ការិយាល័យពិធីបុណ្យអន្តរភូមិភាគ បានរៀបចំសិក្ខាសាលាស្តីអំពី «អគ្គសញ្ញាអាពាហ៍ពិពាហ៍» ដែលមានការចូលរួមពីលោកអភិបាល លោកបូជាចារ្យ ដូនជី និងគ្រីស្តបរិស័ទប្រមាណ៧០នាក់ មកពីព្រះសហគមន៍ទាំង៣ភូមិភាគ នាថ្ងៃទី១៨ ដល់ថ្ងៃទី១៩ ខែកុម្ភៈ ឆ្នាំ២០២៥ ក្នុងគោលបំណងសិក្សាអំពីអគ្គសញ្ញាអាពាហ៍ពិពាហ៍ និងក្បួនប្រារព្ធពិធីតាមច្បាប់ព្រះសហគមន៍កាតូលិក និងតាមប្រពៃណីខ្មែរ។
លោកអភិបាល សិលា សួន ហង្សលី ទទួលបន្ទុកការិយាល័យពិធីបុណ្យអន្តរភូមិភាគបានឲ្យដឹងថា សិក្ខាសាលានេះមានគោលបំណងចង់ឲ្យលោកឪពុក បងប្រុស បងស្រី ព្រមទាំងតំណាងគ្រីស្តបរិស័ទយើងមានឱកាសជួបជុំគ្នាដើម្បីរិះគិតពិចារណាឡើងវិញអំពីអគ្គសញ្ញាអាពាហ៍ពិពាហ៍ដែលយើងប្រារព្ធក្នុងព្រះសហគមន៍កាតូលិក ដោយសារការិយាល័យពិធីបុណ្យចង់ធ្វើសៀវភៅសម្រាប់ពិធីរៀបអាពាហ៍ពិពាហ៍នេះឲ្យបានសមរម្យ និងបានល្អប្រសើរជាង។
លោកអភិបាលបន្តទៀតថា គណៈកម្មការពិធីបុណ្យបានទទួលយោបល់ជាច្រើនពីអង្គប្រជុំ ដែលបង្ហាញអំពីសារៈសំខាន់នៃអគ្គសញ្ញាអាពាហ៍ពិពាហ៍ និងពិធីផ្សេងៗនៅក្នុងប្រពៃណីខ្មែរ។ លោកបន្ថែមថា យោបាល់ទាំងអស់នេះ លោកនឹងពិភាក្សាជាមួយលោកអភិបាលពីរអង្គទៀត និងជាមួយលោកព្រឹទ្ធាចារ្យខ្លះៗ ដើម្បីសម្រេចរក្សាឬដាក់បញ្ចូលពិធីតាមប្រពៃណីនៅក្នុងអគ្គសញ្ញាអាពាហ៍ពិពាហ៍របស់គ្រីស្តបរិស័ទ និងចេញជាសៀវភៅសម្រាប់ប្រើប្រាស់ក្នុងក្របខណ្ឌទូទាំងប្រទេស។
ឆ្លងតាមសិក្ខាសាលានេះ លោកអភិបាលទទួលបន្ទុកផ្នែកពិធីបុណ្យរូបនេះ បានប្រាប់ទៀតថា ព្រះសហគមន៍ក៏គ្រោងនឹងរៀបចំសៀវភៅមួយទៀត អំពីពិធីបុណ្យសពតាមបែបព្រះសហគមន៍កាតូលិកបុកបញ្ជូលនឹងប្រពៃណីខ្មែរ។ លោកបញ្ជាក់ថា «ទោះបីបងប្អូនពុទ្ធបរិស័ទដែលមកចូលរួមនៅក្នុងកម្មវិធីអី គេឃើញថាពិធីនេះសមរម្យល្មមដែលអាចទទួលយកបាន … ប្រពៃណីដែលយើងមានកន្លងមកនៅក្នុងប្រទេសកម្ពុជាយើងក៏សំខាន់ដែរ»។
