នាថ្ងៃទី២៤ ខែមករា ឆ្នាំ២០២១ នៅព្រះសហគមន៍ព្រះត្រៃឯកគិរីវង់ ក្នុងមណ្ឌលសកម្មភាពតាកែវ ភូមិភាគភ្នំពេញ យុវជននិងយុវតីចំនួន២១រូប បានសុំចូលព្រះសហគមន៍ ជាជំហានដំបូងមុននឹងក្លាយជាគ្រីស្តបរិស័ទ។
ពិធីនេះមានការអញ្ជើញចូលរួមពីតំណាងគ្រីស្តបរិស័ទក្នុងមណ្ឌលសកម្មភាពតាកែវ បងប្រុសបងស្រី និងបងប្អូនគ្រីស្តបរិស័ទជាច្រើននាក់ ដោយមានលោកអភិបាល អូលីវីយ៉េ ជាអធិបតី។
នៅក្នុងកម្មវិធីនោះផងដែរ លោកអភិបាល អូលីវីយ៉េ អភិបាលព្រះសហគមន៍កាតូលិកភូមិភាគភ្នំពេញ បានលើកឡើងថា ថ្ងៃនេះជាថ្ងៃពិសេសសម្រាប់ព្រះសហគមន៍គិរីវង់ ដែលបានអញ្ជើញគ្រប់ព្រះសហគមន៍នៅក្នុងមណ្ឌលសកម្មភាពតាកែវ ដើម្បីចូលរួមអធិដ្ឋានអបអរសាទរយុវជនយុវនារី២១នាក់ ដែលយើងបានស្វាគមន៍ជាផ្លូវការនិងយ៉ាងឱឡារិកនៅក្នុងព្រះសហគមន៍យើង។
លោកអភិបាលបានមានប្រសាសន៍ថា ៖ «តាមពិតប្អូនៗមួយចំនួនជាកូនកាយរឹទ្ធិរបស់យើងយូរឆ្នាំមកហើយ ដូច្នេះដល់ពេលវេលាធ្វើពិធីមួយដើម្បីស្វាគមន៍ពួកគាត់»។
លោកថា ជំហានទីមួយ ជាទូទៅសម្រាប់យុវជន ចាំរហូតដល់គាត់មានអាយុ១៨ ឬ១៩ឆ្នាំ ប៉ុន្តែសម្រាប់កូនក្មេងបើចាំយូរពេកគេក៏ចង់មានសញ្ញាមួយដែរ។ថ្ងៃនេះពួកគេបានទទួលព្រះពរពីព្រះជាម្ចាស់ ថ្ងៃនេះគេបានទទួលមេដៃសន្តីតេរេសា ថ្ងៃនេះគេបានទទួលគម្ពីរដំណឹងល្អដើម្បីទៅជាព្រះបន្ទូលចិញ្ចឹមជីវិតរបស់គេចាប់ពីពេលនេះតទៅ។
លោកបូជាចារ្យ ហ្វេសរ៉ាណាន់ដូ ដែលជាបូជាចារ្យទទួលខុសត្រូវព្រះសហគមន៍ក្នុងមណ្ឌលសកម្មភាពតាកែវ ក៏បានថ្លែងផងដែរ ថាសម្រាប់ប្អូនៗដែលបានសុំចូលព្រះសហគមន៍ថ្ងៃនេះ ពួកគាត់ខ្លះបានទទួលការអប់រំជំនឿអស់រយៈពេលពីរឆ្នាំ ខ្លះទៀត៣ឆ្នាំហើយ។
លោកបូជាចារបានមានប្រសាសន៍ថា ៖ «ដូច្នេះ ព្រះសហគមន៍ក៏បានសម្រេចចិត្តឲ្យបេក្ខជនទាំងនោះចូលនៅក្នុងព្រះសហគមន៍ជាផ្លូវការ ដើម្បីបញ្ជាក់ថា គាត់ចូលកាន់តែជិតស្និទ្ធរួមជាមួយគ្រីស្តបរិស័ទនៅក្នុងព្រះសហគមន៍ និងបញ្ជាក់ថា ចាប់ពីពេលនេះតទៅបងប្អូនចាប់ផ្តើមមើលឃើញផ្លូវនិងមាគ៌ារបស់ព្រះជាម្ចាស់កាន់តែច្បាស់ឡើង»។
