅក្នុងក្រុមគ្រួសារផ្ទាល់ខ្លួន។
កញ្ញាថា ៖«អ្វីដែលសំខាន់ជាងនេះទៅទៀត គឺបានទទួលនូវផលផ្លែពីការអធិដ្ឋានដែលអាចដោះស្រាយបញ្ហានៅក្នុងក្រុមគ្រួសារបាន។ ជាពិសេសកាលពី១០ឆ្នាំមុន ម្ដាយខ្ញុំឈឺធ្ងន់ ខ្ញុំបានសុំឱ្យគាត់ឱ្យម្ដាយខ្ញុំបានធូរ ហើយគាត់ក៏ធូរមែន»។
ពីមួយឆ្នាំទៅមួយឆ្នាំ ចំនួនអ្នកដែលមកចូលរួមកម្មវិធីដើម្បីអធិដ្ឋានសូមព្រះពរតាមលោកប៊ូយៀប នៅព្រះវិហារព្រះបេះដូងព្រះយេស៊ូ (ផ្លូវត្រី) មានកំណើនជារៀងរាល់។
លោកបូជាចារ្យទទួលខុសត្រូវព្រះសហគមន៍មណ្ឌលសកម្មភាពមេគង្គ វីរជ័យ ស្រ៊ីប្រាម៉ុង បានឲ្យដឹងថា ព្រះសហគមន៍នឹងរៀបចំពង្រីកទីកន្លែងបន្ថែមដោយចាក់ដីទៅលើច្រាំងទន្លេ ដើម្បីឱ្យអ្នកចូលរួមមានកន្លែងសមរម្យក្នុងការចូលអុជធូបអធិដ្ឋាន។
សូមជម្រាបផងដែរថា ក្រៅពីកិច្ចការរៀបចំការជួបជុំគ្នាធ្វើអធិដ្ឋាននេះ ព្រះសហគមន៍ក៏បានជួយសម្រួលនៅក្នុងការចម្លង អ្នកចូលរួមទាំងអស់តាមផ្លូវទឹកឱ្យមកដល់គោលដៅមុខព្រះវិហារដោយផ្ទាល់ ព្រមទាំងជូនដំណឹងដល់អាជ្ញាធរ ដើម្បីស្នើសុំការអនុញ្ញាតនិងកម្លាំងសមត្ថកិច្ចក្នុងការរក្សាសណ្ដាប់ធ្នាប់ដើម្បីរក្សាសុវត្ថិភាព ក៏ដូចជាទំនុកចិត្តអ្នកចូលរួមនៅក្នុងការអធិដ្ឋានរួមជាមួយនឹងលោកបូជាចារ្យប៊ូយៀបផងដែរ។
លោក វិន សិនហុង ប្រធានគណៈកម្មការព្រះសហគមន៍ បានឱ្យដឹងថា ព្រះសហគមន៍មានផែនការចាក់ដីបន្ថែមច្រាំងទន្លេ ដើម្បីទទួលអស់អ្នកជឿទាំងនោះ។
លោកបានរៀបរាប់ថា ៖ «នៅទីនេះទោះបីជាថ្ងៃធម្មតាក៏នៅមានអ្នកមុខអធិដ្ឋានសុំ ហើយជាពិសេសអ្នករកស៊ីមិនមែនត្រឹមតែជាគ្រីស្តិស័ទទេ ថែមទាំងមានអ្នកដែលជាសាសនិកផ្សេងៗក៏មកអុជធូបសុំដែរ»។
ចំពោះខ្លួនលោកផ្ទាល់ក្នុងនាមជាគ្រីស្តបរិស័ទ និងជាអ្នករកស៊ីម្នាក់ លោកបានបង្ហាញពីសក្ខីភាពរបស់ខ្លួន តែងតែអធិដ្ឋានសូមអង្វរព្រះជាម្ចាស់តាមរយៈលោកបូជាចារ្យយៀប ដើម្បីសុំសេចក្ដីសុខនៅក្នុងក្រុមគ្រួសារ ឃើញថាបានទទួលលទ្ធផលពិតមែន ព្រោះពេលក្រុមគ្រួសារលោកមានសេចក្ដីសុខសាន្ត គ្មានជំងឺនោះ លោកក៏អាចរកស៊ីបានងាយស្រួល និងរីកចម្រើនដែរ។
សូមរំឭកផងដែរថា លោក ត្រឿង ប៊ួយៀប កើតនៅថ្ងៃទី ១ ខែមករា ឆ្នាំ១៨៩៧ ក្នុងខេត្តអាងយ៉ាង ប្រទេសវៀតណាម។ នៅឆ្នាំ១៩២៤ លោកត្រូវបានតែងតាំងជាបូជាចារ្យ នៅភ្នំពេញ ក្នុងសម័យលោកអភិបាល Valentin Herrgotte។ ឆ្នាំ ១៩២៤ ដល់ ១៩២៥ លោកបូជាចារ្យ ត្រឿង ប៊ូយៀប ត្រូវបានចាត់ឱ្យបំពេញបេសកម្មជាបូជាចារ្យជំនួយនៅព្រះសហគមន៍ ផ្លូវត្រី។
លោកបានទទួលមរណភាពដោយសារគេ កាត់ក នៅប្រទេស វៀតណាម នាថ្ងៃទី១២ មីនា ១៩៤៦។ បច្ចុប្បន្នមានមនុស្សជាច្រើនទាំងក្នុង និងក្រៅប្រទេស ទាំងគ្រីស្តបរិស័ទ និងអ្នកដែលមានជំនឿលើសាសនាដទៃទៀត បានមកព្រះសហគមន៍ផ្លូវត្រី ដើម្បីអុជធូបសូមសេចក្តីសុខតាមតម្រូវការរបស់ខ្លួន ជាពិសេសគឺសម្រាប់មុខជំនួញ៕
ដោយ៖ ដាលីស
