សិក្ខាសាលាស្តីពី «សម្មាសង្កប្បៈ» ត្រូវបានរៀបចំឡើងកាលពីថ្ងៃទី១៤ ខែមីនា ឆ្នាំ២០២៣នាវិទ្យាស្ថានសន្តប៉ូល ក្នុងស្រុកត្រាំកក់ ខេត្តតាកែវ ដោយមានការចូលរួមពីសំណាក់គណៈគ្រប់គ្រង បុគ្គលិក និស្សិត និងតាមប្រព័ន្ធZoom សរុបប្រមាណជា១៧៥នាក់។
សិក្ខាសាលានេះក៏មានការចូលរួមជាវាគ្មិនកិត្តិយសពីសំណាក់ ព្រះភិក្ខុវជិរប្បញ្ញោ សាន សុជា និងលោកបូជាចារ្យ គង់ វៀល ជាបូជាចារ្យព្រះសហគមន៍កាតូលិក និងជាអ្នកសម្របសម្រួលនៃគេហទំព័រវិគីភីឌាក្នុងស្រុកជាភាសាខ្មែរ។
ថ្លែងបើកអង្គសិក្ខាសាលា លោក ផុន សុផល នាយកនៃវិទ្យាស្ថានសន្តប៉ូល បានឱ្យដឹងថា កម្មវិធីនេះបង្កើតឡើងមានគោលបំណងមួយ ដើម្បីជួយដល់និស្សិតឆ្នាំទី១ ឆ្នាំទី២ និងអ្នកដែលចូលរួមទាំងអស់ យល់ពីការសម្រេចចិត្តក្នុងផ្លូវត្រឹមត្រូវដោយផ្អែកលើព័ត៌មាន ឬមូលដ្ឋានសម្រេចចិត្តជាក់លាក់ហើយ និងចេះទទួលខុសត្រូវចំពោះការសម្រេចចចិត្តរបស់ខ្លួនផ្ទាល់។
លោកបានបន្តថា គោលបំណងនៃសិក្ខាសាលានេះ ធ្វើឡើងដើម្បីឱ្យយល់ពីការចេះសម្រេចចិត្តដោយ ផ្ដោតទៅលើច្បាប់ សីលធម៌ គុណធម៌ ទំនាក់ទំនង និងក្រមសីលធម៌របស់មនុស្សដែលរស់ប្រចាំថ្ងៃ,មូលដ្ឋាននៃការសម្រេចចិត្តជាក់លាក់ដែលសិក្ខាសាលានេះអាចធ្វើឱ្យមនុស្សម្នាក់ៗរកមូលដ្ឋានជាក់លាក់ក្នុងកម្រិតណាមួយទៅតាមតួនាទី តាមឋានៈ តាមការរស់នៅ នឹងតាមរបៀបក្នុងការទំនាក់ទំនង។
លោក ផុន សុផល បានបន្ថែមថា ចំណែកគោលបំណងទី៣ គឺការចេះទទួលខុសត្រូវជាមួយការសម្រេចចិត្តរបស់ខ្លួន ពីព្រោះការសម្រេចចិត្តរបស់មនុស្សម្នាក់ៗអាចមានការសម្រេចក្នុងផ្លូវល្អ និងផ្លូវអាក្រក់។
លោកបានបញ្ជាក់ថា ៖ «ចំពោះកម្មវិធីដែលបានរៀបចំនេះចង់បង្ហាញពីទស្សនៈអប់រំសាសនាធំចំនួន២របស់ប្រទេសកម្ពុជា គឺព្រះពុទ្ធសាសនា និងគ្រីស្តសាសនា (កាតូលិក) ដើម្បីឱ្យសិស្សនិស្សិតក៏ដូចជាអ្នកចូលរួមទាំងអស់យល់អំពីទស្សនៈអប់រំតាមបែបសាសនា»។
