«ពិតមែនយើងជាអ្នកចម្បាំងការពារពន្លឺ ដែលការប្រយុទ្ធរបស់យើង ជាការប្រយុទ្ធដើម្បីសិទ្ធិសេរីភាព និងរំដោះមនុស្សលោកឱ្យរកឃើញផ្លូវនៃជីវិតអស់កល្បជានិច្ច»។ នេះជាសារដែលថ្លែងឡើងដោយលោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតអ៊ីស្លេរ។
លោកអភិបាលបានលើកឡើងដូចនេះ កាលពីថ្ងៃទី២៩ ខែមីនា ឆ្នាំ២០២៣ កន្លងទៅថ្មីៗនេះ ដើម្បីជាការក្រើនរំឭកដល់លោកបូជាចារ្យដែលបានចូលរួមប្រមាណជាជិត៩០អង្គ នៅក្នុងឱកាសពិធីបុណ្យអភិបូជាប្រកាសពាក្យសន្យាជាថ្មីរបស់លោកបូជាចារ្យចំពោះមុខព្រះសហគមន៍ និងពិធីប្រសិទ្ធិពរលើប្រេង នាព្រះវិហារសន្តសិលា និងសន្តប៉ូល នៃមណ្ឌលសកម្មភាពភ្នំពេញថ្មី។
ក្នុងពិធីនោះ លោកអភិបាល អូលីវីយ៉េ មានប្រសាសន៍ថា ៖ «យើងមិនមែនជាអ្នកចម្បាំង ដើម្បីបំផ្លាញ ដើម្បីណែនាំឱ្យមានភាពស្អប់គ្នា ប៉ុន្តែចម្បាំងដើម្បីចូលក្នុងការប្រយុទ្ធរបស់ព្រះជាម្ចាស់ ដើម្បីឱ្យពន្លឺ និងសេចក្តីពិតឈ្នះគ្រប់ពេលវេលា គ្រប់កាលៈទេសៈ»។
នៅក្នុងធម្មទេសនាដដែលនេះ លោកក៏បានរំឭកពីអត្ថន័យនៃការចូលក្នុងសប្តាហ៍ពិសិដ្ឋខាងមុខនេះ ដែលជាការចូលនៅក្នុងការប្រយុទ្ធចុងក្រោយបំផុតរបស់ព្រះយេស៊ូ ដើម្បីឈ្នះអំពើហិង្សាឈ្នះអំពើបាប និងឈ្នះការស្អប់គ្នានៅលើផែនដីទាំងមូល។
លើសពីនេះទៅទៀត លោកអភិបាលភូមិភាគភ្នំពេញរូបនេះ ក៏បានថ្លែងលើកទឹកចិត្តលោកបូជាចារ្យដែលជាអ្នកចម្បាំងការពារពន្លឺឱ្យឈរឡើង កុំភ័យខ្លាច ព្រោះមានព្រះជាម្ចាស់ជាខែលនៅក្នុងការប្រយុទ្ធប្រឆាំងនឹងភាពងងឹតនេះ។
លោកមានប្រសាសន៍ថា ៖ «អស់លោកបូជាចារ្យ ត្រូវការរស់នៅក្នុងសេចក្ដីស្រឡាញ់ដ៏ពិសេសរបស់ព្រះជាម្ចាស់ រស់នៅក្នុងទំនាក់ទំនងដ៏ពិតប្រាកដ ដោយមិនវង្វេងទៅនឹងស្ថានភាពសិប្បនិម្មិតរបស់ពិភពលោក»។
ដើម្បីធ្វើជាអ្នកចម្បាំងការពារពន្លឺនេះដែរ បូជាចារ្យទទួលខុសត្រូវព្រះសហគមន៍មណ្ឌលសកម្មភាពព្រះសីហនុ លោក តាវ៉ូឡា យ៉ាំងលូកា បានលើកឡើងដែរថា ៖ «ខ្ញុំយល់ថាយើងជាបូជាចារ្យត្រូវការផ្ដល់សេចក្ដីសង្ឃឹមឱ្យបងប្អូន ពិសេសព្យាយាមធ្វើឱ្យព្រះសហគមន៍មានសកម្មភាពនៃសេចក្ដីពិតជាក់ស្ដែង តាមរយៈកិច្ចការមេត្តាករុណា និងផ្ដល់សេចក្ដីសង្ឃឹមដល់បងប្អូនឯទៀតៗ ដើម្បីឱ្យគេឃើញពន្លឺរបស់ព្រះជាម្ចាស់»។
លោក លូកា បានបន្ថែមទៀតថា ពេលខ្លះនៅក្នុងសង្គមនេះ ពោរពេញដោយការជិះជាន់យកឈ្នះចាញ់គ្នាដែលជាភាពងងឹត។ ហេតុនេះត្រូវការមានចិត្តសប្បុរស ចេះលះបង់ ដោយបូជាជីវិតដើម្បីបងប្អូន ដើម្បីជាគំរូដល់បងប្អូនក្នុងការធ្វើជាពន្លឺកុំឱ្យភាពងងឹតមកគ្រងរាជ្យក្នុងដួងចិត្ត និងបងប្អូន។
បញ្ជាក់ផងដែរថា ក្នុងពិធីនោះ លោកអូលីវីយ៉េ ក៏បានផ្ដល់នូវអនុសាសន៍ដល់លោកអភិបាល និងបូជាចារ្យទាំងអស់ឱ្យរស់នៅក្នុងគុណធម៌ ដូចជា៖ ភក្តីភាព, ចិត្តអត់ធ្មត់, មានជំនាញប៉ិនប្រសប់, មានចិត្តសប្បុរស និងពោរពេញដោយសេចក្តីស្រលាញ់, ថែរក្សា, បូជា លះបង់ និងតស៊ូ និងការថែរក្សាស្នាមញញឹម។
បន្ទាប់ពីការថ្លែងនូវខ្លឹមសារដ៏មានអត្ថន័យពីសំណាក់លោកអភិបាលអូលីវីយ៉េរួច លោកបូជាចារ្យបានក្រោកឈរឡើងនៅចំពោះមុខព្រះសហគមន៍ទាំងមូល ដើម្បីប្រកាសពាក្យសច្ចារបស់ខ្លួនសាជាថ្មី ដោយរួមជាមួយព្រះយេស៊ូជាព្រះជាម្ចាស់អស់ពីចិត្ត និងលះបង់ប្រយោជន៍ផ្ទាល់ខ្លួនដើម្បីបំពេញបេសកកម្មនៅក្នុងព្រះសហគមន៍។
ក្នុងឱកាសនេះដែរ លោកអភិបាលអូលីវីយ៉េ ក៏បានស្នើឱ្យគ្រីស្តបរិស័ទទាំងអស់ទូលអង្វរព្រះជាម្ចាស់ ដើម្បីជួយអស់លោកបូជាចារ្យឲ្យបម្រើព្រះជាម្ចាស់ដោយស្មោះត្រង់ ដើម្បីណែនាំគ្រីស្តសាសនិកខ្លួនឲ្យទទួលការសង្គ្រោះ ដោយចេះបំពេញមុខងារយ៉ាងស្ម័គ្រចិត្ត ព្រមទាំងមានភក្ដីភាពជាមួយព្រះយេស៊ូជាគង្វាលដ៏សប្បុរស៕
ដោយដាលីស