លោកបន្តទៀតថា ពួកគាត់កំពុងតែតម្រែតម្រង់ចិត្តគំនិតឆ្ពោះទៅព្រះជាម្ចាស់ ដើម្បីក្លាយទៅជាគ្រីស្តបរិស័ទនៅពេលខាងមុខ។
លោកបូជាចារ្យ ហ្វេសរ៉ាណាន់ដូ ក៏បានថ្លែងអំណរគុណដល់បងប្អូនទាំងអស់ជាកុមារាកុមារី ជាយុវជនយុវនារី ក៏ដូចជាបងប្អូនមួយចំនួនកំពុងតែស្តាប់ព្រះបន្ទូល ស្តាប់ព្រះសូរសឿងរបស់ព្រះជាម្ចាស់ ឆ្លើយតបនឹងការត្រាស់ហៅរបស់ព្រះអង្គ និងកំពុងតែបង្ហាញសេចក្តីស្រឡាញ់ចំ ពោះព្រះជាម្ចាស់កាន់តែច្បាស់ ដោយវត្តមានរបស់គាត់នៅក្នុងព្រះសហគមន៍របស់ព្រះអង្គផងដែរ។
យុវនារី ម៉ៅ មករា ជាបេក្ខជនដែលបានសុំចូលព្រះសហគមន៍បានថ្លែងថា គាត់បានទទួលការអប់រំជំនឿអស់រយៈពេល៥ឆ្នាំ ដោយសារចង់ស្គាល់ព្រះជាម្ចាស់ និងចង់ដើរតាមព្រះជាម្ចាស់។ កញ្ញា មករា បន្តថា ពេលខ្លះមានគេរិះគន់កាលដែលនាងចូលនៅក្នុងព្រះសហគមន៍ដែរ ព្រោះគាត់កើតចេញពីគ្រួសារកាន់ព្រះពុទ្ធសាសនា ប៉ុន្តែទោះជាយ៉ាងណាក៏ដោយ ដោយសារជំនឿរបស់នាង យុវតីរូបនេះមិនគិតអំពីពាក្យសំដីទាំងនោះឡើយ ហើយគាត់តែងតែមកព្រះវិហារជារៀងរាល់សប្តាហ៍។
យុវតីរូបនេះបន្តទៀតថា លោកឪពុកបានអប់រំគាត់ឲ្យស្គាល់ព្រះជាម្ចាស់ ឲ្យចេះដើរតាមព្រះជាម្ចាស់ ចេះស្តាប់ព្រះបន្ទូល និងខិតខំព្យាយាមមកទទួលការអប់រំជំនឿ។ កញ្ញា មករាក៏សូមអរគុណលោកបូជាចារ្យដែលបានអប់រំជំនឿពួកគាត់កន្លងមក ដែលធ្វើឲ្យពួកគាត់បានយល់ពីព្រះជាម្ចាស់កាន់តែច្បាស់ជាងមុន។
ស្រដៀងគ្នាដែរយុវជន ស៊ាប សាវេត ថ្លែងថា រយៈពេល១ឆ្នាំដែលគាត់បានទទួលការអប់រំជំនឿនៅក្នុងព្រះសហគមន៍ ធ្វើឲ្យគាត់ចង់ដើរតាមព្រះជាម្ចាស់ ត្បិតតែយុវជនរូបនេះមកពីគ្រួសារពុទ្ធបរិស័ទ ប៉ុន្តែឪពុកម្តាយគាត់ពុំបានបដិសេធក្នុងជម្រើសនៃជំនឿរបស់គាត់ទេ។
យុវជនសាវេតបានប្រាប់ថា ៖ «ខ្ញុំពិតជាមានអំណរសប្បាយណាស់ដែលបានដើរតាមព្រះយេស៊ូគ្រីស្ត ព្រោះបានធ្វើឲ្យខ្ញុំចេះអធិដ្ឋាន ចេះថ្វាយបង្គំទៅព្រះជាម្ចាស់»។
យុវជនរូបនេះបន្ថែមថា ត្បិតតែពេលនេះគាត់មិនទាន់ក្លាយជាគ្រីស្តបរិស័ទ ប៉ុន្តែនៅពេលគាត់ទៅបន្តការសិក្សានៅភ្នំពេញឬនៅកន្លែងណាផ្សេង គាត់នឹងបន្តទទួលការអប់រំជំនឿនៅព្រះសហគមន៍ដែលនៅក្បែរ រហូតក្លាយជាគ្រីស្តបរិស័ទពេញលក្ខណៈ៕
