ព្រះវិហារសន្ត អូគូស្តាំង ព្រះសហគមន៍កាតូលិក ទីរួមខេត្តកំពត បានប្រារព្ធ ពិធីអធិដ្ឋាន សម្រាប់មរណបុគ្គលទាំងឡាយ និងការចែកទានជាគ្រឿងបរិភាគជូនដល់បងប្អូនខ្វះខាតចំនួន១៨គ្រួសារ នៅរសៀលថ្ងៃទី១៣ ខែកញ្ញា ឆ្នាំ២០២០នេះ។
ប្រជាពលរដ្ឋខែ្មរដែលកាន់ព្រះពុទ្ធសាសនា កំពុងប្រារព្ធពិធីកាន់បិណ្ឌ ហើយនឹងប្រារព្ធបុណ្យភ្ជំបិណ្ឌនាពេលខាងមុខឆាប់ៗនេះ។ ព្រះសហគមន៍កាតូលិកនៅប្រទេសកម្ពុជា មានជំនឿយ៉ាងមាំលើព្រះគ្រីស្តយេស៊ូ ក៏បានប្រារព្ធពិធីនឹករលឹកដល់មរណបុគ្គលក្នុងរដូវដាក់បិណ្ឌនេះ ដើម្បីនឹករលឹកដល់វិញ្ញាណក្ខន្ធជីដូនជីតា បុព្វការីជនដែលបានចែកស្ថានទៅហើយ។ បងប្អូនគ្រីស្តបរិស័ទកាតូលិក អធិដ្ឋាន ថ្វាយទៅព្រះជាម្ចាស់ សូមសេចក្តីប្រោសប្រណីពីព្រះជាម្ចាស់ ជាព្រះបិតា ចំពោះវិញ្ញាណ្ឌក្ខន្ធ ញាតិមិត្តទាំងឡាយដែលចែកស្ថានទៅ សូមព្រះអង្គទទួលអ្នកទាំងនោះនៅស្ថានបរមសុខរួមជាមួយព្រះអង្គ។ ក្នុងពិធីនោះគ្រីស្តបរិស័ទប្រកាសជំនឿ និងសេចក្តីសង្ឃឹមរបស់ខ្លួនលើព្រះគ្រីស្ត។
ក្នុងធម្មទេសនា លោកបូជាចារ្យ ទទួលខុសត្រូវព្រះសហគមន៍កាតូលិកតំបន់កំពត យ៉ាំងលូកា តាវូឡា បានលើកឡើងថា ក្នុងឱកាសនេះយើងសប្បាយចិត្តដោយដឹងថា ព្រះជាម្ចាស់ស្តាប់ពាក្យទូលអង្វររបស់យើង។ ព្រះអង្គមានព្រះហឫទ័យមេត្តាករុណា យើងជឿសង្ឃឹមថា ព្រះអង្គនឹងប្រទានសេចក្តីសុខសាន្ត ព្រមទាំងទទួលវិញ្ញាណ្ឌក្ខន្ឌ ជីដូនជីតា ឪពុកម្តាយអ្នកមានគុណទាំងឡាយរបស់យើងនៅស្ថានបរមសុខដែរ។
លោកបន្តថា យើងក៏អរគុណព្រះជាម្ចាស់ចំពោះអ្វីៗដែលល្អដែលអ្នកទាំងនោះបានប្រព្រិត្តរួមជាមួយយើង សុទ្ធតែប្រកបដោយសេចក្តីស្រឡាញ់ ដែលមានក្នុងជំរៅដួងចិត្តរបស់យើង និងមិនអាចបំភ្លេចបានផងដែរ។ យើងអរព្រះគុណព្រះជាម្ចាស់សម្រាប់ជីវិតរបស់ពួកគាត់។
ប៉ុន្តែលោកបូជាចារ្យក៏បានបញ្ជាក់ប្រាប់បងប្អូន និងរំលឹកបងប្អូនគ្រីស្តបរិស័ទថា ទោះបីយើងបានឃើញសេចក្តីល្អជាច្រើន ដោយសេចក្តីស្រឡាញ់ យើងគិតថាគាត់ទៅនៅស្ថានបរមសុខហើយ។ តែមនុស្សយើងមានភាពទន់ខ្សោយ យើងត្រូវការពឹងផ្អែកលើព្រះហឫទ័យមេត្តាករុណាស្រឡាញ់របស់ព្រះយេស៊ូ ចំពោះយើងម្នាក់ៗ។ ក្នុងរដូវកាលបុណ្យភ្ជំបិណ្ឌរលឹកថ្ងៃណាមួយយើងនឹងស្លាប់ដែរ ចឹងយើង ត្រូវត្រៀមខក្នុងជីវិតរបស់យើងដើម្បីជួបជាមួយព្រះជាម្ចាស់។ ព្យាយាមលះបង់អ្វីដែលនាំឲ្យយើងប្រព្រិត្តអំពើបាប និងរស់នៅប្រកបដោយសេចក្តីស្រឡាញ់។ រស់នៅដោយចេះលើកលែងទោស។ រស់នៅដោយមានគំនិតល្អចំពោះបងប្អូនឯទៀតៗ។រស់នៅដោយចិត្តសប្បុរស។ ព្រោះចុងក្រោយព្រះបន្ទូលជួយបំភ្លឺយើងថា ព្រះជាម្ចាស់នឹងវិនិច្ឆ័យយើងតាមអ្វីដែលយើងប្រព្រិតចំពោះបងប្អូនឯទៀត។
ក្នុងអភិបូជានេះគ្រួសារ គ្រីស្តបរិស័ទនីមួយៗបឆនសរសេរឈ្នោះញាតិមិត្តទាំងអស់ ថ្វាយទៅព្រះតាមរយៈផ្សែងធុបដែលបានអុជរួមនឹងពាក្យសម្រាប់បុព្វការីជនទាំងអស់។
តាមការក្រោងទុកបន្ទាប់ពីអធិដ្ឋានអរព្រះគុណព្រះជាម្ចាស់ គណៈកម្មការព្រះសហគមន៍និងលោកបូជាចារបានចែកគ្រឿងបរិភោគចូនបងប្អូនខ្វះខាត ស្ត្រីមេយាយ អ្នកជំងឺ ចាស់ជរា និងអ្នកទីទាល់ក្រចំនួខ១៨គ្រួសារ។
កិច្ចការសប្បុរសធម៌ ជាសកម្មភាពដែលមិនអាចខ្វះបានរបស់គ្រីស្តបរិស័ទកាតូលិក ដែលបានរួមដំណើរជាមួយព្រះយេស៊ូ។ ចំពោះបុណ្យនឹករំលឹកដល់មរណបុគ្គលនិង សន្តបុគ្គលទាំងឡាយ ព្រះសហគមណ៍កាតូលិកសកលប្រារព្ធនៅថ្ងៃទី១-២ ដើមខែវិច្ឆការៀងរាល់ឆ្នាំ។ នៅប្រទេសកម្ពុជាបានទទួលការអនុញ្ញាត ឲ្យបុណ្យនឹករំលឹកដល់មរណបុគ្គលទាំងឡាយ ក្នុងថ្ងៃដែលពលរដ្ឋកម្ពុជាប្រារព្ធបុណ្យភ្ជំបិណ្ឌ៕
