អភិបាលព្រះសហគមន៍កាតូលិកភូមិភាគភ្នំពេញ លោកអភិបាល អូលីវីយ៉េ បានអញ្ជើញជាអធិបតីក្នុងកម្មវិធីសម្ពោធជើងជួងនិងជួងថ្មី នៅព្រះសហគមន៍ព្រះត្រៃឯកគិរីវង់ ក្នុងមណ្ឌលសកម្មភាពតាកែវ ភូមិភាគភ្នំពេញ នៅព្រឹកថ្ងៃទី២៤ ខែមករា ឆ្នាំ២០២១។
លោកអភិបាល អូលីវីយ៉េ បានថ្លែងទៅកាន់តំណាងគ្រីស្តបរិស័ទ និងអ្នកចូលរួមទាំងអស់នាពេលនោះថា ថ្ងៃនេះយើងសូមព្រះជាម្ចាស់ប្រទានព្រះពរលើជួងថ្មីនេះ។ នេះជាឱកាសមួយដើម្បីនឹកឃើញវត្តមានរបស់ព្រះជាម្ចាស់នៅក្នុងភូមិរបស់យើង មិនមែនជាវត្តមានស្ងាត់ៗ ប៉ុន្តែតាមរយៈសំលេងជួងយើងដឹងថាព្រះជាម្ចាស់កំពុងត្រាស់ហៅយើង។
លោកបានមានប្រសាសន៍ថា ៖ «យើងដឹងថាព្រះជាម្ចាស់ណែនាំឲ្យយើងភ្ញាក់ស្មារតីដឹងថាម៉ោងនេះជាម៉ោងអធិដ្ឋាន ម៉ោងនេះជាម៉ោងអរព្រះគុណព្រះជាម្ចាស់ ម៉ោងនេះជាម៉ោងជួបជុំគ្នា ម៉ោងនេះជាម៉ោងអធិដ្ឋានម្នាក់ឯង…»។
លោកអភិបាលបន្តថា ថ្ងៃនេះ លោកសូមអរព្រះគុណព្រះជាម្ចាស់សម្រាប់ព្រះសហគមន៍ដ៏តូចរបស់យើង ដែលបានកើតឡើងនៅឆ្នាំ២០០៣រហូតមកដល់ឆ្នាំ២០២១នេះ យើងបានចាប់ផ្តើមពិធីជ្រមុជទឹកពីឆ្នាំ២០០៦ ឆ្នាំ២០០៧បានសាងសង់សាលាមត្តេយ្យ។ ឆ្នាំ២០០៨-២០០៩ យើងបានសាងសង់ព្រះវិហារ និងឥឡូវនេះព្រះសហគមន៍បានចាក់គ្រឹះនៅក្នុងទេសភាពនៃភូមិព្រៃជើងស្រុកគិរីវង់នេះ ។
លោកអភិបាល អូលីវីយ៉េ លើកឡើងថា ៖ «សូមព្រះជាម្ចាស់ប្រទានព្រះពរដល់បងប្អូនទាំងអស់ សូមឲ្យឆ្នាំ២០២១នេះ យើងពោរពេញដោយសេចក្តីសុខ និងជាពិសេសឲ្យយើងការពារសុខភាពដើម្បីឈ្នះជំងឺកូវីដ-១៩រួមជាមួយគ្នា»។
បូជាចារ្យទទួលខុសត្រូវព្រះសហគមន៍ក្នុងមណ្ឌលសកម្មភាពតាកែវ លោកហ្វេសរ៉ាណាន់ដូ ក៏បានលើកឡើងនាពេលនោះដែរថា ជួងនេះមានឈ្មោះថា ព្រះត្រៃឯក ដូចឈ្មោះព្រះសហគមន៍ដែរ។
លោកថា៖ «តាមពិត សារៈសំខាន់នៃការកសាងជួងនេះ គឺជាវប្បធម៌របស់ព្រះសហគមន៍ទូទាំងសកលលោក ដើម្បីរំលឹកបងប្អូនឲ្យចូលក្នុងព្រះសហគមន៍ ឲ្យចូលនៅក្នុងព្រះវិហារ ដើម្បីអធិដ្ឋាន និងនឹកឃើញព្រះវត្តមានរបស់ព្រះជាម្ចាស់នៅក្នុងដំណើរជីវិតរបស់គាត់ផងដែរ»។
