ព្រះសហគមន៍កាតូលិកភូមិភាគភ្នំពេញបានប្រារព្ធពិធីអធិដ្ឋាន២៤ម៉ោងសម្រាប់ព្រះជាម្ចាស់ ដោយបែងចែកទៅតាមកាលវិភាគនៃតំបន់និងតាមក្រុមផ្សេងៗ ដើម្បីទូលអង្វរព្រះជាម្ចាស់នៅក្នុងរដូវអប់រំពិសេស ស្របតាមការស្នើសុំរបស់សម្ដេចប៉ាបហ្វ្រង់ស៊ីស្កូ។
កម្មវិធីនេះដឹកនាំដោយលោកអភិបាលភូមិភាគភ្នំពេញ អូលីវីយ៉េ ជ្មីតអ៊ីស្ល៊ែរ ដែលបានធ្វើឡើងកាលពីថ្ងៃទី២០ មីនា ២០២១ ដល់ថ្ងៃទី២១ មីនា ២០២១កន្លងមកនេះ។
នៅក្នុងធម្មទេសនារបស់លោកអភិបាល អូលីវីយ៉េ ក្នុងអភិបូជាបើក២៤ម៉ោងសម្រាប់ព្រះជាម្ចាស់ ពីព្រះសហគមន៍កាតូលិកសន្តីម៉ារីញញឹម ចំការទៀង លោកបានធ្វើការរំឭកគ្រីស្តបរិស័ទឱ្យនឹកឃើញថាព្រះយេស៊ូជានរណា? លោកក៏បានណែនាំឱ្យគ្រីស្តបរិស័ទរិះគិតបន្ថែមទៀតថា នៅក្នុង២៤ម៉ោងសម្រាប់ព្រះជាម្ចាស់ តើយើងអាចទទួលស្គាល់ព្រះយេស៊ូជានរណា?
លោកអភិបាលបានបញ្ជាក់ថា៖ «នៅពេលយើងគិតពិចារណា អំពីស្ថានភាពកូវីដ-១៩នៅក្នុងពិភពលោក យើងនាំឱ្យភ័យខ្លាច និងរស់នៅក្នុងភាពសង្ស័យ។ ដូច្នេះ ២៤ម៉ោងដើម្បីអធិដ្ឋានសម្រាប់ព្រះជាម្ចាស់នៅក្នុងភូមិភាគយើងគឺសម្រាប់ពិភពលោក ដែលកំពុងរងទុក្ខលំបាក»។
លោកបានបន្តទៀតថា ការអធិដ្ឋានសម្រាប់ប្រទេសកម្ពុជាដែលកំពុងភ័យខ្លាចជំងឺកូវីដ-១៩ ដែលកំពុងតែរីករាលដាលនៅតាមខេត្តនានាក្នុងប្រទេសនេះ។ លោកអភិបាល អូលីវីយ៉េ បានមានប្រសាសន័ថា ៖ «យើងអធិដ្ឋានសម្រាប់ប្រទេសយើង ដែលមានមនុស្សកំពុងភ័យ មានអ្នកបាត់បង់ការងារ បាត់បង់ទ្រព្យសម្បត្តិសម្រាប់ចិញ្ចឹមជីវិតផ្ទាល់ ឬដើម្បីព្យាបាលជំងឺនានា»។
លោកថា ការអធិដ្ឋាននេះក៏សម្រាប់ប្រទេសភូមា សម្រាប់ព្រះសហគមន៍ នៅជុំវិញពិភពលោក ជាពិសេសរួមជាមួយសម្ដេចប៉ាប ហ្វ្រង់ស៊ីស្កូ ដើម្បីអធិដ្ឋានសម្រាប់ព្រះសហគមន៍ នៅក្នុងភូមិភាគភ្នំពេញ។
លោកអភិបាល អូលីវីយ៉េ លើកឡើងថា ៖ «ខ្ញុំអធិដ្ឋាន ដើម្បីឱ្យធម៌មេត្តាករុណារបស់យើង និងសេចក្តីស្រឡាញ់របស់យើង សម្រាប់បងប្អូនដែលកំពុងរងទុក្ខលំបាកនាពេលបច្ចុប្បន្ននេះ»។
លោកអភិបាលក៏បានស្នើឱ្យគ្រីស្តបរិស័ទបង្កើតសង្គមថ្មីដែលចាប់អារម្មណ៍លើទំនាក់ទំនងផ្ទាល់ ចេះជួយអ្នកដទៃដោយចេះសាមគ្គីភាព និងបង្កើតភាតរភាព ដើម្បីរស់នៅក្នុងសេចក្ដីថ្លៃថ្នូរ និងចេះស្វាគមន៍អ្នកតូចតាចឱ្យមានសេចក្ដីសង្ឃឹម ចេះអប់រំកូនចៅឱ្យចេះស្រឡាញ់បរិស្ថាន។
លោក អ៊ុន ប៊ុនលី និស្សិតទេវវិទ្យាល័យ បានឱ្យដឹងថា ការអធិដ្ឋានបានភ្ជាប់នឹងជីវិតជាអ្នកឈ្វេងយល់ពីការត្រាស់ហៅ។ ប្រសិនបើមិនមានការអធិដ្ឋាន នោះមិនអាចជួបជាមួយព្រះជាម្ចាស់បានទេ ហើយមិនត្រឹមតែ២៤ម៉ោងនេះប៉ុន្តែអស់មួយជីវិតដើម្បីបង្កើតទំនាក់ទំនងជាមួយព្រះជាម្ចាស់កាន់តែជ្រៅឡើងៗ។
លោកបានប្រាប់ថា ៖ «ការអធិដ្ឋាន២៤ម៉ោងនេះ ពិតជាមានប្រយោជន៍សម្រាប់សង្គម ដោយរំពឹងថាអាចជះឥទ្ធិពលតាមរយៈព្រះពររបស់ព្រះជាម្ចាស់មកលើលមនុស្សទាំងអស់នៅក្នុងសង្គម»។
លោក អ៊ុន ប៊ុនលីបានបន្ថែមថា សង្គមសព្វថ្ងៃប្រឈមនឹងកូវីដ រឹតតតែត្រូវការអធិដ្ឋាន ដោយត្រូវការព្រះពរព្រះជាម្ចាស់ដើម្បីព្យាបាលទុក្ខលំបាកដែលលោកនិងមនុស្សដទៃទៀតជួបសព្វថ្ងៃនេះ និងសុំឱ្យលើកលែងទោសឱ្យគ្រប់ៗគ្នាផងដែរ។៕
