អំណរសប្បាយពិតប្រាកដគឺ នៅក្នុងដួងចិត្តរបស់យើង និងប្រសិនបើយើងទីពឹងអំណរសប្បាយមកពីគេមិនស្ថិតស្ថេរនោះទេ។ នេះជាប្រសាសន៍របស់លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ នៅព្រះវិហារសន្តីម៉ារីម៉ាដាឡា(ស្វាយប៉ាក)ស្ថិតនៅភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
លោកអភិបាលបន្ថែមថា វត្តមានរបស់ព្រះយេស៊ូនៅក្នុងដួងចិត្តរបស់យើងឯណោះទេ ដែលជាអំណរសប្បាយដ៏ស្ថិតស្ថេរ។ លោកបានស្នើឲ្យគ្រីស្តបរិស័ទយកចិត្តទុកដាក់ថែរក្សាអំណរសប្បាយមួយនេះក្នុងគ្រប់កាលៈទេសៈ និងត្រូវកែប្រែចិត្តគំនិតធ្វើជាមនុស្សថ្មីដូចនាងម៉ារីម៉ាដាឡាដែលជាឧបការីជននៃព្រះវិហារនេះ។
នៅក្នុងធម្មទេសនានាឱកាសថ្ងៃទី១៤ ឧសភា ២០២៣ នេះ លោកអភិបាលអូលីវីយ៉េ មានប្រសាសន៍រំឮកទៀតថា នាងម៉ារីម៉ាដាឡា មានអំណរសប្បាយដោយព្រះយេស៊ូបានណែនាំនាងក្លាយជាមនុស្សថ្មី ដោយមានឋានៈជាស្ត្រីពោរពេញដោយតម្លៃរហូតបានទៅជាសាក្សីដំបូង ដើម្បីបញ្ជាក់ថាព្រះយេស៊ូមានព្រះជន្មរស់ឡើងវិញ និងទៅប្រកាសដល់គ្រីស្តទូតពីដើម។
អំណរសប្បាយរបស់គ្រីស្តបរិស័ទគឺព្រះយេស៊ូ ដោយធ្វើតាមវិន័យរបស់ព្រះអង្គគឺ«ស្រឡាញ់គ្នាទៅវិញទៅមក ដូចខ្ញុំបានស្រឡាញ់អ្នករាល់គ្នា»។ លោកអភិបាលបញ្ជាក់ថា អំណរសប្បាយរបស់យើងអាចរកឃើញតាមរយៈចំណុចមួយចំនួនដូចជា ចិត្តស្រឡាញ់និងបម្រើព្រះជាម្ចាស់ ការចូលរួមរបស់គ្រីស្តបរិស័ទក្នុងព្រះសហគមន៍ និងសកម្មភាពរបស់គ្រីស្តបរិស័ទដែលបង្ហាញការដឹងគុណនិងសងគុណព្រះជាម្ចាស់ដោយបម្រើអ្នកដទៃ និងធ្វើធម៌មេត្តាករុណា។
និស្សិតទេវវិទ្យាល័យ លោកសិលា ឡុង រតនា បានឱ្យដឹងថា«សម្រាប់ខ្ញុំផ្ទាល់ជាអំណរសប្បាយដ៏មានអត្ថន័យបំផុតសម្រាប់ជីវិតខ្ញុំ ព្រោះព្រះជាម្ចាស់ស្រឡាញ់យើងទាំងអស់គ្នា ដោយជ្រើសរើសយើងតាមតួនាទីរៀងៗខ្លួន។»
លោកបញ្ជាក់ថា «សម្រាប់ខ្ញុំពាក្យថាបម្រើព្រះជាម្ចាស់ គឺមិនមែនទៅជាទាសករ ប៉ុន្តែបម្រើដោយប្រើសេចក្ដីស្រឡាញ់ដែលទទួលពីព្រះជាម្ចាស់ទៅដល់បងប្អូនដែលមិនទាន់ស្គាល់ព្រះជាម្ចាស់។»
ដោយដាលីស
