យុវជនកាតូលិកជាង៥០រូបមកពីមណ្ឌលសកម្មភាពទាំង៦នៃព្រះសហគមន៍កាតូលិកភូមិភាគភ្នំពេញ បានចូលរួមសិក្ខាសាលាក្រោមប្រធានបទ “យុវជន និងភាពក្រីក្រ”នៅចុងសប្តាហ៍ មុននេះ ដែលដឹកនាំដោយការិយាល័យយុវជន ជំទង់ កុមារ និងគ្រួសារ នៅព្រះសវិហារសន្តសិលា ពោធិ៍ធំ មណ្ឌលសកម្មភាពភ្នំពេញខាងជើង ។
លោកស៊ាន់ សារឿន ប្រធានការិយាល័យយុវជន ជំទង់ កុមារ និងគ្រួសារ បានឲ្យដឹងថា សិក្ខាសាលានេះផ្ដោតទៅលើ “យុវជន និងភាពក្រីក្រ” ដែលបានបញ្ជ្រាបតាមរយៈ ការអប់រំ ទ្រព្យសម្បត្តិ និងសុខភាព។
លោកបញ្ជាក់ទៀតថា ប្រធានបទនេះសំខាន់ ព្រោះយុវជនត្រូវទទួលការអប់រំ ត្រូវមានចំណេះដឹងស្គាល់ពីស្ថានភាព ព្រះសហគមន៍ និងសង្គមដែលកំពុងតែរស់នៅ ក៏ដូចជាចំណេះដឹងផ្សេងៗដែលគេត្រូវតែមាន ព្រោះនេះជាការយល់ដឹងមួយជួយឲ្យគេមានលក្ខណៈគ្រប់គ្រាន់ក្នុងការអភិវឌ្ឍខ្លួនទៅថ្ងៃអនាគត។
លោកស៊ាន់ សារឿន បានបន្ថែមថា អង្គសិក្ខាសាលាក៏ណែនាំឲ្យសិក្ខាកាមយល់ពីការប្រើប្រាស់ទ្រព្យសម្បត្តិ ដោយឱ្យចេះប្រើដោយមានអត្ថប្រយោជន៍និងត្រឹមត្រូវ មិនប៉ះពាល់ដល់អ្នកដទៃ។
បានបានថ្លែងថា៖ «ខ្ញុំសង្ឃឹមថា តាមរយៈសិក្ខាសាលារយៈពេលពីរថ្ងៃមកនេះ អ្នកចូលរួមនឹងទទួលបានចំណេះដឹង និងបទពិសោធកាន់តែច្បាស់ថែមទៀតនូវអ្វីដែលគេគួរ និងមិនគួរធ្វើ និងអ្វីដែលជាអាទិភាពនៅក្នុងជីវិត។ ត្រូវចេះរៀបចំចិត្តគំនិត និងការរស់នៅសមស្របជាសាវ័ករបស់ព្រះយេស៊ូដែលជាគំរូនៅក្នុងការប្រកាសដំណឹងល្អ»។
លោកក៏បានផ្តាំផ្ញើឱ្យអ្នកចូលរួមចេះថែរក្សាសុខភាព ប្រុងប្រយ័ត្ន និងកុំភ័យខ្លាចជ្រុលពីមេរោគកូវីដ១៩ ដោយចេះជួយគ្នាទៅវិញទៅមកក្នុងគ្រាទុក្ខលំបាកដោយមានជំនឿរឹងមាំនិងការទទួលខុសត្រូវ។
កញ្ញា លី ទៀង ជាយុវជននៃព្រះវិហារសន្តសិលាពោធិ៍ធំ បានបញ្ជាក់ថា កញ្ញាពេញចិត្តចំពោះប្រធានបទនេះ ព្រោះការអប់រំមានសារៈសំខាន់នៅក្នុងការស់នៅដោយចេះអធ្យាស្រ័យយោគយល់គ្នាទៅវិញទៅមកដោយមានគុណធម៌ សច្ចធម៌នៅក្នុងខ្លួន។
លី ទៀងបន្ថែមថា សព្វថ្ងៃមនុស្សចូលចិត្តអួតបង្ហាញរឿងសម្ភារៈនិយម ប៉ុន្តែមិនបានគិតថាវាអាចធ្វើឲ្យមនុស្សផ្សេងទៀតមានចិត្តច្រណែន និងមានសកម្មភាពអវិជ្ជមាននៅក្នុងសង្គម។
ជារៀងរាល់ឆ្នាំ ការិយាល័យយុវជន ជំទង់ កុមារ និងគ្រួសារ តែងតែរៀបចំសិក្ខាសាលា ដើម្បីជួយដល់យុវជន យុវនារីនៅក្នុងការរិះគិតទាំងជីវិតនៅក្នុងព្រះសហគមន៍ និងសង្គមនៅតាមព្រះសហគមន៍នានាក្នុងភូមិភាគភ្នំពេញ។ ដោយឡែកឆ្នាំនេះការិយាល័យត្រូវបានបែងចែកអង្គសិក្ខាសាលាជាពីរផ្នែក គឺយុវជន យុវនារី ដែលមកឈ្វេងយល់រយៈពេលពីរថ្ងៃខាងលើទាំងនេះមកពី មណ្ឌលសកម្មភាពភ្នំពេញខាងជើង ភ្នំពេញខាងត្បូង ភ្នំពេញថ្មី បាសាក់ មេគង្គ និងតាខ្មៅ និងមួយក្រុមទៀតគឺយុវជននៃមណ្ឌលសកម្មភាពតាកែវ កំពត និងព្រះសីហនុនឹងធ្វើរួមគ្នានាពេលឆាប់ៗខាងមុខនេះ។