ស្របពេលជាមួយគ្នានេះ ព្រះភិក្ខុវជិប្បញ្ញោ សាន សុជា បាននិមន្តធ្វើបទបង្ហាញពីអត្ថន័យរួមរបស់ពាក្យ សម្មាសង្កប្បៈ ដែលផ្ដោតលើការត្រិះរិះត្រឹមត្រូវ មិនចាកចេញកាម មិនព្យាបាទ និងមិនបៀតបៀនទៅលើការសម្រេចចិត្តរបស់អ្នកដទៃ។
ព្រះភិក្ខុវជិប្បញ្ញោ សាន សុជា មានថេរ ដីកាថា ៖ «ចំពោះការសម្រេចចិត្តតាមបែបព្រះពុទ្ធសាសនាគឺ ត្រូវដឹងថាអ្វីដែលមិនគួរធ្វើ គឺមិនត្រូវបៀតបៀនអ្នកណាម្នាក់ មិនបៀតបៀនអ្នកដទៃ មិនធ្វើឱ្យខ្លួនឯងឈឺចាប់ទាំងផ្លូវកាយផ្លូវចិត្ត និងមិនធ្វើឱ្យអ្នកណាម្នាក់ឈឺចាប់ដោយសារទង្វើនឹងការសម្រេចចិត្តរបស់ខ្លួនហើយត្រូវឈរលើមូលដ្ឋានគាំទ្រលើការសម្រេចចិត្តគឺឱ្យមានភាពបរិសុទ្ធ សុចរិត ទៀងត្រង់ ភក្ដីភាព និងមានមេត្តាករុណាក្នុងការសម្រេចចិត្ត»។
ចំណែក លោកបូជាចារ្យ គង់ វៀល ជាតំណាងបូជាចារ្យព្រះសហគមន៍កាតូលិក បានបង្ហាញពីទស្សនៈអប់រំដែលជួយដល់និស្សិត និងអ្នកចូលរួមរិះគិតពិចារណាទៅលើការសម្រេចចិត្តមួយ ដែលការសម្រេចចិត្តនោះផ្អែកទៅលើចំណុចអព្យាក្រឹត្យ សុក្រឹតភាព ឯកភាព និងត្រូវមានសេរីភាព។
លោកបានបន្តថា ត្រូវស្ថិតនៅលើជំនឿ ដោយជំនឿរបស់កាតូលិក ជឿទៅលើព្រះជាម្ចាស់ ពីព្រោះព្រះអង្គពោរពេញដោយសេចក្ដីស្រលាញ់ ព្រះអង្គជាសេចក្ដីស្រលាញ់ ព្រះអង្គជាសេចក្ដីពិត និងជាផ្លូវ ដូច្នេះការសម្រេចចិត្តត្រូវមានជំនឿដោយស្ថិតនៅក្នុងសេចក្ដីពិតដោយមិនលំអៀង។
លោកបូជាចារ្យក៏បានជំរុញ លើកទឹកចិត្តចំពោះអ្នកដែលគ្មានសេចក្ដីស្រលាញ់ គ្មានសេចក្ដីពិត ត្រូវតែគិតពិចារណា ដើម្បីធ្វើការសម្រេចចិត្តឱ្យយោងទៅតាមជំនឿស្ថិតក្នុងសេចក្ដីពិតដែលព្រះយេស៊ូបានបង្រៀនឱ្យយល់ច្បាស់ពីសេរីភាពហើយកាលណាបើយល់ពីសេចក្ដីស្រលាញ់ សេចក្ដីពិត មនុស្សម្នាក់ៗមានសេរីភាពនៅក្នុងសម្រេចចិត្ត។
លោកបូជាចារ្យបានសង្កត់ធ្ងន់ថា «ចំពោះទស្សនៈនៃការគាំទ្រលើកទឹកចិត្តក្នុងការសម្រេចចិត្តនោះគឺត្រូវមានស្មារតីទទួលខុសត្រូវចំពោះការសម្រេចចិត្តដោយផ្អែកលើសេចក្ដីស្រលាញ់ និងសេចក្តីពិតដែលទទួលបានពីការអប់រំរបស់ព្រះយេស៊ូ»៕