លោកបូជាចារ្យបានបន្តថា ក្នុងការសាងសង់ជើងជួងនិងជួងនេះ ព្រះសហគមន៍បានទទួលជំនួយពីសប្បុរសជនមកពីប្រទេសវៀតណាម តាមរយៈលោកបូជាចារ្យទីន នៅព្រះសហគមន៍ជ្រៃធំ និងគ្រួសារអ្នកស្រីសុខឡែន ដែលជាគ្រីស្តបរិស័ទមកព្រះសហគមន៍ទួលតាំង។
លោក ហ្វេសរ៉ាណាន់ដូ បានមានប្រសាសន៍ថា ៖ «បន្ទាប់ពីមានជួងនៅក្នុងព្រះសហគមន៍យើង ខ្ញុំសង្ឃឹមថា យើងនឹងជួបជុំគ្នា ជាព្រះសហគមន៍ជាធ្លុងតែមួយ ហើយយើងទទួលស្គាល់ថាគ្រប់ពេលដែលយើងលឺសូរសំលេងជួងនេះ គឺដូចជាព្រះសូរសៀងរបស់ព្រះជាម្ចាស់ដែលកំពុងតែលើកទឹកចិត្ត និងជម្រុញឲ្យបងប្អូនមានជំនឿកាន់តែរឹងមាំ ដោយដឹងថាពិតប្រាកដមែនព្រះជាម្ចាស់គង់នៅជាមួយបងប្អូនជាប្រចាំ»។
លោកបានបន្ថែមទៀតថា លោកសូមអរព្រះគុណព្រះជាម្ចាស់ សម្រាប់ឧបករណ៍ និងមធ្យោបាយទាំងប៉ុន្មានដែលកំពុងតែប្រើប្រាស់ ឬកំពុងមាននៅក្នុងព្រះសហគមន៍ ដើម្បីបន្តបង្ហាញទាំងព្រះវត្តមានរបស់ព្រះជាម្ចាស់ ព្រមទាំងព្រះបន្ទូលរបស់ព្រះជាម្ចាស់ចំពោះបងប្អូនឯទៀតៗផងដែរ។
លោក អ៊ូ ចយ ប្រធានព្រះសហគមន៍ព្រះត្រៃឯកគិរីវង់ បានឱ្យដឹងដែរថា ចំពោះការកសាងជើងជួងក៏ដូចជាការវាយជួយ អាជ្ញាធរមូលដ្ឋាននៅទីនេះក៏បានយល់ព្រម និងមានអំណរសប្បាយជាមួយព្រះសហគមន៍ដែរ។
លោកមានប្រាប់ថា ៖ «សម្រាប់ខ្ញុំជាគ្រីស្តបរិស័ទ ជួងមានន័យសំខាន់ណាស់ចំពោះគ្រីស្តបរិស័ទយើង ព្រោះថា ជួងជាសញ្ញាណែនាំឲ្យយើងដឹងពេលវេលា ដូចជាព្រះជាម្ចាស់បានផ្តល់ដំណឹងដល់យើង ឲ្យធ្វើដំណើរមកព្រះវិហារ ដើម្បីចូលរួមអភិបូជាឬអធិដ្ឋាន»។
ប្រធានព្រះសហគមន៍រូបនេះបានបន្តទៀតថា លោកពិតជាសប្បាយ ដែលព្រះសហគមន៍ព្រះត្រៃឯកគិរីវង់មានអ្វីៗទាំងអស់នៅទីនេះ ដែលពីដើមមក លោកមិនដែលគិតថាអាចមានដូចពេលនេះទេ នេះដោយសារតែមានលោកអភិបាល អូលីវីយ៉េ ដែលតែងតែជួយគាំទ្រ និងបង្កើតអ្វីៗទាំងអស់នៅទីនេះ។
គួរបញ្ជាក់ផងដែរថា សព្វថ្ងៃព្រះសហគមន៍ព្រះត្រៃឯកគិរីវង់មានសមិទ្ធិផលសំខាន់ៗជាច្រើនដូចជា ព្រះវិហារដែលជាព្រះដំណាក់របស់ព្រះជាម្ចាស់ ចេតិយសម្រាប់តម្កល់ធាតុគ្រីស្តបរិស័ទ ភ្នំព្រះនាងម៉ារីសម្រាប់អធិដ្ឋាន សាលាមត្តេយ្យសម្រាប់បង្រៀនក្មេងៗ ផ្ទះសំណាក់សម្រាប់ទទួលភ្ញៀវ និងពេលនេះមានជួងដែលជាព្រះសូរសៀងនៃការត្រាស់ហៅរបស់ព្រះជាម្ចាស់ដល់បងប្អូនទាំងឡាយ៕
