ការិយាល័យយុវជន ជំទង់និងកុមារភូមិភាគភ្នំពេញបានរៀបចំកម្មវិធីបូជនីយចរប្រចាំឆ្នាំដែលមានយុវជនចូលរួមចំនួន៣០០នាក់ លោកបូជាចារ្យ និងបព្វជិត-ជិតា ចូលរួមក្រោមប្រធានបទ បូជនីយេសក៏ឆ្ពោះទៅសេចក្តីសង្ឃឹម ធ្វើនៅព្រះសហគមន៍ដាក់ដំាំ និងប៊ូស្រា ក្នុងខេត្តមណ្ឌលគិរី ដែលមានបងប្អូនជនជាតិដើមភាគតិចព្នងរស់នៅ កាលពីថ្ងៃទី២៨ដល់ថ្ងៃទី០២ ខែមីនាកន្លងទៅ។
លោកស៊ាន់ សារឿន ប្រធានការិយាល័យយុវជន ជំទង់និងកុមារភូមិភាគភ្នំពេញ មានប្រសាសន៍ថា កម្មវិធីនេះ បានរឿបចំឡើងរយៈ១៤ឆ្នាំមកហើយ គឺនៅតាំងពីឆ្នាំ២០១០។ លោកបន្ថែមថា កម្មវិធីនេះ គឺដើម្បីឲ្យយុវជនមានឱកាសបង្ហាញអំពីជំនឿ និងមានពេលវេលាដើម្បីធ្វើដំណើររួមគ្នា ចែករំលែកបទពិសោធន៍អំពីការបម្រើរបស់ពួកគេនៅតាមព្រះសហគមន៍នីមួយៗ ចេះបម្រើព្រះសហគមន៍និងសង្គមដោយសេចក្តីស្រឡាញ់ ហើយយុវជនអាចរស់នៅ ដោយមានសេចក្ដីសុខសន្តិភាព រស់នៅក្នុងសេចក្ដីថ្លៃថ្នូរនិងនៅក្នុងសេចក្ដីសង្ឃឹម ក្នុងនាមជាយុវជនយុវនារីរបស់ព្រះសហគមន៍កាតូលិក។
លោកសារឿនបន្ថែមថា ពិសេសនោះគឺ «ឲ្យយុវជននិងយុវនារីទទួលបានសេចក្ដីសង្ឃឹមដ៏ពិតប្រាកដតាមរយៈជំនឿ»។
នៅល្ងាចថ្ងៃទី១នៃបូជនីចរនេះ មានរៀបចំអធិដ្ឋានតេហ្សេសម្រាប់សុខភាពរបស់សម្តេចប៉ាបហ្វ្រង់ស៊ីស្កូ ដែលកំពុងសម្រាកនៅក្នុងមន្ទីរពេទ្យនាទីក្រុងរ៉ូម នៅព្រះវិហារសន្តយ៉ាកុប នៃព្រះសហគមន៍ដាក់ដាំ និងព្រឹកថ្ងៃបន្ទាប់ យុវជនទាំងអស់បាននាំគ្នាដើរតាមដងផ្លូវជាតិដែលមានចម្ងាយ១៧គីឡូម៉ែត្រ ឆ្ពោះទៅកាន់ព្រះវិហារសន្តយ៉ូហានបាទីស្ត ប៊ូស្រា។ នៅតាមផ្លូវយុវជនទាំងអស់អធិដ្ឋានដោយសូត្រផ្គាំ និងមានឱកាសស្តាប់ការអប់រំរបស់លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ។
លោកអភិបាលអូលីវីយ៉េ មានប្រសាសន៍អប់រំយុវជនចំនួន២ដំណាក់កាល គឺទី១ ឲ្យយុវជនចេះទីពឹងលើព្រះយេស៊ូគ្រីស្តដែលជាសេចក្តីសង្ឃឹមរបស់គ្រីស្តបរិស័ទ ពឹងលើព្រះបន្ទូលរបស់ព្រះជាម្ចាស់ និងពឹងលើព្រះសហគមន៍។
