ក្រោយពីបានទទួលអគ្គសញ្ញាជ្រមុជទឹក ទទួលជីវិតថ្មីរួមជាមួយព្រះយេស៊ូក្នុងពេលបុណ្យចម្លងកន្លងទៅ បេក្ខជនចំនួន ១៥ រូប អគ្គសញ្ញាលាបថ្ងាសបន្តទៀត នៅព្រះវិហារសន្តសិលា និងសន្តប៉ូល ភ្នំពេញថ្មី ក្រោមអធិបតីភាពលោកអភិបាលអូលីវីយេ និងមានគ្រីស្តបរិស័ទចូលរួមយ៉ាងច្រើនកុះករ នាព្រឹកថ្ងៃទី ១៩ ខែឧសភា ឆ្នាំ២០១៩។
នៅក្នុងធម្មទេសនា លោកអភិបាលអូលីវីយេ បានដាស់តឿនបេក្ខជនទទួលអគ្គសញ្ញាលាបថ្ងាសឲ្យ ថែរក្សាមិត្តភាពជាមួយព្រះយេស៊ូ។ ថែរក្សាអំណរសប្បាយ និងយកចិត្តទុកដាក់ធ្វើជាសាក្សី នៃសេចក្តីស្រឡាញ់ និងអំណរសប្បាយ។ លោកបញ្ជាក់យ៉ាងនេះថា « សម្រាប់បងប្អូនដែលទទួលអគ្គសញ្ញាលាបថ្ងាស់ ត្រូវបន្តថែរក្សាមិត្តភាពជាមួយព្រះយេស៊ូជានិច្ច។ ថែរក្សាអំណរសប្បាយ និងសេចក្តីស្រលាញ់។ យកចិត្តទុកដាក់ ធ្វើជាសាក្សីអំពីអំណរសប្បាយ និងសេចក្តីស្រលាញ់ដល់បងប្អូនឯទៀតៗ។
ក្នុងពេលនោះលោកអភិបាលក៏បានរំលឹកដល់គ្រីស្តបរិស័ទទាំងអស់ ឲ្យអនុវត្តតាម ដោយឆ្លាក់ជាប់នៅក្នុងដួងចិត្តនូវ ធម្មវិន័យរបស់ព្រះយេស៊ូ “ត្រូវស្រឡាញ់គ្នាទៅវិញទៅមក ដូចខ្ញុំបានស្រឡាញ់អ្នករាល់គ្នាដែរ” ។
អគ្គសញ្ញាលាបថ្ងាសជាអគ្គសញ្ញាបញ្ជាក់បន្ថែមថា បងប្អូនដែលបានកើតជាថ្មីដោយទឹក និងព្រះវិញ្ញាណពេលទទួលអគ្គសញ្ញាជ្រមុជទឹក ពេលនេះពេញវ័យក្នុងជំនឿ ក្នុងពេលនេះ គឺគេទទួលព្រះវិញ្ញាណបន្ថែម ដើម្បីផ្តល់កម្លាំងក្នុងការចេញទៅប្រកាសដំណឹងល្អ និងរស់នៅជាសាវ័កព្រះយេស៊ូពេញលក្ខណៈ។
លោកអភិបាលអូលីវីយេ បានប្រាប់អ្នកយកព័ត៌មានក្នុងបទសម្ពាសន៍ថា «ថ្ងៃនេះយើងពោរពេញដោយអំណរសប្បាយ ដោយសារក្នុងព្រះសហគមន៍ភ្នំពេញថ្មីនេះ មានបេក្ខជន ១៦ នាក់បានទទួលអគ្គសញ្ញាលាបថ្ងាស មានន័យថាបានទទួលព្រះវិញ្ញាណដ៏វិសុទ្ធ ជាដង្ហើមរបស់ព្រះជាម្ចាស់ ជាសេចក្ដីស្រឡាញ់របស់ព្រះជាម្ចាស់ដ៏ពេញលក្ខណៈ និងបានបញ្ចូលជាមួយក្រុមគ្រូអប់រំជំនឿភូមិភាគភ្នំពេញជាង៥០នាក់ ដែលជារៀងរាល់អាទិត្យបានយកចិត្តទុកដាក់ក្នុងការបញ្ជូនបន្តជំនឿដោយដឹងថាជំនឿដែលយើងទទួលមកពីព្រះជាម្ចាស់ ជាអំណោយទានពិសេស។» លោកអភិបាលបានបញ្ជាក់ផងដែរ ថា «គ្រូអប់រំជំនឿត្រូវ ធ្វើយ៉ាងណាឲ្យគ្រីស្តបរិស័ទថ្មីៗ និងគ្រីស្តបរិស័ទចាស់ៗ អាចធ្វើដំណើររួមគ្នាជាគ្រួសារតែមួយគឺព្រះសហគមន៍។» លោកបន្ថែមថា« នេះជាតួនាទីរបស់គ្រូអប់រំជំនឿ ឪពុកម្ដាយធម៌ និងអស់លោកបូជាចារ្យដែលយកចិត្តទុកដាក់ណែនាំ រំឭក និងលើកទឹកចិត្ត ដោយធ្វើជាឪពុក ម្ដាយ បង និងមិត្តសម្លាញ់យ៉ាងជិតស្និទ្ធ ដូចលោកប៉ូល និងលោកបាណាបាស ដែលបានលើកទឹកចិត្តនិងធ្វើដំណើរជាមួយគ្រីស្តបរិស័ទនាសម័យមុនយ៉ាងជិតស្និទ្ធផងដែរ។ ធ្វើដូចនេះ ដើម្បីឲ្យយើងចេះបង្កើតបរិយាកាសជាក្រុមគ្រួសារ ចេះស្វាគមន៍ ដោយមានចិត្តអាណិតមេត្តា ទទួលខុសត្រូវ និងស្នាដៃនៅក្នុងសង្គមផងដែរ។»
បេក្ខនារី ច្រឹប មកពីខេត្តកំពង់ធំ បាននិយាយថា «ពេលស្វា មីបោះបង់ចោល ខ្ញុំបាក់ទឹកចិត្ត ប៉ុន្តែក្រោយពីបានស្គាល់បងស្រីមេត្តាករុណា និងព្រះសហគមន៍ បានធ្វើឲ្យខ្ញុំមានកម្លាំងចិត្ត ទោះបីមានឧបសគ្គក៏ខ្ញុំនៅខិតខំមកព្រោះមានតែព្រះយេស៊ូទេដែលជាទីពឹង និងបងស្រីបានធ្វើឲ្យខ្ញុំមានចិត្តតស៊ូចង់រស់នៅបន្តទៀតនិងលែងចង់ធ្វើបាបខ្លួនឯង។ បន្ទាប់ពីទទួលអគ្គសញ្ញានេះ ខ្ញុំមានបំណងចង់បម្រើព្រះសហគមន៍ ទោះបីខ្ញុំមិនចេះអក្សរក៏ដោយ ប្រសិនបើលោកឪពុក ឬបងស្រីឲ្យខ្ញុំធ្វើអ្វីក៏ខ្ញុំសុខដែរឲ្យតែបានផ្សព្វផ្សាយដំណឹងល្អរបស់ព្រះជាម្ចាស់ និងលើកទឹកចិត្តគេឲ្យមានសង្ឃឹមឡើងវិញដូចខ្ញុំអីចឹងដែរ។»
បេក្ខជន ប៊ុន រ៉ុង ដែលមានដើមកំណើតមកពីខេត្តបាត់ដំបង និងកំពុងស្នាក់នៅព្រះវិហារសន្តសិលា និងសន្តប៉ូល បាននិយាយថា អគ្គសញ្ញានេះហាក់បីដូចជាធ្វើឲ្យខ្ញុំផ្សាភ្ជាប់ជាមួយព្រះជាម្ចាស់ ដោយសារកាលពីមុននឹងស្គាល់ព្រះជាម្ចាស់ ខ្ញុំដូចជាព្រងើយកន្តើយនឹងអ្នកដទៃ មិនដែលជួយគេ ដោយមិនខ្វល់ពីមនុស្សដែលរងទុក្ខវេទនានៅជុំវិញខ្លួនខ្ញុំ។ ប៉ុន្តែក្រោយពីបានក្លាយជាគ្រីស្តបរិស័ទខ្ញុំបានផ្លាស់ប្ដូរនូវអកប្បកិរិយាទាំងនោះ។
តាមអត្ថបទព្រះគម្ពីរដំណឹងល្អ ក៏ដូចជាការអប់រំរបស់ព្រះសហគមន៍កាតូលិក ព្រះវិញ្ញាណដ៏វិសុទ្ធគឺជាព្រះអំណោយទានរបស់ព្រះជាម្ចាស់ និងជាព្រះដែលជួយការពារដល់អស់អ្នកជឿទាំងឡាយ ដោយ ព្រះវិញ្ញាណដ៏វិសុទ្ធជួយឲ្យមានប្រាជ្ញាញាណ ឲ្យស្គាល់សេចក្ដីពិត ចេះពិចារណាដឹងខុសដឹងត្រូវ ប្រាជ្ញាឈ្លាសវៃ មានចិត្តអង់អាច ស្គាល់ព្រះជាម្ចាស់ និងគោរពកោតខ្លាចព្រះជាម្ចាស់។