ក្នុងសិក្ខាសាលារយៈពេល២ថ្ងៃនេះ ព្រះសហគមន៍បានអញ្ជើញ លោក កែវ ហេង ប្រធាននាយកដ្ឋាន ស្រាវជ្រាវផ្សព្វផ្សាយពុទ្ធសាសនាផ្សារភ្ជាប់សង្គម នៃក្រសួងធម្មការនិងសាសនាមកពន្យល់អំពីអាពាហ៍ពិពាហ៍តាមប្រពៃណីខ្មែរនិងអត្ថន័យរបស់ពិធីនីមួយៗ។ បន្ទាប់មកលោកបូជាចារ្យ ហ្រ្វង់ស័រ អេមេល្សដាល ណែនាំអំពីអាពាហ៍ពិពាហ៍តាមព្រះគម្ពីរ និងតាមលទ្ធិគ្រីស្តសាសនា។
នៅថ្ងៃទីពីរ លោកបូជាចារ្យ ដាមីញ៉ាំង ហ្វារនឺ បានណែនាំអំពីក្បួនប្រារព្ធអគ្គសញ្ញាអាពាហ៍ពិពាហ៍។ ក្នុងសិក្ខាសាលានោះអ្នកចូលរួមបានចែកជាក្រុមតូចៗ ដើម្បីចែករំលែកនិងពិភាក្សាគ្នាពីបញ្ហាផ្សែងៗដែលមានក្នុងការរៀបចំពីធីអគ្គសញ្ញាអាពាហ៍ពិពាហ៍តាមព្រះសហគមន៍រៀងៗខ្លួន។
លោក រ៉ាវី សុភារ៉ុង អនុប្រធានក្រុមពិធីបុណ្យ នៅព្រះសហគមន៍សន្តយ៉ូសែប (ផ្សារតូច) បាននិយាយថា គ្រីស្តបរិស័ទមិនគ្រាន់តែរៀបអាពាហ៍ពិពាហ៍រវាងគូស្វាមីភរិយាទេ តែជាការបង្ហាញពីសេចក្ដីស្រឡាញ់ដែលព្រះជាម្ចាស់ចងសម្ព័ន្ធមេត្រីជាមួយមនុស្ស។
លោកបន្តថា៖ «នៅក្នុងព្រះសហគមន៍ ខ្ញុំបានចូលរួមច្រើនជាមួយនឹងការរៀបចំអាពាហ៍ពិពាហ៍ ដោយសារនៅព្រះសហគមន៍សន្តយ៉ូសែប (ផ្សារតូច) អគ្គសញ្ញាអាពាហ៍ពិពាហ៍ ផ្ដោតសំខាន់ទៅលើវប្បធម៌ខ្មែរ នាំឲ្យយើងឃើញថា ទាំងការប្រកាសជំនឿ និងទាំងការបង្ហាញពីវប្បធម៌ខ្មែរ(មាន)នៅក្នុងគ្រីស្តសាសនារបស់យើង»។
លោកបន្ថែមថា ជាទូទៅព្រះសហគមន៍នីមួយៗ រៀបចំអគ្គសញ្ញាអាពាហ៍ពិពាហ៍តាមបែបបទរៀងៗខ្លួន និងគ្មានក្បួនច្បាប់ពិធីនៅឡើយទេ។
សុភារ៉ុងបានសំណូមពរឲ្យខាងពិធីបុណ្យអន្តរភូមិភាគ «រៀបចំក្បួនពិធីមួយច្បាស់លាស់ទាក់ទងជាមួយនឹងការលាយបញ្ចូលនូវពិធីបែបប្រពៃណីទាំងបីដែលយើងមាន គឺពិធីផ្ទឹមចងដៃ ពិធីបង្វិលពពិល និងពិធីបាចផ្កាស្លា»។
គួរបញ្ជាក់ផងដែរថា នេះជាសិក្ខាសាលាលើកដំបូងអំពីពិធីបុណ្យស្តីអំពី «អគ្គសញ្ញាអាពាហ៍ពិពាហ៍» ដែលមានតំណាងគ្រីស្តបរិស័ទ លោកបូជាចារ្យ និងបព្វជិត-ជិតា មកពីព្រះសហគមន៍ទាំងបីភូមិភាគចូលរួមមតិ យោបល់ ដើម្បីជួយឲ្យការិយាល័យពិធីបុណ្យអន្តរភូមិភាគ រៀបចំក្បួនពិធី «អគ្គសញ្ញាអាពាហ៍ពិពាហ៍» ឲ្យបានល្អប្រសើរ៕
ដោយ៖ ម៉េង ភីឡុង