លោកថា «ពឹងលើព្រះយេស៊ូដោយសារព្រះអង្គគង់នៅជាមួយយើង ផ្តល់សេចក្តីសង្ឃឹម សេចក្តីសុខសាន្ត និងធ្វើដំណើររួមជាមួយយើងទាំងពេលមានអំណរសប្បាយនិងទុក្ខព្រួយ»។ លោកអភិបាលរំលឹកថា ពេលយើងអស់សង្ឃឹមសូមទូលអង្វរព្រះយេស៊ូ «ឱព្រះអម្ចាស់អើយ សូមអាណិតអាសូរទូលបង្គំ»។
ក្នុងនាមជាគ្រីស្តបរិស័ទ យើងត្រូវអានព្រះបន្ទូលរបស់ព្រះជាម្ចាស់ជាប្រចាំថ្ងៃ ដើម្បីឲ្យយើងអាចធ្វើជាសាក្សីរបស់ព្រះយេស៊ូក្នុងជីវិតរស់នៅរបស់យើង។ លោកអភិបាលបានបញ្ជាក់ប្រាប់យុវជន។
ក្នុងនោះដែរ លោកគង្វាលព្រះសហគមន៍បន្តថា ព្រះសហគមន៍គឺជាទីពឹងរបស់គ្រីស្តបរិស័ទទាំងឡាយ គឺ«ជាគ្រួសារដ៏ធំមួយ ដែលត្រូវជួយគ្នាទៅវិញទៅមក ណែនាំឲ្យយើងចេះអធិដ្ឋាន បន្តអប់រំជំនឿ និងបង្ហាញធម៌មេត្តាករុណារបស់ព្រះជាម្ចាស់ចំពោះមនុស្សឯទៀតៗ និងណែនាំឲ្យបងប្អូនមានសង្ឃឹម»។
នៅដំណាក់ទី២ លោកអភិបាលអូលីវីយ៉េ បានសង្កត់ធ្ងន់អំពីមាគ៌ាឆ្ពោះទៅកាន់សេចក្តីសង្ឃឹមក្នុងជិវិតជាគ្រីស្តបរិស័ទ ដោយលោកបានលើកយកគម្ពីរម៉ាថាយ ៥,៣-១០ ស្តីអំពីសុភមង្គលដ៏ពិតប្រាកដ។ លោកអភិបាលបានណែនាំឲ្យយុវជនទាំងអស់យកចិត្តទុកដាក់ទទួលស្វាគមន៍ព្រះយេស៊ូ តាមរយៈការអធិដ្ឋាន ទទួលអគ្គសញ្ញានានា ទទួលការអប់រំ និងនៅជាមួយគ្នា។
ក្នុងនោះលោកបានរំលឹកដែរថា ដោយសារសេចក្តីស្រឡាញ់ យើងអាចមើលឃើញផលផ្លែនៃជំនឿ ណែនាំឲ្យយើងចេះបង្ហាញធម៌មេត្តាករុណាដល់បងប្អូនឯទៀតៗ ដែលណែនាំឲ្យយើងអាចកសាងសេចក្តីសង្ឃឹម។ លោកបន្ថែមថា ក្នុងរដូវអប់រំពិសេសដែលខិតជិតមកដល់នេះ «ឲ្យយើងក្លាយជាមនុស្សថ្មី» ដោយធ្វើកិច្ចការផ្ទាល់ខ្លួនឱ្យអស់ពីសមត្ថភាព។
ដំណើរយុវជនពេញមួយថ្ងៃនេះ ទោះបីមានអ្នកខ្លះអស់កម្លាំង ឈឺជើង និងពិបាកធ្វើដំណើរក៏ដោយ តែវាបានផ្តល់អំណរសប្បាយនិងក្តីសង្ឃឹមដល់យុវជន។ នៅថ្ងៃបន្ទាប់ក្រុមយុវជនបានចែករំលែកបទពិសោធជាមួយគ្នាអំពីជំនឿ និងដំណើរការកម្មវិធី។ សឿន ស្រីធាង អាយុ២២ឆ្នាំ មកពីព្រះសហគមន៍ភ្នំពេញថ្មី បានចូលរួមក្នុងកម្មវិធីនេះជាលើកទី២។ នាងឲ្យដឹងថា សម្រាប់បីថ្ងៃនេះ ចំណាប់អារម្មណ៍របស់ខ្ញុំគឺ យុវជនមានសាមគ្គីគ្នាច្រើនក្នុងការអធិដ្ឋាន នៅស្ងៀមស្ងាត់ ពេលខ្លះយើងដើរហត់ យើងលេងសប្បាយខ្លះ ហើយពេលយើងអធិដ្ឋានជាមួយគ្នា យើងស្រុះគ្នាបានល្អ។
ស្រីធាង បន្ថែមថា ក្នុងជីវិតរបស់យើង យើងតែងគិតថា មានការងារធ្វើ មានលុយ មានសម្ភារ ទើបមានសេចក្តីសុខ ប៉ុន្តែតាមរយៈការអធិដ្ឋានទើបដឹងថា «ជីវិតរបស់យើងគឺជាសេចក្តីសុខនិងសេចក្តីស្រឡាញ់ចំពោះមនុស្សនៅជុំវិញខ្លួន ធ្វើឲ្យជីវិតរបស់យើងមានន័យ»។
ជុយ រស្មី អាយុ១៩ឆ្នាំ មកពីព្រះសហគមន៍តាខ្មៅ ឲ្យដឹងថា កម្មវិធីនេះ បានជួយគាត់ចេះត្រិះរិះពិចារណាអ្វីដែលគួរធ្វើក្នុងនាមជាយុវជន ចេះអធិដ្ឋានសម្រាប់មនុស្សដែលនៅជុំវិញខ្លួន។ សម្រាប់ការរស់នៅ ធ្វើឲ្យយើងចេះព្យាយាម ដោយសារតែការធ្វើដំណើរពីដំណាក់កាលមួយទៅមួយ សុទ្ធតែចំណាយពេលវេលានិងកម្លាំង ដើម្បីអាចទៅដល់គោលដៅ។
រស្មីបន្ថែមថា ការអប់រំរបស់លោកអភិបាលបានជួយដល់គាត់អំពីជីវិតរស់នៅប្រចាំថ្ងៃ ឲ្យគាត់ចេះ «ផ្តល់សេចក្តីស្រឡាញ់ទៅឲ្យមនុស្សដែលនៅជុំវិញខ្លួន ឲ្យចេះប្រាប់គាត់ឲ្យមានសេចក្តីព្យាយាម»។ យុវ័នរូបនេះបន្តថា ពេលណាយើងមានសេចក្តីព្យាយាម និងអំណត់ក្នុងខ្លួនយើងតែងតែទទួលបានជ័យជម្នះក្នុងជីវិតរបស់យើង។ យើងត្រូវតែជឿលើព្រះយេស៊ូដែលទ្រង់បានប្រោសលោះឲ្យយើង ផ្តល់អ្វីៗមកយើង ហើយយើងត្រូវចេះថែរក្សា។
បន្ទាប់ពីបូជនីយចរនេះបានបញ្ចប់ លោកអភិបាលអូលីវិយ៉េ បានប្រទានពរ និងអធិដ្ឋានសម្រាប់យុវជនទាំងអស់ឲ្យមានកម្លាំងដើម្បីអាចធ្វើជាសាក្សីនៃសេចក្តីសង្ឃឹម ដើម្បីឲ្យព្រះសហគមន៍បច្ចុប្បន្ននេះ អាចទៅជាព្រះសហគមន៍ដែលផ្តល់សក្ខីភាពអំពីព្រះហឫទ័យប្រណីសន្តោសរបស់ព្រះជាម្ចាស់យ៉ាងជាក់ស្តែងសម្រាប់បងប្អូនឯទៀតៗ និងជាពិសេសយកចិត្តទុកដាក់ យកព្រះយេស៊ូ ព្រះបន្ទូល និងព្រះសហគមន៍ជាទីពឹង ដើម្បីរស់នៅក្នុងសង្គមបច្ចុប្បន្ននេះ ជាគ្រីស្តបរិស័ទពិតៗ។ លោកបន្ថេមថា ឲ្យពួកគេ «ជាសាវ័កផង ជាអ្នកបម្រើផង ជាអ្នកស្រឡាញ់ ជាអ្នកលើកលែងទោសឲ្យ ជាអ្នកបង្កើតទំនាក់ទំនងជាមួយសង្គម ជាមួយសាសនាដទៃ ជាមួយបងប្អូនឯទៀតៗ ជាមួយបងប្អូនដែលយើងជួបជាប្រចាំ»។
សម្រាប់បូជនីចរនៅឆ្នាំក្រោយ លោកអភិបាលអូលីវីយ៉េ បានប្រកាសថា នឹងរៀបចំឡើងនៅព្រះសហគមន៍ប៉ៃលិនស្ថិតក្នុងប៉ែកពាយ័ព្យនៃប្រទេសក្នុងភូមិភាគបាត់ដំបង៕
ដោយកែវ កញ្ញា
